༄༅།།ཝ་ག་ཤྭ་ར་སྭ་ར་དཱེ་ཝི་ན་མོ།

དཔལ་ལྡན་ཡོན་ཏན་རིན་ཆེན་མཐའ་དག་གིས།།

ཡོངས་སུ་གང་བའི་རྒྱ་མཚོ་ཆེན་པོ་སྟེ།།

ཤྰཀྱའི་རྒྱལ་བ་མཚན་དཔེས་སྤྲས་འདྲ་བ།།

རྗེ་བཙུན་བླ་མ་མཆོག་ལ་གསོལ་བ་འདེབས།།

ཚོགས་གཉིས་འཛིན་མའི་རྡུལ་གྱི་གྲངས་སྙེད་ཀྱིས།།

མཐོན་པོར་བརྩེགས་པའི་ཁོར་ཡུག་ནམ་མཁའི་མཐར།།

གཤེགས་པའི་སྐུ་ནི་ཐུན་མཚམས་བླ་གོས་ཀྱིས།།

འཁྱུད་པ་ལྷུན་པོའི་མགོན་ལ་གསོལ་བ་འདེབས།།

ལྷག་པའི་བསླབ་པ་གསུམ་གྱི་བཅས་པ་དང་།།

འགལ་བའི་ཉེས་པས་རྨི་ལམ་ནམ་དུ་ཡང་།།

མ་གོས་དྲི་མ་མེད་པ་རྣམས་མནོས་པ།།

དག་པའི་ཐུགས་མངའ་ཁྱོད་ལ་གསོལ་བ་འདེབས།།

དྲི་མེད་རྨི་ལམ་གསེརགྱི་འཁྲི་ཤིང་ནི།།

ལྷག་བསམ་མ་ངྷུ་རཱ་བཱ་མངལ་ཁུར་གྱིས།།

མཛེས་པ་དེ་ཚེ་ལྷར་བཅས་འཇིག་རྟེན་གྱིས།།

འདོད་དགུའི་རེ་བ་སྐོང་ལ་གསོལ་བ་འདེབས།།

ཐུབ་བསྟན་ཉི་མ་ཁྱོད་ཀྱི་སྙན་པའི་ཚོགས།།

རབ་བཀྲའི་ཟེར་གྱིས་ས་ལ་བླ་གོས་བཟང་།།

སྦྱིན་མཛད་ཕྱོགས་ཀྱི་བུ་མོའི་རྣ་བ་ཡི།།

དགའ་བའི་བཅུད་ལེན་བགྱིད་ལ་གསོལ་བ་འདེབས།།

བསམ་གཏན་ལ་ཆགས་ཞི་བའི་གཟིགས་སྟངས་ཀྱིས།།

སྟོང་བ་ཉིད་ལ་མཉམ་པར་བཞག་བཞིན་དུ།།

གདུལ་བྱའི་ཁམས་དང་བསམ་པ་དབང་བོ་དང་།།

མཐུན་པར་ཆོས་སྟོན་མཛད་ལ་གསོལ་བ་འདེབས།།

རང་གཞན་གྲུབ་མཐའི་རྒྱ་མཚོར་རྣམ་རོལ་བའི།།

དབྱངས་ཅན་མ་འདི་གློག་གི་རོལ་རྩེད་ཀྱིས།།

ལྗགས་ཀྱི་རྩེ་ལ་རྣམ་པར་རོལ་བྱེད་དེ།།

རྗེ་བཙུན་མཁྱེན་པའི་གཏེར་ལ་གསོལ་བ་འདེབས།།

གྲུབ་པ་གྲོང་འཇོམས་ཆུར་ཉལ་འཇིག་རྟེན་མེས།།

རང་སྐྱེས་ཉི་མའི་བུ་སོགས་དྲེགས་པ་ཅན།།

རྣམ་དག་ཁྲིམས་ཀྱི་གཟི་བརྗིད་འབར་བ་ཡིས།།

རྟག་ཏུ་འཛུམ་མཛད་ཁྱོད་ལ་གསོལ་བ་འདེབས།།

ཁྱོད་ཐུགས་བྱམས་པའི་རི་དྭགས་ལྟེ་བའི་དྲིས།།

གང་བར་ཁྲོ་བའི་སྦྲུལ་དུ་འཇུག་པའི་སྐབས།།

མེད་པ་ལྟ་ཞོག་ཁྱོད་སྐུ་མཐོང་མ་ཐག།

བཟོད་པ་གོམས་པར་མཛད་ལ་གསོལ་བ་འདེབས།།

རིག་ཚུལ་ཆུ་བོ་མ་ལུས་ཞལ་གྱི་ནི།།

རྒྱ་མཚོར་སོང་ཡང་ངོམ་པ་མི་མངའ་བའི།།

ཐུབ་བསྟན་འཛིན་མའི་འཁོར་ཡུག་ལེགས་བཤད་ཀྱི།།

ཀ་བའི་རྣམ་པར་བརྟེན་ལ་གསོལ་བ་འདེབས།།

འགྲོ་འདི་ཐུགས་རྗེའི་ཕྱག་གིས་དམ་འཁྱུད་ནས།།

ད་ལྟ་ཉིད་དུ་སངས་རྒྱས་གོ་འཕང་ལ།།

བདེ་བླག་ཉིད་དུ་བཀྲི་བའི་ཐབས་གང་ཞེས།།

རྟག་ཏུ་བསམ་གཏན་མཛད་ལ་གསོལ་བ་འདེབས།།

ཁྱོད་ཀྱི་བཀའ་ནི་འཕགས་མཆོག་རྣམས་ཀྱིས་ཀྱང་།།

རྒྱལ་བའི་གསུང་བཞིན་སྤྱི་བོར་འཛིན་བྱེད་དེ།།

རྣམ་ཐོས་བུ་སོགས་བསྟན་བསྲུངས་ཚོགས་འདི་ཡིས།།

རྟག་ཏུ་མངག་གཞུག་བགྱིད་ལ་གསོལ་བ་འདེབས།།

ལྷ་ཡི་རྣམ་འབྱོར་མཐར་ཕྱིན་ཐ་མལ་གྱི།།

རྣམ་རྟོག་ཟད་ཅིང་བ་སྤུའི་ཁུང་བུ་རེར།།

རི་རབ་སུམ་ཅུ་དྲུག་གི་རྡུལ་སྙེད་ཀྱི།།

དྲུག་གཉིས་མཛད་པ་ཡོན་ཏན་ལ་གསོལ་འདེབས།།

ཆགས་སོགས་ཀུན་རྟོག་སྦྲུལ་གདུག་ཉི་ཟླའི་ལམ།།

རྣམ་པར་བཅོམ་ཞིང་དྷུ་ཏའི་འཆང་བ་གྲོལ།།

བདེ་ཆེན་སྟོང་ཉིད་མཛེས་མའི་དགའ་བའི་རོས།།

ལོངས་སྤྱོད་རྫོགས་སྐུ་ཉིད་ལ་གསོལ་བ་འདེབས།།

དེང་ནས་བརྩམས་ཏེ་ཚེ་རབས་ཐམས་ཅད་དུ།།

རྒྱལ་བ་རྡོ་རྗེ་འཆང་དང་དབྱེར་མེད་པ།།

དགེ་བའི་བཤེས་ཁྱོད་ཞབས་རྡུལ་སྤྱི་བོ་ཡིས།།

རེག་པའི་མཐུ་ལས་སྲིད་པའི་ཕུན་ཚོགས་ཀུན།།

ཆུ་ཤིང་བཞིན་དུ་རྟོགས་ནས་ཐར་ལམ་ལ།།

ཤུགས་དྲགས་བརྩོན་འགྲུས་རྩོམ་པར་བྱིན་གྱིས་རློབས།།

རྣམ་དག་བྱང་ཆུབ་སེམས་དང་བདག་མེད་བློ།།

ཕྲ་རགས་བསྐྱེད་པའི་རིམ་པ་མཐར་ཕྱིན་ནས།།

རྫོགས་རིམ་སྤྱོད་པ་དང་བཅས་ལེགས་སྤྱད་དེ།།

ཚེ་འདིར་རྡོ་རྗེ་འཆང་དབང་ཐོབ་གྱུར་ཅིག། ཅེས་དཔལ་ལྡན་བླ་མ་གནས་བརྟན་ཆེན་པོ་རིན་ཆེན་རྒྱལ་མཚན་པའི་ཞལ་སྔ་ནས་ལ་གསོལ་བ་འདེབས་པའི་ཚིགས་སུ་བཅད་པ་འདི་ནི། ཕྱོགས་ལས་རྣམ་རྒྱལ་ཆོས་དབང་གྲགས་པའི་དཔལ་གྱིས་འབྲོག་རི་བོ་ཆེ་དགེ་ལྡན་རྣམ་པར་རྒྱལ་བའི་གླིང་དུ་སྦྱར་པའོ།།

རྩོམ་ཁུངས།