གཟིམས་པ་མེད་པའི་མཆོད་མེ། དབྱངས་གསལ་སོ་བཞིའི་མཛེས་སྡུག  RSSསྔོན་མངག

༄༅། །མཁས་པ་དང་བླུན་པོ་བརྟག་པའི་བསྟན་བཅོས་དགེ་ལྡན་ལེགས་བཤད་པད་མ་དཀར་བོའི་ཆུན་པོ་ཞེས་བྱ་བ་བཞུགས་སོ།། ༢

2009-11-21 15:21:00 བསོད་ནམས་གྲགས་པ། ཀློག་གྲངས། མཆན ཡོད།

མཁས་པ་ཕམ་པ་ཙམ་གྱིས་ནི།

དགྲ་ལན་ལྡོན་པའི་བློ་སྟོབས་འབྱུང༌།

མདའ་ཡིས་ཕོག་པའི་བྱང་གཡག་གིས།

རྔོན་པ་སྲོག་དང་ཕྲལ་ལ་ལྟོས།

 

བླུན་པོ་ལན་ཅིག་ཕམ་པ་ན།

གཉེན་ལ་འཁང་ཞིང་དགྲ་བློ་ཞི།

ཁྱི་ངན་ལ་ནི་རྡོ་ཕོག་ན།

འཁང་ནས་ཉལ་བའི་སྤྱོད་ཚུལ་ལྟོས།

 

 

མཁས་པ་དོན་གྱི་གལ་ཐུག་ན།

དགྲ་བོ་གང་ལའང་འཇིགས་པ་མེད།

ལྷ་དབང་གཅིག་གིས་ལྷ་མིན་གྱི།

དཔུང་ཚོགས་ཕམ་པའི་བྱུང་བ་ལྟོས།

 

བླུན་པོ་དོན་གྱི་གལ་ཐུག་ན།

ཅུང་ཟད་ཙམ་ལའང་སྐྲག་པ་སྐྱེ།

མི་ལ་ཟགས་སུ་འཁྲུལ་བ་ཡིས།

སྟག་གི་སྙིང་སྲིད་གས་ལ་ལྟོས།

 

མཁས་པ་མང་དུ་འདུས་པ་ན།

བློ་གྲོས་བསྡུས་བས་ལེགས་ལ་སྦྱོར།

གླང་བོ་ལ་སོགས་སྲོག་ཆགས་བཞི།

འཛོམས་ནས་བསླབ་ཁྲིམས་བཅས་ལ་ལྟོས།

 

བླུན་པོ་མང་དུ་འདུས་པ་ན།

བློ་ངན་བསྡུས་བས་ཉེས་ལ་སྦྱོར།

རྫོགས་བྱེད་མང་དུ་འདུས་ནས་ནི།

འཕགས་པ་མདྒལ་བཀྲོངས་ལ་ལྟོས།

 

མཁས་པ་རེ་རེའི་དགེ་མཚན་གྱིས།

རྒྱལ་ཁམས་ཀུན་ལ་བདེ་སྐྱིད་འབྱུང༌།

ཤ་བྱིན་ཞེས་བྱའི་ཆོས་རྒྱལ་གྱིས།

རང་སྲིད་བསྐྱངས་པའི་ཡ་མཚན་ལྟོས།

 

བླུན་པོ་རེ་རེའི་བྱེད་པ་ཡིས།

རྒྱལ་ཁམས་ཀུན་ལ་སྡུག་བསྔལ་འབྱུང༌།

མ་ལ་གནོད་ཀྱི་བྱེད་པ་ཡིས།

ཤཱཀྱའི་རིགས་ནི་ཕུང་ལ་ལྟོས།

 

 

མཁས་པ་ཆགས་སྡང་ཞི་བ་ཡིས།

དགྲ་བོ་དང་ཡང་མཛའ་བ་འཐོབ།

རི་དྭགས་ཤ་བྷས་བསྒྲལ་བ་ཡིས།

རྒྱལ་པོ་དགའ་བའི་ངང་ཚུལ་ལྟོས།

 

བླུན་པོ་ཆགས་སྡང་གོམས་པ་ཡིས།

ཀུན་དང་འཁོན་པ་ངང་གིས་འཐོབ།

དུག་སྦྲུལ་གདུག་པའི་གཟུགས་མཐོང་ན།

སྐྱེ་བོ་མཐའ་དག་བྲོས་ལ་ལྟོས།

 

མཁས་པའི་རྙེད་པ་རྙེད་པ་སྟེ།

འབྱུང་འོས་ཤིག་ལས་བྱུང་བ་ཡིན།

སྐྱེ་བོ་མང་བོས་བཀུར་བ་ཡིས།

སྔོན་གྱི་རྒྱལ་པོའི་ཡ་མཚན་ལྟོས།

 

 

བླུན་པོའི་རྙེད་པ་ལོག་འཚོ་སྟེ།

འབྱུང་མི་འོས་ཤིག་བྱུང་བ་ཡིན།

ལྭ་སྐྱེས་རྒྱལ་པོར་བཀུར་བ་ཡིས།

རི་དྭགས་རྒྱལ་པོས་བསད་ལ་ལྟོས།

 

མཁས་པ་དང་བོ་བརྩམས་ཕྱིན་ཆད།

ཅི་ལ་ཐུག་ཀྱང་ཕ་མཐར་སྐྱེལ།

མེ་འོབས་བརྒལ་ནས་ཚོང་དཔོན་གྱིས།

དྲང་སྲོང་མཆོད་པའི་སྙིང་སྟོབས་ལྟོས།

 

བླུན་པོ་བྱ་བ་གང་བརྩམས་ཀྱང༌།

ཕྱིས་སུ་འཚེངས་པ་གཅིག་ཀྱང་མེད།

ཁྱེའུ་མེ་སྐྱེས་ཕ་ཡིས་ནི།

བུད་མེད་ལྟོ་བ་མཉེས་ལ་ལྟོས།

 

 

མཁས་པས་གཞན་དག་ཅི་ཟེར་ཡང༌།

དོན་ལ་བལྟས་ནས་འཇུག་ལྡོག་བྱེད།

བྲམ་ཟེའི་སློབ་མས་སློབ་དཔོན་གྱིས།

རྐུ་བར་བསྔགས་པ་བཟློག་ལ་ལྟོས།

 

བླུན་པོ་དོན་ལ་མི་ལྟ་བར།

གཞན་གྱིས་བྲིད་པའི་དབང་དུ་གཏོང༌།

སྲིན་མོའི་ངག་བཞིན་ཉན་པ་ཡིས།

ཚོང་མགྲོན་མཐའ་དག་ཕུང་ལ་ལྟོས།

 

མཁས་པ་ཤིན་ཏུ་རྒུད་ན་ཡང༌།

ཟླ་བ་བཞིན་དུ་ཡར་ངོ་འབྱུང༌།

བཙོན་རྭར་འཁོད་པའི་བློན་པོ་མགར།

རྗེས་སུ་ཀུན་ལས་རྒྱལ་ཞེས་གྲགས།

 

བླུན་པོ་ལན་ཅིག་རྒུད་པ་ན།

མར་མེ་བཞིན་དུ་ཟད་པར་འགྱུར།

བཟོད་སྨྲར་རྒོལ་བའི་རྒྱལ་པོ་ཉིད།

འཕྲལ་དུ་བརླགས་པའི་ངང་ཚུལ་ལྟོས།

 

མཁས་པས་གཞན་དག་འཐབ་པ་ན།

ཕན་པའི་སེམས་ཀྱིས་མཐུན་པར་སྒྲུབ།

རྒྱལ་བུ་དད་པས་ཀླུ་རྒྱལ་གཉིས།

མཛའ་བར་བྱས་པའི་དགེ་མཚན་ལྟོས།

 

བླུན་པོས་གཞན་དག་འཐབ་པ་ན།

ཀྱོག་པོའི་སེམས་ཀྱིས་ཅི་དགར་འཇོག

བྱི་བས་གླང་ཆེན་སྲེ་མོང་གཉིས།

བཏང་སྙོམས་བྱས་པས་ཕུང་ལ་ལྟོས།

 

མཁས་པས་ནོར་བསགས་སྦྱིན་པར་གཏོང༌།

དེ་ཡིས་ཁྲོན་ཆུ་བཞིན་དུ་འཕེལ།

འཕྲལ་ལ་མཐོ་ཞེས་ཁྱེའུ་ཡིས།

སངས་རྒྱས་མཆོད་པའི་བསོད་ནམས་ལྟོས།

 

བླུན་པོས་སེར་སྣས་ལོངས་མི་སྤྱོད།

དེ་ཡིས་ཟླ་བ་བཞིན་དུ་འཛད།

སྦྲང་མས་བསགས་པའི་སྦྲང་རྩི་རྣམས།

གཞན་གྱིས་སྤྱད་ནས་ཟད་ལ་ལྟོས།

 

མཁས་པས་དང་བོ་འཐབ་རྩོད་སྤོང༌།

འཐབ་རྟིང་དགྲ་ལ་ནུས་ཐོན་བྱེད།

རྒྱལ་པོ་སྲིད་སྒྲུབ་ཅེས་བྱ་བས།

ཕ་རོལ་དམག་ཚོགས་བཅོམ་ལ་ལྟོས།

 

བླུན་པོས་དང་བོ་འཐབ་རྩོད་སློང༌།

འཐབ་ནས་རྒྱལ་ཁ་དགྲ་ལ་གཏོང༌།

རྒྱལ་པོ་མེ་ལོང་འཛིན་པ་ཡིས།

རྒྱལ་ཁ་བློན་པོར་ཤོར་ཞེས་གྲགས།

 

མཁས་པས་རང་ལ་གནོད་ནུས་པའི།

དགྲ་བོ་ཐོག་མར་ཆམ་ལ་འབེབས།

དེད་དཔོན་རྒྱ་མཚོར་འཇུག་པ་ན།

སྔོན་ལ་ཆུ་སྲིན་གསོད་ཅེས་གྲགས།

 

བླུན་པོས་རང་ལ་གནོད་ངེས་ཀྱང༌།

ཟང་ཟིང་སེམས་ཀྱིས་ཅི་དགར་འཇོག

གཟུགས་ཅན་སྙིང་བོས་ལུས་འཕགས་མ།

བཙུན་མོར་བྱས་པའི་ཉེས་དམིགས་ལྟོས།

 

མཁས་པས་རང་གི་སྙན་གྲགས་གང༌།

སྐྱེ་བོ་གཞན་ལ་བགོ་བཤའ་བྱེད།

རྒྱལ་པོས་བསྟན་པ་བཙུགས་པ་ཡི།

སྙན་གྲགས་འགོས་ཀྱིས་ཐོབ་ལ་ལྟོས།

 

བླུན་པོ་རང་གི་ཉེས་སྐྱོན་རྣམས།

སྐྱེ་བོ་གཞན་ལ་ནན་གྱིས་བགོ

གཡོ་ཅན་གྱིས་ནི་གོ་ཏམ་དྲུང༌།

རང་གྲི་ཁྲག་ཅན་བོར་ལ་ལྟོས།

 

མཁས་པས་ཐབས་ལ་མཁས་པའི་མཐུས།

ཆེན་པོ་རྣམས་ཀྱང་བྲན་དུ་བཀོལ།

མཁའ་ལྡིང་མཐུ་རྩལ་ཆེ་ན་ཡང༌།

གོས་སེར་ཅན་གྱིས་བཞོན་ལ་ལྟོས།

 

བླུན་པོ་ཐབས་ལ་མི་མཁས་པས།

ཆུང་ངུ་རྣམས་ཀྱིའང་བྲན་དུ་འགྱུར།

ཝ་ཡིས་ཁུར་བོ་བསྐུར་བ་ཡིས།

སེདྒ་རྒྱགས་པའི་སྤྱོད་ཚུལ་ལྟོས།

 

རྩོམ་ཁུངས། མི་རིགས་དཔེ་སྐྲུན་ཁང་།

དཔྱད་མཆན ཡོངས་སུ་གཟིགས།དཔྱད་མཆན།

མིང་མི་འགོད་པར་སྤེལ།