གཟིམས་པ་མེད་པའི་མཆོད་མེ། དབྱངས་གསལ་སོ་བཞིའི་མཛེས་སྡུག  RSSསྔོན་མངག

སྟོན་པ་མཉམ་མེད་ཤྰཀྱའི་རྒྱལ་པོ་རྗེས་སུ་དྲན་པའི་སྨྲེ་སྔགས་ཀྱི་གདུང་དབྱངས་དོན་དང་ལྡན་པ་ཞེས་བྱ་བ།

2009-01-05 17:57:00 རྡོ་གྲུབ་འཇིགས་མེད་བསྟན་པའི་ཉི ཀློག་གྲངས། མཆན ཡོད།

 ༄༅།།ཨ་ཧོ་སྐལ་ལྡན་ཤིང་རྟའི་ཆུ་འགྲམ།།སྐལ་བཟང་ཤཱཀྱའི་གྲོང་གི་ཉེ་འདབས།།ཉམས་དགའ་ལུམྦིནི་ཡི་ཚལ་དེར།།ཟས་གཙང་རིགས་ཀྱི་པད་མོ་བཞད་དོ།།དེ་ཚེ་འཇིག་རྟེན་གསུམ་གྱི་ཁོངས་འདི།།ལྷ་ཀླུ་མི་གསུམ་དགའ་བའི་ཅ་ཅོས།།གླུ་ཡི་འདུན་ཁང་ལྟ་བུར་གྱུར་ཏེ།།དམྱལ་ཁམས་སྡུག་བསྔལ་མེ་ཡང་ཞི་སྐད།།ང་ནི་ས་གསུམ་འགྲོ་བའི་མིག་ཅེས།།འཇིགས་བྲལ་ཚངས་པའི་དབྱངས་ཀྱི་ང་རོས།།སྟོང་གསུམ་དཀྱིལ་འཁོར་མ་ལུས་གང་ཚེ།།འོན་པ་རྣམས་ཀྱང་རྣ་བ་དག་གོ།བཙོ་སྦྱངས་གསེར་ཞུན་ལྟ་བའི་འོད་ཀྱིས།།མཁའ་ལྟར་ཡངས་པའི་ཞིང་ཀུན་གཡོགས་ཏེ།།དམུས་ལོང་མུན་པའི་སྐྱེ་གནས་རྣམས་ཀྱང་།།དེ་ཚེ་མིག་དང་སྣང་བ་རྙེད་དོ།།བགྲང་བྱ་སུམ་སྟོང་ཉེ་བའི་ཁོངས་འདིར།།དེ་ལྟའི་ཡ་མཚན་གཞལ་མེད་བྱུང་ཡང་།།ཆ་ཙམ་མཐོང་ཐོས་ཡུལ་གྱི་སྐལ་བར།།མ་ཐོབ་བདག་འདྲ་དེ་ཚེ་གར་སོང་།།མགོན་པོ་གཞོན་ནུའི་རོལ་རྩེད་མཛད་ཅིང་།།བཙུན་མོའི་འཁོར་དབུས་སྒྱུ་མ་སྟོན་དང་།།དཀའ་སྤྱད་བྱང་ཆུབ་ཞིང་དྲུང་གཤེགས་པའི།།གནས་སྐབས་ཀུན་ཏུ་ཉིན་རེ་ཞིང་ཡང་།།ཕྱོགས་བཅུའི་ཞིང་ནས་གྲངས་མེད་གདུལ་བྱ།།འཕགས་ཡུལ་རིགས་བཞི་མི་ཡི་ནང་དུ།།བདུད་རྩི་སྦྱིན་པའི་མགྲོན་ལ་བསོགས་ནས།།ས་འདི་དེ་འདྲའི་འཁོར་གྱིས་གང་སྟེ།།ཀྱི་ཧུད་དེ་ཚེ་དབུས་འགྱུར་ཚལ་གྱི།།གནག་རྫི་ཐ་ཤལ་ཙམ་དུ་སྐྱེ་བའི།།སྐལ་བ་མ་གཟིགས་སྡིག་པའི་གོང་བུ།།བདག་འདྲ་མི་རུ་རློམ་སྟེ་ཅི་རུང་།།སྐྱེ་མཆོག་བྱང་ཆུང་བླ་མེད་བརྙེས་ནས།།ཕྱོགས་བཅུརགདུལ་བྱ་རེ་རེའི་ཕྱིརཡང་།།ཐོགས་མེད་རྫུ་འཕྲུལ་རྐང་བའི་ཤུགས་ཀྱིས།།སྐྱོ་དུབ་ངལ་བ་མེད་པར་གཤེགས་ཏེ།།བདག་འདྲ་འདི་ན་མ་བརྒྱུད་བྱ་བ།།ཁམས་གསུམ་ཀུན་ཏུ་ཡོང་ཡེ་མེད་ཀྱང་།།སྡིག་འཕྲོག་འཁོར་ལོ་མངའ་བའི་ཕྱག་དེར།།ཐེངས་གཅིག་མ་བཏུད་སྐལ་བ་ངན་ནོ།།དྲི་མེད་ཟླ་ཞལ་དེ་ཡི་སྤྱན་སྔར།།གླེན་ལྐུགས་དུད་འགྲོའི་རྟེན་ལ་ཕྱིན་ཡང་།།འདི་ལྟར་རྣམ་མང་རྒུད་པའི་རྒྱ་མཚོར།།བྱིང་སྟེ་མི་ཆི་རྟ་དབྱངས་བཞིན་ནོ།།འོན་ཀྱང་བདག་དང་བདག་འདྲ་དུ་མ།།ཐུབ་པའི་སྐུ་ཚེ་སྔ་མར་བསྡུ་བཞིས།།མགྲོན་དུ་བོས་བའི་འཁོར་ལ་གཏོགས་ཕྱིར།།དེ་ཡི་ཚེ་ཡང་འབངས་སུ་དགོངས་མཆི།།རིང་ནས་ལས་ཀྱི་ཆུ་བོས་ཁྱེར་ཡང་།།དྲང་སྲོང་སྨོན་ལམ་ཞགས་པས་བརྟོད་ཕྱིར།།རྒྱལ་བསྟན་ལྔ་བརྒྱ་ཕྱི་མའི་དུས་མཐར།།གསུང་རབ་རིན་ཆེན་གླིང་དུ་ཐོན་བྱུང་།།ཕན་མཛད་ཆོས་ཀྱི་ཕྲིན་བསྐུར་མང་པོ།།སློབ་དཔོན་ཀླུ་སྒྲུབ་ཞལ་སྒོ་བརྒྱུད་ནས།།མཐར་གྱིས་རྗེ་བཙུན་བླ་མའི་དྲིན་ལས།།ཡིད་དང་རྣ་བའི་བདུད་རྩིར་རྙེད་དོ།།དེ་ཚེ་དགའ་སྐྱོ་འདྲེས་མའི་ཉམས་ཀྱིས།།ཀྱེ་མའོ་ཐུགས་རྗེ་ལྡན་པའི་སྟོན་པ།།འདི་ལྟར་འཕྲིན་ཙམ་ཤུལ་དུ་བཞག་ནས།།གར་བཞུད་སྙམ་སྟེ་མཆི་མ་བློག་གོ།།ས་སྟེང་ཆོས་ཀྱི་སྣང་བ་འབྱེད་པའི།།བསྟན་འཛིན་ཉི་ཟླའི་ཕྲེང་བ་ཕལ་ཆེར།།དུས་ཀྱི་རིམ་པས་ཞི་བར་གཟིགས་ཏེ།།ཆོས་མིན་འབྱུང་བོའི་བྱ་རྣམས་དགོད་འདུག།སྟོན་པའི་ལེགས་གསུང་ནོར་བུའི་སྒྲོན་ཆེན།།ནགས་མཆོག་གང་དུ་ཐོག་མར་ཕྱེ་བའི།།དྲང་སྲོང་ལྷུང་བའི་ནགས་ཙལ་དེ་དང་།།རི་དབང་བྱ་རྒོད་ཕུབ་བོ་དེ་ཡང་།།དགའ་སྟོན་ཟིན་པའི་སྐྱེད་ཚལ་བཞིན་དུ།།ཧ་ཅང་ཉམས་སུ་དགའ་རྒྱུ་མེད་དེ།།སངས་རྒྱས་རྗེས་དྲན་མཚན་མ་ཕལ་ཆེར།།སྐྱོ་ཤས་སྐུལ་བའི་ཕོ་ཉར་སོང་འདུག།དཀར་བོའི་ཆོས་དང་དེ་ཡི་འབྲས་བུ།།དགའ་དང་སྐྱིད་པའི་དངོས་པོ་གང་མཐོང་།།སྟོན་པའི་བཀའ་དྲིན་ཁོ་ནར་ངེས་པས།།དེས་ཀྱང་རྒྱལ་བ་ཉག་གཅིག་དྲན་ནོ།།འཇིགས་རུང་སྙིགས་མའི་སྤྱོད་ཚུལ་རྣམས་དང་།།སྡུག་བསྔལ་མང་པོས་ཡིད་རབ་བྱུང་ཚེ།།བློ་གཏད་གཞན་ན་མེད་པར་ངེས་པས།།དེས་ཀྱང་སྟོན་པའི་རྣམ་ཐར་དྲན་ནོ།།མང་དུ་དྲན་ཡང་ཀུན་རྟོག་རི་མོ།།ངུས་ཀྱང་རང་ཉིད་གདུངས་བ་ཙམ་ལས།།མཚན་དཔེའི་མཆོད་སྡོང་བལྟར་ནི་མི་སྣང་།།ཀྱི་ཧུད་མི་བཟད་ལས་ཀྱི་མུན་པ།།དེ་ལྟར་རང་རྒྱུད་ཆོས་ཀྱི་སྒྲིབ་པས།།བསླད་ཕྱིར་སྔོན་གྱི་སངས་རྒྱས་རྣམས་དང་།།གང་གིས་བདག་ཅག་ཕྱག་མཚན་བཞེས་པའི།།ཤྰཀྱའི་སྐྱེས་མཆོག་དེ་ཡང་མ་མཐོང་།།ད་དུང་རང་གི་སྤྱོད་ལ་བལྟས་ཚེ།།བྱས་ཚད་ཆོས་སྤང་མིན་པ་མི་འདུག།དེ་ཕྱིར་མ་བྱོན་སངས་རྒྱས་རྣམས་ཀྱང་།།དེ་འདྲ་འགྱུར་དོགས་གདུངས་བ་སྐྱེའོ།།ཚུལ་འདི་བསམས་ཤིང་སྐྱེ་བ་ཀུན་ཏུ།།སྐད་ཅིག་ཙམ་ཡང་དམ་པའི་ཆོས་ལ།།ལོག་སྒྲུབ་མི་བྱེད་བསམ་སྦྱོར་གཙང་མས།།རྒྱལ་བ་དགྱེས་སྐྱེད་སྨོན་ལམ་འདེབས་སོ།།སྟོབས་བཅུ་མངའ་བའི་རྗེས་སུ་བསམས་ཏེ།།མཆི་མ་བླག་པའི་སྨྲེ་སྔགས་འདི་ཡིས།།སྔོན་བསགས་ཆོས་ཀྱིས་ཕོངས་པའི་སྒྲུབ་མུན།།མཐའ་དག་ཡུད་ལ་བྱང་བར་གྱུར་ཅིག།བརྩེར་བཅས་བདེན་པ་གསུང་བ་དེ་ཡིས།།མ་བྱོན་རྒྱལ་རྣམས་ང་ཡི་མཛའ་ཟླ།།ང་ལ་རྩེ་གཅིག་དད་པར་བྱོས་དང་།།མཛའ་བོའི་ཚོགས་ལ་བཅོལ་གཏམ་བགྱི་ཡིས།།ཞེས་གསུངས་བཀའ་འདི་རྣམ་པ་གཞན་དུ།།མི་འགྱུར་སྙམ་ནས་རེ་བའི་མིག་ཡངས།།ཟླ་མེད་སྟོན་པ་ཁྱོད་ལ་གཏོད་ཀྱིས།།ཐུགས་རྗེའི་རྒྱ་མཚོ་བཏང་སྙོམས་མ་བཞུགས།།བྱང་ཆུང་བར་གྱི་ཚེ་རབས་ཕྲེང་བར།།ཁྱོད་ཀྱི་ཡོངས་རྫོགས་བསྟན་པའི་མཛོད་ཁང་།། དངོས་པོ་ཀུན་གྱིས་ལེགས་པར་བཟུང་སྟེ།། ཁྱོད་མཉེས་འབའ་ཞིག་བྱེད་པར་ཤོག་ཅིག། སྟོན་པ་མཉམ་མེད་ཤྰཀྱའི་རྒྱལ་པོ་རྗེས་སུ་དྲན་པའི་སྨྲེ་སྔགས་ཀྱི་གདུང་དབྱངས་དོན་དང་ལྡན་པ་ཞེས་བྱ་བ་བསྟན་པའི་ཉི་མས་མཛེས་བྱེད་ཆུ་སྟོད་ཟླ་བའི་རྒྱལ་བ་དང་པོའི་ཉིན་སྦྱར་བ་འདིས་ཀྱང་སྐྱེ་བ་ཐམས་ཅད་དུ་དེ་བཞིན་གཤེགས་པས་རྗེས་སུ་དགོངས་པར་གྱུར་ཅིག་གུ།

རྩོམ་ཁུངས། མགོ་ལོག་ཁུལ་རྩོམ་སྒྱུར་ལས་ཁུངས་ཀྱིས་བསྒྲིགས་པའི

དཔྱད་མཆན ཡོངས་སུ་གཟིགས།དཔྱད་མཆན།

མིང་མི་འགོད་པར་སྤེལ།