གཟིམས་པ་མེད་པའི་མཆོད་མེ། དབྱངས་གསལ་སོ་བཞིའི་མཛེས་སྡུག  RSSསྔོན་མངག

ལེགས་པར་བཤད་པ་ཤིང་གི་བསྟན་བཅོས་ལུགས་གཉིས་ཡལ་འདབ་བརྒྱ་ལྡན་ཞེས་བྱ་བ་ཞུགས་སོ།།༢

2009-11-20 11:04:00 གུང་ཐང་དཀོན་མཆོག་བསྟན་པའི་སྒྲོ ཀློག་གྲངས། མཆན ཡོད།

གཡོག་འཁོར་རྒུད་པའི་སྡེ་དཔོན་ནི། 

རང་ཉིད་འབྱོར་ཡང་ངོ་ཚའི་རྒྱུ། 

སྡོང་པོ་ཅི་ཙམ་སྦོམ་ན་ཡང༌། 

ཡལ་འདབ་མེད་ན་གཅེར་བུ་ཡིན། 

 

སྡོང་རུལ་རྩ་བར་གནས་པའི་མི། 

ཉི་མཚན་ཀུན་ཏུ་བག་ཕེབས་བྲལ། 

གཙོ་བོ་ངན་པའི་གཡོག་འཁོར་ཡང༌། 

རྟག་ཏུ་སེམས་ཁྲལ་གདུང་བས་གཟིར། 

 

དཔོན་ངན་གཡོག་འཁོར་བྲོས་ན་ཡང༌། 

སྡེ་དཔོན་བཟང་པོས་བསྐྲད་ཀྱང་འདུ། 

ཚེར་ཤིང་འབོར་བའི་བྷྲ་མ་ར། 

ཙཱུ་ཏའི་ཤིང་ལས་བསྐྲད་ཀྱང་འཁོར། 

 

 

 རྗེ་དཔོན་གསར་ཚེ་བྱམས་བྱེད་ཀྱང༌། 

ཕྱི་ནས་བསྒྲུབ་དཀའི་དཔྱ་ཁྲལ་འབེབས། 

ཤིང་ལ་ཆར་སྐྱོབ་བྱེད་མོད་ཀྱང༌། 

རྗེས་སུ་ཐིགས་ཕྲེང་ལྩི་བར་འབབ། 

 

ལྗོན་པའི་གྲིབ་བསིལ་ཀུན་ལ་སྙོམས། 

ཉི་ཟླའི་སྣང་བ་ཀུན་ལ་སྙོམས། 

སྤྲིན་བྱི་ཆུ་ཆར་ཀུན་ལ་སྙོམས། 

རྒྱལ་པོའི་བཀའ་ཁྲིམས་ཀུན་ལ་སྙོམས།

 

གཙོ་བོ་བཟང་ཡང་འཁོར་ངན་ན། 

དེ་ཡི་དྲུང་དུ་བསྙེན་པར་དཀའ། 

གདུག་པའི་སྦྲུལ་གྱིས་དཀྲིས་པ་ཡི། 

ཙན་དན་ལྗོན་པ་སུ་ཡིས་བརྟེན། 

 

ཕྱི་ནང་སྨིན་དང་མ་སྨིན་པའི། 

ཨ་མྲའི་འབྲས་བུ་རིགས་བཞིར་གསུངས། 

མི་ཡང་སེམས་དང་སྤྱོད་པ་གཉིས། 

དག་དང་མི་དག་དབྱེ་བ་མང༌།

 

མཁས་པ་ཡོན་ཏན་ཀུན་ལྡན་དེ། 

རློམས་སེམས་མེད་པར་ཞི་ཞིང་དུལ། 

སྙེ་མའི་ཁུར་གྱིས་ལྗིད་པ་ཡི། 

ལྗོན་ཤིང་རྩེ་མོ་དུད་དེ་གནས། 

 

ཡོན་ཏན་མེད་པའི་སྐྱེ་བོ་དེ། 

ང་རྒྱལ་མགོ་འཕང་ཅི་ལས་མཐོ། 

འབྲས་བུའི་བཅུད་ཀྱིས་མི་བཟུང་བའི། 

ལྗོན་པ་རེངས་པ་ཆོས་ཉིད་ཡིན། 

 

ལྷན་སྐྱེས་ཡོན་ཏན་མེད་གྱུར་ན། 

ཕྱི་ཚུལ་བཅོས་པས་ཅི་ལ་ཕན། 

ཡལ་འདབ་མེད་པའི་ཤིང་སྐམ་དེར། 

ཅོད་པན་བཏགས་ཀྱང་ག་ལ་མཛེས། 

 

བསླབ་སྦྱངས་དུས་ན་གཡེལ་བ་དེས། 

མཁས་འདོད་རེ་བ་འབྲས་མེད་ཡིན། 

མེ་ཏོག་སད་ཀྱིས་ཁྱེར་བ་ཡི། 

ཤིང་ལ་འབྲས་བུའི་རེ་བ་མེད། 

 

བློ་གྲོས་རྩལ་དང་མི་ལྡན་ན། 

གོ་ས་མཐོ་ཡང་ཁྲེལ་བའི་གཞི། 

ཤིང་ལས་བྱས་པའི་སེང་གེ་དེ། 

འཇིགས་འཇིགས་འདྲ་ཡང་སྙིང་པོ་མེད། 

 

དྲི་ཞིམ་བསུང་དང་མ་ལྡན་ན། 

ཙན་དན་ཡིན་ཞེས་སྨྲས་ཀྱང་རྫུན། 

དམ་པའི་ཚུལ་དང་མི་མཐུན་ན། 

དམ་པར་ཁས་འཆེ་དོན་དང་བྲལ། 

 

 

དམན་པ་རྒྱལ་སར་བཏོན་ན་ཡང༌། 

མ་རབས་སྤྱོད་པའི་རྗེས་སུ་འཇུག

ཆུ་ཤིང་གྱེན་དུ་སྐྱེས་ན་ཡང༌། 

འདབ་མ་ཐུར་དུ་འཕྱང་བར་གྱུར། 

 

ཨ་གར་དུམ་བུ་བརྒྱར་གཏུབས་ཀྱང༌། 

ལྷན་སྐྱེས་དྲི་བཟང་མི་གཏོང་ལྟར། 

དམ་པ་ཅི་ཙམ་རྒུད་ན་ཡང༌། 

བཟང་པོའི་རང་བཞིན་ག་ལ་འདོར། 

 

ཤུག་པའི་ལོ་མ་མེར་བཅུག་ན། 

ལྷག་པར་དྲི་བཟང་རྒྱས་པ་བཞིན། 

དམ་པ་རྣམས་ལ་གནོད་བྱས་པས། 

ཕྱིར་ཞིང་དེ་ཡི་ཆེ་བ་འདོན། 

 

དམ་པ་དབེན་པར་གནས་ན་ཡང༌། 

གྲགས་སྙན་ལྷ་ཡིས་སྒྲོག་པར་བྱེད། 

ལྷོ་ཡི་རི་ལས་སྐྱེས་པ་ཡི། 

ཙན་དན་དྲི་བསུང་རླུང་གིས་འགྱེལ། 

 

ཁྱོག་པའི་ཤིང་དེ་བསྲངས་ན་ཡང༌། 

རླན་དང་འཕྲད་ཚེ་ཡ་ཡོར་འགྱུར། 

རང་བཞིན་ངན་པ་བཅོས་ན་ཡང༌། 

རྐྱེན་དང་འཕྲད་ཚེ་རང་མཚང་འདོན། 

 

ཀླད་ཆུང་རང་བཞིན་ངན་པ་ལ། 

ཡོན་ཏན་ཡོད་ཀྱང་ཕན་མི་ཐོགས། 

རྩ་བ་དུག་ཏུ་གནས་པ་ཡི། 

མེ་ཏོག་མཛེས་ཀྱང་སུ་ལ་མཁོ། 

 

ཙན་དན་ཤུག་པའི་ཀ་བ་གཉིས། 

གདུང་མ་འདེགས་པའི་ནུས་པ་མཚུངས། 

སྙིང་སྟོབས་ལྡན་ན་དབུལ་ཕྱུག་གཉིས། 

བྱ་བ་བྱེད་པའི་དུས་སུ་འདྲ། 

 

ལོངས་སྤྱོད་མངའ་ཐང་མཉམ་ན་ཡང༌། 

བཟང་ངན་ལས་ལ་སྦྱར་ན་ཤེས། 

ཕྲ་སྦོམ་མཉམ་ཡང་ཆུར་འཕངས་ན། 

ཤིང་གི་མགོ་མཇུག་ཤེས་པར་ནུས། 

 

མཁས་པའི་སྐྱེ་བོ་ཡུལ་གཞན་དུ། 

བྲིན་ཞིང་ཀུན་གྱིས་བཀུར་བར་འགྱུར། 

ནགས་སུ་སྐྱེས་པའི་ཤིང་གིས་ནི། 

གཞན་དུ་ཤིང་གི་བྱ་བ་བྱེད། 

 

ཤིང་བལ་རླུང་གིས་བདས་པ་དེ། 

རི་རྩེར་མི་སྡོད་གཤོང་དུ་ཆགས། 

བློ་ཆུང་ཕྱོགས་མཐར་འཁྱམས་འཁྱམས་ནས། 

མཐའ་མར་རྒུད་པའི་གནས་སུ་ལྷུང༌། 

 

སྐྱོན་གྱིས་གོས་པ་ཆེས་སླ་སྟེ། 

ཡོན་ཏན་སློབ་པ་དེ་ལྟ་མིན། 

ཤིང་ལ་མེ་ལྕེ་མཆེད་སླ་ཡང༌། 

ཆུ་བོ་སོ་སོར་འགྱེས་པར་དཀའ། 

 

རྩོམ་ཁུངས། མི་རིགས་དཔེ་སྐྲུན་ཁང་།

དཔྱད་མཆན ཡོངས་སུ་གཟིགས།དཔྱད་མཆན།

མིང་མི་འགོད་པར་སྤེལ།