གཟིམས་པ་མེད་པའི་མཆོད་མེ། དབྱངས་གསལ་སོ་བཞིའི་མཛེས་སྡུག  RSSསྔོན་མངག

ཁམས་སྤྲུལ་བསྟན་འཛིན་ཆོས་ཀྱི་ཉི་མའི་མཛད་རྣམ་ཤིན་ཏུ་བསྡུས་པ།

2014-12-12 04:16:22 དུང་དཀར་བློ་བཟང་འཕྲིན་ལས། ཀློག་གྲངས། མཆན ཡོད།

 འབྲུག་ཁམས་སྤྲུལ་སྐུ་ཕྲེང་གཉིས་པ་ངག་དབང་ཀུན་དགའ་བསྟན་འཛིན་གྱི་སྐུ་ཕྲེང་རྗེས་མ་ཡིན། རབ་བྱུང་བཅུ་གཉིས་པའི་ལྕགས་ཁྱི(༡༧༣༠)ལོར་རྫ་སྟོད་དཔོན་ཚང་གི་ཁྱིམ་དུ་འཁྲུངས། དགུང་ལོ་བཞིར་ཕེབས་སྐབས། མདོ་ཁམས་ལྷ༌་ཐོག་རྒྱལ་པོའི་མངའ་ཁོངས་ཁ་སྟག་དཀར་མོའི་རི་ཁུག་ཁམས་པ་དགོན་ཕུན་ཚོགས་ཆོས་འཁོར་གླིང་གི་སྤྲུལ་སྐུར་ངོས་འཛིན་ཞུས། སི་ཏུ་རིན་པོ་ཆེ་ཆོས་ཀྱི་འབྱུང་གནས་དང་༌། འབྲུག་བདེ་ཆེན་ཆོས་འཁོར་གྱི་ཡོངས་འཛིན་འཇམ་དཔལ་དཔའ་བོ་སོགས་མཁས་གྲུབ་ཀྱི་བླ་མ་མང་པོ་བསྟེན་ནས་མདོ་སྔགས་རིག་གནས་དང་བཅས་པར་ཐོས་བསམ་
ངོམས་པ་མེད་པར་གནང་སྟེ་གཞུང་འགྲེལ་ཁག་མང་ལྗགས་རྩོམ་མཛད་ཅིང༌། ལྷག་པར་དམ་པ་དེས་རབ་བྱུང་བཅུ་གསུམ་པའི་ལྕགས་སྟག(༡༧༧༠)ལོར་མཛད་པའི་སྙན་ངག་གི་འགྲེལ་པ《རྒྱན་གྱི་བསྟན་བཅོས་དབྱངས་ཅན་ངག་གི་རོལ་མཚོ》ནི་སི་ཏུ་རིན་པོ་ཆེ་ཆོས་ཀྱི་འབྱུང་གནས་ཀྱི་དྲུང་་ནས《སྙན་ངག་མེ་ལོང་མ》དང༌། 《སྒྲ་ཙནྡྲ་པ》 《སྡེབས་སྦྱོར》སོགས་གསན་གྲུབ་རྗེས་དགུང་ལོ་ཉེར་ལྔ་པ་རབ་བྱུང་བཅུ་གསུམ་པའི་ཤིང་ཁྱི(༡༧༥༤)ལོར་ལྗགས་རྩོམ་གནང་ཞིང༌། དེ་ནས་ལོ་བཅུ་དྲུག་གི་རིང་མཛད་འཕྲིན་རྒྱ་ཆེ་མང་པོའི་ཞོར་ལ་ཁ་སྣོན་དང་དག་བཅོས་ཡང་ཡང་མཛད་དེ་་་་་
མཐར་དགུང་ལོ་ཞེ་གཅིག་པ་རབ་བྱུང་བཅུ་གསུམ་པའི་ལྕགས་སྟག(༡༧༧༠)ལོར་ཡོངས་སུ་གྲུབ་པར་མཛད་ནས་དབུས་གཙང་ཁམས་གསུམ་དུ《ཁམས་འགྲེལ་ཆེན་མོ》ཞེས་མཁས་དབང་ཕལ་ཆེ་བས་བསྔགས་བརྗོང་ཀྱི་མཚན་སྙན་ཡོངས་སུ་ཁྱབ་པ་ཞིག་ཡིན། དགུང་ལོ་བཅུ་དྲུག་པ་ཤིང་་གླང(༡༧༤༥)ལོར་ཁ་སྟག་དཀར་མོའི་རི་ཁུག་ནས་ཁམས་པ་སྒར(དེང་སང་ཆབ་མདོ་རྫོང་ཁོངས)དུ་ཕུན་ཚོགས་གླིང་དགོན་པ་གནས་སྤོས་མཛད་དེ་དགོན་གནས་རྟེན་གསུམ་དང་བཅས་པ་གསར་བཞེངས། གྱིང་ཕུ་དཔལ་གྱི་ཡང་དབེན་དུ་མཚན་ཉིད་དགོན་རྣམ་རྒྱལ་ཆོས་འཁོར་གླིང༌། སྒ་ཉག་དཀར་མོ་རིའི་ཡང་དགོན་དུ་སྒྲུབ་སྡེ་གསང་ཆེན་མཐོང་གྲོལ་གླིང་བཅས་དགོན་སྡེ་ཆེན་པོ་གསུམ་ཕྱག་བཏབ། བསྟན་འགྲོའི་དོན་རྒྱ་ཆེར་མཛད། མཐར་དགུང་ལོ་ལྔ་བཅུར་ཕེབས་པ་རབ་བྱུང་བཅུ་གསུམ་པའི་ས་ཕག་(༡༧༧༩)ལོར་ཕུན་ཚོགས་ཆོས་འཁོར་གླིང་དུ་སྐུ་གཤེགས།
  དམ་པ་འདིར་ཁམས་སྤྲུལ་ཞེས་པའི་མཚན་ཐོགས་སྟངས་སྐོར། རབ་བྱུང་བཅུ་པའི་ས་སྦྲུལ(༡༥༤༨)ལོར་ཁམས་ཁོ་ཚ་རིན་ཆེན་སྒང་དུ་འཁྲུངས་པ་ཁམས་པ་གྲུབ་ཆེན་ཀརྨ་བསྟན་འཕེལ་ཞུ་བ་ཞིག་བྱུང་བ་དེས་སྟག་ལུང་མ་ཐང་གི་གདན་ས་རི་བོ་ཆེར་ཆོས་ཞུགས་མཛད་དེ། རྗེ་དྲུང་མཚོ་་སྐྱེས་རྡོ་རྗེ་སོགས་བསྟེན་ནས་སྟག་ལུང་གི་ཆོས་རྒྱུན་ཆ་ཚང་བར་གསན། ཀརྨ་པ་སྐུ་ཕྲེང་དགུ་པ་དབང་ཕྱུག་རྡོ་རྗེའི་དྲུང་ནས་བསྙེན་རྫོགས་བཞེས། རྗེས་སུ་འབྲུག་པ་བཀའ་བརྒྱུད་ཀྱི་བླ་མ་ལྷ་རྩེ་བ་ངག་དབང་བཟང་པོ་བསྟེན་ནས་འབྲུག་པའི་ཆོས་རྒྱུན་ཆ་ཚང་གསན་ཏེ་བླ་མས་ལུང་བསྟན་པ་ལྟར་ཁམས་སུ་བྱོན། རྡོ་རྗེའི་ཡང་རྫོང་དང་ཊཱ་ཀིའི་གསང་ཕུག་སོགས་སུ་སྒྲུབ་པ་ཉམས་བཞེས་གཙོ་བོར་མཛད་ཅིང་༌། ཞོར་ལ་སློབ་མ་རྣམས་ལ་ཆོས་འཆད་སྤེལ་གནང་བས་སློབ་མ་གྲགས་ཅན་རྒྱ་མཚོ་རྣམ་དགུས་མཚོན་བསམ་གྱིས་མི་ཁྱབ་པ་བྱུང་བར་བརྟེན་རྒྱལ་བ་མདོ་ཁམས་པ་ཞེས་ཡོངས་སུ་གྲགས་པའི་མཚན་ཆགས། དེའི་སྐུ་ཕྲེང་རྗེས་མཁམས་པ་ངག་དབང་ཀུན་དགའ་བསྟན་འཛིན་ནི། ཡུལ་དབུས་གངས་དཀར་རྫོང་ཞོལ་བདེ་སྐྱིད་གླིང་དུ་རབ་བྱུང་་བཅུ་གཅིག་པའི་ལྕགས་སྤྲེལ(༡༦༢༠)ལོར་འཁྲུངས་ཤིང༌། འབྲུག་པ་སྐྱབས་མགོན་མི་ཕམ་ཆོས་ཀྱི་དབང་པོ་ལ་གཙུག་ཕུད་ཕུལ་བས་མཚན་ངག་དབང་ཀུན་དགའ་བསྟན་འཛིན་དུ་གསོལ། རིག་གནས་སྤྱི་དང་ལྷག་པར་གསོ་བ་རིག་པ་ལ་མཁས། འབྲུག་ཁམས་པ་གྲུབ་དབང་ཀརྨ་བསྟན་འཕེལ་གྱི་ཡང་སྲིད་དུ་ངེས་པས་ཁམས་སུ་གདན་དྲངས། དེའི་སྤྲུལ་སྐུ་དགེ་རྒྱས་དཔོན་ཚང་དུ་སྐུ་འཁྲུངས་ཤིང༌། སི་ཏུ་རིན་པོ་ཆེའི་སློབ་མར་གྱུར་པ་དེ་ཡིན་ཚུལ་སོགས་ཀྱི་ལོ་རྒྱུས་མདོར་བསྡུས་ཤིག《གུ་བཀྲ་ཆོས་འབྱུང》ལྕགས་དཔར་མའི་ཤོག་གྲངས༥༨༨ནས༥༨༩བར་གསལ།

   
 

རྩོམ་ཁུངས། དུང་དཀར་ཚིག་མཛོད་ཆེན་མོ།

དཔྱད་མཆན ཡོངས་སུ་གཟིགས།དཔྱད་མཆན།

མིང་མི་འགོད་པར་སྤེལ།