གཟིམས་པ་མེད་པའི་མཆོད་མེ། དབྱངས་གསལ་སོ་བཞིའི་མཛེས་སྡུག  RSSསྔོན་མངག

ལེགས་པར་བཤད་པ་ཤིང་གི་བསྟན་བཅོས་ལུགས་གཉིས་ཡལ་འདབ་བརྒྱ་ལྡན་ཞེས་བྱ་བ་ཞུགས་སོ།། ༤

2009-12-01 11:49:00 གུང་ཐང་དཀོན་མཆོག་བསྟན་པའི་སྒྲོ ཀློག་གྲངས། མཆན ཡོད།

མཆོག་གསུམ་བྱིན་རླབས་མཐའ་ཡས་ཀྱང༌། །
དད་པ་མེད་ན་ཇི་ལྟར་སྐྱོབ། 
རྒྱ་མཚོ་ཆེ་ཡང་ཆར་སྡོད་ཀྱི། 
བྱིའུའི་སྐོམ་པ་སེལ་མི་ནུས། 

འཁོར་བའི་འདམ་ལས་མ་བརྒལ་བའི། །
འཇིག་རྟེན་པ་ལ་བརྟེན་མི་བྱ། །
ཆུས་ཁྱེར་ཆུ་ཡིས་ཁྱེར་བ་ལ། །
འཇུས་ན་གཉིས་ཀ་བྱིང་བར་འགྱུར། །

 

མཆོག་གསུམ་བརྟེན་ན་དེ་ཡི་ཁྲིམས། །

ལས་འབྲས་བླང་དོར་འབད་པ་གཅེས། །

དེད་དཔོན་བསྟེན་ཀྱང་གྲུ་གཟིངས་སུ།།

མི་སྡོད་དེ་ཉིད་ཇི་ལྟར་སྒྲོལ། །

 

སྣོད་བཅུད་བདེ་སྡུག་སྣང་བ་ཀུན། །

འཁྲུལ་མེད་སྔོན་བསགས་ལས་ལས་འབྱུང༌། །

ཆུ་ཕོར་གང་ཡང་འགྲོ་བ་བཞིར། །

སྣང་ཚུལ་ཐ་དད་འབྱུང་བར་གསུངས། །

 

 

དགེ་དང་མི་དགེ་ཆུང་ངུ་ནས། །

བསགས་པས་ཤེས་རྒྱུད་གང་འགྱུར་ཏེ། །

ཆར་གྱི་ཐིགས་པ་བསགས་པས་ཀྱང༌། །

མཐའ་ཀླས་ཆུ་ཡི་དཀྱིལ་འཁོར་ཆགས། །

 

གནས་སྐབས་དགེ་བ་ལྟར་སྣང་ཡང༌། །

བསྔོ་དང་འདུན་པས་བསླད་པ་མང༌། །

མཆོག་ཏུ་མངར་བ་གང་གཱའི་ཆུ། །

རྒྱ་མཚོར་འདྲེས་ན་ཁ་བར་འགྱུར། །

 

རྨོངས་པའི་མུན་ནག་གིས་ལྡོངས་ཤིང༌།།

ལས་ཀྱི་ཞགས་པས་བཅིངས་པ་རྣམས།།

སྲེད་པའི་ཀླུང་གིས་རབ་དྲངས་ཏེ། །

མི་བཟད་སྐྱེ་བའི་རྒྱ་མཚོར་འགྲོ། །

 

འདོད་པ་ལན་ཚྭའི་ཆུ་བོ་ནི། །

ཅི་ཙམ་སྤྱད་ཀྱང་མི་ངོམས་པས། །

ཆུ་མཚོ་འཁྱག་པའི་ངང་པ་ལྟར། །

སྲིད་ལས་ངེས་འབྱུང་སྐྱོ་ཤས་སྐྱེད། །

 

ལས་ཉོན་ན་ཀྲས་ཡོངས་གང་བ། །

སྡུག་བསྔལ་འཁོར་བའི་རྒྱ་མཚོ་ལས། །

སྒྲོལ་བྱེད་བསླབ་གསུམ་གྲུ་བོ་ཆེ། །

བཟུང་ནས་ཐར་པའི་གླིང་དུ་གཤེགས། །

 

ཁྱད་པར་ཁས་བླངས་ཚུལ་ཁྲིམས་ནི། །

ཉེས་ལྟུང་དྲི་མས་མ་སྦགས་པ། །

རྒྱ་མཚོ་རོ་དང་མི་འགྲོགས་ལྟར། །

རྟག་ཏུ་དྲན་ཤེས་བརྟན་པོས་སྲུངས། །

 

འོན་ཀྱང་མ་རྒན་སེམས་ཅན་རྣམས། །

དོར་ནས་རང་དོན་བྱར་མི་འོས། །

རྒྱ་མཚོའི་གླིང་དུ་གཉེན་བཤེས་ཀུན། །

འབོར་བ་དེད་དཔོན་སྤྱོད་ཚུལ་མིན། །

 

མཚོར་གནས་གཡོ་དང་མི་བདེན་པའི། །

ཁྱད་པར་གསུམ་ལྡན་ཆུ་ཟླ་ལྟའི། །

འགྲོ་ལ་སྙིང་རྗེ་རྣམ་གསུམ་གྱིས། །

ཐེག་ཆེན་ལམ་གྱི་སྲོག་རྩ་ཚུགས། །

 

བྱང་ཆུབ་སེམས་ཀྱིས་ཟིན་པའི་དགེ། །

མི་ཟད་བྱང་ཆེན་རྒྱུར་འགྲོ་སྟེ། །

ཛམ་བུའི་འབྲས་བུ་མ་དྲོས་མཚོར། །

ལྷུང་བས་གསེར་སྦྱངས་ཁམས་སུ་འགྱུར། །

 

རྒྱལ་སྲས་སྤྱོད་པ་མཐའ་ཀླས་ཀྱང༌།

ཕ་རོལ་ཕྱིན་པ་དྲུག་ཏུ་འདུ། །

རི་སུལ་ལ་ལུང་ཆུ་བོ་བརྒྱ། །

ཟམ་འོག་གཅིག་ཏུ་འདྲིལ་བ་བཞིན། །

 

 

 རྒྱལ་སྲས་རྣམས་ནི་བདོག་པ་ཀུན། །

འབྲས་བཅས་གཏོང་སྟེ་སྦྱིན་པའི་མཆོག །

ཆར་གྱིས་རྩི་བཅུད་ལོ་ཏོག་ཀུན། །

བསྐྱངས་ཀྱང་ལན་དང་རེ་བ་མེད། །

 

རྣམ་དག་ཁྲིམས་ཀྱིས་ཉེས་ལྟུང་གི། །

རྙོག་པ་མ་ལུས་དྲུངས་འབྱིན་ཏེ། །

ཀེ་ཏ་ཀ་འབྲས་བྱེ་མ་ཡིས། །

ཆུ་བོའི་རྙོག་མ་དྭངས་པར་བྱེད། །

 

དགེ་ཚོགས་མ་ལུས་སྲེག་པྱེད་པའི། །

ཁོང་ཁྲོའི་དགྲ་འཇོམས་བཟོད་པ་སྟེ། །

ཀུན་ཟ་འབར་བའི་མེ་ལྕེ་ནི། །

གསོད་བྱེད་གཉེན་པོ་ཆུ་ཡིན་ནོ། །

 

རྟག་གུས་བརྩོན་པ་མ་བཏང་ན། །

མི་འགྲུབ་བྱ་བ་ཅི་ཡང་མེད། །

ཆུ་ཐིགས་རྟག་ཏུ་འབབ་པ་ཡིས། །

བྲག་གི་རི་བོ་འབིགས་ལ་ལྟོས། །

 

 

རྩོམ་ཁུངས། མི་རིགས་དཔེ་སྐྲུན་ཁང་།

དཔྱད་མཆན ཡོངས་སུ་གཟིགས།དཔྱད་མཆན།

མིང་མི་འགོད་པར་སྤེལ།