གཟིམས་པ་མེད་པའི་མཆོད་མེ། དབྱངས་གསལ་སོ་བཞིའི་མཛེས་སྡུག  RSSསྔོན་མངག

བྱང་ཆུབ་སེམས་དཔའ་རྟག་ཏུ་ངུའི་རྟོགས་བརྗོད་ལས་ཤེར་ཕྱིན་གྱི་གླེགས་བམ་ལ་བསྟོད་པ་བཞུགས་སོ།།

2017-02-04 12:46:37 རྗེ་ཙོང་ཁ་པ་བློ་བཟང་གྲགས་པ། ཀློག་གྲངས། མཆན ཡོད།

IMG_0295.JPG

གང་གིས་ཚངས་དབང་མཆོག་གི་ཡང་།།
ཅོད་པན་ས་ལ་ལྟུང་བྱེད་པ།།
སྲིད་པ་གསུམ་གྱི་མཆོད་པའི་གནས།།
རྒྱལ་བ་ཀུན་གྱི་ཡུམ་བཞུགས་སོ།།

སྐུ་གསུམ་དཀྱིལ་འཁོར་རབ་རྒྱས་པ།།
དུག་གསུམ་མུན་པའི་ཚོགས་འཇོམས་ཤིང་།།
ཐེག་གསུམ་པདྨོའི་ཚལ་སྐྱོང་བ།།
མཁྱེན་གསུམ་ཉིན་མོའི་དབང་ཕྱུག་བཞུགས།།

བདེན་བཞི་རྟོགས་པའི་འོད་དཀར་ཅན།།
སྐུ་བཞི་རྒྱ་མཚོ་འཕེལ་བྱེད་ཅིང་།།
གླིང་བཞི་འགྲོ་བའི་གདུང་སེལ་བ།།
སྦྱོར་བཞི་རྒྱུ་སྐར་རྒྱལ་པོའང་བཞུགས།།

འགྲོ་བའི་སྐྱབས་གཅིག་དོན་དམ་སྐུ།།
ཀུན་མཁྱེན་ཉག་གཅིག་ཁོ་ནའི་ཡུམ།།
ཆོས་སྐུ་རོ་གཅིག་སྤྲོས་བྲལ་དབྱིངས།།
རྒྱལ་བའི་ཡུམ་གཅིག་ཆོས་སྐུ་བཞུགས།།

སྤྲོས་བྲལ་དབུ་མའི་མཁའ་ལ་ལེགས་གནས་ཤིང་།།
མཐའ་བརྒྱད་མུན་པའི་དམག་དཔུང་ཉམས་བྱེད་པ།།
རྒྱལ་ཡུམ་ཉིན་མོའི་དཔལ་འདི་མཐོང་བའི་ཚེ།།
པདྨོའི་གཉེན་འདིའང་སྐྲག་ནས་བྲོས་པ་འདྲ།།

སྟོང་ཉིད་སྤྲོས་དང་བྲལ་བའི་དབྱིངས་འདི་ཡིས།།
ལྷ་ཡི་ལམ་གྱིས་ཁྱབ་པའི་གོ་ཕྲོགས་ཤིང་།།
ཀུན་ལ་རང་ཉིད་རྗེས་སུ་ཞུགས་པ་ན།།
མཁའ་འདིའང་བསྐྲད་པས་མིག་ལམ་མི་སྣང་གྱུར།།




རྩོམ་ཁུངས། རྟག་ངུའི་རྟོགས་བརྗོད་བོད་དབྱིན་ཤན་སྦྱར་མ།

དཔྱད་མཆན ཡོངས་སུ་གཟིགས།དཔྱད་མཆན།

མིང་མི་འགོད་པར་སྤེལ།