གཟིམས་པ་མེད་པའི་མཆོད་མེ། དབྱངས་གསལ་སོ་བཞིའི་མཛེས་སྡུག  RSSསྔོན་མངག

༄༅། །ཁ་ཆེ་ཕ་ལུའི་འཇིག་རྟེན་ལས་འབྲས་རྩི་ལུགས་ཀྱི་བསླབ་བྱ་བཞུགས་སོ། །༼༤༽

2011-12-16 15:04:00 རྩོམ་པ་པོ་མི་གསལ། ཀློག་གྲངས། མཆན ཡོད།

                               བསླབ་བྱ་ལེའུ་བརྒྱད་པ།
   ཞིམ་ཚད་མ་ཟ་འཇམ་ཚད་མ་གྱོན་ཅིག །ཁ་ལུས་གཉིས་ཀྱིས་སྡུག་ལ་སྦྱར་ཡོང་ངོ་། །ཁོག་པའི་བོངས་ཚད་ཆེ་ཡང་དེ་ཐམས་ཅད། །ཟ་མ་གཅིག་པོའི་སྡོད་ས་ཡིན་མདོག་མེད། །མིག་དང་གྲོད་པ་གཉིས་ལ་ཁེངས་རྒྱུ་མེད། །ལྟོ་ཚོད་ཟ་ཚོད་རང་གིས་བྱས་པ་དགའ། །གྲོད་པ་ཐབ་ལ་འཚོད་འཚོད་མང་དྲགས་ན། །སྡུག་རྩྭ་མཐོང་དུས་སྒྱིད་བུ་གྲང་བ་མཐོང་། །མི་ལ་རེ་བའི་ཇ་ཆང་ལོངས་སྤྱོད་ལས། །རང་གི་རྩྭ་རྐྱང་ཆུ་རྐྱང་བྲོ་བ་ཞིམ། །ལས་ངན་ཤན་པའི་དྲེག་ཁུ་བཟའ་བ་ལས། །དམར་དད་ལངས་ན་ཤིག་ཀྱང་ཟ་བ་དགའ། །ཟ་རྒྱུ་ཉལ་རྒྱུ་བ་དང་བོང་བུའི་ལས། །དེ་འདྲ་བྱས་པ་ཨེ་དགའ་ཕ་ཡི་བུ། །ཁྱི་དང་གྲོད་པ་ལག་ནས་ཤོར་སོང་ན། །རྟ་རོ་བོང་རོའི་ཐོག་ལ་ཤོར་ཉེན་ཆེ། །གྲོད་པའི་སྒོ་ལ་བསྡམ་ཚོད་མ་བྱས་ན། །གཏམ་གྱི་ནོར་བུ་རྐུ་ལ་ཤོར་བའི་ཉེན། །གཏམ་གྱི་ཕུ་ཐུང་འཇོལ་འཇོལ་དགོས་འདོད་ན། །གྲོད་པའི་ལག་མགོ་ཐུང་དུ་བཅུག་པ་དགའ། །ཆུ་ནང་ཉ་མོ་སྤགས་ལ་དད་པས་ཕུང་། །བྱི་བ་བྱིའུ་འཇོལ་པད་ཁ་ཟོས་པས་ལན། །བྱི་བ་སྨུག་ཆུང་ལྟོགས་ལ་ཟ་འདོད་ཀྱིས། །ས་མདའ་སྐེ་ལ་ཟུག་པ་ཟ་མའི་སྐྱོན། །བྱང་ཐང་ཝ་མོ་རང་ཚོད་མ་ཟིན་ན། །མགོ་ལྤགས་ཐང་ལ་བཤུ་བ་ཟ་མའི་སྐྱོན། །སྟག་དམར་ངར་བཞིན་བུ་བཞིན་འཛིན་རྒྱུ་འདི། །སྟག་རྒན་ལུག་ལ་ཁྱི་ལྟར་མཆོངས་པས་ཉེས། །མཁས་པ་འདི་ཡིན་ཞུ་རྒྱུ་མེད་ལགས་ཀྱང་། །དཀར་པོའི་ཐོག་ཏུ་ནག་པོའི་བྲིས་ཆ་གསལ། །ཁ་ཆེ་ཕ་ལུ་ས་འོག་སོང་ན་ཡང་། །རྒྱ་ཤོག་ལོགས་ཀྱི་སྣག་ཚའི་རི་མོ་འདི། །ས་སྟེང་ཡུན་རིང་གནས་པའི་བཀྲ་ཤིས་ཤོག །ཚང་མའི་ཡིད་དུ་འོང་བའི་བཀྲ་ཤིས་ཤོག ། ། །
                               བསླབ་བྱ་ལེའུ་དགུ་པ།
   འཇིག་རྟེན་ལྟ་ལུགས་གཅིག་ལ་མཐོང་ལུགས་གཉིས། །ལྟ་ལུགས་གཅིག་ལ་རིགས་ཀྱང་རིགས་གཅིག་འདུག །ཕ་ཡིས་བུ་དང་བུ་ཡིས་ཕ་བྱེད་པ། །དེ་འདྲ་བསམས་ན་ཐུང་ཐུང་ག་ནས་ཡིན། །མ་བསམས་གྱུར་ན་ཕ་བུའི་དམ་ཚིག་ཉམས། །དམ་ཉམས་ལག་ལེན་སྡང་བའི་དགྲ་ལ་འགྱུར། །ཕྲུ་གུ་ཕ་མ་མེད་པ་མི་སྲིད་ཀྱང་། །ལག་ཐོག་སྟོན་རྒྱུ་ཡོད་པ་རེ་རེ་ཙམ། །ཚེ་སྟོད་ཡོད་ཀྱང་ཚེ་སྨད་མེད་པ་མང་། །ཕ་བུའི་དམ་ཚིག་བསྲུང་དུས་བསྲུངས་པ་དགའ། །དུས་ཚོད་ཆུ་ཚོད་མ་འགྱངས་གྲོལ་ནས་འགྲོ། །འཐུས་ཤོར་མེད་པར་བུ་ལ་ཡོན་ཏན་སློབས། །ཡོན་ཏན་ཀུན་གྱི་རྩ་བ་ཡི་གེ་དང་། །ཡོན་ཏན་ཡོངས་ཀྱི་རྒྱལ་པོ་ཡི་གེ་རེད། །ཕྲུ་གུའི་ཡི་གེ་གསེར་ཁྲིའི་སྟེང་དུ་སྐྱོལ། །མི་ཕོའི་ཡི་གེ་སྟག་གདན་སྟེང་དུ་འཇོག། །བླ་མའི་ཆོས་རར་ཡི་གེ་མེ་ལོང་རེད། །རྒྱལ་པོའི་ཁྲིམས་རར་ཡི་གེ་འབྲས་བུ་རེད། །ཡིག་ཡོད་མིག་ཡོད་མཁས་པ་སྤྲུལ་པའི་རྒྱུད། །ཡིག་མེད་མིག་མེད་ལོང་བ་ལྐུགས་པའི་རྒྱུད། །ཀྱོག་ཀྱོག་ཡི་གེ་གཞུ་ལྟར་འཁྱོག་གྱུར་ཀྱང་། །དོན་རྩ་མདའ་ལས་འདྲོང་བ་དེ་རུ་ཚང་། །ཡོན་ཏན་རིན་ཆེན་དགོས་འདོད་ཀུན་འབྱུང་རེད། །དགོས་འདོད་ཀུན་འབྱུང་དགོས་མིར་ཐོགས་པ་མེད། །དོན་དུ་མི་ལ་ཡོན་ཏན་ཚང་བ་དགོས། །ནོར་རྫས་མཚམས་རེ་སོང་འགྲོ་མཚམས་རེ་ཡོང་། །ནོར་ལ་བསྐྱུར་བརླག་རྐུན་མས་འཁྱེར་བའི་ཉེན། །ཡོན་ཏན་རིན་ཆེན་འཛད་མེད་ཕུགས་ཀྱི་གཏེར། །ན་སོ་གཞོན་དུས་བུ་ལ་སྦྱོང་ཐར་སློབ། །ན་སོ་ལོངས་ནས་བསླབ་དགོས་མེད་པ་གྱིས། །ལྕང་གསར་གཞོན་དུས་འདྲོང་ན་འདྲོང་པ་རེད། །ལྕང་རྒན་སྲོང་སྲོང་མང་ན་ཆག་པའི་ཉེན། །ངན་པའི་མི་དང་གྲོགས་ལ་བསྡོངས་པ་ན། །དུག་དང་བསྡོངས་ན་དུག་གི་ཁ་རླངས་ཕོག །ངན་པའི་ཚོགས་དང་ནག་པོའི་སོལ་བ་འདྲ། །ཚ་མོས་བསྲེག་ཉེན་གྲང་མོས་རྫས་ཉེན་ཆེ། །ཁེ་དང་གྱོང་གི་བསྐོར་ཕྱོགས་གཏོང་གིན་སོང་། །ཡག་དང་ཉེས་ཀྱི་སྐད་ཆ་ཤོད་ཀྱིན་སོང་། །ཡག་ན་ཡག་པས་ངོ་བསྟོད་བདག་རྐྱེན་སྤྲོད། །ཉེས་ན་ཉེས་སོང་ཟེར་ནས་ཉེས་གཏག་ཐོངས། །ཨ་མའི་ཁ་ལ་སྒོ་ལྕགས་བརྒྱབ་དྲགས་ན། །ཕྲུ་གུས་ཆག་སྒོའི་རྒྱལ་སྒོ་ཕྱེ་ཉེན་ཡོད། །རྡོ་ལ་ཕྱིས་བདར་ཐོན་ན་ནོར་བུ་དང་། །ལྕགས་ལ་འཇམ་ཤ་ཐོན་ན་མེ་ལོང་ཡོང་། །ཡོན་ཏན་ཕུན་སུམ་ཚོགས་པ་སྙིང་གི་བུ། །བྱ་ལུགས་བྱེད་ལུགས་ངན་ན་དགྲ་ལས་ལོད། །དེ་ཚོ་སེམས་པ་དཀར་བའི་སྐད་ཆ་རེད། །བུ་ཡོད་ཕ་ཚོ་ཐུགས་ལ་དེ་ལྟར་ཞོག ། ། །

རྩོམ་ཁུངས། ངེད་དྲ་བ།

དཔྱད་མཆན ཡོངས་སུ་གཟིགས།དཔྱད་མཆན།

མིང་མི་འགོད་པར་སྤེལ།