གཟིམས་པ་མེད་པའི་མཆོད་མེ། དབྱངས་གསལ་སོ་བཞིའི་མཛེས་སྡུག  RSSསྔོན་མངག

རྗེ་བཙུན་འཇམ་པའི་དབྱངས་ལ་བསྟོད་པ་བསྟོད་སྤྲིན་རྒྱ་མཚོ་ཞེས་བྱ་བཞུགས་སོ།།

2015-01-11 19:12:42 ཙོང་ཁ་པ་བློ་བཟང་གྲགས་པ། ཀློག་གྲངས། མཆན ཡོད།


༄༅། །ན་མོ་གུ་རུ་མཉྫུ་གྷོ་ཥཱ་ཡ། རིང་ནས་གོམས་པའི་ཐུགས་རྗེའི་ཆབ་ཀྱིས་རང་བདེ་འདོད་པའི་ཡིད་ཀྱི་མེ་དཔུང་བཅིལ། །ཟབ་མོའི་རང་བཞིན་ཇི་བཞིན་གཟིགས་པས་ཀུན་ཏུ་རྟོག་པའི་སྤྲོས་པའི་དྲ་བ་བཅད། །ཉིད་ཀྱིས་གཟིགས་གང་འགྲོ་ལ་བསྐྲུན་ཕྱིར་གཞན་ཕན་ཁུར་ཆེན་སྐྱོ་མེད་ཐུགས་ཀྱིས་ཁྱེར། །ལྷག་པའི་ལྷ་དེར་ཡིད་གཏད་དད་པའི་རླུང་གིས་བསྐྱོད་པའི་བསྟོད་ཚིག་མེ་ཏོག་ལ། །ཉིན་བྱེད་འཆར་ཀའི་མདངས་ཀྱིས་རབ་འཁྱུད་པའི། །ལྷུན་སྟུག་གསེར་གྱི་རི་བོའི་ངོས་བཞིན་དུ། །དམར་སེར་འོད་ཀྱི་ཕུང་པོ་ལྷམ་མེ་བ། །འཇམ་དབྱངས་མཁྱེན་པའི་གཏེར་ཁྱོད་ཡུད་ཙམ་དགོངས། །མ་ལུས་ཞིང་དུ་འབད་པས་བཙལ་ན་ཡང། །ཁྱོད་ལས་གཞན་པའི་སྐྱབས་བཟང་མ་མཆིས་པས། །བདག་ཡིད་ཁྱོད་ཀྱི་རྗེས་སུ་ཕྱོགས་པ་ནི། །ཉི་མས་གདུངས་པའི་གླང་ཆེན་པད་མཚོར་བཞིན། །དེ་ཕྱིར་ཁྱོད་ཀྱི་ཡོན་ཏན་བརྗོད་ལ་བདག །ཡིད་ལ་རེ་བ་སྐོང་བར་བྱེད་པ་ཡི། །གཏོང་བས་མཛེས་པའི་སྦྱིན་བདག་མཐོང་བ་ན། །འབྱོར་པས་དམན་པའི་སློང་མོ་བ་བཞིན་གྱུར། །ཁྱོད་སྐུ་རི་དབང་ཇི་བཞིན་མཐོ་ཞིང་དྲང༌། །ནྱ་གྲོའི་ལྗོན་པ་རྒྱས་ལྟར་ཆུ་ཞེང་གབ། །བཙོ་མའི་གསེར་ལྟར་དག་ཅིང་གསལ་བ་ཡི། །པགས་པའི་མདོག་ནི་ལེགས་ཤིང་སྲབ་ལ་འཇམ། །རྒྱལ་མཚན་ཏོག་ལྟར་སྤྱི་གཙུག་གནས་སུ་ནི། །རིང་འཇམ་གནག་ལ་སྣུམ་པའི་རལ་པ་ཡི། །ཐོར་ཅོག་མཛེས་པར་བཅིངས་པའི་ཟར་བུ་ནི། །ཟུར་ཕུད་ལྔ་ལྡན་ཅུང་ཟད་གཡོན་དུ་འཕྱང༌། །རིན་ཆེན་རྩེ་ཕྲན་རྣམས་ཀྱིས་མཛེས་བྱས་པའི། །དབྱིབས་ལེགས་གདུགས་བཞིན་ཀུན་ནས་རྒྱས་པའི་དབུ། །སྐྲ་མཚམས་མཐོ་བ་ལེགས་པར་ཕྱེད་པ་ཡི། །དཔྲལ་བའི་དབྱེས་ནི་ཟླ་བ་རྒྱས་པ་བཞིན། །ཀུན་ད་དུང་དང་པདྨའི་རྩ་བ་ལྟར། །དཀར་གསལ་གཡས་སུ་འཁྱིལ་ལེགས་རི་མོ་ཅན། །དག་པའི་དངུལ་གྱི་འབུར་དང་འདྲ་བ་ཡི། །དྲི་མེད་མཛོད་སྤུ་སྨིན་མའི་དབུས་ན་མཛེས། །ཁ་དོག་ནག་ཅིང་ཅུང་ཟད་གུག་པ་ཡི། །འཇམ་སྣུམ་སྤུ་མཉམ་སྨིན་ཚུགས་རིང་པོ་ཅན། །སྟུག་ཅིང་འཇམ་ལ་མ་འཛིངས་སྒྲིག་ལེགས་པ། །ཁྱུ་མཆོག་བཞིན་དུ་རྫི་མ་ཡིད་དུ་འོང༌། །ཨུཏྤལ་མཐིང་གའི་འདབ་མ་ཇི་བཞིན་དུ། །སྤྱན་དཀྱུས་རིང་པོ་ཅུང་ཟད་ཟུམ་པ་ཡི། །དཀར་ནག་ཆ་རྣམས་མ་འདྲེས་མཛེས་པ་ནི། །འདམ་སྐྱེས་འདབ་མ་ཀུན་ནས་རེངས་པ་བཞིན། །རིམ་པར་འཚམ་ཞིང་ཀུན་ཏུ་མཐོ་བའི་ཤངས། །བིམ་པ་ལྟར་དམར་ཡིད་དུ་འོང་བའི་མཆུ། །དཀར་ཞིང་ཚད་མཉམ་ཐགས་བཟང་བཞི་བཅུའི་ཚེམས། །འགྲམ་པ་ཟླུམ་རྒྱས་རི་དྭགས་རྒྱལ་པོ་བཞིན། །སྲབ་གཉེན་རོ་མཆོག་མྱོང་བའི་ལྗགས་ཀྱིས་ནི། །ཞལ་གྱི་དཀྱིལ་འཁོར་ཀུན་ཏུ་ཁེབས་པར་མཛད། །སྙན་ཤལ་བཟང་པོ་རིང་དུ་འཕྱང་བའི་རྩེར། །རིན་ཆེན་དུ་མས་སྤྲས་པའི་རྣ་ཆ་གཡོ། །གཟི་འོད་འཁྱུག་པའི་རིན་ཆེན་ཕྲེང་བའི་རྒྱན། །གང་དུ་འཕྱང་བའི་དྲི་མེད་མགྲིན་པ་ནི། །མཛེས་པའི་གསེར་གྱི་བུམ་པའི་མགྲིན་པ་བཞིན། །རྩ་ཡི་དྲ་བ་མི་མངོན་ཟླུམ་ཞིང་རྒྱས། །ཕྱག་ཞབས་བོལ་དང་ཕྲག་གོང་ལྟག་པའི་ཕྱོགས། །ཡོངས་སུ་གང་བས་མི་མཉམ་མེད་པའི་སྐུ། །གདོང་ལྔ་པ་བཞིན་ཀུན་ནས་རྒྱས་པའི་སྟོད། །ལྷུན་པོའི་ངོས་ལྟར་རབ་ཏུ་ཡངས་པའི་བྲང༌། །དཔུང་པའི་མགོ་ནི་ལེགས་པར་ཟླུམ་པའི་ཕྱག །གླང་པོའི་རྒྱལ་པོའི་སྣ་ལྟར་རིང་ཞིང་མཛེས། །ཉི་ཤུའི་སོར་མོ་མཛེས་པའི་དྲ་བ་ཡིས། །ལེགས་པར་འབྲེལ་བ་ངང་པའི་རྒྱལ་པོ་བཞིན། །མདོག་སྣུམ་དམར་བའི་མདངས་ཆགས་སེན་མོ་ཡི། །ཕྲེང་བས་རབ་ཏུ་དངར་བའི་སོར་མོ་ནི། །དཔག་བསམ་ཡལ་འདབ་གཞོན་ནུའི་ལྕུག་ཕྲན་ལྟར། །རིང་ཞིང་རྒྱས་ལ་འཇམ་ཞིང་གཞོན་ཤ་ཆགས། །གསལ་ཞིང་རྫོགས་ལ་སོ་སོར་མ་འདྲེས་པའི། །རྩིབས་སྟོང་ལྡན་པའི་གསེར་གྱི་འཁོར་ལོ་མཆོག །ཕྱག་དང་ཞབས་ཀྱི་མཐིལ་ན་བཀྲ་བ་ནི། །རྒྱ་ལས་རྒྱ་ཡི་འབུར་ནི་གསལ་བ་བཞིན། །དཔུང་རྒྱན་གདུ་བུས་མཛེས་པར་བྱས་པ་ཡི། །གཡས་པའི་ཕྱག་ན་དངོས་འཛིན་འཁྲི་ཤིང་གི །ལྗོན་པ་དྲུང་ནས་གཅོད་པའི་རལ་གྲི་ནི། །འབར་བའི་འོད་ཀྱི་དྲ་བ་འགྱེད་པ་བསྣམས། །ཞི་སྒོ་གཉིས་སུ་མེད་པའི་རྟེན་འབྲེལ་ལམ། །མ་ལུས་གསལ་བར་སྟོན་པའི་གླེགས་བམ་མཆོག ། ཨུཏྤལ་སྔོན་པོའི་ལྟེ་བར་གནས་པ་ཡི། །སྡོང་བུ་གཡོན་པའི་ཕྱག་གིས་ཐུགས་ཀར་འཛིན། །རབ་འབྱམས་ཚོན་གྱིས་ཁ་བསྒྱུར་སྲབ་ལ་འཇམ། །སྣ་ཚོགས་དར་གྱི་སྨད་གཡོགས་གཡོ་བའི་སྟེང༌། །སིལ་སིལ་སྒྲ་སྒྲོག་གསེར་གྱི་འོག་པག་གིས། །ཡིད་འོང་སྐེད་སྐབས་ཀུན་ནས་མཛེས་པར་བསྡམས། །རྟ་མཆོག་བཞིན་དུ་གསང་གནས་སྦུབས་སུ་ནུབ། །འཇམ་ཞིང་ཕྲ་བ་བ་སྤུའི་ཚོགས་རྣམས་ནི། །ཟླ་མེད་རེ་རེར་བྱུང་ནས་གཡས་ཕྱོགས་སུ། །རིམ་གྱིས་འཁྱིལ་ནས་སྐུ་ལ་གྱེན་དུ་ཕྱོགས། །བགས་ཀྱིས་ཕྲ་ཞིང་ཟླུམ་པའི་བྱིན་པ་ལེགས། །ཞབས་ཀྱི་མཁྲིག་མ་ལོང་བུའི་འབུར་གྱིས་དབེན། །རུས་སྦལ་ལྟོ་བཞིན་ཞབས་མཐིལ་ཀུན་ནས་མཉམ། །ཞབས་ཀྱི་བཞི་ཆ་ཕྱིར་འཕགས་རྟིང་པ་ཡངས། །འདབ་དྲུག་པད་དཀར་དམར་སེར་ལྟེ་བའི་སྟེང༌། །དཀྱིལ་འཁོར་ཡོངས་རྫོགས་རྒྱུ་སྐར་བདག་པོའི་གདན། །གང་དེར་སྒྲ་ལྡན་གདུ་བུས་མཁྲིག་མའི་ཕྱོགས། །མཛེས་པའི་ཞབས་གཉིས་རྡོ་རྗེའི་སྐྱིལ་ཀྲུང་མཛད། །བསོད་ནམས་ཚོགས་རབ་རབ་འབྱམས་རྒྱུ་ལས་འཁྲུངས་པའི་སྐུ་མཆོག་མཆོག་ཏུ་མཛེས་པ་ཁྱོད་ཀྱི་སྐུ། །ནམ་མཁའི་མཐས་གཏུགས་གཏུགས་པ་མེད་པའི་ཞིང་མཆོག་ཀུན་དུ་དུ་མའི་འགྲོ་ལ་མིག་འཕྲུལ་བཞིན། །ལ་ལར་བལྟམ་ཞིང་ཞིང་གཞན་དུ་ཡང་བྱང་ཆུབ་ཚུལ་སྟོན་སྟོན་པ་ཁྱོད་ཀྱི་སྐུ་ཡི་ནི། །བཀོད་པ་མཆོག་འདི་འདི་དང་གཞན་དུ་མ་ལུས་འགྲོ་ཀུན་ཀུན་མཁྱེན་གྱུར་ཀྱང་བརྗོད་མི་ནུས། །ལི་ཁྲིའི་རྒྱ་མཚོར་རྟ་བདུན་འོད་སྟོང་ལྷུང་བ་བཞིན། །བལྟ་བས་མི་ངོམས་འོད་ཕུང་ཕྱོགས་བཅུར་འཕྲོ་བའི་སྐུ། །གང་དེ་ཅུང་ཟད་བསྟོད་པའི་བསོད་ནམས་དེ་ཡིས་བདག །འཇམ་དབྱངས་སྐུ་མཛེས་མིག་གི་ལམ་དུ་འབྲལ་མེད་ཤོག །ནམ་ཞིག་ཁྱོད་སྐུ་མཐོང་བར་གྱུར་མ་ཐག །སྲིད་པར་རིང་དུ་འཁྱམས་པས་དུབ་པ་བདག །ལོག་པའི་ལམ་དུ་སོང་བའི་མ་རུངས་ཡིད། །བྱང་ཆུབ་སེམས་ཀྱིས་དབང་དུ་འགྱུར་བར་ཤོག །གཞན་ཡང་གཟུངས་དང་མངོན་ཤེས་རྣམ་ཐར་སྒོ། །མུ་མཐའ་མེད་པའི་ཏིང་འཛིན་ཚོགས་ཐོབ་ནས། །ཞིང་ཁམས་བྱེ་བར་རྒྱལ་རྣམས་བལྟ་བའི་ཕྱིར། །དཔག་མེད་ལུས་ཀྱི་བཀོད་པ་སྟོན་པར་ཤོག །དེར་ནི་མང་དུ་ཐོས་པའི་མཐར་སོན་ཏེ། །མཐའ་ཡས་འགྲོ་བ་ཆོས་ཀྱིས་ཚིམ་བྱས་ནས། །རིང་པོར་མི་ཐོགས་རྒྱལ་བ་ཀུན་གྱི་གཙོ། །ངག་གི་དབང་པོའི་སྐུ་མཆོག་ཐོབ་པར་ཤོག །རྗེ་བཙུན་འཇམ་པའི་དབྱངས་ལ་བསྟོད་པ་འཇམ་དབྱངས་མཉེས་པར་བྱེད་པའི་བསྟོད་སྤྲིན་རྒྱ་མཚོ་ལས་སྐུ་ལ་བསྟོད་པའི་སྐབས་ཏེ་དང་པོའོ། ། ༈ འོད་སྟོང་ཟེར་གྱིས་ཕྱེ་བའི་གུར་ཀུམ་གཟུགས། །དང་བའི་མེ་ལོང་དཀྱིལ་ན་གསལ་བ་བཞིན། །འགྱིང་ལེགས་དབང་པོའི་གཞུ་བཞིན་རབ་བཀྲ་བའི། །འཇམ་པའི་དབྱངས་ཀྱིས་ངག་གི་དབང་ཕྱུག་སྩོལ། །ཕྱོགས་བཅུའི་ཞིང་ཀུན་ཀུན་ནས་འགེངས་པའི་སྒྲ་སྐད་སྐད་ཀྱི་དབྱེ་བ་མཐའ་ཡས་པ། །སེམས་ཅན་ཀུན་ཡིད་ཡིད་དང་མཐུན་པར་ཚིམ་བྱེད་བྱེད་པོའི་གདངས་ཀྱང་ཟིལ་གནོན་པ། །ཁྱོད་ཀྱི་གསུང་དབྱངས་དབྱངས་ཀྱི་ང་རོའི་དཀྱིལ་འཁོར་འཁོར་བ་སྲིད་དུ་རྒྱུན་ཆགས་པའི། །སྙན་པའི་གསུང་གང་གང་གི་རྣ་བའི་ལམ་དུ་ལྷུང་ན་ན་རྒ་འཆི་བ་འཕྲོག་པར་བྱེད། །གསུང་མཉེན་འཇམ་ཞིང་ཡིད་འོང་ཡིད་དུ་འཐད། །དག་ཅིང་དྲི་མེད་འོད་གསལ་སྙན་ལ་འཇེབས། །མཉན་པར་འོས་ཤིང་མི་ཚུགས་སྙན་ཞིང་དུལ། །མི་རྩུབ་མི་བརླང་རབ་དུལ་རྣ་བར་སྙན། །ལུས་སེམས་སྙིང་ནི་ཚིམ་བྱེད་དགའ་བདེ་སྐྱེད། །གདུང་མེད་ཀུན་ཏུ་ཤེས་བྱེད་རྣམ་རིག་བྱ། །རྣམ་གསལ་དགའ་བྱེད་མངོན་པར་དགའ་བྱེད་ཅིང༌། །ཀུན་ཤེས་བྱེད་ཅིང་རྣམ་པར་རིག་པར་བྱེད། །རིགས་ཤིང་འབྲེལ་ལ་ཟློས་པའི་སྐྱོན་དང་བྲལ། །སེང་གེ་གླང་ཆེན་འབྲུག་དང་ལག་འགྲོའི་དབང༌། །དྲི་ཟ་ཀ་ལ་པིང་ཀ་ཚངས་པ་དང༌། །ཤང་ཤང་ཏེའུ་དབང་པོའི་དབྱངས་ལྟར་སྙན། །རྔ་སྒྲ་མ་ཁེངས་མི་དམའ་ཀུན་རྗེས་ཞུགས། །ཚིག་ཟུར་ཕྱིན་ཅིང་མ་ཚང་མེད་པ་དང། །མ་ཞུམ་མི་ཞན་རབ་དགའ་ཁྱབ་ཅིང་ཆུབ། །རྒྱུན་ཆགས་འབྲེལ་ཞིང་སྒྲ་ཀུན་རྫོགས་པར་བྱེད། །དབང་པོ་ཀུན་ཚིམ་མ་སྨད་མི་འགྱུར་ལ། །མ་བརྟགས་འཁོར་གྱི་དཀྱིལ་འཁོར་ཀུན་ཏུ་གྲགས། །དུག་གསུམ་སེལ་བྱེད་བདུད་དཔུང་ཚར་གཅོད་ཅིང༌། །རྣམ་པ་ཀུན་གྱི་མཆོག་དང་ལྡན་པར་འབྱུང༌། །དེ་ལྟར་བཞི་ཡིས་ལྷག་པའི་དྲུག་ཅུའི་དབྱངས། །གསུང་གཅིག་ཉིད་ལའང་མ་ཚང་མེད་པར་ནི། །ཇི་སྲིད་ནམ་མཁའི་མཐས་ཁྱབ་དེ་སྲིད་དུ། །སྐལ་ལྡན་རྣ་བའི་ལམ་དུ་བདེ་བ་སྟེར། །དེ་ཚེ་ཉེ་བར་གནས་ལ་ཧ་ཅང་ཆེ་བར་མི་སྣང་རིང་ན་གནས་ལ་ཆུང་མིན་པར། །སྣ་ཚོགས་ཚོན་དང་ཕྲད་པའི་ཤེལ་བཞིན་གྲངས་མེད་གདུལ་བྱའི་རང་རང་སྐད་དང་མཐུན་པར་ནི། །སྤྱི་གཙུག་མཛོད་སྤུ་མགྲིན་པ་ལ་སོགས་ཁྱོད་སྐུའི་ཆ་ཤས་ཀུན་ནས་འབྱུང་བར་རབ་སྟོན་ཀྱང༌། །དེ་དག་ཀུན་ལ་རྟོག་པ་ཉེར་ཞི་འདི་ནི་ནམ་མཁས་ཚངས་དབྱངས་སྒྲོག་ན་མཚོན་པར་ནུས། །གློག་དམར་མཛེས་པའི་སྐ་རགས་བཅིངས་པ་ཡི། །ཆར་སྤྲིན་ནང་གི་འབྲུག་སྒྲ་ཟབ་མོ་བཞིན། །འཇམ་དབྱངས་གསུང་བསྟོད་བསོད་ནམས་འདི་ཡིས་བདག །ཁྱོད་གསུང་རྣ་བའི་ལམ་དུ་འབྲལ་མེད་ཤོག །གསུང་རྒྱུན་རྣ་བའི་བུ་གར་ཞུགས་མ་ཐག །སྐལ་ལྡན་རྗེས་འཛིན་ལོག་སྨྲ་ཚར་གཅོད་ཅིང༌། །སྡེབ་ལེགས་ཚིག་གིས་བློ་གསལ་ཡིད་འཕྲོག་པའི། །འཆད་རྩོད་རྩོམ་པའི་གནས་རྣམས་མཐར་སོན་ཤོག ། ཐ་དད་འགྲོ་བའི་སྐད་ལ་ཐོགས་མེད་པའི། །ངེས་ཚིགས་སོ་སོ་ཡང་དག་རིག་པ་མཆོག ། བདེ་བླག་ཐོབ་ནས་འགྲོ་བ་ཐམས་ཅད་ཀྱི། །ཐེ་ཚོམ་གཅོད་པའི་མཆོག་ཏུ་བདག་གྱུར་ཅིག །ཁྱོད་ཀྱིས་ཇི་ལྟར་རྗེས་སུ་གདམས་པ་ཡི། །གསུང་གི་མཚམས་ལས་ནམ་ཡང་མི་འདའ་བར། །གུས་པས་རྩེ་གཅིག་ཉམས་སུ་བླངས་པ་ཡིས། །གསུང་གི་དབང་ཕྱུག་མྱུར་དུ་འགྲུབ་པར་ཤོག །རྗེ་བཙུན་འཇམ་པའི་དབྱངས་ལ་བསྟོད་པ་འཇམ་དབྱངས་མཉེས་པར་བྱེད་པའི་བསྟོད་སྤྲིན་རྒྱ་མཚོ་ལས་གསུང་ལ་བསྟོད་པའི་སྐབས་ཏེ་གཉིས་པའོ།། ༈ བྱུ་རུའི་མདངས་དང་འདྲེས་པའི་གསེར་ཟངས་མདོག །མདོག་ལེགས་ཤེས་བྱ་མ་ལུས་ལྷང་ངེར་མཁྱེན། །མཁྱེན་རབ་དབང་ཕྱུག་འཇམ་དབྱངས་འགྲོ་བའི་སྐྱབས། །སྐྱབས་མཆོག་ཁྱོད་ཀྱིས་རབ་འབྱམས་ཤེས་རབ་སྩོལ། །དངོས་འཛིན་ཆང་གིས་རབ་ཏུ་མྱོས་པས་བླང་དོར་དཔྱོད་པའི་བློ་གྲོས་ཉམས། །ཉོན་མོངས་གདུག་པའི་སྣ་ཡི་ལག་པས་དགེ་བའི་ལྗོན་པ་ཀུན་ཏུ་འཇོམས། །སྲེད་པའི་ཞགས་པས་ཡིད་ནི་དྲངས་པས་རྙེད་བཀུར་གླང་མོའི་ཕྱིར་འབྲང་བ། །བག་མེད་ནགས་ཁྲོད་ཀུན་ཏུ་རྒྱུ་བའི་གདུལ་དཀའི་ཡིད་ཀྱི་གླང་པོ་ཆེ། །དྲན་ཤེས་བག་ཡོད་ཐག་པས་དམ་བཅིངས་ནས། །ཡང་དག་རིགས་པའི་ལྕགས་ཀྱུ་རྣོན་པོ་ཡིས། །འཕགས་མཆོག་བྱེ་བས་བགྲོད་ཅིང་བསྔགས་པ་ཡི། །རྟེན་འབྲེལ་དམ་པའི་ལམ་བཟང་སྲོལ་དུ་བཙུད། །ཚུལ་དེ་སྐྱོ་མེད་བརྩོན་པའི་ཤུགས་དྲག་གིས། །དཔག་མེད་བསྐལ་པར་ཡང་དང་ཡང་གོམས་པས། །སྒྱུ་མ་ལྟ་བུའི་ཏིང་འཛིན་རྡོ་རྗེ་ཡིས། །མཐར་འཛིན་རི་བོ་མིང་གི་ལྷག་མར་མཛད། །སླར་ཡང་མཐའ་ཡས་རྒྱལ་བའི་དབང་པོ་རྣམས། །རབ་མཆོག་མཆོད་སྤྲིན་རྒྱ་མཚོས་མཉེས་བྱས་པས། །དྲི་མེད་མགུར་ནས་ཚངས་དབྱངས་ང་རོ་ཡིས། །དགོངས་པ་གཅིག་གིས་གསུངས་པའི་གདམས་པ་མཆོག །སྲིད་པའི་ནད་བརྒྱ་དྲུངས་འབྱིན་བདུད་རྩིའི་ཟས། །རྒྱུན་དུ་བསྟེན་པས་བགྲོད་པར་ཆེས་དཀའ་བའི། །རྒྱལ་སྲས་སྤྱོད་པ་རླབས་ཆེའི་ཕ་རོལ་ཏུ། །བགྲོད་པའི་བློ་གྲོས་ལུས་སྟོབས་རྒྱས་པ་ན། །མཐའ་དག་འཛིན་པས་ནམ་ཡང་མི་རྫི་ཞིང༌། །མ་ལུས་འཁྲུལ་སྣང་འཇོམས་ལ་ཐོགས་མེད་པའི། །ཏིང་འཛིན་ཀུན་གྱི་གཙོ་བོར་གྱུར་པ་གང༌། །རྡོ་རྗེ་ལྟ་བུར་གྲགས་པའི་ཏིང་ངེ་འཛིན། །ཁྱོད་ཀྱིས་མངོན་དུ་མཛད་པ་དེ་ཡི་མཐུས། །སྒྱུ་མ་ལྟ་བུའི་ཡུལ་གྱི་སྣང་བ་དང༌། །རྨི་ལམ་ལྟ་བུར་གསལ་ཞིང་རིགས་པའི་བློ། །མྱོང་སྣང་མ་ལུས་ཆོས་ཀྱི་དབྱིངས་སུ་ཞུགས། །དེ་ཕྱིར་རྩ་བ་ཉམས་པའི་ལྗོན་པ་བཞིན། །མ་ལུས་འཛིན་པའི་ས་བོན་དྲུངས་ཕྱུང་བས། །སྐྱོབ་པ་ཁྱོད་ལ་ནམ་མཁའ་ཇི་སྲིད་དུ། །ཆོས་ཀྱི་སྐུ་ལས་གཡོ་བ་ག་ལ་ཞིག །དེ་ལྟར་མགོན་ཁྱོད་ཆོས་ཀྱི་དབྱིངས་ལས་ཅུང་ཟད་གཡོ་བ་མེད་བཞིན་དུ། །དུ་མའི་ཤེས་བྱ་གསལ་བར་སྣང་བ་མེ་ལོང་ནང་དུ་གཟུགས་བརྙན་ནམ། །ནམ་མཁའི་ལམ་ན་འཇའ་ཚོན་བཞིན་དུ་སོ་སོར་མ་འདྲེས་རྫོགས་པར་མཁྱེན། །མཁྱེན་བཟང་ཁྱོད་ཀྱི་མཁྱེན་པ་དེ་ཡང་སྐད་ཅིག་ཉིད་ལ་དེ་ལྟར་ལགས། །སྦྱིན་ལས་འབྱོར་ལྡན་གནས་ཡིན་དབུལ་པོ་མིན། །སེར་སྣས་དབུལ་པོའི་གནས་ཡིན་འབྱོར་ལྡན་མིན། །དེ་སོགས་རྟེན་འབྲེལ་མི་བསླུའི་གནས་ཀུན་མཁྱེན། །དེ་ཕྱིར་ཁྱོད་ནི་སྨྲ་བའི་གཙོ་བོ་ལགས། །ཐོགས་མེད་སྲིད་པར་སོང་བ་ཐམས་ཅད་ཀྱི། །དགེ་དང་མི་དགེའི་ལས་ཚུལ་འབྲས་བུར་བཅས། །གང་དེ་ཁྱོད་ཀྱི་མངོན་དུ་མ་གྱུར་མེད། །དེ་སླད་ཁྱོད་གསུང་འབྲས་མེད་མ་མཆིས་ལགས། །ཆགས་ལ་གནས་ཤིང་སྡང་ལ་མོས་པ་དང༌། །དེ་ལས་ལྡོག་སོགས་མོས་པ་སྣ་ཚོགས་ཚུལ། །མངོན་སུམ་གཟིགས་ཕྱིར་ཁྱོད་ཀྱི་མཛད་པ་ཀུན། །འགྲོ་ལ་དོན་དུ་མི་འགྱུར་ཡོད་མ་ལགས། །བཅོ་བརྒྱད་ཁམས་ཀྱི་རབ་དབྱེ་མཐའ་དག་ལ། །ཁྱོད་ལ་ལྐོག་ཏུ་གྱུར་པ་གང་ཡང་མེད། །དེ་ཕྱིར་ཁྱོད་ནི་གདུལ་བྱའི་གནས་རྣམས་ཀྱི། །གདུལ་བའི་དུས་ལས་ཅུང་ཟད་འདའ་མ་ལགས། །སྲིད་པར་རྒྱུ་བ་རྣམས་ཀྱི་དད་སོགས་ཀྱི། །དབང་པོ་རྣོ་རྟུལ་དབང་པོ་མེད་པ་ལ། །མཁྱེན་པ་ཐོགས་མེད་འཇུག་པ་དེ་སླད་ཁྱོད། །ཆོས་སྟོན་ཚུལ་ལ་ཤིན་ཏུ་མཁས་པ་ལགས། །མངོན་པར་མཐོ་ཞིང་ངེས་པར་ལེགས་པ་དང༌། །ངན་སོང་གནས་རྣམས་ཀུན་ཏུ་བགྲོད་པའི་ལམ། །ཀུན་ལ་མཁྱེན་པ་སྒྲིབ་པ་མེད་པའི་ཕྱིར། །ཁྱོད་ནི་འགྲོ་བའི་བཤེས་གཉེན་བཟང་པོ་ལགས། །བསམ་གཏན་གཟུགས་མེད་སེང་གེ་རྣམ་པར་བསྒྱིངས། །ཐོད་རྒལ་ལ་སོགས་ཏིང་འཛིན་མཐའ་དག་གི །འཇུག་ལྡང་ཀུན་བྱང་ཚུལ་ལ་མ་རྨོངས་པས། །སྙོམས་འཇུག་རྣམས་ཀྱི་ཕ་རོལ་སོན་པ་ལགས། །ཐོག་མེད་འཁོར་བར་ཡོངས་སུ་འདྲིས་བགྱིས་པའི། །རང་གཞན་ཚེ་རབས་དན་རྟགས་དང་བཅས་པ། །སྐད་ཅིག་ཙམ་གྱིས་ཁོང་དུ་ཆུད་པས་ན། །ཁྱོད་ནི་སྔོན་གྱི་མཐའ་ལ་མཁས་པ་ལགས། །འདི་ཙམ་དུས་ན་འདི་ནས་འཆི་འཕོ་ཞིང༌། །ལེགས་སྤྱད་ཉེས་སྤྱད་ལས་རྣམས་ཇི་ལྟ་བར། །གང་དུ་སྐྱེ་བའི་གནས་ཀུན་རབ་མཁྱེན་པས། །ཁྱོད་ནི་ཕྱི་མའི་མཐའ་ལ་མཁས་པ་ལགས། །གང་ཞིག་ཟག་པ་ཟད་པའི་མྱང་འདས་དང༌། །གང་གིས་ཟད་བྱེད་འཕགས་ལམ་བརྒྱད་ཀྱི་ལམ། །དེ་དག་ཀུན་ལ་སྒྲིབ་མེད་མངོན་སུམ་སྤྱན། །དེ་ཕྱིར་ཁྱོད་ནི་སྐྱབས་ཀྱི་དམ་པ་ལགས། །དེ་ལྟར་གནས་དང་གནས་མིན་ལས་ཀྱི་རྣམ་སྨིན་མོས་པ་འཇིག་རྟེན་ཁམས། །དབང་པོའི་རིམ་པ་ཀུན་འགྲོའི་ལམ་དང་ཉོན་མོངས་རྣམ་བྱང་སྔོན་གྱི་གནས། །འཆི་འཕོ་སྐྱེ་དང་ཟག་པ་ཟད་ལ་མཁྱེན་པ་ཐོགས་པ་མེད་འཇུག་པ། །གང་ལ་མངའ་བ་ཁྱོད་ཀྱི་ཡུལ་དུ་མ་གྱུར་ཤེས་བྱའི་གནས་དེ་གང༌། །སྲིད་པར་འཁྱམས་པ་རྣམས་ཀྱིས་ཐོག་མེད་ནས། །བདག་བདེའི་ཕྱིར་དུ་གཞན་ལ་གནོད་པའི་ལམ། །དྲག་པོའི་རྩོལ་བས་ཀུན་ཏུ་བསྟེན་ན་ཡང༌། །ངལ་བ་འབྲས་བུ་མེད་པས་གོལ་བ་ལྟར། །གཞན་ལ་ཅུང་ཟད་ཙམ་ཡང་མི་འཚེ་བར། །རང་ཉིད་ཕྱིར་དུ་ཉིན་མཚན་བར་མེད་པར། །བརྒྱ་ཕྲག་བརྩོན་པས་ཐར་པ་བསྒྲུབ་དེ་ཡང༌། །ཡང་དག་ལམ་ལ་རྒྱབ་ཀྱིས་ཕྱོགས་པར་གཟིགས། །དེ་ཕྱིར་རྒྱལ་བ་ཀུན་གྱི་ལམ་གཅིག་པུ། །ལུས་ཅན་མཐའ་དག་རྗེས་སུ་འཛིན་པའི་མ། །རྒྱལ་སྲས་དཔའ་བོ་གཡུལ་དུ་འཇུག་པའི་གོ །སྙིང་རྗེའི་ལམ་བཟང་རིང་ནས་གོམས་པར་མཛད། །སྡུག་བསྔལ་རྨི་ལམ་དུ་ཡང་མི་འདོད་ཅིང༌། །ཕུལ་བྱུང་བདེ་ལ་ཆོག་ཤེས་མེད་པར་ནི། །འགྲོ་བ་འདི་ཀུན་ཁྱད་པར་ཡོད་མིན་ན། །གཞན་བདེ་ཡལ་བར་འདོར་རྣམས་ཆེས་འཁྲུལ་བར། །བརྩེ་ལྡན་ཁྱོད་ཀྱིས་གཟིགས་ནས་བདག་དང་གཞན། །མཉམ་པ་ཉིད་དུ་མཐོང་བའི་བྱང་ཆུབ་སེམས། །ཐོག་མ་ཉིད་དུ་གོམས་པར་མཛད་པ་ཡིས། །སེམས་ཅན་ཐམས་ཅད་ཁྱོད་ཀྱིས་བདག་གིར་བཟུང༌། །བདག་བདེར་སྲེད་པ་ཡང་དག་ལམ་གྱི་གེགས། །གཞན་ཉིད་གཅེས་འཛིན་ཡོན་ཏན་ཀུན་གྱི་གཏེར། །དེ་ཕྱིར་ཁྱོད་ཀྱི་བདག་གཞན་བརྗེ་བའི་ཚུལ། །ཡང་ཡང་གོམས་པས་འགྲོ་ཀུན་བདག་ཏུ་མཛད། །དེ་ལྟར་སྙིང་རྗེའི་མ་ཡིས་ལན་མང་དུ། །ལུས་སྟོབས་རྫོགས་པར་བསྐྱངས་པའི་བཅོམ་ལྡན་ཁྱོད། །ཕུན་ཚོགས་ཡོན་ཏན་རྣམས་ཀྱི་མཐར་ཕྱིན་ཀྱང༌། །ཞི་བའི་བདེ་བས་འཕྲོག་པར་ག་ལ་འགྱུར། །འདབ་བཟང་དབང་པོ་ལྷ་ཡི་ལམ་ཞུགས་པ། །དེར་གནས་མ་ཡིན་འཛིན་མར་མི་ལྟུང་ལྟར། །སྲིད་ཞིར་མི་གནས་ཁྱོད་ཐུགས་བསྟོད་པས་བདག །འཇམ་དབྱངས་མཁྱེན་བརྩེ་ཡིད་ལ་འབྲལ་མེད་ཤོག །མཐར་འཛིན་གོ་སྐབས་འཕྲོག་པའི་ལྟ་བ་དང༌། །འགྲོ་ཀུན་བུ་སྡུག་ལྟར་མཐོང་སྙིང་རྗེ་གཉིས། །ཡིད་ལ་བདེ་བླག་ཉིད་དུ་འགྲུབ་གྱུར་ནས། །ལུས་ཅན་ཐེག་པ་མཆོག་ལ་འཁྲིད་པར་ཤོག །ཆོས་ཀུན་ཚིག་དོན་མི་བརྗེད་དྲན་པའི་གཟུངས། །དྲི་བ་ཀུན་གྱི་ལན་ལྡོན་སྤོབས་པ་མཆོག །མྱུར་དུ་བསྐྱེད་ནས་ཆོས་ཀྱིས་ཕོངས་རྣམས་ལ། །ལེགས་བཤད་དགའ་སྟོན་འགྱེད་པར་བདག་གྱུར་ཅིག །སྣ་ཚོགས་གདུལ་བྱའི་བསམ་པ་ཇི་བཞིན་དུ། །མི་རྟོག་བཞིན་དུ་རེ་བ་སྐོང་བ་ཡི། །འཇམ་དབྱངས་ཐུགས་ཀྱི་དཔལ་གྱིས་མྱུར་དུ་བདག །སྟོན་ཟླས་ནམ་མཁའ་ཇི་བཞིན་མཛེས་གྱུར་ཅིག །རྗེ་བཙུན་འཇམ་པའི་དབྱངས་ལ་བསྟོད་པ་འཇམ་དབྱངས་མཉེས་པར་བྱེད་པའི་བསྟོད་སྤྲིན་རྒྱ་མཚོ་ལས་ཐུགས་ལ་བསྟོད་པའི་སྐབས་ཏེ་གསུམ་པའོ།། །།ཕྱོགས་བཅུའི་ཞིང་ན་མཐའ་ཡས་རྒྱལ་བས་རྒྱུན་ཆད་མེད་པར་རབ་བསྔགས་པ། །གང་གི་སྙན་པས་འཇིག་རྟེན་གསུམ་བཀང་འཇམ་པའི་དབྱངས་ཞེས་རབ་ཏུ་གྲགས། །གང་དེའི་ཡོན་ཏན་ཅུང་ཟད་གུས་པས་བརྗོད་པའི་བསྟོད་སྤྲིན་རྒྱ་མཚོ་འདི། །གང་ཞིག་འཛིན་ཅིང་ཀློག་པ་དེ་ཡི་ཡིད་ལ་འཇམ་དབྱངས་མྱུར་འཇུག་ཤོག། །།ཅེས་རྗེ་བཙུན་འཇམ་པའི་དབྱངས་ལ་བསྟོད་པ་འཇམ་དབྱངས་མཉེས་པར་བྱེད་པའི་བསྟོད་སྤྲིན་རྒྱ་མཚོ་ཞེས་བྱ་བ་འདི་ནི་མང་དུ་ཐོས་པའི་རྒྱལ་ཁམས་པ་བློ་བཟང་གྲགས་པའི་དཔལ་གྱིས་གངས་ཅན་ཁྲོད་ཀྱི་གངས་རིའི་དབང་པོ་འོ་དེ་གུང་རྒྱལ་གྱི་ལྷ་ཞོལ་དུ་སྦྱར་བའི་ཡི་གེ་པ་ནི་སྡེ་སྣོད་འཛིན་པ་བྷ་དྲ་པཱ་ལའོ། ། 

རྩོམ་ཁུངས། ངེད་དྲ་བ།

དཔྱད་མཆན ཡོངས་སུ་གཟིགས།དཔྱད་མཆན།

མིང་མི་འགོད་པར་སྤེལ།