གཟིམས་པ་མེད་པའི་མཆོད་མེ། དབྱངས་གསལ་སོ་བཞིའི་མཛེས་སྡུག  RSSསྔོན་མངག

ལེགས་པར་བཤད་པ་ཤིང་གི་བསྟན་བཅོས་ལུགས་གཉིས་ཡལ་འདབ་བརྒྱ་ལྡན་ཞེས་བྱ་བ་ཞུགས་སོ།། ༡

2009-11-18 12:47:00 གུང་ཐང་དཀོན་མཆོག་བསྟན་པའི་སྒྲོ ཀློག་གྲངས། མཆན ཡོད།

ཨོཾ་བདེ་ལེགས་སུ་གྱུར་ཅིག

རིན་ཆེན་སེམས་ཀྱི་རྩ་བ་བརྟན། །

རླབས་ཆེན་ཚོགས་གཉིས་ཡལ་ག་རྒྱས། །

སྐུ་གསུམ་འབྲས་བཟང་སྙེ་མས་དུད། །

སངས་རྒྱས་ལྗོན་པ་དེ་ལ་འདུད། །

 

སྣང་བ་དཔེ་རུ་ཤར་བ་ཡི། །

རྣལ་འབྱོར་དེ་ལ་གདམས་ངག་མང༌། །

ནགས་ཀླུང་སྟུག་པོའི་དོ་ར་རུ། །

ཤིང་ལོའི་ཕུང་པོ་ཟད་པ་མེད། །

 

དཔག་བསམ་ཤིང་ལ་བརྟེན་བྱས་ན། །

དགོས་འདོད་ཐམས་ཅད་ཆར་དུ་བསྙིལ། །

དེ་བཞིན་བཤེས་གཉེན་དམ་པ་ལ། །

བརྟེན་ན་ལེགས་ཚོགས་ལྷུན་གྱིས་གྲུབ། །

 

བཤེས་ལ་མི་གུས་སྐྱེ་བོ་དེས། །

གཞུང་བརྒྱ་ཤེས་ཀྱང་དོན་མི་འགྱུར། །

ཤིང་སྐམ་ལོ་བརྒྱ་ཆུར་འཕངས་ཀྱང༌། །

ལོ་འདབ་སྐྱེ་བ་སྲིད་ན་མེད། །

 

དད་ལྡན་རང་བཞིན་བཟང་པོ་དེར། །

ཚིགས་བཅད་གཅིག་ཙམ་གྱིས་ཀྱང་ཕན། །

རྐང་འཐུང་གསར་པའི་མྱུ་གུ་དེ། །

ཆུ་ཆར་གཟེགས་མ་ཡིས་ཀྱང་འཕེལ། །

 

ཚེར་མ་ཅན་དང་དུག་ཤིང་གིས། །

མི་དགོས་བཞིན་དུ་ས་འདི་གང༌། །

མི་ཁོམ་ངན་སོང་སྐྱེ་བོ་ནི། །

ས་ཡི་རྡུལ་བཞིན་གྲངས་ལས་འདས། །

 

ཙན་དན་ས་མཆོག་ལྗོན་པ་དེ། །

འཇིག་རྟེན་འདི་ན་སྲིད་པ་ཙམ། །

དལ་འབྱོར་ཚང་བའི་རྟེན་བཟང་ཡང༌། །

བརྒྱ་ལམ་ཐོབ་པ་མ་བཀག་ཙམ། །

 

དལ་འབྱོར་སྙིང་པོ་མ་བླངས་ན། །

དུད་འགྲོའི་རྟེན་དང་གཉིས་སུ་མེད། །

ཨ་མྲའི་འབྲས་བུ་མི་སྤྱོད་ན། །

ཨེ་རཎྜ་དང་ཁྱད་པར་ཅི། །

མདངས་དང་ལོ་འབྲས་མེ་ཏོག་སོགས། །

ལྗོན་པ་གཅིག་ཀྱང་དུས་ཀྱིས་འགྱུར། །

སྐྱེ་རྒ་ན་དང་འཆི་བ་ཡི། །

ཟློས་གར་སྐད་ཅིག་སྐད་ཅིག་བསྒྱུར། །

 

རིང་དུ་འབྲེལ་བའི་ཤིང་ལོ་དེ། །

ལན་གཅིག་བྲུལ་བ་སླར་མི་འབྱོར། །

མཛའ་བ་ཡུན་རིང་འཁོད་འཁོད་ནས། །

ནམ་ཞིག་གཏན་དུ་འབྲལ་བར་འགྱུར། །

 

སྡོང་པོ་གཤགས་གཏུབ་དྲས་པ་ཡིས། །

ཤིང་མཁན་མྱུར་དུ་ངལ་བར་འགྱུར། །

བསྐལ་པར་དེ་འདྲའི་ལས་བསྒྲུབས་ཀྱང༌། །

དམྱལ་སྲུང་རྣམས་ནི་ངལ་བ་མེད། །

 

ཇི་སྲིད་མི་དགེ་མ་ཟད་པ། །

དེ་སྲིད་སྡུག་བསྔལ་འཁོར་མོར་མྱོང༌། །

དུག་གི་ས་བོན་གནས་ཀྱི་བར། །

དུག་ལོ་སྐྱེ་བ་ཆོས་ཉིད་ཡིན། །

 

གང་ཞིག་གསུམ་ལ་སྐྱབས་སོང་བ། །

དེ་ལ་སྲིད་ཞིའི་རྒུད་པ་མེད། །

ལྗོན་པ་ཆེ་ལ་བརྟེན་པ་དེར། །

གཅན་གཟན་གདུག་པས་གཙེ་མི་ནུས། །

 

རྩ་བ་རུལ་བའི་ལྗོན་པ་ལ། །

བརྟེན་པར་བྱེད་པ་བླུན་པོའི་རྟགས། །

རང་ཡང་འཁོར་བར་བྱིང་བ་ལ། །

སྐྱབས་སུ་འཛིན་རྣམས་ཀྱེ་མ་འཁྲུལ། །

 

དུག་དང་སྨན་གྱི་མྱུ་གུ་ལས། །

འབྲས་བུ་འཆོལ་བ་འགར་ཡང་མེད། །

དགེ་དང་མི་དགེའི་ལས་ལས་ཀྱང༌། །

འབྲས་བུ་གཞན་འབྱུང་གནས་མ་ཡིན། །

 

 

ཐོག་མེད་དུས་ནས་བསགས་པའི་ལས། །

བསྐལ་པ་བརྒྱར་ཡང་ཆུད་མི་ཟ། །

ཏ་ལའི་ཤིང་འབྲས་སྟོང་ཕྲག་ལོར། །

སྐམ་ཡང་རླན་དང་འཕྲད་ན་སྐྱེ། །

ས་བོན་ཆུང་སྨིན་ནུ་གྲོ་ཏའི། །

ཡལ་འདབ་རྒྱས་པས་རྒྱང་གྲགས་ཁེབས། །

ཁམ་གཅིག་ཟས་ཀྱི་སྦྱིན་པས་ཀྱང༌། །

འབྲས་བུ་འཁོར་ལོས་བསྒྱུར་བ་འཐོབ། །

 

རྣམ་བཀྲ་སྲིད་པའི་འཁོར་ལོ་འདིར། །

དོན་ལྡན་སྙིང་པོ་འགའ་མ་མཆིས། །

ཆུ་ཤིང་རློན་པའི་སྡོང་པོ་ལ། །

རྩེ་རྟིང་ཀུན་ན་སྙིང་པོ་མེད། །

 

ལྗོན་ཤིང་ལོ་བརྒྱར་སྐྱེས་པ་ཡང༌། །

ནམ་ཞིག་ཚེ་ན་འགྱེལ་བར་འགྱུར། །

སྲིད་པའི་རྩེ་མོར་ཕྱིན་ནས་ནི། །

སླར་ཡང་མི་བཟད་ངན་འགྲོར་འགྲོ། །

 

བུར་ཤིང་ཁུ་བས་རབ་བསྒོས་ན། །

ཏིག་ཏའི་ཁ་བ་སེལ་བར་ནུས། །

ལམ་གྱི་བདེན་པ་རབ་གོམས་པས། །

སྡུག་བསྔལ་རྩ་བ་ཀུན་འབྱུང་སྤོང༌། །

 

ཀ་གདུང་ལྕམ་དང་དྲལ་མ་རྣམས། །

ཚོགས་པས་ཡིད་འོང་ལྡིང་ཁང་སྟེ། །

ལྷག་པའི་བསླབ་པ་གསུམ་ཚོགས་པས། །

ཐར་པ་དམ་པའི་ཁང་བཟང་འགྲུབ། །

 

ཛན་དུའི་ས་བོན་དེའི་ས་བོན། །

གཞན་ལས་སྐྱེ་ཕྱིར་ཐོག་མ་མེད། །

མཐའ་མེད་འཁོར་བར་སྐྱེས་པ་ན། །

ཕ་མར་མ་གྱུར་སུ་ཞིག་ཡོད། །

 

རྟ་གླང་བརྒྱ་ཡི་ཁུར་ལྩི་བ། །

ཤིང་རྟ་ཆེན་པོ་གཅིག་གིས་འདྲེན། །

ཉན་རང་ཀུན་གྱིས་མ་ལོངས་པའི། །

ཁུར་དེ་རྒྱལ་སྲས་ཕྲག་ན་མཛེས། །

 

ཤིང་གཞན་འབྲས་བུ་བླངས་པས་འཛད། །

དཔག་བསམ་ཤིང་འབྲས་ཟད་པ་མེད། །

དགེ་བ་གཞན་འབྲས་སྤྱད་པས་འཛད། །

བྱང་ཆུབ་སེམས་དགེ་ཕྱིར་ཤིང་འཕེལ། །

 

ཡོངས་སྨིན་འབྲས་བུས་སྤ་བ་ཡི། །

རྐང་འཐུང་དེ་ལ་སྐྱེ་བོ་འདུ། །

འཇུངས་མེད་གཏོང་བའི་དཔལ་ཡོན་ཅན། །

དེ་ཡིས་སྐྱེ་དགུའི་རེ་བ་སྐོང༌། །

 

 

མངོན་པར་མཐོ་དང་ངེས་ལེགས་ཀྱི། །

རྩ་བ་ཚུལ་ཁྲིམས་ལས་གཞན་མེད། །

ཡལ་འདབ་གཡུར་དུ་ཟ་བ་ཡི། །

རྩ་བ་སྡོང་བུ་ཉག་གཅིག་ཡིན། །

 

ཚེར་མ་ཟུག་པའི་ལན་དུ་སླར། །

ཁུ་ཚུར་རྡེག་པ་བཞད་གད་རྒྱུ། །

གནོད་བྱེད་ལ་ཡང་སླར་ཁྲོ་བ། །

རང་ཉིད་ཉམས་པའི་རྒྱུ་རུ་ཟད། །

 

རྒྱུ་དུས་བརྩོན་པ་མང་བཏང་ན། །

འབྲས་དུས་ཡོན་ཏན་ཐམས་ཅད་སྐྱེ། །

རྩ་བ་རླན་དང་མ་བྲལ་ན། །

རྩེ་མོར་ལོ་འབྲས་སྨིན་པར་འགྱུར། །

སྡོང་པོ་རླུང་གིས་ཆེར་བསྐྱོད་ན། །

འབྲས་སུ་ས་ལ་འབྲུལ་བ་ལྟར། །

བྱིང་རྒོད་གཡེང་བས་རབ་གཡོས་པས། །

ཏིང་འཛིན་དམིགས་པ་སྟོར་བར་བྱེད། །

 

བསམ་གཏན་རྣམ་པར་དག་པ་ལས། །

མངོན་ཤེས་ལ་སོགས་ཡོན་ཏན་འབྱུང༌། །

སྡོང་བུ་ཉམས་པ་མེད་གྱུར་ན། །

མེ་ཏོག་གེ་སར་མགོ་ལྕོག་ལྡེམ། །

 

ཤིང་གི་རལ་གྲི་གཡུལ་གྱི་ངོར། །

འཕྱར་བ་དགྲ་ཡི་དགའ་སྟོན་ཡིན། །

ལྟར་སྣང་ཉི་ཚེའི་ལྟ་བ་ཡིས། །

སྲིད་རྩ་གཅོད་འདོད་ཀྱེ་ཧུད་མཚར། །

 

ཧ་རི་ཙན་དན་བཟང་པོ་ཡིས། །

ལུས་ཀྱི་ཚ་གདུང་སེལ་བར་བྱེད། །

སྙིང་རྗེའི་བཅུད་ལྡན་ལྟ་བ་ཡིས། །

དུག་གསུམ་ནད་བརྒྱ་དྲུང་ནས་འབྱིན། །

 

ཤིང་ལས་སྐྱེས་པའི་སྲིན་འབུ་ཡིས། །

ཤིང་དེ་ཟད་པར་བྱེད་པ་བཞིན། །

འདོད་ཆགས་ལས་སྐྱེས་ཡེ་ཤེས་ཀྱིས། །

འདོད་ཆགས་ཉེས་པ་ཞི་བར་བྱེད། །

 

ཤིང་སྐྱ་རླན་གྱིས་ཟིན་པ་ལས། །

བཻཌཱུར་མདངས་སུ་འཕོ་བ་ལྟར། །

ཐ་མལ་སྣང་བ་འོད་གསལ་གྱིས། །

སྦྱངས་ཏེ་དག་པའི་ལྷ་སྐུར་སྡང༌། །

 

ཡལ་འདབ་ཡོངས་སུ་རྫོགས་པ་ཡི། །

ལྗོན་པའི་གྲིབ་མ་ཀུན་ཏུ་བསིལ། །

ཡོན་ཏན་མ་ལུས་རྫོགས་པ་ཡི། །

རྒྱལ་བ་སྐྱེ་དགུའི་མགོན་དུ་གྱུར། །

 

 དེ་ལྟར་ཤིང་གི་བསྟན་བཅོས་ལས། །

ཆོས་ཀྱི་ལམ་བསྟན་སརྒ་སྟེ། །

ད་ནི་འཇིག་རྟེན་ཚུལ་ལུགས་འགའ། །

བཤད་དོ་རྣ་བ་བླགས་ཏེ་ཉོན། །

 

ཆོས་ལྡན་རྒྱལ་པོའི་གཟི་བྱིན་གྱིས། །

དགྲ་སྡེ་རྣམས་ཀྱང་དབང་དུ་འདུ། །

མ་ལ་ཡར་སྐྱེས་དྲི་བསུང་དེ། །

བུང་བ་འགུགས་པའི་ཕོ་ཉ་ཡིན། །

 

རྒྱལ་ངན་ཆབ་འབངས་གཟིར་བ་དེར། །

ནམ་ཞིག་གཡོག་ཀྱང་འཁོར་མི་འགྱུར། །

སྲན་ཕུང་དབྱུག་པས་གཏོར་ན་ཡང༌། །

དབྱུག་པའི་ངོས་ལ་འབྱར་མི་སྲིད། །

 

བློན་དང་འབངས་ཀྱིས་མ་བཀུར་ན། །

རྒྱལ་པོ་ཆེན་པོ་ཇི་ལྟར་གནས། །

གདུང་མ་ཀ་བས་མ་བཏེགས་ན། །

རྒྱལ་པོའི་ཕོ་བྲང་གང་ལས་འབྱུང༌། །

 

རྗེ་དཔོན་བཟང་པོའི་བཀའ་དྲིན་གྱིས། །

གཡོག་འཁོར་མངའ་ཐང་དར་བར་གྱུར། །

ལྗོན་པ་ཆེ་ལ་བརྟེན་པ་ཡིས། །

འཁྲི་ཤིང་རྩེ་མོ་དགུང་ལ་བསྙེགས། །

 

ཚེར་མའི་ཤིང་ལ་བརྟེན་བྱས་ན། །

གནད་དུ་ཟུག་པའི་སྡུག་བསྔལ་སྐྱེ། །

སྐྱེ་བོ་ངན་ལ་བརྟེན་བྱས་ཀྱང༌། །

ཕྱི་ཕྱིར་སྡུག་བསྔལ་འབའ་ཞིག་བསྐྱེད། །

 

ཆབ་འབངས་བདེ་སྐྱིད་རྒྱས་པ་དེ། །

རྗེ་དཔོན་ཉིད་ཀྱི་ཆེ་བའི་རྟགས། །

རབ་རྒྱས་ཡལ་གའི་ཁྱོན་ཡངས་པ། །

སྡོང་པོ་རྩ་བའི་མཛེས་རྒྱན་ཡིན། །

 

 


རྩོམ་ཁུངས། མི་རིགས་དཔེ་སྐྲུན་ཁང་།

དཔྱད་མཆན ཡོངས་སུ་གཟིགས།དཔྱད་མཆན།

མིང་མི་འགོད་པར་སྤེལ།