གཟིམས་པ་མེད་པའི་མཆོད་མེ། དབྱངས་གསལ་སོ་བཞིའི་མཛེས་སྡུག  RSSསྔོན་མངག

༄༅། །ཁ་ཆེ་ཕ་ལུའི་འཇིག་རྟེན་ལས་འབྲས་རྩི་ལུགས་ཀྱི་བསླབ་བྱ་བཞུགས་སོ། །༼༥༽

2011-12-16 15:08:00 རྩོམ་པ་པོ་མི་གསལ། ཀློག་གྲངས། མཆན ཡོད།

                              བསླབ་བྱ་ལེའུ་བཅུ་པ།
   དེ་ནས་གསོན་དང་ཨ་མའི་སྙིང་ཉེ་ཚོ། །བྱམས་དང་བརྩེ་བ་ཅན་གྱི་དྲིན་ཆེན་མ། །ཕྲུ་གུ་ཆུང་དུས་ཨ་མའི་མགོ་རུ་སྡོད། །ལང་ལ་གཏོང་རང་གཏོང་ན་ཨ་མས་གཏོང་། །ཁ་ལ་མི་སྟེར་དགུ་སྟེར་ཨ་མས་སྟེར། །ལུས་ལ་མི་གཡོག་དགུ་གཡོག་ཨ་མས་གཡོགས། །ཆུང་དུས་ཨ་མས་ལང་ལ་བཏང་བའི་བུ། །ལང་ཤོར་ཐ་མ་ཨ་མས་དགའ་མི་ཁུག །དེ་འདྲས་མི་གསོད་བྱས་ནས་ཕུང་བ་མང་། །དེ་འདྲས་རྟ་འཁྱེར་བྱས་ནས་བྲོས་པ་མང་། །ཨ་མས་སྡུག་སྙིང་མནན་ནས་མ་བསྡད་ན། །ཨ་མས་ཕྲུ་གུ་རླུང་ལ་བསྐུར་ཡོང་ངོ་། །རྐུན་མ་རྐུ་དུས་ཐུག་ཐུག་རྡུང་བ་དགའ། །ཧམ་གྱི་ཡོད་ན་གླེག་གླེག་སྟེར་བ་དགའ། །སྒོ་ང་རྐུ་དུས་ཁྲིག་ཁྲིག་མ་བཟོས་ན། །བྱ་མོ་འཁྱེར་བའི་རྗེས་ལ་རྟ་པོ་འཁྱེར། །ཞིམ་པོ་སྟེར་སྟེར་འཇམ་པོ་གཡོག་གཡོག་ཞོག །བྱ་ལུགས་བྱེད་ལུགས་འགྲོ་ལུགས་སྡོད་ལུགས་སྦྱོངས། །བྱེད་ལུགས་མེད་ཀྱང་ཁ་ལ་ཟ་ལུགས་སློབས། །ཐ་མ་དེ་འདྲའི་སྨྱོ་སྨྱོ་སུ་ཞིག་སྨྱོ། །ཝ་ཕྲུག་ཐང་ནས་ཐང་ལ་ཟག་རྒྱུ་མེད། །རྒོད་ཕྲུག་གཡང་ལ་ཟགས་པ་སྙིང་ཡང་རྗེ། །སྤྲང་ཕྲུག་རྒྱལ་ཁམས་བསྐོར་བ་སྤྲང་པོའི་ལས། །ཕྱུག་པོ་སྤྲང་ལ་འཁྱམས་པ་དགྲ་ལ་འགྱུར། །ཉན་མཁན་ཡོད་ན་གོ་རྒྱུ་བཤད་ཡོད་དོ། །ལྟ་མཁན་ཡོད་ན་མཐོང་རྒྱུ་བསྟན་ཡོད་དོ། །སྨྱུ་གུའི་ཁ་ཡི་དོན་གྱི་རྡོ་ཁའི་ཚིག །ཐུགས་ཀྱི་དཀྱིལ་དུ་ཞོག་མཛོད་ཨ་མའི་ཚོགས། ། ། །
                               བསླབ་བྱ་ལེའུ་བཅུ་གཅིག་པ།
   དེ་ནས་ཉོན་དང་ཨ་མའི་ཨོ་ལོ་ཚོ། །སྟག་གཟིག་ནགས་ཀྱི་དཀྱིལ་ནས་ཐོན་འདྲ་རྣམས། །ཕྲུ་གུ་མ་ཡི་ཁོག་ནས་ཐོན་པའི་དུས། །ལྟེ་བ་མ་དང་འབྲེལ་ནས་ཡོང་བའི་དུས། །ཙེར་ཙེར་ཟེར་བ་ཙམ་ལས་ཤ་རྡོག་གཅིག །ནུ་ཞོ་ཁ་ལ་སྦྱར་ཡང་འཐུང་མི་ཤེས། །རྐང་པ་ཡོད་ཀྱང་གོམ་པ་སྤོ་མི་ཤེས། །རྣ་བ་ཡོད་ཀྱང་ཚིག་བརྡ་སྤྲོད་མི་ཤེས། །མིག་གཉིས་ཡོད་ཀྱང་མཐོང་རྒྱུ་མ་ལས་མེད། །སེམས་པ་ཡོད་ཀྱང་བསམ་རྒྱུ་མ་ལས་མེད། །ངོ་ལ་འཁོར་བའི་སྦྲང་མ་དཀྲོག་མི་ཤེས། །མིག་ལ་འཚངས་པའི་ཐལ་བ་འདོན་མི་ཤེས། །གྲང་ངུ་འཁྱག་ངུ་ལྟོགས་ངུ་རྒྱག་པའི་དུས། །ཕ་མ་གཉིས་པོའི་དགོང་མོའི་གཉིད་ཐེབས་བཅག །སྐམ་པ་བུ་ང་རློན་པ་ཕ་མས་བྱེད། །འཇམ་པ་བུ་དང་རྩུབ་པ་ཕ་མས་བྱེད། །ད་ལྟའི་དེ་འདྲ་དེ་དུས་ཡིན་མདོག་མེད། །ཕྲུ་གུ་ཆུང་དུས་ལྟེ་བ་ཕ་མས་སྒྲོལ། །བྱ་ལུགས་བྱེད་ལུགས་འགྲོ་ལུགས་སྡོད་ལུགས་སྦྱོངས། །གང་བྱས་ཡོང་བའི་ཡོན་ཏན་ཕ་མའི་དྲིན། །
ཁ་ནས་ཕྲིས་ཏེ་བསགས་ཚད་བུ་ཡི་དོན། །ལས་འབྲས་རླུང་ལ་བསྐུར་རྒྱུ་བུ་ཡི་དོན། །བསམ་རྒྱུ་བུ་དང་དྲན་རྒྱུ་བུ་ལས་མེད། །དགོས་རྒྱུ་བུ་དང་འདེགས་རྒྱུ་བུ་ལས་མེད། །བཀའ་དྲིན་ཅན་གྱི་ཕ་མ་རྣམ་པ་གཉིས། །ན་སོ་རྒས་པ་ད་ལྟ་ཨེ་ཤེས་ལ། །དྲིན་ཅན་དྲིན་དུ་བསམས་པ་ཨེ་ཡོད་ལགས། །ཁྲེལ་དང་ངོ་ཚ་དགོས་པ་འདི་རུ་རེད། །ཚོགས་དང་བསོད་ནམས་གསོག་པའི་རྩ་བ་རེད། །གོང་ན་གོ་བརྡ་གཤམ་ན་ཕ་མ་གཉིས། །དེ་གསུམ་ལས་ལྷག་སུ་ཡང་ཡོད་པ་མིན། །ཉིན་མཚན་མེད་པ་ཕ་མའི་བཀའ་དང་བསྟུན། །སྔ་དགོང་མེད་པ་ཕ་མའི་ཞབས་ལ་བཅར། །ཞིམ་པོ་ཕུལ་ནས་ཨེ་མཉེས་སེམས་ཀྱིས་ལྟོས། །འཇམ་པོ་བསྒྲོན་ནས་ཨེ་མཉེས་ཡིད་ཀྱིས་ལྟོས། །སྙན་པོ་ཞུས་ནས་ཐུགས་སེམས་ཨེ་སྤྲོ་ལྟོས། །ཡག་པོ་ཞུས་ནསདགོངས་པ་ཨེ་སྤྲོ་ལྟོས། །ཕ་མ་མཉེས་ན་འདི་ཕྱི་གཉིས་ཡོད་རེད། །ཕ་མ་ཡོད་དུས་བཀའ་དྲིན་མ་བསམ་པར། །མེད་དུས་འགྱོད་པ་སྐྱེས་པ་ཐ་མའི་ཐ། །འགྱོད་པ་དེ་ནི་ཕུགས་ནས་ཕུགས་སུ་འགྱོད། །ད་ལྟ་ས་སྟེང་འགྱོད་པ་དེ་ལས་འགྱོད། །དེ་ལྟར་ཕ་མ་འཛོམས་པའི་ཕྲུ་གུ་ཚོ། །གཏམ་གྱི་ནོར་བུ་སྙིང་གི་སྒམ་དུ་ཆུག །བུད་མེད་ཁྲམ་དང་གཡོ་སྒྱུ་གྱོད་ཀྱི་གཞི། །བསླུ་ཇ་སྟེར་ནས་ཕ་བུ་འཕྲལ་ཡོང་ངོ་། །དེ་འདྲ་དམྱལ་བའི་གཏིང་དུ་བསྐྱུར་ཡོང་ངོ་། །ར་ཐང་གཡོགས་པ་རྣ་བས་ཐོས་ཡོད་འགྲོ། །རྩྭ་མཆོག་ཟིལ་པས་སྐད་ཆ་གོ་ཚོད་འགྲོ། །མི་རྒྱུད་མི་དགོས་ལྷ་རྒྱུད་ཡིན་གྱུར་ཀྱང་། །བུད་མེད་ཡིན་ན་བདུད་ཀྱི་ཡན་ལག་རེད། །དེ་འདྲའི་བཤད་ཚད་ཉན་ན་ཕུང་ལ་སྦྱོར། །བྱས་ཚད་ལམ་ལ་བཏང་ན་རླུང་ལ་བསྐུར། །བདུད་དང་བསྡོངས་དུས་མི་ལ་དོགས་ཟོན་དགོས། །འདྲེ་དང་གྲོགས་པོ་བྱེད་ན་བླ་མ་སྒོམས། །གྱོན་པ་རྙིང་ན་གསར་པ་བཟོས་པས་ཆོག །མནའ་མ་མེད་ཀྱང་མནའ་མ་བསུས་པས་ཆོག །འཚོལ་དགོས་བྱུང་ན་ཕ་མ་རྙེད་མདོག་མེད། །ཕ་མ་གཉིས་དང་མནའ་མ་བརྗེ་མདོག་མེད། །འདྲ་འདྲའི་ཁྲོད་དུ་སྡོད་པ་ངོ་ཡང་ཚ། །འཇོན་མདོག་བྱས་ཀྱང་འཇོན་རྒྱུ་དེ་ག་རེད། །ཕ་མ་མནའ་མའི་དབྱེ་འབྱེད་མ་ཤེས་ན། །མི་ལུས་དེ་འདྲ་ཐོབ་ཀྱང་ཁྱི་ལས་ལོད། །ཁྱི་ངན་སྨྱོ་ཡང་བདག་པོ་ངོས་ཀྱིས་འཛིན། །ཁྱི་ལས་ལོད་པའི་མི་དེ་ཡ་ཡང་ང་། །དེ་འདྲའི་ལུས་རྟེན་སྡང་བའི་དགྲ་ལ་འགྱུར། །མི་ངན་གཅིག་གིས་མི་བརྒྱ་རླུང་ལ་བསྐུར། །མི་ལུས་ཡིན་ཡང་རྒྱ་མཚོའི་གཏིང་ལ་བསྐྱུར། །ལམ་ངན་གཏོད་ནས་འཛམ་གླིང་ཕུང་ལ་སྦྱོར། །བ་མོ་གཅིག་གིས་མི་ཡི་ཞིང་ཟོས་ནས། །བ་མོ་ཡོངས་ཀྱི་འགྲོ་བའི་ལམ་བུ་བཀག །ཅེས་པའི་དཔེ་ལྟར་སྤྱོད་ངན་འདོར་ཤེས་པ། །རིག་པ་གནད་དུ་ཁོད་ཅིག་ཕ་ཡི་བུ། །བསམ་བློ་འདྲོངས་ལ་ཐོངས་ཤིག་ཇོ་ཇོའི་སྙིང་། །རེ་དང་འཇིགས་པས་དབྱར་ས་དགུན་ས་ནས། །ཐར་པའི་གླིང་གི་ལས་སུ་སྐྱ་སེང་སེང་། །བཟང་གི་རེ་དང་ངན་གྱི་ཉེས་ཡོད་ན། །ལམ་བུ་དེ་ག་རེད་དོ་སྐལ་ལྡན་ཚོ། །འཁོར་བ་མི་སྲིད་སྲིད་པའི་ཁྲོན་པ་རུ། །ལས་ཉོན་མི་སྲིད་སྲིད་པའི་སྐུ་དུས་འདིར། །དོན་རྩ་བསྒྲིལ་ནས་རྡོག་ཐོན་བྱེད་པའི་དུས། །རེ་ས་ལྟ་ས་གོ་བརྡ་ཁོང་ལ་ཞུས། །ལས་འབྲས་སྙིང་ལ་བཅངས་ནས་འགྲོ་ལུགས་དང་། །དཀར་ནག་སེམས་ལ་བཞག་ནས་བྱ་ལུགས་མཛོད། །ལས་འབྲས་ཁ་ནས་ཤོད་མཁན་མང་པོ་ཡོད། །ལག་ལེན་ལག་ཏུ་ལོན་པ་གསེར་ལས་དཀོན། །དེ་ལ་བལྟས་ན་འགྱོད་པ་སྙིང་ནས་བསྐྱེད། །དེ་འདྲ་བསམས་ན་སྐྱོ་བ་གཏིང་ནས་སྐྱེས། །དེ་རིང་བྲིས་པའི་ཡི་གེ་ནག་ཆུང་འདི། །ཁ་ཆེ་ཕ་ལུ་སྨྱོ་བའི་སྨྱོ་ལབ་རེད། །གཏི་མུག་སྙིང་གི་དཀྱིལ་ལ་རྩོལ་རྩོལ་འདི། །རང་གི་མི་ཤེས་མི་ལ་བཤད་ལེ་འདྲ། །རང་སྐྱོན་མི་མཐོང་མི་སྐྱོན་སྟོན་ལེ་འདྲ། །ཆག་པ་གས་པས་ཕྱོགས་ལ་ཧམ་ལེ་འདྲ། །ང་ལ་བླ་མས་ཐུགས་རྗེས་རྒྱང་ནས་གཟིགས། །ཁ་དང་ལག་ལེན་འགྲིག་པའི་ཕྲིན་ལས་མཛོད། །མདོག་དང་བྲོ་བ་མཐུན་པའི་བཀྲ་ཤིས་ཤོག །ཁ་ཆེ་ཕ་ལུའི་བསམ་བློའི་རྒྱ་མཚོ་ནས། །བཏོན་པའི་ནོར་བུ་ཤོག་བུའི་ནང་དུ་བཏུམས། །རྒྱལ་སྡེ་ཁྲོམ་པའི་དཀྱིལ་དུ་བཞག་ཡོད་དོ། །རྨ་བྱའི་ལུས་ལ་ཁུ་བྱུག་གསུང་སྙན་འདི། །སྐྱིད་སྐྱིད་ཟེར་བས་ཕྱོགས་ཀུན་ཁྱབ་པར་ཤོག །ཁ་ཆེ་ཕ་ལུས་ཀུན་ལ་གདམས་པ་འོ། ། ། །

རྩོམ་ཁུངས། ངེད་དྲ་བ།

དཔྱད་མཆན ཡོངས་སུ་གཟིགས།དཔྱད་མཆན།

མིང་མི་འགོད་པར་སྤེལ།