གང་ཞིག་བཤད་དང་སྒྲུབ་པ་ཡིས།། རྒྱལ་བའི་དགོངས་པ་བླ་ན་མེད།། སྨྲ་དང་གཟིགས་པའི་མཆོག་གྱུར་བ།། རྟེན་འབྱུང་གསལ་མཛད་དེ་ལ་འདུད།། བརྒྱད་ཁྲི་བཞི་སྟོང་ཆོས་ཀྱི་སྒོ།། ཇི་སྙེད་རྒྱལ་བས་གསུངས་པ་ཀུན།། གང་དུ་གཞོལ་ཞིང་འབབ་པའི་གནས།། རྟེན་ཅིང་འབྲེལ་འབྱུང་འདི་ཁོ་ན།། ཅི་ཕྱིར་ཞེ་ན་འགྲོ་ཀུན་གྱི།། རྒུད་པའི་སྐྱོན་མང་དྲུངས་འབྱིན་པའི།། སྨན་དང་རིག་སྔགས་རྒྱལ་པོ་ཡང་།། ཆོས་ཚུལ་འདི་ལས་གཞན་ན་གང་།། དེ་ཕྱིར་རྒྱལ་བ་སྟོན་པ་ཡི།། བསྟན་ལ་འོད་བྱེད་ཉི་མ་དང་།། འགྲོ་བའི་དབུགས་འབྱིན་ཟླ་བ་ཡང་།། མཚུངས་པ་མེད་པ་ཁྱོད་དུ་ངེས།། ཞི་ལམ་དེ་བཞིན་ཉིད་སྟོན་པའི།། ས་མཁན་རང་བཞིན་བརྗོད་པ་ནི།། ཆོས་ཀྱི་རྗེས་འགྲོ་དད་པའི་སྒོ།། མི་མཉམ་ཆེ་བའི་གཏེར་དུ་ངེས།། འཕགས་ཡུལ་མཁས་རྣམས་གཟུར་གནས་པས།། རང་བློའི་སྟོབས་བཞིན་གྲུབ་མཐའ་འཛིན།། འདི་ན་ཐམས་ཅད་དབུ་མའི་གྲལ།། བསྙེགས་ཀྱང་བློ་ཡིས་མ་ལྕིགས་པས།། སྐྱེ་ན་མཐའ་བཞིར་ངེས་ཀྱང་དེ།། ཁེགས་ཕྱིར་སྐྱེ་བ་ཡོད་མིན་ལ།། ཐ་སྙད་བློ་ཡི་སྣང་བ་ནི།། འཁྲུལ་ཕྱིར་དོན་དུ་མི་འགྱུར་ཞེས།། རང་བཞིན་མེད་ལ་བདེན་བཞི་དང་།། སྐྱབས་གསུམ་ལས་འབྲས་ལ་སོགས་པ།། མེད་པར་ཐལ་བ་དངོས་སྨྲའི་གཏམ།། དང་དུ་ལེན་བཞིན་དབུ་མར་སྨྲ།། དངོས་སྨྲ་རིགས་པའི་ལུགས་འཛིན་པས།། བདེན་སྟོང་རིགས་པས་བཀག་ནས་དོར།། འདི་ན་རིགས་པས་འགོག་བཞིན་དུ།། འཐད་པར་སྒྲུབ་པ་ཀྱེ་མ་ཧོ།། ཁ་ཅིག་ཆད་པར་དོགས་པ་ཡིས།། མ་སྐྱེས་མི་འགྱུར་ལྟོས་མེད་བདག། བཀག་ཙམ་དབུ་མར་འཁྲུལ་བ་ཡིས།། གྲུབ་མཐའ་རྣམ་བཞི་གཅིག་ཏུ་འགྱུར།། ལ་ལ་དགག་བྱའི་མཚམས་ཀྱི་འབེན།། གཏད་མེད་ཕྱོགས་ཆར་གཅོད་པ་ཡིས།། སྟོང་བར་འཁྲུལ་ཡང་འཆར་སླ་ལ།། རྟེན་འབྲེལ་བཤིག་པ་སྨད་པའི་གནས།། རྟག་ཆད་གཉིས་ཀའི་གཡང་ས་ལ།། འཇིགས་ཕྱིར་དབུ་མར་འཇུག་དཀའ་ཡི།། དགག་པའི་ཕྱོགས་གཅིག་ཙམ་ཉིད་ན།། དེ་ནི་གང་ནས་དབུ་མར་བརྗོད།། དེ་ཕྱིར་མཁྱེན་པའི་གཏེར་གྱིས་ཀྱང་།། སྣང་སྟོང་ཉེ་རིང་མི་བྱ་ཞེས།། ཡོད་དང་མེད་པའི་མཐའ་གཉིས་ལས།། ཁྱོད་ཀྱི་ཐུགས་ནི་ཡོངས་སུ་བཟུང་།། ཕྱག་རྫོགས་གསལ་སྟོང་འཛིན་མེད་ཅེས།། འགྲོ་འོང་གཟུགས་ཅན་ལྟར་མེད་དང་།། འབྱུང་འཇིག་རགས་པའི་མི་རྟག་ཚུལ།། མཐོང་བྱ་མ་མཐོང་བརྒྱལ་འདྲ་འམ།། གཟུགས་སུ་མ་གྲུབ་གསལ་རིག་ཙམ།། མྱོང་ལ་བདེན་མཐོང་རློམ་འཆང་ཞིང་།། ཕྱོགས་གླང་གྲགས་པ་སོགས་ཀྱིས་ཀྱང་།། དེ་ཉིད་མ་མཐོང་སྨྲ་བ་མཚར།། ཁ་ཅིག་མ་བཙལ་སྐྱོང་བར་རློམ།། ལ་ལ་བཙལ་ཡང་སྐྱོང་ཚེ་སྟོར།། བཟུང་ཡང་དཔྱོད་མེད་འཇོག་སྒོམ་ཙམ།། ལྟ་ལ་མཁས་པ་མིན་པར་གསུངས།། ཉམས་མྱོང་བརྡ་ཡི་ཆིག་ཐང་དེ།། ཕན་འགའ་སྲིད་ཀྱང་གོལ་བ་མང་།། དགག་སྒྲུབ་སྦྱོར་བ་ཀུན་ཚང་བ།། ཁྱོད་གསུང་ཐར་འདོད་ཡོངས་ཀྱི་གསོས།། ཡོད་དང་མེད་པའི་ཕྱོགས་འཇིག་པ།། བདག་ཉིད་ཆེན་པོ་ཁྱེད་དག་ནི།། སྟོང་དང་རྟེན་འབྱུང་དོན་གཅིག་པར།། གསུང་མཆོག་མཚུངས་པ་མེད་པར་བཞེད།། སྟོན་པ་མཆོག་དེར་བསྟོད་པའི་སྒོ།། ཀུན་གྱི་བླ་མར་གྱུར་བ་ཡང་།། རྟེན་ཅིང་འབྲེལ་འབྱུང་གསུངས་པ་རུ།། ཀླུ་སྒྲུབ་ཞབས་དང་ཁྱོད་ཀྱིས་གཟིགས།། ཤས་ཆེར་སྟོང་ལ་མོས་བློ་ཡིས།། རྟེན་ཅིང་འབྲེལ་འབྱུང་འགོག་བྱེད་པ།། སྣང་བས་བསྒྲིབས་པ་དེ་དག་གི། བློ་མུན་སྟུག་པོ་གང་གིས་སེལ།། ལྟ་བས་རང་བཞིན་བཙལ་བའི་ཕྱིར།། མ་རྙེད་པ་ཡིས་ཁེགས་འགྱུར་ལ།། མ་རྙེད་འདགས་གཞི་འགོག་མིན་པས།། རྗེས་ཀྱི་མིང་ཙམ་ལྷག་མར་མཐོང་།། མིང་ཙམ་དེར་ཡང་བྱ་བྱེད་ཀུན།། བསྙོན་མེད་མྱོང་བས་གྲུབ་པ་ཡི།། རྗེས་འགྲོ་སྐྱོན་ཡོན་བླང་དོར་ཀུན་།། བརྩོན་པས་སྤྱོད་པ་རྣམ་པར་དག། སྣང་སྟོང་རིམ་པས་ཆད་རྟག་མཐའ།། སེལ་བ་གྲུབ་མཐའ་ཀུན་འདོད་ཀྱང་།། བཟློག་སྟེ་སྨྲ་བ་འདི་ཁོ་ནས།།བརྒྱུད་མའི་ཀླན་ཀ་མཐའ་དག་བསལ།། བདག་བསྟན་རྒྱུ་འབྲས་རྟོགས་པའི་ཕྱིར།། གསུང་རབ་མ་ལུས་གདམས་པར་ཤར།། འགར་ཡང་མི་བདེ་མི་མཆིས་པས།། ལྟ་བའི་དཔྱད་པ་ཡོངས་སུ་རྫོགས།། དཔྱད་བཟོད་ཤེས་པ་མ་གྲུབ་ཅིང་།། ཕྱི་དོན་སྣང་བ་བསྙོན་མེད་པས།། ཀུན་གཞི་རང་རིག་ཡོད་མིན་ལ།། དོན་དང་ཞིག་པ་དངོས་པོར་སྒྲུབ།། མདོར་ན་ངོ་བོས་སྟོང་བ་དང་།། ཕན་ཚུན་བརྟེན་དང་བཏགས་པ་གཉིས།། འགལ་མེད་གྲོགས་སུ་ཤར་བ་ཡིས།། རྣམ་གཞག་ཐམས་ཅད་འཐད་པར་གཟིགས།། ཉོན་མོངས་འཆིང་གཅོད་ཀླུ་སྒྲུབ་ཀྱི།། ལྟ་བའི་རལ་གྲི་འཛིན་བྱེད་པ།། སྒོམ་པའི་དཔུང་བ་བརྟན་པོའི་ཐབས།། མཐའ་ཡས་ས་སྡེ་བཞིན་དུ་གསུངས།། བོད་སྒོམ་གཞུང་དུ་མི་ཚོལ་བར།། མེད་སར་འབད་པས་འཚོལ་ཞིང་སྐྱོང་།། དྲོད་རྟགས་ཕྲ་མོས་རློམ་རྣམས་ཀྱི།། སྒོམ་པའི་མན་ངག་དཔེ་ཟླ་མིན།། མདོར་ན་ལྟ་སྒོམ་སྤྱོད་པ་འམ།། རྣམ་དག་ལྷག་པའི་བསླབ་གསུམ་སྲོལ།། གཞན་ལས་ཆེས་ཆེར་འཕགས་པ་ཡིས།། རྒྱུ་ཡི་ཐེག་པ་ཉིན་མོར་བྱས།། གསང་ཆེན་རྒྱུད་སྡེ་རབ་འབྱམས་ཀྱི།། དབང་དང་དམ་ཚིག་ལམ་དང་འབྲས།། ཀུན་ལ་གོལ་བའི་མཐའ་བཀག་སྟེ།། གསང་བའི་གནད་ཀུན་རྫོགས་པར་བཀྲལ།། བདེན་མེད་སྣང་སྟོང་ལྷ་སྐུ་སོགས།། ཕ་རོལ་ཕྱིན་དང་འོག་མར་ཡང་།། གྲགས་པ་ཙམ་ལས་འདས་པའི་གནད།། བདག་བྱིན་རླབས་སོགས་རིམ་པ་ཡི།། སྦས་དོན་སྣང་མེད་གྱུར་བ་ན།། རྒྱུད་དོན་འཕགས་པ་ཡབ་སྲས་ཀྱི།། དགོངས་པ་ཇི་བཞིན་གསལ་མཛད་དེ།། ཕ་རྒྱུད་ཀུན་གྱི་སྲོག་རྩ་བཟུང་།། ཕྱི་ནང་ཕྱག་རྒྱའི་སྤྲོས་པ་ལས།། གང་གིས་རྒྱས་གདབ་དེ་ཉིད་དོན།། མ་མཐོང་རྣམས་ཀྱང་མིག་ཕྱེ་སྟེ།། མ་རྒྱུད་གནད་ལ་ཤིད་ཟན་བཏང་།། བདེ་སྟོང་ཟུང་འཇུག་སྨྲ་བ་ན།། དེ་ཉིད་ཡ་གྱལ་གཅིག་གྱུར་བའི།། བདེན་གཉིས་དབྱེར་མེད་གཏམ་འདི་ཡང་།། ཁྱོད་ཀྱིས་འཇིག་རྟེན་གསུམ་དུ་བསྒྲགས།། གསང་སྔགས་འཇིག་རྟེན་སྤྱོད་པ་དང་།། ལྟ་བ་ཡིད་བྱེད་བཀག་ཙམ་དུ།། གྱུར་ཚེ་དབང་བོ་ཏོག་གི་དྲུང་།། དམ་བཅས་བཞིན་དུ་ཁྱོད་ཀྱིས་གསོས།། སངས་རྒྱས་མཛད་པ་བྱེད་པ་རུ།། ལུང་བསྟན་པ་ཡང་མཆོག་འདི་སྟེ།། གང་ལས་ཁྱོད་ནི་རྗེས་དྲན་པའི།། ཡོན་ཏན་ཟླ་དང་བྲལ་བའང་འདི།། ཐུབ་དབང་ཆོས་ཀྱི་ཉི་མ་དེ།། ཞི་བའི་དབྱིངས་སུ་གཞོལ་གྱུར་ནས།། རིང་ཞིག་འདས་ཏེ་ཆོས་ཀྱི་སྲས།། རྒྱལ་བའི་གདུང་འཚོབ་ཁྱོད་ཉིད་འཁྲུངས།། བག་ཡོད་བརྟུལ་ཞུགས་ལྷག་བསམ་སྤྱོད།། བདེ་སྟོང་ཏིང་འཛིན་མཐའ་བྲལ་ལྟ།། ཐུབ་བསྟན་མཐའ་དག་གདན་གཅིག་ཏུ།། རྫོགས་པའི་སྲོལ་དེ་ཁྱོད་ཀྱིས་ཕྱེས།། དེང་དུས་ཡབ་རྗེའི་སྲོལ་བཟང་ཡང་།། སྙིགས་མ་མུན་པའི་རྡུལ་གྱིས་ཁེབས།། ལྟར་སྣང་བཤེས་གཉེན་དུ་མ་ཡིས།། སྐྱེ་བོ་ཉམ་ངའི་གཡང་དུ་ཁྲིད།། ཀྱེ་ཧུད་དགེ་ལྡན་བསྟན་པ་འདི།། དཔལ་དང་འབྱོར་བས་རབ་རྒྱས་ཀྱང་།། བཤད་དང་སྒྲུབ་པས་ཆེས་ཕྲ་བ།། བསམ་གྱིན་སྙིང་ནས་ཤེས་པ་འཕྱོ།། ཟབ་རྒྱས་ཆོས་ཀྱི་དེ་ཉིད་དོན།། ཇི་བཞིན་འདོམས་པ་ཆེས་དཀོན་ཡང་།། འཁྲུལ་བྲལ་ཁྱོད་གསུང་གླེགས་བམ་རྣམས།། གདུང་སེལ་དབུགས་དབྱུང་མཆོག་སྦྱིན་འགྱེད།། རྒྱལ་ཀུན་དགོངས་པ་མཐར་ཐུག་དང་།། དབྱེར་མེད་གྱུར་བ་ཁྱོད་ཀྱི་བསྟན།། གང་དུ་ཇི་བཞིན་གནས་པ་དེར།། རྟག་ཏུ་སྐྱེ་བ་འཛིན་པར་ཤོག། ཕྱོགས་རེར་མ་གྱུར་ཐོས་པའི་ཆོས།། བསམ་དང་སྒོམ་པས་ཉམས་བླངས་ནས།། རྒྱལ་བ་དགྱེས་པའི་ལམ་བཟང་བོ།། ཚང་ལ་མ་ནོར་རྙེད་གྱུར་ཅིག། རྟག་ཏུ་འཇམ་དབྱངས་བླ་མ་ཡིས།། རྗེས་བཟུང་ལྟ་བས་རྒྱས་བཏབ་པ།། རྡོ་རྗེ་ཐེག་པའི་མྱུར་ལམ་གྱིས།། བྱང་ཆུབ་བདེ་བླག་ཐོབ་གྱུར་ཅིག། ཅེས་འཇམ་མགོན་རྒྱལ་བ་གཉིས་པ་ལ་བསྟན་པའི་སྙིང་བོ་གསལ་བར་མཛད་པའི་ཚུལ་ལས་བརྩམས་ཏེ་བསྟོད་པ་དང་ལྡན་པ་ཞེས་བྱ་བ་འདི་ནི། གཞུང་བརྒྱ་སྨྲ་བའི་དབང་ཕྱུག་ཨིལ་གོག་ས་ན་ཨེར་ཏི་ནི་ཤྲི་རེ་གེ་ཐུ་རྡོ་རམ་པ་ངག་དབང་ཡོན་ཏན་གྱིས་བསྐུལ་བའི་ངོར། ༧བཙུན་པ་དཀོན་མཆོག་བསྟན་པའི་སྒྲོན་མེས་བཤད་སྒྲུབ་བསྟན་པའི་འབྱུང་གནས་དཔལ་ལྡན་བཀྲ་ཤིས་འཁྱིལ་དུ་སྦྱར་བའི་ཡི་གེ་བ་ནི་དགེ་སློང་དཀོན་མཆོག་ཀུན་དགའའོ།། །།




     ༼གུང་ཐང་དཀོན་མཆོག་བསྟན་པའི་སྒྲོན་མེའི་བཀའ་འབུམ༽བླ་བྲང་པར་མའི་གླེགས་བམ་དང་པོ་ལས་བཤུས།

       (མཆོད་མེའི་པར་དབང་གཞན་གྱིས་དགོལ་མི་རུང)