གཟིམས་པ་མེད་པའི་མཆོད་མེ། དབྱངས་གསལ་སོ་བཞིའི་མཛེས་སྡུག  RSSསྔོན་མངག

ལེགས་པར་བཤད་པ་རིན་པོ་ཆེའི་གཏེར། ༦

2009-12-11 10:56:00 ཀུན་དགའ་རྒྱལ་མཚན་དཔལ་བཟང་པོ། ཀློག་གྲངས། མཆན ཡོད།

བྲན་གཡོག་ང་རྒྱལ་ཆེ་བ་དང༌།།

དཀའ་ཐུབ་ལྡན་པ་ཆས་གཟོབ་དང༌།།

རྒྱལ་པོ་ཆོས་བཞིན་མི་སྤྱོད་པ།།

གསུམ་པོ་ཚུལ་མིན་ཞུགས་པ་ཡིན།།

 

མི་ལྕོགས་བྱ་བ་རྩོམ་པ་དང༌།།

མང་དང་འཁོན་ཞིང་སྟོབས་ལྡན་རྩོད།།

བུད་མེད་ཡིད་རྟོན་ངན་དང་མཛའ།།

ལྔ་པོ་མྱུར་དུ་བརླག་པའི་རྒྱུ།།

 

ནོར་མེད་ཟས་གོས་མཆོག་འདོད་དང༌།།

གཞན་ལ་སློང་ཞིང་ང་རྒྱལ་ཆེ།།

བསྟོན་བཅོས་མི་ཤེས་རྩོད་པར་འདོད།།

གསུམ་པོ་འགྲོ་བའི་བཞད་གད་ས།།

 

ཡུལ་བཟང་ཡོད་བཞིན་ཡུལ་ངན་ལ།།

སྐྱེ་བོ་ངན་པ་ཕོངས་ཤིང་ཆགས།།

ཀིང་ཤུའི་མེ་ཏོག་ཤ་ཡིན་ཞེས།།

ཤེ་སྤྱང་ལས་གཞན་སུ་ཞིག་རེ།།

 

ཆེན་པོ་རྣམས་ལ་དགྲ་བས་ཀྱང༌།།

རང་གི་འཁོར་གྱིས་གནོད་པ་མང༌།།

སེང་གེ་ལུས་ཀྱི་འབུ་མིན་པ།།

སྲོག་ཆགས་གཞན་གྱིས་ག་ལ་ཟ།།

 

 

རྗེ་བོས་བདག་ལ་གནོད་བྱེད་ན།།

དེ་ལ་སྐྱོབ་པར་བྱེད་པ་སུ།།

སྣང་བས་གཟུགས་ལ་སྒྲིབ་བྱེད་ན།།

དེ་ལ་ལྟ་བའི་ཐབས་གཞན་མེད།།

 

ཆོས་སྤྱོད་ཞི་བར་གནས་པ་ལ།།

འཚེ་བྱེད་ཤིན་ཏུ་ཐ་ཤལ་ཡིན།།

རང་ལ་སྐྱབས་འོངས་བསད་པ་ལ།།

དཔའ་བོ་ཡིན་ཞེས་སུ་ཞིག་སྒྲོགས།།

 

སྐྱེ་ངན་རང་ལ་མི་ཕན་ཡང༌།།

གཞན་ལ་གནོད་པར་བྱེད་པ་ཡོད།།

སྦྲུལ་གདུག་ཟས་སུ་རླུང་ཟ་ཡང༌།།

ཕ་རོལ་མཐོང་ན་མི་གསོད་དམ།།

 

འདོད་པ་བདེའོ་སྙམ་སེམས་ཀྱང༌།།

དེ་སྤྱོད་སྡུག་བསྔལ་ཁོ་ནའི་རྒྱུ།།

ཆང་འཐུང་བདེའོ་སྙམ་པ་དེ།།

སྨྱོ་བ་བདེ་བར་བསྒོམ་པ་ཡིན།།

 

ཡོན་ཏན་ཅན་ལ་འཇིག་རྟེན་གུས།།

ཡོན་ཏན་འབད་པའི་ཤུགས་ལ་གནས།།

འབང་ནས་ཡོན་ཏན་མི་བསྒྲུབ་པར།།

གཞན་ལ་འཁངས་པས་ཅི་ཞིག་ཕན།།

 

མི་རྣམས་ཚེ་རིང་བ་ལ་སྨོན།།

རྒས་པར་གྱུར་ལ་འཇིགས་པར་ལྟ།།

རྒས་ལ་འཇིགས་ཤིང་ཚེ་རིང་བར།།

འདོད་པ་བླུན་པོའི་ལོག་ལྟ་ཡིན།།

 

གང་ཞིག་མཁས་པ་ཡོད་བཞིན་དུ།།

དེ་ལས་ཡོན་ཏན་མི་ལེན་ན།།

མི་དེ་གདོན་གྱིས་བཏབ་པ་འམ།།

ཡང་ན་ལས་གྱིས་མནར་བ་མིན།།

 

གང་ལ་ལོངས་སྤྱོད་ཡོད་བཞིན་དུ།།

སྤྱོད་དམ་སྦྱིན་པར་མི་བྱེད་ན།།

མི་དེ་ནད་ཀྱིས་བཏབ་པ་འམ།།

ཡང་ན་ཡི་དྭགས་མངོན་སུམ་ཡིན།།

 

ཆོས་ལུགས་ཤེས་ཀྱང་མི་སྒྲུབ་ན།།

དེ་ཡི་ཆོས་ཀྱིས་ཅི་ཞིག་བྱ།།

ལོ་ཏོག་ཕུན་སུམ་ཚོགས་ན་ཡང༌།།

གཅན་གཟན་དགའ་བ་ག་ལ་སྐྱེ།།

 

ལས་ཀྱིས་མནར་བའི་སེམས་ཅན་ལ།།

ལོངས་སྤྱོད་ཡོད་ཀྱང་སྤྱོད་མི་ནུས།།

བྱ་རོག་ལྟོགས་ཀྱང་བསྐུངས་མོད་ཀྱི།།

འགྲངས་པར་ཟ་བ་ག་ལ་ནུས།།

 

སྤྱོད་དམ་སྦྱིན་པར་མི་ནུས་པའི།།

ནོར་དེས་ཕྱུག་པོར་བགོམ་ན་ནི།།

རི་བོ་གསེར་དུ་བསྒོམས་པ་ཡིས།།

ཕྱུག་པོ་བསྒྲུབ་པ་ཤིན་ཏུ་སླ།།

 

ཆོས་དང་ཆོས་མིན་སྨྲ་བ་ལ།།

མཁས་པ་ཤིན་ཏུ་མང་ན་ཡང༌།།

དེ་ལྟར་ཤེས་ནས་ཉམས་ལེན་པ།།

འཇིག་རྟེན་འདི་ན་ཤིན་ཏུ་དཀོན།།

 

རིགས་གཟུགས་ལང་ཚོ་ལྡན་ན་ཡང༌།།

ཡོན་ཏན་མེད་ན་མཛེས་མ་ཡིན།།

རྨ་བྱ་སྤུ་སྡུག་ཡིད་འོང་ཡང༌།།

ཆེན་པོའི་རྒྱན་དུ་འོས་སམ་ཅི།།

 

སྣ་ཡི་ཚབ་དང་ཉོས་པའི་བུ།།

གཡར་པོའི་རྒྱན་དང་བརྐུས་པའི་ནོར།།

སློབ་དཔོན་མེད་པའི་རིག་པ་རྣམས།།

ཡོད་ཀྱང་གཞན་གྱིས་བརྩི་བ་མེད།།

 

མི་གང་བྱས་པ་མི་གཟོ་བ།།

དེ་ནི་གཞན་པས་རང་ལ་གནོད།།

ལྟས་ངན་སྒྲུབ་པ་ཉེས་པ་འགའ།།

དགྲ་ཡི་ཐོག་མར་རང་ལ་འབྱུང༌།།

 

ལོངས་སྤྱོད་འགྲུབ་པར་མཐོང་ན་ཡང༌།།

གནས་མ་ཡིན་ལས་སུ་ཞིག་ལེན།།

ལུག་ཐུག་འཐབ་པའི་ཁྲག་བལྡགས་པས།།

ཝ་སྐྱེས་མགོ་བོ་བཀས་ཞེས་ཐོས།།

 

འབྲེལ་བ་འགའ་ཡི་ངོར་བྱས་ནས།།

གཞན་ལ་སྟེས་ཀྱི་དོར་མི་བྱ།།

བརྒྱ་བྱིན་ཡིན་ཡང་འཁོར་འདབས་རྣམས།།

ག་བུར་བཞིན་དུ་འབྲོས་པར་འགྱུར།།

 

རྒྱུན་དུ་འགྲོགས་པའི་གྲོགས་སྤངས་ནས།།

གསར་ཐུ་འགའ་ལ་ཡིད་མི་བརྟན།།

འུག་པའི་རྒྱལ་པོས་བྱ་རོག་གི།།

བློན་པོ་བསྟེན་པས་ཕུང་ཞེས་གྲགས།།

 

མི་ངན་འབད་པས་བསྟེན་བྱས་ཀྱང༌།།

རང་གི་མི་རུ་འགྲོ་བ་མེད།།

ཆུ་ནི་ཇི་ལྟར་བསྐོལ་གྱུར་ཀྱང༌།།

མེ་རུ་འབར་བ་མི་སྲིད་དོ།།

 

རྒྱུ་མཚན་བརྟགས་ནས་ཁྲོ་བ་ནི།།

ཅུང་ཟད་རིག་ཅིང་སེལ་བའང་ཤེས།།

རྒྱུ་མེད་པར་ནི་གང་ཁྲོ་བ།།

དེ་ཡི་བསལ་ཐབས་སུ་ཡིས་ཤེས།།

 

 དགྲ་བོའི་ནུས་པ་མ་བརྟགས་པར།།

ཉམ་ཆུང་ན་ཡང་བརྙས་མི་བྱ།།

ཏ་ཌི་བྷ་ལ་བརྙས་པ་ཡིས།།

ནམ་མཁའ་ལྡིང་གིས་རྒྱ་མཚོ་བཅོམ།།

 

བསོད་ནམས་འཛད་ན་ངན་སེམས་སྐྱེ།།

རིགས་འཛད་པ་ན་ཐུ་ངན་སྐྱེ།།

ནོར་འཛད་པ་ན་བརྐམ་ཆགས་སྐྱེ།།

ཚེ་འཛད་པ་ན་འཆི་ལྟས་འབྱུང༌།།

 

རང་གིས་ངན་སྤྱོད་མ་བྱས་ན།།

བརྒྱ་བྱིན་གྱིས་ཀྱང་སྨད་མི་ནུས།།

ཆུ་མིག་རང་ཉིད་མ་བསྐམས་ན།།

ས་ཡིས་མནན་པས་ག་ལ་ཐུབ།།

 

བྱ་བ་མི་འདྲ་བརྒྱ་ཕྲག་རྩོམ།།

མཐར་ཕྱིན་བྱ་བ་གཅིག་ཀྱང་མེད།།

བློ་རྒོད་ཕལ་ཆེར་གྲོང་བར་གྱི།།

ཁྱི་རྒན་འདྲ་བར་རྒྱུན་དུ་འཁྱམས།།

 

ལས་ཀྱི་ཤུགས་ཀྱིས་ཁྲིད་པ་ན།།

བློ་ཆེན་ལོག་པའི་ལམ་ནས་འགྲོ།

མུ་སྟེགས་བྱེད་པའི་སྟོན་པ་མཆོག།

དབང་ཕྱུག་སྨྱོན་པའི་བརྟུལ་ཞུགས་འཛིན།།

 

 མི་གང་ཁྲིམས་ལས་གང་འདའ་བ།།

རེ་ཞིག་རྒྱལ་ཡང་ཕམ་པ་ཡིན།།

ཆུ་སྐྱར་ཁྲིམལ་ལས་འདས་པ་ཡིས།།

ས་ཀུན་ཐོབ་ཀྱང་སེང་གེས་བསད།།

 

ཧ་ཅང་ཤེས་རབ་ཆེ་དྲགས་པའི།།

བྱ་བ་མང་ན་བདག་ཉིད་བརླག།

རྒྱལ་པོ་དྲན་རྒྱ་ཆེ་བ་ཡིས།།

རྒྱལ་སྲིད་ཉམས་པ་ཤིན་ཏུ་མང༌།།

 

ཧ་ཅང་ལོངས་སྤྱོད་བསགས་དྲགས་པའི།།

ནོར་ནི་རང་གི་གཤེད་མ་ཡིན།།

ཕུང་ཁྲོལ་ཕལ་ཆེར་ཕྱུག་པོ་ལ།།

འབྱུང་གི་སྤྲང་པོ་བདེ་བར་རྒྱུ།།

 

ཧ་ཅང་མཐུ་རྩལ་ཆེ་དྲགས་ན།།

ལྕེབ་པའི་སྟ་གོན་བྱེད་པ་ཡིན།།

གཡུལ་དུ་བསད་པ་ཕལ་མོ་ཆེ།།

མཐུ་རྩལ་ཅན་ལ་བྱུང་བ་མང༌།།

 

འབྱོར་དང་ཤེས་རབ་སྟོབས་ལ་སོགས།།

བསོད་ནམས་ལྡན་ལ་གྲོགས་སུ་འགྱུར།།

བསོད་ནམས་མེད་ན་དེ་དག་ཀུན།།

བདག་ཉིད་བརླག་པའི་རྒྱུ་རུ་འགྱུར།།

 

 མཁས་པས་བྱ་བ་ཅི་བྱེད་ཀྱང༌།།

རང་གི་བསོད་ནམས་བརྟགས་ཏེ་བྱ།།

རྩོད་དུས་བསོད་ནམས་ཕུན་ཚོགས་པ།།

སྐྱེ་བོ་བརྒྱ་ཡི་ནང་ནའང་དཀོན།།

 

རྫིང་ངན་ཆུ་ཡིས་ཁེངས་པ་ན།།

ཕྱོགས་གཅིག་ཅི་ནས་འཇིག་པ་ལྟར།།

གང་ལ་ནོར་དང་ལྡན་གྱུར་པ།།

དེ་ལ་རིགས་རྒྱུད་ཤིན་ཏུ་དཀོན།།

 

བུ་དང་ལྡན་ལ་ནོར་ཆེན་དཀོན།།

དེ་དང་ལྡན་ན་དགྲ་བོས་འཇོམས།།

ཐམས་ཅད་ཕུན་སུམ་ཚོགས་གྱུར་ན།།

མི་དེ་མྱུར་དུ་འཆི་བ་མང༌།།

 

དེས་ན་མཁས་པས་བསོད་ནམས་གསོག།

བསོད་ནམས་ཁོ་ན་ཕུན་ཚོགས་རྒྱུ།།

སུ་ཞིག་གང་ན་ཕུན་ཚོགས་པ།།

དེ་ནི་བསོད་ནམས་བསགས་པའི་རྟགས།།

 

རྫུན་གྱིས་ཕ་རོལ་བསླུས་སོ་ཞེས།།

སྙམ་ན་རང་ཉིད་བསླུས་པ་ཡིན།།

ལན་ཅིག་རྫུན་དུ་སྨྲ་བ་དེས།།

བདེན་པ་སྨྲས་ཀྱང་དོགས་པ་སྐྱེ།།

 

ལེགས་ཉེས་རྣམ་པར་མི་དཔྱོད་པར།།

ཁྲོས་ཤིང་ཕ་རོལ་གནད་འབེབས་པ།།

ཆུང་མ་བསད་པའི་ཐི་བ་ལྟར།།

གྲོགས་དང་བྲལ་བའི་མྱ་ངན་ཐོབ།།

 

མ་འོངས་པ་ལ་མི་དཔྱོད་པར།།

བྱུང་བའི་ཚེ་ན་འབད་དེ་བཙལ།།

ཆུ་དང་ཕྲད་ན་ལྟམ་ཕུད་ཀྱི།།

མ་ཕྲད་པ་ན་ག་ལ་ཕུད།།

 

ཕུགས་སུ་བསྒྲུབ་པར་མི་ནུས་པའི།།

བྱ་བ་ལེགས་ཀྱང་འཇུག་མི་རུང༌།།

ཁོང་པའི་ནང་དུ་མི་འཇུ་བའི།།

ཁ་ཟས་ཞིམ་ཡང་སུ་ཞིག་ཟ།།

 

རྩོལ་བ་དོར་ནས་འདུག་པ་ལ།།

འདི་ཕྱི་གཉིས་ཀ་འགྲུབ་མི་འགྱུར།།

འབད་པ་མེད་ན་ཞིང་བཟང་ཡང༌།།

ལོ་ཏོག་ཐོབ་པར་མི་འགྱུར་རོ།།

 

 གནས་མ་ཡིན་པའི་དུལ་དྲགས་ན།།

ཐམས་ཅད་ཀྱིས་ནི་བཀོལ་བར་འགྱུར།།

ཤིང་བལ་སྟན་དུ་བྱེད་མོད་ཀྱི།།

ཡལ་ག་སུ་ཞིག་སྟན་དུ་འདིངས།།

 

བྱ་བ་ངན་དང་མི་འགྲུབ་པ།།

ཕ་རོལ་བསྒོ་ཡང་བྱེད་ན་བླུན།།

སྦྱར་དུག་ཉོ་ལ་སུ་ཡིད་རྟོན།།

ཐམས་ཅད་སྦྱིན་ཞེས་སུས་སྨྲ་ནུས།།

 

ནོར་རྣམས་གསོག་ཅིང་མི་སྤྱོད་པ།།

རང་བསྲེག་བུད་ཤིང་གསོག་པ་ཡིན།།

བུང་བ་སྦྲང་རྩི་མི་ཟ་བ།།

གཞན་གྱིས་ཁྱེར་ན་ལྕེབ་པར་རྩོམ།།

ལེགས་པར་བཤད་པ་རིན་པོ་ཆེའི་གཏེར་ལས་མི་རིགས་པའི་ཚུལ་དཔྱད་པ་སྟེ་རབ་ཏུ་བྱེད་པ་བདུན་པའོ།།

རྩོམ་ཁུངས། མི་རིགས་དཔེ་སྐྲུན་ཁང་།

དཔྱད་མཆན ཡོངས་སུ་གཟིགས།དཔྱད་མཆན།

མིང་མི་འགོད་པར་སྤེལ།