གཟིམས་པ་མེད་པའི་མཆོད་མེ། དབྱངས་གསལ་སོ་བཞིའི་མཛེས་སྡུག  RSSསྔོན་མངག

ལེགས་པར་བཤད་པ་ཤིང་གི་བསྟན་བཅོས་ལུགས་གཉིས་ཡལ་འདབ་བརྒྱ་ལྡན་ཞེས་བྱ་བ་ཞུགས་སོ།།༣

2009-11-24 10:47:00 གུང་ཐང་དཀོན་མཆོག་བསྟན་པའི་སྒྲོ ཀློག་གྲངས། མཆན ཡོད།

 

མ་རབས་སྐྱེ་བོ་གཉིས་འགྲོགས་ན། 

ཕུགས་སུ་རང་གཞན་གཉིས་ཀ་འཕུངས། 

གཙུབ་ཤིང་ཟུང་དུ་བརྡར་བ་ཡིས། 

མཇུག་ཏུ་གཉིས་ཀ་བསྲེག་པར་བྱེད། 

 

ཕུན་སུམ་ཚོགས་པའི་ལྗོན་པ་ཡང༌། 

ཆུ་དང་འགྲོགས་ན་རྩ་བ་འབྱིན། 

ཡ་རབས་ཡོན་ཏན་ལྡན་པ་ཡང༌། 

གྲོགས་པོ་ངན་པས་ཉམས་པར་བྱེད། 

 

འབྲས་ལྡན་ཤིང་གཉིས་སྦྱར་བ་ལས། 

འབྲས་བུ་ཕུང་གསུམ་འབྱུང་བ་ལྟར། 

བློ་དང་ལྡན་པ་གཉིས་འགྲོགས་ན། 

སྔོན་མེད་ལེགས་པའི་བློ་གྲོས་སྐྱེ། 

 

ལྗོན་པའི་གྲིབ་བསིལ་བསྟེན་པ་ཡིས།

གླང་པོས་ཤིང་གི་རྩ་བ་འབྱིན། 

གཡོག་འཁོར་ངན་པ་བསྟེན་པ་ཡིས། 

ལེགས་བྱས་རྩ་བ་ཉམས་པར་བྱེད། 

 

ཤིང་སྡོང་གཙུག་གིས་བཀུར་བ་ཡི། 

འདབ་ཆགས་འགྲོ་ཚེ་བྱ་ཐལ་གཏོང༌། 

ཟླ་གྲོགས་ངན་པ་བསྟེན་ན་ཡང༌། 

ནམ་ཞིག་རྗེས་ངན་བཞག་ནས་འགྲོ། 

 

ངན་པར་ཅི་ཙམ་ཕན་བཏགས་ཀྱང༌། 

ལན་དུ་ཕན་པའི་རེ་བ་མེད། 

ཤིང་གིས་རྟག་ཏུ་མེ་གསོས་ཀྱང༌།

མེ་ཡིས་དེ་ཉིད་ཐལ་བར་བྱེད། 

 

བློ་དང་མཐུ་ལྡན་རེ་རེས་ཀྱང༌། 

མཆོག་དམན་ཀུན་གྱི་དགོས་པ་བསྒྲུབ། 

འོད་མའི་གནམ་རུ་གཅིག་གིས་ཀྱང༌། 

ཉག་ཕྲན་སྟོང་གི་བྱ་བ་བྱེད། 

 

ལོངས་སྤྱོད་དཔལ་དང་མི་ལྡན་ན། 

རིགས་རུས་མཐོ་ཡང་དགོས་པ་ཆུང༌། 

དགོས་པའི་གྲིབ་བསིལ་མེད་གྱུར་ཚེ། 

རྩེ་མོ་མཐོ་བས་ཅི་ལ་ཕན། 

 

རྩ་བ་བསོད་ནམས་མེད་གྱུར་ན། 

བསགས་པས་དབུལ་བ་མི་སེལ་ཏེ། 

སྡོང་པོ་རླན་དང་བྲལ་བ་ལ། 

ཡལ་གར་ཆུ་བོས་བྱུགས་ཀྱང་ཅི། 

 

 

བུན་དང་བསྐྱེད་ཀྱིས་ནོར་སྤེལ་བར། 

འདོད་ཀྱང་རྩ་བ་སྟོང་བ་མང༌། 

ཤིང་སྐྱེས་བཅད་ནས་ས་གཞན་དུ། 

བཙུགས་པ་ཕལ་ཆེར་སྐམ་པར་འགྱུར། 

 

གཡང་ས་མཐོན་པོར་སྐྱེས་པ་ཡི། 

ས་ཧ་ཀཱ་རའི་འབྲས་བུ་བཞིན། 

རང་གཞན་གང་ལའང་མི་ཕན་པའི། 

ལོངས་སྤྱོད་ཆེ་དེ་སྦ་བ་ཡིན། 

 

ལོངས་སྤྱོད་སྤེལ་བར་འདོད་པ་ཡིས། 

ཆ་ཤས་གཏོང་བ་མན་ངག་སྟེ། 

ལྗོན་ཤིང་ཡལ་ག་རྒྱས་འདོད་ན། 

རྩེ་མོ་འབྲེག་པ་ཐབས་སུ་བཟང༌། 

 

དམན་པས་བསགས་ཀྱང་མི་འགྲུབ་ལ། 

བསོད་ནམས་ལྡན་པས་བཏང་ཡང་འབྱོར། 

རླན་སར་བཅད་ཀྱང་སྐྱེ་བའི་ཤིང༌། 

སྐམ་སར་བཙུགས་ཀྱང་ག་ལ་སྐྱེ། 

 

ལམ་ཁའི་ཤིང་གི་འབྲས་བུ་དེ། 

བྱིས་པའི་རྡོ་ཆར་འབེབས་པའི་རྒྱུ། 

བདག་པོ་ངན་པའི་ལོངས་སྤྱོད་ཀྱང༌། 

ཕལ་ཆེར་དགྲ་ཡི་གཡབ་མོ་ཡིན། 

 

ས་འགའ་ལྡེམ་པོ་རྒྱལ་བས་གསུངས། 

འཇིག་རྟེན་ཚངས་པའི་རལ་ཀློང་དུ༌། 

འཁྱམས་པའི་སརྒ་མཐར་སོན་ཏེ། 

སྒྲིབ་གཉིས་དྲི་མ་འཁྲུད་པའི་ཕྱིར། 

དམ་པའི་ཆོས་ཀྱི་ལམ་དུ་འདྲེན། 

 

ཆུ་རིགས་བདུན་ལས་མཆོག་གྱུར་པའི། 

ཆུ་མགོ་གངས་ལ་ཐུག་པ་བཞིན། 

ཆོས་ཀྱང་འཁྲུལ་བྲལ་མ་ནོར་བ། 

རྒྱལ་བའི་བཀའ་ལས་འབྱུང་བ་དགོས། 

 

དེ་ནས་ཟབ་རྒྱས་ཉམས་ལེན་གྱི། 

ལམ་གསུམ་རིམ་པར་འབབ་པ་ཡི༌། 

གདམས་ངག་ཚང་ལ་མ་ནོར་བ། 

སྐལ་བཟང་རྣམ་སད་མཆོད་ཡོན་ཡིན། 

 

འོན་ཀྱང་དུས་ཀྱིས་ཆེར་སྙིགས་ཚེ། 

འཇམ་དབྱངས་བླ་མས་གསལ་མཛད་དེ། 

རྒྱ་མཚོར་བྱིངས་པའི་རིག་བྱེད་བཞི། 

ཉ་ཡི་གཟུགས་ཀྱིས་བཏོན་པ་བཞིན༌། 

 

འདི་འདྲའི་བསྟན་དང་མཇལ་བཞིན་དུ། 

ལྟར་སྣང་ལམ་ལ་སུ་ཞིག་འཇུག

ལྷ་ཡི་ཆུ་བོ་གང་གཱའི་རྩར། 

བ་ཚྭའི་ཁྲོན་པ་སུ་ཞིག་བརྐོ། 

 

 

 བློ་ཆུང་སྐལ་དམན་ཟབ་ཟབ་ཀྱི། 

གྲགས་པས་བསླུས་ནས་ལོག་པར་འགྲོ། 

སྨིག་རྒྱུ་ཆུ་རུ་འཁྲུལ་པ་ཡི། 

རི་དྭགས་དོན་མེད་སྡུག་བསྔལ་མྱོང༌། 

 

ཆོས་ཀྱི་ལམ་དུ་འཇུག་པ་ལ། 

དང་པོར་དགེ་བའི་བཤེས་གཉེན་བསྟེན། 

རྒྱ་མཚོར་བགྲོད་འདོད་བྱ་བའི་འགོ། 

དེད་དཔོན་མཁས་པ་འཚོལ་བ་ཡིན། 

 

འཇིག་རྟེན་འཇིག་རྟེན་འདས་པ་ཡི། 

དགེ་ལེགས་རྩ་བ་བླ་མ་སྟེ། 

འཛམ་གླིང་རྩི་ཤིང་ལོ་འབྲས་ཀུན། 

མ་དྲོས་མཚོར་གནས་ཀླུ་ཡི་དྲིན། 

 

ང་རྒྱལ་སྤངས་ཏེ་ཞི་དུལ་གྱིས། 

དམ་ཆོས་སྣོད་དུ་རུང་བར་བྱ། 

ཆུ་བོ་སྒང་དུ་མི་གནས་པར། 

དམའ་བའི་གཤོང་དུ་འཁྱིལ་བར་འགྱུར། 

 

ཆོས་ཀུན་ཅིག་ཅར་མི་ཤེས་ཀྱང༌། 

ཅི་ཙམ་ཤེས་བཞིན་དོན་དུ་འགྱུར། 

ཆུ་ཀླུང་རྫོགས་པར་མ་འཐུངས་ཀྱང༌། 

ཅི་ཙམ་བཏུངས་པས་སྐོམ་པ་སེལ། 

 

ཐོས་མང་ཉམས་སུ་མ་བླངས་ན། 

རང་གི་རྒྱུད་ལ་མི་ཕན་ཏེ། 

ཆུ་ནང་ལོ་བརྒྱར་གནས་པ་ཡི། 

རྡོ་བའི་རང་བཞིན་སྐམ་པོར་གནས། 

 

སྟོང་རྐྱལ་གོམ་པའི་རིམ་པ་ཡིས། 

རྟག་འཇུ་རེས་འཇུ་མི་འཇུ་ལྟར། 

ཐོས་བསམ་སྒོམ་པ་སྒྲ་སྤྱི་ལ། 

བརྟེན་པའི་ཚུལ་ཡང་གསུམ་དུ་གསུངས། 

 

མི་ཡི་གྲུ་གཟིངས་རྙེད་དུས་འདིར། 

ཐོས་བསམ་སྒོམ་པའི་བ་དན་ལ། 

བརྟེན་ནས་སྲིད་མཚོ་བརྒལ་བྱ་ཡི། 

གྲུ་འདི་ཕྱི་ནས་རྙེད་པར་དཀའ། 

 

རིགས་དྲུག་སྐྱེ་སྒོ་མཐའ་ཡས་ཀྱང༌། 

དལ་བརྒྱད་ཚང་བ་ཤིན་ཏུ་དཀོན། 

ཆུ་བོ་གྲངས་མེད་འབབ་ན་ཡང༌། 

ཡན་ལག་བརྒྱད་ལྡན་རེ་རེ་ཙམ། 

 

སྐྱེས་པའི་སྐད་ཅིག་དེ་ཉིད་ནས། 

མི་སྡོད་འཆི་བདག་ཁར་ཕྱོགས་ཏེ། 

ཆུ་ཀླུང་སྐད་ཅིག་རེ་རེ་བཞིན། 

ཕྱིར་མི་ལྡོག་པར་རྒྱ་མཚོར་འགྲོ། 

 

 

མི་རྟག་སྲིན་པོས་བཟུང་བཞིན་དུ། 

སོས་བདེར་སྡོད་པ་ག་ལ་རིགས། 

ཆུ་སྲིན་མཆེ་བའི་ཕྲག་གནས་ལ། 

བདེ་བའི་གོ་སྐབས་ནམ་ཡང་མེད། 

 

བསྒྲུབས་ཀྱང་ཕ་མཐར་ཕྱིན་མེད་པའི། 

འཇིག་རྟེན་བྱ་བ་བཙན་ཆོད་བྱ། 

ཆུ་གཉེར་གཅིག་རྗེས་གཅིག་ནོན་དེ། 

ཅི་ཙམ་བདས་ཀྱང་ཟིན་དུས་མེད། 

 

བློ་རིག་སྟོབས་དང་རྩལ་ཆེ་ཡང༌། 

དུས་ཀྱི་ཕོ་ཉས་དབང་མེད་འཆིང༌། 

ཆུ་ཆེན་རླབས་ཀྱི་གར་མཁན་མ། 

དགུན་དུས་འཁྱག་པའི་སྦུབས་སུ་ཚུད། 

 

སྒོ་གསུམ་མི་དགེའི་སྤྱོད་ཚུལ་འདིས། 

ཕྱི་མའི་སྐྱེ་བ་ངན་འགྲོར་ངེས། 

རི་བོའི་ཟོམ་ནས་འབབ་པའི་ཆུ། 

གཡང་ས་བརྒྱུད་མར་བརྡབ་ཅིང་འཕྱོ། 

 

དེ་ནས་ལོ་གྲངས་བྱེ་བ་བརྒྱར། 

བསྲེགས་ཤིང་འཚེད་ཀྱང་འཆི་མི་ནུས། 

རྡོ་སོལ་རི་ལ་ཆར་གྱི་རྒྱུན། 

བབས་པ་བསྐལ་པའི་བར་དུ་ཁོལ། 

 

འཇིག་ཆེན་དེ་ལས་སྐྱོབ་པའི་སྐྱབས། 

བསླུ་མེད་དཀོན་མཆོག་གསུམ་ལས་མེད། 

ཆུ་བོའི་རྒྱུན་གྱིས་ཁྱེར་བ་དེ། 

སྒྲོལ་བྱེད་མཉན་པ་ཁོ་ནར་ངེས། 

 

རྩོམ་ཁུངས། མི་རིགས་དཔེ་སྐྲུན་ཁང་།

དཔྱད་མཆན ཡོངས་སུ་གཟིགས།དཔྱད་མཆན།

མིང་མི་འགོད་པར་སྤེལ།