༅༅།།ཕ་བླ་མ་མཁྱེན་བརྩེའི་ཟློས་གར་མཆོད།།གླུ་ཚིག་ཐུང་རྐང་བ་དུམ་ཆོད་མ།།ངག་སྙན་པོས་ལེན་འདོད་མི་འདུག་སྟེ།།གང་དྲན་གྱི་སྨྱོ་གླུ་ཚིག་གསུམ་ལེན།།གླུ་བླང་ན་ཆོས་ཀུན་གླུ་ཆོས་ཏེ།།མགྲིན་པ་འདི་གླུ་ཡི་བང་མཛོད་ཡིན།། ངེད་དེ་འདྲའི་དོ་ཧ་མི་ཤེས་པས།།གླུ་བླང་ན་གྲེ་བ་དོག་མོར་གདའ།།དེ་འོན་ཀྱང་བཤེས་གཉེན་མ་ཏིའི་མཚན།།བཞི་ཆ་གསུམ་བྲལ་བའི་གྱི་ཆོས་སྐད་འདི།།གླུ་ཚིག་བཅད་ལམ་ནས་དྲོངས་ཤིག་ཅེས།།བཀའ་སྩལ་དེ་ཟློག་ཏུ་ཅུང་མ་སྤོབས།།ལམ་ཐེག་པའི་རྩེ་རྒྱལ་རྫོགས་པ་ཆེ།།ཟབ་པའི་ཟབ་གནད་ཅིག་མ་ཤེས་ན།།ཟབ་ཁ་ལ་བཏགས་ཀྱང་དོན་རྩ་ཆུང་།།བསྟོད་མི་ཤེས་སྨད་རའི་གཞི་མར་འགྲོ།སྤྱིར་རྡོ་རྗེ་ཐེག་པའི་ཟབ་ཁྱད་དང་།།དགོས་བླ་མེད་ཐེག་པའི་དགོངས་དོན་ལ།།གོ་བ་རགས་པ་ཙམ་མ་བྱུང་ན།།རྡོ་རྗེ་རྐེད་བཟུང་ཞིག་དཀའ་བར་སྣང་།།ད་མང་རབ་དེ་ཚོ་ཕར་བཞག་ནས།།མི་ཉན་ཤེས་ཀྱི་རྣ་བ་བཟང་པོ་ལ།།མགོ་མེད་མཇུག་མེད་ཀྱི་རྣ་རྒྱན་ཞིག།འདོགས་པ་དུས་སུ་བབས་པ་ལགས།།སེམས་རིག་པ་གཉིས་ཀྱི་ཐ་སྙད་འདི།།སྒོམ་ཆེན་གྱི་ཞལ་ན་རླུང་ལྟར་གྲགས།།གྲོག་གྲགས་པ་ཆེ་སར་ཡོད་ན་ཀོ།དེ་ཞིབ་མོར་བཤད་དུ་ཅི་ཞིག་དགོས།།དེ་ཐུགས་ལ་བཅངས་ནས་སྐབས་དོན་འདིར།།བཞི་ཆ་དེ་རིག་པ་ཀ་དག་ལ།།གསུམ་སེམས་ལ་བྱས་པའི་གོ་ལས་འདི།།གཞི་མེད་རྩ་བྲལ་དུ་ཆོད་ལ་ཞོག།སེམས་ཀུན་རྟོག་བརྒྱད་ཅུའི་དབྱེ་བ་དེ།།གསུམ་དུ་བསྡུས་པ་མི་ཤེས་ན།།སེམས་ཅི་ཟེར་འདི་ཟེར་ཐབས་རྡུག་ནས།།གནས་འགྱུའི་བརྡ་ཆད་ལ་སྐྱབས་སུ་མཆིས།།ལར་འགྱུ་བ་སེམས་སུ་བཏགས་པ་ཙམ།།འགལ་འདུའི་སྣ་འདྲེན་མ་ལགས་མོད།།སྤྱི་རྒྱ་དེ་རླབས་ཀྱིས་མ་ཆོད་ན།།ཁོལ་ཆོས་བང་ཐག་མི་ཆོད་ལགས།།དོན་དེ་སླད་ཀུན་རྟོག་སྤྲོས་པའི་ཁམས།།ངོ་བོ་བརྒྱད་ཅུ་རུ་ཕྱེ་མོད་ཀྱི།།ཡུལ་འདུས་བྱས་དངོས་པོའི་སྣང་བ་ཀུན།།དུས་གསུམ་དུ་བསྡུ་བ་འདི་ཡི་ལུགས།།དུས་ལྡན་མིན་འདུ་བྱེད་ཡིན་མོད་ཀྱི།།དུས་གསུམ་གྱིས་བསྡུས་པའི་ཤེས་བྱ་ལ།།ཕུང་བོ་ལྔས་བསྡུས་ཀྱི་ཆོས་ཀུན་འདུ།།འདུས་མ་བྱས་ཆོས་ཀྱང་ཞར་ལ་མཚོན།།དེ་ཡུལ་ལས་ཡུལ་ཅན་ཕྱེ་བ་ཡིས།།རྟོག་པ་རྣམ་གསུམ་དུ་གྲགས་པ་དེ།།ཤུགས་འབྱུང་གི་དྲན་པ་གཉུག་མའི་ཁམས།།བཟོ་མེད་དུ་ཁྲོལ་ལེར་ཤིག་ལ་ཞོག།དེར་བཞག་ན་རྟོག་མེད་རིག་པའི་གཤིས།།དཀར་དམར་ནག་གསུམ་གྱིས་མ་བསླད་པའི།།གཤིས་འོད་གསལ་རིག་པ་བུམ་པའི་སྐུ།།ནམ་མཁའི་གཟུགས་ཅན་དེ་འབྱོན་ཞིང་འོང་།།འདི་རང་བཞིན་རྫོགས་པ་ཆེན་པོ་ཞེས།།སྒོམ་ཆེན་སྟོང་གི་སྙིང་རྡོ་སྟེ།།རྟོགས་ལྡན་ཁྲི་ཡིས་མ་རྟོགས་པ།།རྟོགས་དཀའི་ཟབ་མོ་གསང་བ་ཡིན།།དེ་བཞི་ཆར་གྲགས་པའི་བརྡ་ཆད་འདི།།དང་པོ་འདུས་དུས་ཀྱི་རྗེས་སུ་གཅོད་ལ།།གཉིས་པ་ད་ལྟའི་ཆ་འཛིན་ཏེ།།ཆ་གསུམ་པ་འབྱུང་འགྱུར་སྔུན་བསུ་ཡིན།།དེ་དག་དང་བྲལ་བའི་གཉུག་སེམས་ལ།།ཆ་བཞི་བའི་བརྡ་ཆད་མཛད་པ་སྟེ།།ཀློང་ཆེན་གྱི་རིག་པ་ཀ་དག་ལ།།གསུམ་བཞི་ཡི་ཐ་སྙད་ཅིག་ཡོད་དོགས་མེད།།ངོ་འཕྲོད་ན་ཚིག་བརྒྱ་དོན་གཅིག་སྟེ།།འུག་པ་གླད་ལོག་གི་བྱིས་པ་ལ།།གོ་སླ་བར་བཤད་པའི་བརྡ་ཆད་ཀྱང་།།ཀོ་དམར་གཡོགས་རྒྱབ་ཏུ་འགྲོ་ཡིན་གདའ།།བཞི་ཆ་སྙིང་དབུས་ན་གཟིམས་ཏེ་ཡོད།།གསུམ་ལས་རླུང་རྟ་ལ་བསྐྱོན་ནས་སོང་།།རླུང་རང་སར་བཞག་ན་དགའ་ལ།།གསུམ་བྲལ་འཐོབ་པའི་ལམ་གནད་ཡིན།།བཞི་ཆ་ལ་གཞོན་ནུ་བུམ་སྐུ་ཟེར།།ཐམས་ཅད་སྟོང་པའང་ཁོང་ལ་ཞུ།།གསུམ་ཡིད་དཔྱོད་རྟོག་པའི་འཆིང་བ་ཟེར།།འཆིང་བ་དང་བྲལ་ན་བཞི་ཆ་ཡིན།།ཕྲ་རགས་ཀྱི་ཀུན་རྟོག་ཡོད་དོ་ཅོག། གསུམ་གྱི་ཕྱོགས་མཐུན་དུ་ཧྲིལ་ཧྲིལ་འདུ།། སྣང་གསུམ་ཁོ་བཞི་ཆ་མ་ལགས་ཀྱང་།། བཞི་ཆའི་ཕྱོགས་མཐུན་དུ་མཁྱེན་པར་མཛོད།།ལར་བཞི་ཆ་འདི་གསུམ་གྱི་སྦྱང་གཞི་སྟེ།།གསུམ་པོ་ཁོ་སྦྱང་བྱའི་ཆོས་སུ་བཞགའབྲལ་བ་ལ་ངང་གིས་འབྲལ་བ་དང་།།སྒོམ་བྱུང་གིས་བྲལ་བ་གཉིས་ཤིག་ཡོད།།འབྲལ་ལུགས་དང་པོ་མཁྱེན་བཞེད་ན།།མི་འཆི་ཀ་མལ་དྲིས་ཤིག་ཨང་།།འབྲལ་ལུགས་དང་པོ་མཁྱེད་བཞེད་ན།།འོད་གསལ་དང་སྒོམ་ལ་བགྲོ་གླེང་མཛོད།།བཞི་ཆ་གསུམ་བྲལ་གྱི་གོ་བ་འདིའི།།མཐའ་བཅད་ན་སྲིད་པའི་སྒྲུང་རབ་ཙམ།།ཕྱོགས་བསྡུས་ན་སྐྱོ་གླུ་ཚིག་གསུམ་ཡིན།།ཕ་ཀུན་མཁྱེན་བརྒྱུད་པའི་མཆོད་པར་བཞེས།།ཞེས་ཡོངས་འཛིན་དགེ་རྒན་བློ་གྲོས་ནས་བཀའ་བསྩལ་བ་ལྟར།།སྤྲང་ཕྲུག་མདོ་མེད་འཇིགས་མེད་བསྟན་རྒྱམ་གྱིས་དྲན་ཚུལ་ས་བཤད་རྡོ་བཤད་དུ་བྲིས་པ་དགེ་ཞིང་བཀྲ་ཤིད།།

རྩོམ་ཁུངས། མགོ་ལོག་ཁུལ་རྩོམ་སྒྱུར་ལས་ཁུངས་ཀྱིས་བསྒྲིགས་པའི