གཟིམས་པ་མེད་པའི་མཆོད་མེ། དབྱངས་གསལ་སོ་བཞིའི་མཛེས་སྡུག  RSSསྔོན་མངག

ཀརྨ་རང་བྱུང་རྡོ་རྗེའི་གསུང་ཕྱག་ཆེན་སྨོན་ལམ།

2009-11-17 10:29:00 ཀརྨ་རང་བྱུང་རྡོ་རྗེ། ཀློག་གྲངས། མཆན ཡོད།


ན་མོ་གུ་རུ། བླ་མ་ལ་ཕྱག་འཚལ།

བླ་མ་རྣམས་དང་ཡི་དམ་དཀྱིལ་འཁོར་ལྷ།།

ཕྱོགས་ཀྱི་དུས་གསུམ་རྒྱལ་བ་སྲས་དང་བཅས།།

བདག་ལ་བརྩེ་དགོངས་བདག་གི་སྨོན་ལམ་རྣམས།།

ཇི་བཞིན་འགྲུབ་པའི་མཐུན་འགྱུར་བྱིན་བརླབས་མཛོད།།

 

བདག་དང་མཐའ་ཡས་སེམས་ཅན་ཐམས་ཅད་ཀྱི།།

བསམ་སྦྱོར་རྣམ་དག་གངས་རི་ལས་སྐྱེས་པའི།།

འཁོར་གསུམ་རྙོག་མེད་དགེ་ཚོགས་ཆུ་རྒྱུན་རྣམས།།

རྒྱལ་བ་སྐུ་བཞིའི་རྒྱ་མཚོར་འཇུག་གྱུར་ཅིག།

 

ཇི་སྲིད་དེ་མ་ཐོབ་པ་དེ་སྲིད་དུ།།

སྐྱེ་དང་སྐྱེ་བ་ཚེ་རབས་ཀུན་ཏུ་ཡང་།།

སྡིག་དང་སྡུག་བསྔལ་སྒྲ་ཡང་མི་གྲགས་ཅིང་།།

བདེ་དགེ་རྒྱ་མཚོའི་དཔལ་ལ་སྤྱོད་པར་ཤོག།

 

དལ་འབྱོར་མཆོག་ཐོབ་དད་བརྩོན་ཤེས་རབ་ལྡན།།

བཤེས་གཉེན་བཟང་བསྟེན་གདམས་པའི་བཅུད་ཐོབ་ནས།།

ཚུལ་བཞིན་བསྒྲུབ་ལ་བར་ཆད་མ་མཆིས་པར།།

ཚེ་རབས་ཀུན་ཏུ་དམ་ཆོས་སྤྱོད་པར་ཤོག།

 

ལུང་རིག་ཐོས་པས་མི་ཤེས་སྒྲིབ་ལས་གྲོལ།།

མན་ངག་བསམ་པས་ཐེ་ཚོམ་མུན་ནག་བཅོམ།།

སྒོམ་བྱུང་འོད་ཀྱིས་གནས་ལུགས་ཇི་བཞིན་གསལ།།

ཤེས་རབ་གསུམ་གྱི་སྣང་བ་རྒྱས་པར་ཤོག།

 

རྟག་ཆད་མཐའ་བྲལ་བདེན་གཉིས་གཞི་ཡི་དོན།།

སྒྲོ་སྐུར་མཐའ་བྲལ་ཚོགས་གཉིས་ལམ་མཆོག་གིས།།

སྲིད་ཞིའི་མཐའ་བྲལ་དོན་གཉིས་འབྲས་ཐོབ་པའི།།

གོལ་འཆུག་མེད་པའི་ཆོས་དང་ཕྲད་པར་ཤོག།

 

སྦྱང་གཞི་སེམས་ཉིད་གསལ་སྟོང་ཟུང་འཇུག་ལ།།

སྦྱོང་བྱེད་ཕྱག་ཆེན་རྡོ་རྗེའི་རྣལ་འབྱོར་ཆེས།།

སྦྱང་བྱ་གློ་བུར་འཁྲུལ་པའི་དྲི་མ་རྣམས།།

སྦྱངས་འབྲས་དྲི་བྲལ་ཆོས་སྐུ་མངོན་པར་ཤོག།

 

གཞི་ལ་སྒྲོ་འདོགས་ཆོད་པ་ལྟ་བའི་གདེངས།།

དེ་ལ་མ་ཡེངས་སྐྱོང་བ་སྒོམ་པའི་གནད།།

སྒོམ་དོན་ཀུན་ལ་རྩལ་སྦྱོང་སྤྱོད་པའི་མཆོག།

ལྟ་སྒོམ་སྤྱོད་པའི་གདེངས་དང་ལྡན་པར་ཤོག།

 

ཆོས་རྣམས་ཐམས་ཅད་སེམས་ཀྱི་རྣམ་འཕྲུལ་ཏེ།།

སེམས་ནི་སེམས་མེད་སེམས་ཀྱི་ངོ་བོས་སྟོང་།།

སྟོང་ཞིང་མ་འགག་ཆིར་ཡང་སྣང་བ་སྟེ།།

ལེགས་པར་བརྟག་ནས་གཞི་རྩ་ཆོད་པར་ཤོག།

 

ཡོད་མ་མྱོང་བའི་རང་སྣང་ཡུལ་དུ་འཁྲུལ།།

མ་རིག་དབང་གིས་རང་རིག་བདག་ཏུ་འཁྲུལ།།

གཉིས་འཛིན་དབང་གིས་སྲིད་པའི་ཀློང་དུ་འཁྱམ།།

མ་རིག་འཁྲུལ་པའི་རྩད་བདར་ཆོད་པར་ཤོག།

 

ཡོད་པ་མ་ཡིན་རྒྱལ་བས་ཀྱང་མ་གཟིགས།།

མེད་པ་མ་ཡིན་འཁོར་འདུས་ཀུན་གྱི་གཞི།།

འགལ་འདུ་མ་ཡིན་ཟུང་འཇུག་དབུ་མའི་ལམ།།

མཐའ་བྲལ་སེམས་ཀྱི་ཆོས་ཉིད་རྟོགས་པར་ཤོག།

 

འདི་ཡིན་ཞེས་པ་གང་གིས་མཚོན་པ་མེད།།

འདི་མིན་ཞེས་བྱ་གང་གིས་བཀག་པ་མེད།།

བློ་ལས་འདས་པའི་ཆོས་ཉིད་འདུས་མ་བྱས།།

ཡང་དག་དོན་གྱི་མཐའ་ནི་ངེས་པར་ཤོག།

 

འདི་ཉིད་མ་རྟོགས་འཁོར་བའི་རྒྱ་མཚོར་འཁོར།།

འདི་ཉིད་རྟོགས་ན་སངས་རྒྱས་གཞན་ན་མེད།།

ཐམས་ཅད་འདི་ཡིན་འདི་མིན་གང་ཡང་མེད།།

ཆོས་ཉིད་ཀུན་གཞིའི་མཚང་ནི་རིག་པར་ཤོག།

 

སྣང་ཡང་སེམས་ལ་སྟོང་ཡང་སེམས་ཡིན་ཏེ།།

རྟོགས་ཀྱང་སེམས་ལ་འཁྲུལ་ཡང་རང་གི་སེམས།།

སྐྱེས་ཀྱང་སེམས་ལ་འགགས་ཀྱང་སེམས་ཡིན་པས།།

སྒྲོ་འདོགས་ཐམས་ཅད་སེམས་ལ་ཆོད་པར་ཤོག།

 

བློས་བྱས་རྩོལ་བའི་སྒོམ་གྱིས་མ་བསླད་ཅིང་།།

ཐ་མལ་འདུ་འཛི་རླུང་གིས་མ་བསྐྱོད་པར།།

མ་བཅོས་གཉུག་མ་རང་བབས་འཇོག་ཤེས་པའི།།

སེམས་དོན་ཉམས་ལེན་མཁས་ཤིང་སྐྱོང་བར་ཤོག།

 

ཕྲ་རགས་རྟོག་པའི་རྦ་རླབས་རང་སར་ཞི།།

གཡོ་མེད་སེམས་ཀྱི་ཆུ་བོ་ངང་གིས་གནས།།

བྱིང་རྨུགས་རྙོག་པའི་དྲི་མ་དང་བྲལ་བའི།།

ཞི་གནས་རྒྱ་མཚོ་མི་གཡོ་བརྟན་པར་ཤོག།

 

བལྟར་མེད་སེམས་ལ་ཡང་ཡང་བལྟས་པའི་ཚེ།།

མཐོང་མེད་དོན་ནི་ཇི་བཞིན་ལྷག་གེར་མཐོང་།།

ཡིན་མིན་དོན་ལ་ཐེ་ཚོམ་ཆོད་པ་ཉིད།།

འཁྲུལ་མེད་རང་ངོ་རང་གིས་ཤེས་པར་ཤོག།

 

ཡུལ་ལ་བལྟས་པས་ཡུལ་མེད་སེམས་སུ་མཐོང་།།

སེམས་ལ་བལྟས་པས་སེམས་མེད་ངོ་བོས་སྟོང་།།

གཉིས་ལ་བལྟས་པས་གཉིས་འཛིན་རང་སར་གྲོལ།།

འོད་གསལ་སེམས་ཀྱི་གནས་ལུགས་རྟོགས་པར་ཤོག།

 

ཡིད་བྱེད་བྲལ་བ་འདི་ནི་ཕྱག་རྒྱ་ཆེ།།

མཐའ་དང་བྲལ་བ་དབུ་མ་ཆེན་པོ་ཡིན།།

འདི་ནི་ཀུན་འདུས་རྫོགས་ཆེན་ཞེས་ཀྱང་བྱ།།

གཅིག་ཤེས་ཀུན་དོན་རྟོགས་པའི་གདེངས་ཐོབ་ཤོག།

 

ཞེན་པ་མེད་པའི་བདེ་ཆེན་རྒྱུན་ཆད་མེད།།

མཚན་འཛིན་མེད་པས་འོད་གསལ་སྒྲིབ་གཡོགས་བྲལ།།

བློ་ལས་འདས་པས་མི་རྟག་ལྷུན་གྱིས་གྲུབ།།

རྩོལ་མེད་ཉམས་མྱོང་རྒྱུན་ཆེད་མེད་པར་ཤོག།

 

བཟང་ཞེན་ཉམས་ཀྱི་འཛིན་པ་རང་སར་གྲོལ།།

ངན་རྟོག་འཁྲུལ་པ་རང་བཞིན་དབྱིངས་སུ་དག

ཐ་མལ་ཤེས་པ་སྤང་བླང་བྲལ་ཐོབ་མེད།།

སྤྲོས་བྲལ་ཆོས་ཉིད་བདེན་པ་རྟོགས་པར་ཤོག།

 

འགྲོ་བའི་རང་བཞིན་རྟག་ཏུ་སངས་རྒྱས་ཀྱང་།།

མ་རྟོགས་དབང་གིས་མཐའ་མེད་འཁོར་བར་འཁྱམས།།

སྡུག་བསྔལ་མུ་མཐའ་མེད་པའི་སེམས་ཅན་ལ།།

བཟོད་མེད་སྙིང་རྗེ་རྒྱུད་ལ་སྐྱེ་བར་ཤོག།

 

བཟོད་མེད་སྙིང་རྗེའི་རྩལ་ཡང་མ་འགགས་པའི།།

བརྩེ་དུས་ངོ་བོ་སྟོང་དོན་རྗེན་པར་ཤར།།

ཟུང་འཇུག་གོལ་ས་བྲལ་བའི་ལམ་མཆོག་འདི།།

འབྲལ་མེད་ཉིན་མཚན་ཀུན་ཏུ་བསྒོམ་པར་ཤོག།

 

སྒོམ་སྟོབས་ལས་བྱུང་སྤྱན་དང་མངོན་ཤེས་དང་།།

སེམས་ཅན་སྨིན་བྱས་སངས་རྒྱས་ཞིང་རབ་སྦྱངས།།

སངས་རྒྱས་ཆོས་རྣམས་འགྲུབ་པའི་སྨོན་ལམ་རྫོགས།།

རྫོགས་སྨིན་སྦྱངས་གསུམ་མཐར་ཕྱིན་སངས་རྒྱས་ཤོག།

 

ཕྱོགས་བཅུའི་རྒྱལ་བ་སྲས་བཅས་ཐུགས་རྗེ་དང་།།

རྣམ་དཀར་དགེ་བ་ཇི་སྙིད་ཡོད་པའི་མཐུས།།

དེ་ལྟར་བདག་དང་སེམས་ཅན་ཐམས་ཅད་ཀྱི།།

སྨོན་ལམ་རྣམ་དག་ཇི་བཞིན་འགྲུབ་གྱུར་ཅིག།

 

རྩོམ་ཁུངས། ངེད་དྲ་བ།

དཔྱད་མཆན ཡོངས་སུ་གཟིགས།དཔྱད་མཆན།

མིང་མི་འགོད་པར་སྤེལ།