གཟིམས་པ་མེད་པའི་མཆོད་མེ། དབྱངས་གསལ་སོ་བཞིའི་མཛེས་སྡུག  RSSསྔོན་མངག

མཁས་པ་དང་བླུན་པོ་བརྟག་པའི་བསྟན་བཅོས་དགེ་ལྡན་ལེགས་བཤད་པད་མ་དཀར་བོའི་ཆུན་པོ་ཞེས་བྱ་བ་བཞུགས་སོ།།༡

2009-11-19 13:12:00 བསོད་ནམས་གྲགས་པ། ཀློག་གྲངས། མཆན ཡོད།

བཅོམ་ལྡན་འདས་ལུགས་གཉིས་ཀྱི་བདག་པོ་ལ་ཕྱག་འཚལ་ལོ།། 

ལུགས་གཉིས་ཇི་བཞིན་མཁྱེན་པ་ཡི།

ཐུབ་དབང་ཞབས་ལ་གུས་བཏུད་ནས།

མཁས་དང་བླུན་པོ་རྣམ་དབྱེ་པའི།

ལེགས་བཤད་མདོ་ཙམ་བསྒྲག་པར་བྱ།

 

མཁས་པ་ཞེས་བྱ་འཇིག་རྟེན་དང༌།

ཆོས་ཀྱི་ཚུལ་ལ་མཁས་པ་སྟེ།

རྣམ་པ་གཉིས་གསུངས་དེ་བཞིན་དུ།

བླུན་པོ་ཡང་ནི་གཉིས་སུ་བཤད།

 

མཁས་པ་དང་བོ་ཚེ་འདི་དང༌།

ཕྱི་མ་དང་བོར་དགེ་འགྱུར་ཞིང༌།

བླུན་པོ་གཉིས་ནི་རིམ་པ་བཞིན།

འདི་དང་ཕྱི་མར་ཕུད་ཞེས་བཤད།

 

དེས་ན་མཁས་དང་བླུན་པོའི་ཁྱད།

རི་རབ་དང་ནི་རྡུལ་ཕྲན་དང༌།

རྒྱ་མཚོ་དང་ནི་ལྟེང་ཀ་དང༌།

ནམ་མཁའ་ལག་མཐིལ་ལྟ་བུ་ཡིན།

 

མཁས་པ་མཁས་པའི་དྲུང་ན་མཛེས།

ཡོན་ཏན་ཇི་བཞིན་མཐོང་བས་ཡིན།

རིན་ཐང་མེད་པའི་ནོར་བུ་དེ།

དེད་དཔོན་ལག་ཏུ་མཛེས་ལ་ལྟོས།

 

བླུན་པོའི་གམ་ན་མཁས་མི་མཛེས།

ཡོན་ཏན་མཐོང་བ་མེད་པས་ནོངས།

ཙན་དན་གསེར་ལས་རིན་ཆེ་བ།

བླུན་པོས་སོལ་བར་བྱས་ལ་ལྟོས།

 

མཁས་པ་མཁས་པའི་ངག་བཞིན་ཉན།

དེ་ལས་ཡོན་ཏན་འོས་པ་འཐོབ།

གྲུ་དཔོན་ལེགས་ཕྱིན་ངག་ཉན་པས།

ཚོང་མགྲོན་དབྱིག་དང་འཕྲད་ཅེས་གྲགས།

 

བླུན་པོ་མཁས་པའི་ངག་མི་ཉན།

དེ་ལས་ཉེས་སྐྱོན་འོས་པ་འཐོབ།

ངང་བའི་ངག་བཞིན་མ་ཉན་པས།

རུས་སྦལ་མཁའ་ལས་ལྷུང་ཞེས་གྲགས།

 

 

མཁས་པ་མཁས་པའི་སྙན་པ་བརྗོད།

དེ་ཡིས་ལུས་ཅན་དང་བ་འདྲེན།

རི་བོང་སེམས་དཔའི་གྲགས་པ་གང༌།

བརྒྱ་བྱིན་གྱིས་ནི་བརྗོད་ལ་ལྟོས།

 

བླུན་པོས་མཁས་པའི་མི་སྙན་བརྗོད།

དེ་ཡིས་ལུས་ཅན་དང་བ་ལྟོས།

མཛའ་བོས་དགེ་སློང་གྱད་ནོར་གྱི།

མི་སྙན་བརྗོད་པའི་བྱུང་བ་ལྟོས།

 

མཁས་པས་མཁས་པ་དབུལ་མཐོང་ན།

ལྷག་པར་སེམས་ཀྱིས་ཡི་རང་བྱེད༌།

དཀའ་ཐུབ་གཙང་མའི་དྲང་སྲོང་ལ།

བརྒྱ་བྱིན་དགྱེས་པའི་བྱུང་བ་ལྟོས།

 

བླུན་པོས་མཁས་པ་དབུལ་མཐོང་ན།

ང་རྒྱལ་སེམས་ཀྱིས་ཁྱད་གསོད་བྱེད།

སྤྲེལ་རྒན་རྣམས་ཀྱིས་མི་བཟུང་ནས།

མཇུག་མ་མེད་ཅེས་བགད་ལ་ལྟོས།

 

མཁས་པས་གོང་མ་ཐོད་བཞིན་ཁུར།

དེ་ཡིས་བདག་ཉིད་གོང་དུ་མཛེས།

བཞིན་བཟང་གིས་ནི་ཡུལ་འཁོར་སྲུང༌།

མཆོག་ཏུ་བཀུར་བའི་ཡ་མཚན་ལྟོས།

 

བླུན་པོས་གོང་མ་ཁྱད་དུ་གསོད།

དེ་ཡིས་བདག་ཉིད་འོག་ཏུ་ལྷུང༌།

གཙུག་ཕུད་ཅན་གྱིས་རང་གི་ཕ།

དགྲ་བཅོན་བསད་པའི་ཉེས་དམིགས་ལྟོས།

 

མཁས་པས་བདེན་པར་སྨྲ་བ་ཡིས།

རང་ཚིག་གཞན་གྱིས་ཚད་མར་བྱེད།

རྒྱལ་པོའི་སྲས་ཀྱིས་བདེན་སྨྲས་པས།

སུ་དཱ་བུ་ཡིས་མཉན་ལ་ལྟོས།

 

བླུན་པོས་རྫུན་པར་སྨྲ་བ་ཡིས།

རང་ཚིག་གཞན་གྱིས་རིས་སུ་འབོར།

མུ་སྟེགས་བྱེད་ཀྱིས་རྫུན་སྨྲས་པས།

ཁྱིམ་བདག་ལུག་གིས་སྤངས་ལ་ལྟོས།

 

བཅོམ་ལྡན་འདས་ལུགས་གཉིས་ཀྱི་བདག་པོ་ལ་ཕྱག་འཚལ་ལོ།། 

 

མཁས་པས་འཕྲལ་དང་ཕྱིས་གཉིས་ལས།

ཕྱིས་སུ་བདེ་བ་མཆོག་ཏུ་བྱེད།

ཐམས་ཅད་སྒྲོལ་གྱི་དཀའ་ཐུབ་ཀྱིས།

ཆོས་སྐུའི་བདེ་བ་ཐོབ་ལ་ལྟོས།

 

བླུན་པོས་འཕྲལ་དང་ཕྱིས་གཉིས་ལས།

འཕྲལ་དུ་བདེ་མ་མཆོག་ཏུ་བྱེད།

རི་དྭགས་རུ་རུས་ཕན་བཏགས་པའི།

མི་ངན་གྱི་ནི་སྤྱོད་ཚུལ་ལྟོས།

 

མཁས་པ་དང་བོ་མཐུན་ཕྱིན་ཆད།

མཛའ་བ་ནམ་ཡང་གཏོང་མི་བྱེད།

སྤྲེའུའི་དབང་བོས་སྤྲེའུའི་ཚོགས།

རྗེས་སུ་བསྐྱངས་པའི་སྤྱོད་ཚུལ་ལྟོས།

 

བླུན་པོ་དང་བོ་མཐུན་ན་ཡང༌།

ཅུང་ཟད་ཙམ་གྱིས་འགྱུར་ལྡོག་བྱེད།

ཤིང་རྟ་མོ་དང་མཛའ་བ་ཡི།

སེང་གེ་ངན་པའི་སྤྱོད་ཚུལ་ལྟོས།

 

མཁས་པ་ལུས་སྟོབས་ཆུང་ན་ཡང༌།

རྣམ་དཔྱོད་རྩལ་གྱིས་དགྲ་ལས་རྒྱལ།

རི་བོང་བློ་དང་ལྡན་པ་ཡིས།

རི་དྭགས་རྒྱལ་པོ་བསད་ཅེས་གྲགས།

 

བླུན་པོ་ལུས་སྟོབས་ཆེ་ན་ཡང༌།

བློ་གྲོས་དམན་པས་དགྲ་དབང་འགྲོ།

ལུས་བོངས་ཆེ་བའི་གླང་བོ་ཉིད།

སྲེ་མོང་དག་གིས་བསད་ལ་ལྟོས།

 

མཁས་པ་ཡོན་ཏན་ཀུན་ལྡན་པས།

གང་དུ་ཕྱིན་པ་དེ་རུ་བྲིན།

རྟ་ཕོ་བཟང་དང་རྒྱན་བཟང་བོ།

ཚོང་འདུས་དག་ལ་བྲིན་ཞེས་གྲགས།

 

བླུན་པོ་ཉེས་པ་ཀུན་ལྡན་པས།

གང་དུ་ཕྱིན་པ་དེ་ནས་ལྡོག

བོང་ཤ་ཡིན་པར་ངོ་ཤེས་ན།

སུས་ཀྱང་ཉོ་བ་མེད་ལ་ལྟོས།

 

མཁས་པ་རང་གི་ཡུལ་ལས་ཀྱང༌།

ཡུལ་ཁམས་གཞན་དུ་མཆོད་པ་ཐོབ།

ནོར་བུ་གཞན་དུ་བྲིན་པ་ཙམ།

རྒྱ་མཚོའི་ནང་དུ་ག་ལ་ཡིན།

 

བླུན་པོ་གང་དུ་གནས་ན་ཡང༌།

ལུས་ཅན་ཀུན་གྱིས་སྤོང་བར་བྱེད།

ཉེས་འོངས་ཞེས་བྱའི་ཁྱིམ་བདག་བུ།

སྐྱེ་བོ་ཀུན་གྱིས་བོར་ལ་ལྟོས།

 

མཁས་པ་དམ་ཚིག་གཙང་བའི་མཐུས།

ཡིད་ལ་འདོད་པའི་དོན་ཆེན་འགྲུབ།

སྲེག་པའི་ཕྲུ་གུ་སེམས་བསྐྱེད་པས།

ཕ་རོལ་མེ་ཆེན་ལོག་ལ་ལྟོས།

 

བླུན་པོ་དམ་ཚིག་མི་གཙང་བས།

མི་འདོན་མཚན་མ་འཕྲལ་དུ་འབྱུང༌།

ཅི་ཚུགས་བྱས་ཀྱང་བརླག་པར་འགྱུར།

མེ་ཡིས་འཇིགས་པའི་འཕགས་སྐྱེས་པོ།

སྐྱེད་མོས་ཚལ་དུ་ཚིག་ལ་ལྟོས།

 

རྩོམ་ཁུངས། མི་རིགས་དཔེ་སྐྲུན་ཁང་།

དཔྱད་མཆན ཡོངས་སུ་གཟིགས།དཔྱད་མཆན།

མིང་མི་འགོད་པར་སྤེལ།