ཉིན་གཅིག་ནམ་མཁའ་ན་བྱ་རྒྱལ་རྒོད་པོ་གཅིག་གིས་ནམ་འཕང་དགུང་ལ་བསྟོད་པ་མཐོང་ནས་མགུར་འདི་བླངས་སོ། །
  ཕྱོགས་བཞི་གཅིག་ལ་འགྲོ་འདོད་ནས། ། དགུང་སྔོན་དཀྱིལ་ན་འཁོར་བཞིན་དུ། ། ནམ་འཕང་བསྟོད་པའི་བྱ་རྒྱལ་རྒོད། ། ཁྱོད་ཀྱིས་ང་ཡི་འཕྲིན་འདི་སྐྱོལ། ། ཤར་གྱི་ཕྱོགས་སུ་ཁྱོད་འགྲོ་ན། ། ཤར་ཕྱོགས་རྡོ་རྗེ་སེམས་དཔའ་
ལ། །མི་རྣམས་འཆི་དུས་ཁྱོད་བྱོན་ལ། ། མངོན་པར་དགའ་བར་དྲོངས་ཤིག་གྱིས། ། ཤར་ཕྱོགས་ལུས་འཕགས་ཡུལ་གྱི་མི། ། གཟུགས་བྱེད་མཛེས་པ་ཚེ་རབས་སྔོན། ། བཟོད་པ་བསྒོམས་པའི་འབྲས་བུ་ཡིན།  ། ད་དུང་བཟོད་པ་སྒོམས་ཤིག་གྱིས།   ། ལྷོ་ཡི་ཕྱོགས་སུ་ཁྱོད་འགྲོ་ན། ། ལྷོ་ཕྱོགས་རིན་ཆེན་འབྱུང་ལྡན་ལ། ། མི་རྣམས་འཆི་དུས་ཁྱོད་བྱོན་ནས། ། དཔལ་དང་ལྡན་པར་དྲོངས་ཤིག་གྱིས། ། ལྷོ་ཕྱོགས་འཛམ་བུ་གླིང་བའི་མི། ། དགེ་སྡིག་ཤེས་པ་ཚེ་རབས་སྔོན། ། ཆོས་ལ་སྦྱངས་པའི་འབྲས་སུ་ཡིན། ། ད་དུང་ཆོས་ལ་སྦྱོངས་ཤིག་གྱིས། ། ནུབ་ཀྱི་ཕྱོགས་སུ་ཁྱོད་འགྲོ་ན། ། ནུབ་ཕྱོགས་སྣང་བ་མཐའ་ཡས་ལ། ། མི་རྣམས་འཆི་དུས་ཁྱོད་བྱོན་ནས། ། བདེ་བ་ཅན་དུ་དྲོངས་ཤིག་
གྱིས། ། ནུབ་ཕྱོགས་བ་གླང་སྤྱོད་ཀྱི་མི། ། ལོངས་སྤྱོད་ཆེ་བ་ཚེ་རབས་སྔོན། ། སྦྱིན་པ་བཏང་བའི་འབྲས་བུ་ཡིན། ། ད་དུང་སྦྱིན་པ་ཐོངས་ཤིག་གྱིས། ། བྱང་གི་ཕྱོགས་སུ་ཁྱོད་འགྲོ་ན། །བྱང་ཕྱོགས་དོན་ཡོད་གྲུབ་པ་ལ། ། མི་རྣམས་འཆི་དུས་ཁྱོད་བྱོན་ལ། ། ལས་རབ་རྫོགས་སུ་དྲོངས་ཤིག་གྱིས། ། བྱང་ཕྱོགས་སྒྲ་མི་སྙན་གྱི་མི། ། ཚེ་ཐག་རིང་བ་ཚེ་རབས་སྔོན། །     གཞན་སྲོག་བསྐྱབས་པའི་འབྲས་བུ་ཡིན། ། ད་དུང་གཞན་སྲོག་སྐྱོབས་ཤིག་གྱིས། །ཞེས་བླངས་པའི་ཚེ་ཡར་ཇེ་མཐོ་ཇེ་མཐོར་སོང་ནས།  ཤར་ཕྱོགས་སུ་འགྲོ་བ་ལ་མིག་གིས་བལྟས་ནས་མཐོང་བ་དང༌། ང་ལ་ཡང་རྫུ་འཕྲུལ་ཐོགས་པ་མེད་པ་ཞིག་ཡོད་ན་བྱ་རྒོད་ཡ་ཀི་ལྟར།   ཕྱོགས་བཞིའི་ཞིང་ཁམས་རྣམས་ཡིད་ལ་བྱས་ཏེ་ཕྱོགས་དེ་རྣམས་སུ་ཕྱག་མང་པོ་བཙལ། ། ནམ་ཞིག་འཆི་དུས་ཞིང་ཁམས་དེ་དག་ཏུ་འདྲེན་པའི་སྨོན་ལམ་ཡང་བཏབ་བོ། །
 

རྩོམ་ཁུངས། ངེད་དྲ་བ།