འདིར་ཤེས་དགོས་པ་ཞིག་ལ་གོང་གསལ་བྱ་བྱེད་ལས་གསུམ་གྱི་ནང་གི་བྱ་བ་ཞེས་པ་དེ་ལ། བྱེད་པ་པོ་ལ་ཡོད་པའི་བྱ་བ་དང༌། བྱ་བའི་ཡུལ་ལ་ཡོད་པའི་བྱ་བ་གཉིས་སུ་ཡོད་པ་དེར། བརྡ་སྤྲོད་འགྲེལ་པ་རྣམས་སུ། བྱེད་པ་པོ་ལ་ཡོད་པའི་ལས་དང་བྱ་བའི་ཡུལ་ལ་ཡོད་པའི་ལས་ཞེས་པའི་ཐ་སྙད་མཛད་ཡོད། ཐ་སྙད་དེའི་དབང་དུ་བྱས་པའི་ལས་དང༌། བྱ་བྱེད་ལས་གསུམ་དུ་ཕྱེས་པའི་ནང་ཚན་གྱི་ལས་གཉིས་འཁྲུལ་བར་མི་བྱ་སྟེ། བྱ་བྱེད་ལ་ཡོད་པའི་ལས་གཉིས་པོ་དེ་ནི། བྱ་བྱེད་ལས་གསུམ་གྱི་ནང་གི་བྱ་བ་ཡིན་ལ། བྱ་བྱེད་ལས་གསུམ་དུ་ཕྱེས་པའི་ལས་ནི་བྱ་བ་བྱེད་སའི་གཞིའམ་བྱ་བའི་ཡུལ་ལ་གོ་དགོས་པའི་ཕྱིར།

            གནད་འདི་ཉིད་ཇི་བཞིན་མི་ཤེས་པར་གསུང་རབ་ལས་བཤད་པའི་དཀར་ནག་ལས་     འབྲས་ཀྱི་ལས་དང༌། བརྡ་སྤྲོད་རིག་པའི་གཞུང་ནས་བཤད་པའི་བྱ་བྱེད་ལས་གསུམ་དུ་ཕྱེས་བའི་ལས་གཉིས་ཀྱི་ཁྱད་པར་ལ་མགོ་བོ་མགལ་མེའི་འཁོར་ལོ་ལྟར་འཁོར་བའི་རྟགས་འགྲེལ་བྱེད་པོ་ཁ་ཅིག །ལས་དང་བྱ་ཡུལ་དོན་གཅིག་ཏུ་འདོད་པ་དག་ལ་ནི། བཤན་པས་ལུག་གསོད་པའི་ཚེ། ལུག་གསོད་པ་པོ་བཤན་པ་ལ་སྲོག་བཅད་པའི་སྡིག་པ་མེད་པ་དང༌། དེ་འདྲའི་ལས་དེ་ལུག་ལ་ཡོད་པར་ཐལ་བ་སོགས་དགེ་སྡིག་གི་ལས་གོ་ལྡོག་ནས་སྨྲ་དགོས་པར་འགྱུར་རོ།། ཞེས་སྨྲ་བར་བྱེད་དོ། །དེ་ནི་རང་ཉིད་ཀྱིས་བརྡ་སྤྲོད་པའི་གཞུང་ལས་བྱུང་བའི་བྱ་བྱེད་ལས་གསུམ་གྱི་རྣམ་གཞག་ཇི་ལྟ་བ་བཞིན་ཁོང་དུ་མ་ཆུད་པའི་རང་མཚང་ཡིན་ཏེ། གསུང་རབ་ལས་འབྱུང་བའི་ལས་ཏེ་སེམས་བྱུང་སེམས་པའམ། རྣམ་སྨིན་བདེ་སྡུག་གི་འཕེན་གྲོགས་གཟུགས་ཅན་པ་ཉིད། ཐ་སྙད་རིག་པའི་བྱ་བྱེད་ལས་གསུམ་གྱི་བཤད་པ་དང་བསྲེས་ནས་ཨུ་ཚུགས་བྱེད་པ་སྤྱིར་ཡང་ཡ་མཚན་པ་ཡིན་ཏེ། རང་སྡེ་བྱེ་བྲག་སྨྲ་བ་དང་ཐལ་འགྱུར་བས་གཟུགས་ཅན་དུ་འདོད་ཅིང༌། མདོ་སེམས་རང་རྒྱུད་པ་རྣམས་ཀྱིས་སེམས་པར་འདོད་པའི་ལས་ནི། གསོག་པ་པོ་གང་ཟག་གང་ཞིག་གིས། རང་གི་རྒྱུད་ལ་གསག་བྱ་ཡིན་ཏེ། དཔེར་ན། ལས་གསོག་པ་པོའི་གང་ཟག གསག་བྱའི་ལས། གསོག་པའམ་གསག་པ་ནི་བྱ་བ་ཞེས། ཁྱད་པར་གསུམ་དུ་ཕྱེ་བའི་ཚེ། དེ་འདྲའི་ལས་དེ་བྱ་བའི་ཡུལ་ལྟ་བུར་འཇོག་དགོས་ལ། འོན་ཀྱང༌། ཤིང་གཅོད་པའི་བྱ་ཡུལ་ལ་ཤིང་འཇོག་པ་དང་འདི་གཉིས་མི་འདྲ་སྟེ། ཤིང་ནི་ཕྱི་རོལ་ཡུལ་གྱི་ལས་དང༌། དཀར་ནག་དགེ་སྡིག་གི་ལས་ནི་རྒྱུད་ཀྱི་བྱ་ཡུལ་ཡིན་པའི་ཁྱད་པར་འབྱེད་དགོས་སོ།།

            གསུང་རབ་ལས་འབྱུང་བའི་དཀར་ནག་དགེ་སྡིག་གི་ལས་ཞེས་པ་དེ་ནི། བརྡ་སྤྲོད་རིག་པའི་གཞུང་གི་བྱ་བྱེད་ལས་ནི་ནང་གི་བྱ་བར་གོ་དགོས་ཤིང༌། དེ་ལའང་བྱེད་པ་པོ་ལ་ཡོད་པའི་བྱ་བའམ་ལས་དང༌། བྱ་བའི་ཡུལ་ལ་ཡོད་པའི་ལས་གཉིས་ཡོད་པའི་ནང་ནས། བྱེད་པ་པོ་ལ་ཡོད་པའི་ལས་ཉིད་ལ་གོ་དགོས་པས། བྱ་བྱེད་ལས་གསུམ་དུ་ཕྱེ་བའི་ལས་སམ་བྱ་ཡུལ་ལ་ཅི་ཕྱིར་གོ་དགོས། དེས་ན་བཤན་པས་ལུག་གསོད་ལྟ་བུར། སྲོག་གཅོད་པ་ནི་བྱ་བ། བཤན་པ་བྱེད་པོ། ལུག་ལས་ཡིན་པ་ནི། བརྡ་སྤྲོད་རིག་པའི་གཞུང་ལ་རླུང་ལྟར་གྲགས་ཤིང༌། སྲོག་གཅོད་པ་པོ་དང་འབྲེལ་བའི་བྱེད་ལས་དེ་ཉིད། གསུང་རབ་ནས་བཤད་པའི་ལས་དང་བརྡ་སྤྲོད་ནས་བཤད་པའི་བྱ་བ་གཉིས་ཀྱི་གཞི་མཐུན་པ་ཡིན་ནོ།།

            འོ་ན་གསུང་རབ་ལས་བཤད་པའི་ལས་དང༌། བྱེད་པ་པོ་ལ་ཡོད་པའི་ལས། བྱ་བའི་ཡུལ་ལ་ཡོད་པའི་ལས་རྣམས། ལས་མ་ཡིན་ནམ་ཞེ་ན། དེ་དག་ནི་ལས་ཀྱི་མིང་གིས་བཏགས་པ་ཙམ་ཡིན་གྱི། བརྡ་སྤྲོད་ལས་བཤད་པའི་ལས་དངོས་མ་ཡིན་ཏེ། བྱ་བ་ཡིན་པའི་ཕྱིར། དེས་ན། བྱ་བྱེད་ལས་གསུམ་དུ་ཕྱེ་བའི་ལས། བྱ་བ་བྱེད་སའི་གཞི། བྱ་བའི་ཡུལ། རྣམ་དབྱེ་གཉིས་པ་ལས་སུ་བྱ་བ་ཞེས་པའི་ལས་རྣམས་གནད་གཅིག་ཅིང༌། བྱེད་པ་པོ་ལ་ཡོད་པའི་ལས་དང༌། བྱ་བའི་ཡུལ་ལ་ཡོད་པའི་ལས་གཉིས་པོ་ནི། བྱ་བྱེད་ལས་གསུམ་གྱི་ནང་ནས་བྱ་བ་ཡིན་ནོ།། དེ་ལྟར་ཡིན་པ་ཡང་བརྡ་སྤྲོད་སྨྲ་བའི་མཁས་པ་ཀུན་ཁ་མཐུན་པ་ཡིན་ཏེ། དབྱངས་ཅན་དགའ་བའི་བློ་གྲོས་ཀྱིས།

                                    བྱ་བའི་ལས་དང་ལས་དངོས་ནི།།

                                    དངོས་པོ་གཞན་དུ་འཇོག་པ་ཡིན།།

            ཞེས་པ་འདིས་བྱ་བྱེད་ཀྱི་ལས་རྣམས་ལས་བཏགས་པ་བ་གོ་ནུས་པའི་ཕྱིར། མཁས་པ་ཆེན་པོ་པྲ་ཏི་དགེ་བཤེས་རིན་ཆེན་དོན་འགྲུབ་ཀྱི་རྟགས་འགྲེལ་བཤད་སྦྱར་ཚིགས་བཅད་མར།

                                    བྱེད་པ་པོ་དང་འབྲེལ་བའི་ལས།།

                                    བྱེད་པའི་ལས་ཞེས་བྱ་བ་སྟེ།།

                                    བྱ་བའི་ཡུལ་དང་འབྲེལ་བའི་ལས།།

                                    བྱ་བའི་ལས་ཞེས་འདོགས་པ་ཡིན།།

            ཞེས་བྱ་བྱེད་ལ་ཡོད་པའི་ལས་གཉིས་པོ་དེ་ལ་ལས་ཞེས་བཏགས་རུང་བ་ཙམ་དུ་གསུངས་པའི་ཕྱིར། འགའ་ཞིག་གིས་འདིའི་གནས་ལུགས་མ་ཤེས་པར། གོང་གི་ཚིགས་བཅད་དེ་དང༌།

                                    བྱ་བ་བསྒྲུབ་པའི་ཡུལ་ལ་ནི།།

                                    ལས་ཀྱི་དངོས་པོ་ཞེས་པ་བརྗོད།།

            ཅེས་གསུངས་པ་གཉིས་འགལ་བར་འདུ་བའི་སྐྱོན་འཕེན་པ་ནི། པྲ་ཏི་དགེ་བཤེས་རིན་པོ་ཆེས། བྱ་བྱེད་ལ་ཡོད་པའི་ལས་བཏགས་པ་བ་དང༌། བྱ་ཡུལ་གྱི་ལས་མཚན་ཉིད་པ་གཉིས་ལ་དངོས་བཏགས་ཀྱི་ཁྱད་པར་ཕྱེ་སྟངས་ལ། རང་ཉིད་ཀྱི་བློ་གྲོས་ཧ་ཅང་ཆུང་བས་དབྱེ་བ་འབྱེད་པར་མ་ནུས་པའི་བབ་ཅོལ་དུ་ཤེས་སླའོ།།

དེ་ལྟར་མ་ཡིན་ན། རྩ་ཤེ་ལས།

                                    གལ་ཏེ་ཤིང་དེ་མེ་ཡིན་ན།།

                                    བྱེད་པ་པོ་དང་ལས་གཅིག་འགྱུར།།

            ཞེས་བྱེད་པ་པོ་མེ་དང༌། དེས་བུད་ཤིང་ལ་འགྱུར་བ་བསྐྱེད་པ་དེ་བྱ་བ། ཤིང་ལས་ལ་བཞག་འདུག་པ་དང༌། དབུ་མ་ལ་འཇུག་པ་ལས།

                        ལེན་པོ་རང་ཉེར་ལེན་གཅིག་རིགས་དངོས་མིན།།

                        དེ་ལྟ་ན་ལས་བྱེད་པོ་གཅིག་ཉིད་འགྱུར།།

            ཞེས་ཕུང་པོ་བདག་ཏུ་འདོད་པའི་རང་སྡེ་ཁ་ཅིག་ལ། ཉེ་བར་ལེན་པ་པོ་བདག་རང་ཉིད་དང༌། ཉེ་བར་ལེན་བྱའི་ཕུང་པོ་གཉིས་གཅིག་ཡིན་ན། དེ་ལྟ་ན་ལས་དང་བྱེད་པ་པོ་གཉིས་གཅིག་ཏུ་ཐལ་བ་འཕེན་འདུག་པ་དང༌།

ལེགས་བཤད་སྙིང་པོར། ཕུང་པོ་ནི་བདག་གི་ཉེ་བར་བླང་བྱ། བདག་ནི་ཉེ་བར་ལེན་པ་པོ་ཡིན་པས། རྣམ་ཤེས་སམ་གཞན་ཡང་རུང་ཕུང་པོ་ནི་བདག་ཏུ་མི་རུང་སྟེ། གཞན་དུ་ན་བྱེད་པ་པོ་དང་ལས་གཅིག་ཏུ་འགྱུར་རོ།། ཞེས་བདག་བྱེད་པ་པོ་དང༌། ཕུང་པོ་ལས་ལ་བཞག་འདུག་པ་འདིས་མཚོན་ཏེ། བྱ་བྱེད་ལས་གསུམ་གྱི་ཟླས་ཕྱེ་བའི་ལས་ཀུན་དཀར་ནག་གི་ལས་ལྟར་བྱེད་པ་པོའི་སྟེང་དུ་འཇོག་དགོས་ན། ཤིང་མེ་ལས་གཞན་དུ་མེད་པ་དང༌། ཕུང་པོ་གང་ཟག་ལས་གཞན་དུ་མེད་པ་སོགས་མི་འདོད་བཞིན་དུ་སྨྲ་དགོས་པར་འགྱུར་རོ།།

            དེས་ན་དཀར་ནག་གི་ལས་དང་བྱ་བྱེད་ལས་གསུམ་གྱི་ལས་གཉིས་བསྲེས་ནས་བཤད་པར་མི་བྱ་སྟེ། དཔེར་ན། རང་རྒྱལ་དང༌། རང་སངས་རྒྱས། སངས་རྒྱས་འབྲིང་རྣམས་དོན་གཅིག་པ་གཞུང་ཆེན་མོ་ཀུན་དགོངས་པ་མཐུན་པ་ལ། འོ་ན་བོད་ཀྱི་རྒྱལ་ཁབ་ཆོས་ཅན། རང་སངས་རྒྱས་ཡིན་པར་ཐལ། རང་རྒྱལ་ཡིན་པའི་ཕྱིར། ཅེས་ཟེར་བ་དང་མཚུངས་ཏེ། དེ་ནི་ནང་ཆོས་ཀྱི་གཞུང་ནས་བཤད་པའི་རང་རྒྱལ་དང་ཆབ་སྲིད་དམ་ལོ་རྒྱུས་ལས་བཤད་པའི་རང་རྒྱལ་གཉིས་བརྡ་ཆད་བསྲེས་པའི་སྐྱོན་ཡིན་པ་ལྟར། འདི་ཡང་ཐ་སྙད་ཕན་ཚུན་བསྲེས་པའི་ཉེས་བཤད་ཁོ་ནའོ། །འདི་དང་འདིས་མཚོན་ནས་རང་རང་གི་བརྡ་ཆད་དང་སྤྱིའི་བརྡ་ཆད་བསྲེས་ནས་འཆད་པ་དང་རྩོམ་པ་མང་པོ་ཞིག་ཤ་མོ་བརྡོལ་བ་བཞིན་ཐོལ་གྱིས་དོན་འོང་བ་མང་དག་ཅིག་འདུག་པ་ནི། བློ་གསལ་བ་རྣམས་མགོ་རྨོངས་སུ་འཇུག་པའི་ཀྱོག་ལམ་ཞིག་གི་སྒོ་འབྱེད་པ་མ་གཏོགས་མཁས་མང་འཇུག་པའི་གཞུང་ལམ་མཚན་ཉིད་པ་ཞིག་ག་ལ་ཡིན་ཏེ་མ་ཡིན་ནོ།།

            བྱ་བའི་སྐོར་ལ་འདི་ལྟར། བྱང་ཆུབ་སེམས་དཔས་སྟོང་པ་ཉིད་ལ་མཉམ་པར་གཞག་ལྟ་བུར། མཉམ་པར་གཞག་པ་ནི་བྱ་བ། བྱང་སེམས་ནི་བྱེད་པོ། སྟོང་པ་ཉིད་ནི་ལས་ཡིན་པས། དེ་འདྲ་བའི་བྱ་བ་དེ་ལ་བྱེད་པ་པོ་ལ་ཡོད་པའི་བྱ་བ་དང༌། བྱ་བའི་ཡུལ་ལ་ཡོད་པའི་བྱ་བ་གཉིས་ཡོད་པ་ནི་སྤྱི་མཚུངས་ཡིན་པས། དེ་ལྟ་ན། བྱ་བའི་ཡུལ་ལ་ཡོད་པའི་བྱ་བ་དེ་བྱ་བ་དངོས་ཡིན་ནམ་མིན་ཞེ་ན། དེ་བྱ་བ་དངོས་མ་ཡིན་ཏེ། བྱ་བ་དངོས་ཡིན་ན་ཁྱོད་ལ་དུས་གསུམ་གྱི་ཁྱད་པར་ཕྱེ་རྒྱུ་ཡོད་དགོས། ཡུལ་སྟོང་པ་ཉིད་ལ་ཡོད་པའི་ལས་སམ་བྱ་བ་དེ་ལ་དུས་གསུམ་གྱི་དབྱེ་བ་འབྱེད་དུ་མི་རུང་བའི་ཕྱིར། རྒྱུ་མཚན་འདི་དག་ལ་བརྟེན་ནས་བྱ་བྱེད་ལས་གསུམ་གྱི་ནང་གི་བྱ་བ་ཞེས་པ་དེ། གཙོ་ཆེར་བྱེད་པ་པོ་ལ་ཡོད་པའི་ལས་སམ་བྱ་བ་ཉིད་ལ་འཇོག་དགོས་པར་འདྲ་སྟེ། གཞན་དུ་ན། སྟོང་པ་ཉིད་ལ་དམིགས། ནམ་མཁའ་ལ་ལྟ། བདག་མེད་སྒོམ། བདེན་མེད་ལ་དཔྱོད་པར་བྱེད། ལྟ་བུ་མང་པོ་ཞིག་གི་བྱ་ཡུལ་རྟག་པ་ཡིན་པས་དེ་དང་འབྲེལ་བའི་བྱ་ལས་ཀྱང་རྟག་པ་ལས་འོས་མེད་སྟབས། དེ་དག་ཀྱང་བྱ་བ་རང་མཚན་པ་ཡིན་པར་ཁས་ལེན་དགོས་པར་འགྱུར་རོ།།

            དེས་ན། བྱ་བྱེད་ལས་གསུམ་གྱི་ནང་ནས་བྱ་བ་འདུས་བྱས་ཡིན་དགོས་པ་དང་གཅིག རྟག་པ་ལ་དུས་གསུམ་གྱི་དབྱེ་བ་མི་འཐད་པ་དང་གཉིས། བྱ་ཡུལ་རྟག་པ་དང་འབྲེལ་བའི་བྱ་བ་རྣམས་རྟག་པ་ཡིན་པ་དང་གསུམ་སྟེ། རྒྱུ་མཚན་དེ་དག་ལ་དཔག་ན། བྱ་ཡུལ་རྟག་པ་ལ་ཡོད་པའི་ལས་སམ་བྱ་བ་རྣམས་བྱ་བ་བཏགས་པ་བ་ཙམ་ལས། བྱ་བྱེད་ལས་གསུམ་དུ་ཕྱེ་བའི་བྱ་བ་དངོས་མིན་ནོ། །ཞེས་སྨྲ་དགོས་པར་སེམས་ཏེ་ད་དུང་ཡང་ཞིབ་ཏུ་དཔྱད་པར་བྱ་དགོས་སོ། །དེར་བརྟེན་བྱ་བྱེད་ལས་གསུམ་ཕྱེ་བའི་བྱ་བ་དེ་དག་བདག་གཞན་གཉིས་ཀྱི་ནང་ནས་གཞན་གྱི་ཁོངས་སུ་འདུ་བར་བཤད་པའང་ཡི་གེའི་ཐོབ་ཐང་ཙམ་ལ་དགོངས་ན་མ་གཏོགས། ད་ལྟ་བ་ཁོ་ནར་སེམས་སོ།།

            བྱ་བྱེད་ལས་གསུམ་གྱི་ནང་གི་བྱ་བ་སྟོན་པའི་ཚིག་གཉིས་པོ་དེ་དག་ལག་ལེན་ལ་འགེལ་དུས། དཔེར་ན། ཤིང་གཅོད་པའམ། གཅད་པ། གང་ཞིག་རྗོད་པའི་ཚེ་ན། དམིགས་གཏད་བྱ་ཡུལ་བྱེད་པའི་ལས་དང་བྱ་བའི་ལས་གཉིས་ཀྱི་ནང་ནས། བྱེད་པའི་ལས་ལ་བསམ་ནས་བརྗོད་ན། ཤིང་གཅོད་པར་བྱེད་ཅེས་འབྲི་བར་བྱ་ཡི། གཅད་པར་བྱ། ཞེས་འབྲི་བར་མི་བྱའོ། །དེ་བཞིན་དུ། ཆོས་སྒྲུབ། ལམ་སྒོམ། གསེར་དུ་སྒྱུར། པར་སྐྲུན། ལམ་འགོག ཆུ་འགེངས། ཞེས་འབྲི་དགོས་པ་ཡིན་ནོ། །དམིགས་གཏད་བྱ་ཡུལ་གྱི་དངོས་པོའི་ངོས་ནས་ཚུར་འགུལ་སྐྱོད་ཀྱི་རྣམ་པ་ལ་བསམ་ནས་བརྗོད་ཚེ། ཤིང་གཅད་པར་བྱ། ཞེས་འབྲི་དགོས་པ་ལས། གཅོད་པར་བྱ་ཞེས་འབྲི་མི་རུང༌། དེ་བཞིན་དུ། ཆོས་བསྒྲུབ། ལམ་བསྒོམ། གསེར་དུ་བསྒྱུར། པར་བསྐྲུན། ལམ་དགག ཆུ་དགང༌། ཞེས་འབྲི་དགོས་པའི་ཁྱད་པར་རྣམས་མ་འདྲེས་པར་ཤེས་དགོས།

            དེང་སང་གི་བརྡ་སྤྲོད་སྨྲ་བ་མང་པོ་ཞིག་གིས། བྱ་བའི་ལས་དང་བྱེད་པའི་ལས་སྟོན་པའི་ཚིག་གཉིས་པོ་ཡིག་འབྲིའི་ལག་ལེན་ལ་འགེལ་དུས་ཁྱད་པར་མེད་པར་གང་འབྲི་ནའང་འགྲིག་པར་བཤད་པ་ནི། ལག་ལེན་ལ་འགེལ་དུས་ཁྱད་མེད་ན་བྱ་བྱེད་ཀྱི་ལས་གཉིས་ལ་གོ་བ་སོ་སོར་ཕྱེ་ནས་བཤད་པ་ལ་དགོས་པ་ཅི་ཞིག་ཡོད། བྱ་བྱེད་ཀྱི་ལས་གཉིས་སྟོན་པའི་ཡིག་གཟུགས་མི་འདྲ་བ་གཉིས་སུ་ཕྱེ་བ་ལ་དེ་བས་ཀྱང་དགོས་མེད་དུ་ཐལ་ལོ།། དེང་སང་གི་བློ་གྲོས་དམན་པའི་གསར་བུ་རྣམས་ལག་ལེན་ལ་འཇུག་པ་བདེ་བའི་ཆེད་དུ་ཡིན་སྲིད་ཀྱང༌། དེ་ནི་ཤིན་ཏུའང་མི་རིགས་ཏེ། སྐྱེ་བོ་བློ་གྲོས་དམན་པའི་ངོར་ལྷག་པར་དུ་ཁ་གསལ་དུ་བཏང་ནས་འགྲེལ་བཤད་རྒྱ་ཆེར་བྱས་ཏེ། རྟོགས་དཀའ་བའི་དོན་རྣམས་ཤེས་ཐབས་བྱེད་ན་མ་གཏོགས། འཇུག་པ་བདེ་ཆེད་སླ་ཆོས་སུ་མཛད་ན་རང་གི་གཙུག་ལག་རིག་གཞུང་དང༌། དེ་དང་འབྲེལ་བའི་རིགས་པའི་གཞུང་ལུགས་མང་པོ་ཞིག་སྟོན་མཇུག་གི་མེ་ཏོག་ལྟར་གནས་སྐབས་ཙམ་འདྲ་ཆགས་པོ་སྣང་ནའང་ཡུན་རིང་དུ་མི་གནས་པར་འགྱུར་བའི་ཕྱིར་རོ།།

            ཡང་སི་ཏུ་རྗེས་འབྲངས་དང་བཅས་པས། བྱེད་པ་པོ་བདག་ད་ལྟ་བ་དང༌། བྱ་བའི་ལས་གཞན་མ་འོངས་པ། ཞེས་འཆད་པ་ཡང༌། བྱེད་པ་པོ་སྟོན་པའི་རྗོད་བྱེད་ཀྱི་སྒྲ་དེ་བྱེད་པ་པོ་གཞན་དང་དངོས་སུ་འབྲེལ་བའི་དུས་གསུམ་ཙམ་པོ་བའི་ད་ལྟ་བ་སྟོན་པའི་རྗོད་བྱེད་ཀྱི་སྒྲ་དང་ཡིག་གཟུགས་གཅིག་པ་ཡིན་ལ། བྱ་བའི་ལས་སྟོན་པའི་རྗོད་བྱེད་ཀྱི་སྒྲ་དེ་བྱེད་པ་པོ་གཞན་དང་འབྲེལ་བའི་ལས་མ་འོངས་པ་སྟོན་པའི་རྗོད་བྱེད་ཀྱི་སྒྲ་དང་ཡིག་གཟུགས་གཅིག་པ་ཡིན་ནོ།། ཞེས་འགྲེལ་ན་མ་གཏོགས། སྤྱིར་བྱེད་པ་པོ་ད་ལྟ་བ་དང༌། བྱ་ཡུལ་གཞན་མ་འོངས་པ་ཡིན་ཞེས། བརྗོད་བྱའི་ངོས་ནས་བསམ་ན་ཤིན་ཏུ་མི་འཐད་དེ། བྱེད་པ་པོ་ཤིང་མཁན་གྱིས་ཤིང་གཅོད་པའི་ཚེ་ན། གཅད་པར་བྱ་བའི་ཡུལ་གྱི་ཤིང་མེད་པར་ཐལ། བྱ་ཡུལ་ཤིང་མ་འོངས་པ་ཡིན་པའི་ཕྱིར། ཡང་བྱ་ཡུལ་ཤིང་གྲུབ་པའི་ཚེ་གཅོད་མཁན་མེད་པར་ཐལ། ཁྱོད་གཅོད་མཁན་དེའི་འབྲས་བུ་ཡིན་པའི་ཕྱིར། རྟགས་ཁས། ཁྱབ་སྟེ། གཞི་གཅིག་གི་སྟེང་དུ་རྒྱུ་འབྲས་དུས་མཉམ་པ་འགལ་བའི་ཕྱིར། རྟགས་གཉིས་ཀ་ཁས་ལེན་ན་གཅོད་པའི་བྱ་བ་གཏན་ནས་འགྲུབ་རྒྱུ་མེད་པར་ཐལ། གཅོད་པ་པོའི་སྐབས་སུ་ཅི་ཙམ་རྩོལ་བར་བྱས་ཀྱང་གཅད་རྒྱུ་མེད། གཅད་བྱའི་ཤིང་གྲུབ་པའི་སྐབས་གཅོད་པ་པོ་འགགས་ཟིན་པས་མེད་ཅིང༌། ཤིང་རང་གིས་རང་ཉིད་ལ་འགུལ་སྐྱོད་ཀྱིས་གཅད་པར་མི་ནུས་པའི་ཕྱིར།

            དེས་ན། གཅོད་པ་པོ་ཤིང་མཁན་དང༌། བྱ་ཡུལ་ཤིང༌། དེ་གཉིས་ཀྱི་བར་དུ་ཡོད་པའི་བྱ་བ་སྟེ། གསུམ་ཀ་མཉམ་དུ་འཛོམས་དགོས་ཏེ། གཅོད་མཁན་མེད་ན་གཅོད་པའི་བྱ་བ་སུས་བྱེད། ཤིང་མེད་ན་ཅི་ཞིག་གཅོད། དེ་གཉིས་ཀ་ཡོད་ཀྱང་གཅོད་པའི་བྱ་བ་ལ་མ་ཞུགས་ན་དེ་གཉིས་བྱ་བྱེད་ཀྱི་འབྲེལ་བ་ཡོད་པ་ལྟ་ག་ལ་འགྱུར། དེར་བརྟེན་བྱ་བྱེད་ལས་གསུམ་གྱི་ནང་ནས་བྱེད་པ་པོ་མེད་ན་ལས་མེད་དགོས། ལས་མེད་ན་བྱེད་པ་པོ་མེད་དགོས། དེ་གཉིས་ཀ་མེད་ན། དེ་གཉིས་དང་འབྲེལ་བའི་བྱ་བ་མེད་པར་འགྱུར་ཏེ། འཇིག་རྟེན་ལས་འདས་པའི་བསྟོད་པར།

                                    བྱེད་པོ་ལས་ལ་ལྟོས་ཤིང་གྲུབ།།

                                    ལས་ཀྱང་བྱེད་པོ་དེ་ཉིད་ལ།།

                                    བརྟེན་ནས་འབྱུང་བ་མ་གཏོགས་པར།།

                                    འགྲུབ་པའི་རྒྱུ་ནི་མ་མཐོང་ངོ༌།།

            ཞེས་གསུངས་པའི་ཕྱིར། དེས་ན་བྱེད་པ་པོ་དང་བྱ་ཡུལ་རྒྱུ་འབྲས་སུ་འདོད་པ་རྣམས་ཀྱིས་ནི། འཇིག་རྟེན་ན་གྲགས་པའི་དུས་གསུམ་དང་བྱ་བྱེད་ཀྱི་རྣམ་གཞག་ཙམ་ཡང་ཇི་ལྟ་བ་བཞིན་འཇོག་མི་ཐུབ་ན། གསུང་རབ་ཀྱི་བརྡ་ཆད་ལས་བྱུང་བའི་དུས་གསུམ་དང་བྱ་བྱེད་ཀྱི་རྣམ་གཞག་ནི་དེ་བས་ཀྱང་ག་ལ་འཇོག་ཐུབ་སྟེ་མི་ཐུབ་བོ།།

            ད་དུང་བྱེད་པོ་རྒྱུ་དང་བྱ་ཡུལ་འབྲས་བུར་འདོད་པའི་ཕྱོགས་ལ་འདི་ལྟར་དཔྱོད་དུ་ཡོད་དེ། བྱང་ཆུབ་སེམས་དཔས་སྟོང་པ་ཉིད་ལ་མཉམ་པར་བཞག་པ་ལྟ་བུའི་བྱ་ཡུལ་སྟོང་པ་ཉིད་ཆོས་ཅན། བྱང་སེམས་དེའི་འབྲས་བུ་ཡིན་པར་ཐལ། དེའི་བྱ་ཡུལ་ཡིན་པའི་ཕྱིར། རྟགས་མ་གྲུབ་ན། ཤིང་མཁན་གྱིས་ཤིང་གཅད་པའི་ཚེ་བྱ་ཡུལ་ཤིང་མ་ཡིན་པར་ཐལ་ལོ། །ཁྱབ་པ་མ་གྲུབ་ན་དམ་བཅའ་འབུད། འདོད་མི་ནུས་ཏེ་དེ་རྟག་པ་ཡིན་པའི་ཕྱིར། འདི་ལྟར་ཁས་ལེན་པ་དེས། དམིགས་བྱེད་བྱང་སེམས་ད་ལྟ་བ་དང༌། དམིགས་ཡུལ་སྟོང་ཉིད་མ་འོངས་པར་རང་དབང་མེད་པར་འདོད་དགོས་པས། སྟོང་ཉིད་དུས་གསུམ་རྒྱལ་བའི་ཡུལ་དུ་གསུངས་པ་ལ་དངོས་སུ་བསྙོན་པར་གྱིས་ཤིག དེ་བཞིན་དུ། བདག་མེད་སྒོམ། བདེན་མེད་ལ་དཔྱོད། སྤྱན་ནམ་མཁའ་ལ་གཟིགས། བདེན་སྟོང་ལ་དམིགས། ཤེས་བྱ་ལ་སློབ། རྟག་པ་ཚད་མས་རྟོགས་ལྟ་བུའི་བདག་མེད་དང༌། བདེན་མེད། ནམ་མཁའ། བདེན་སྟོང༌། ཤེས་བྱ། རྟག་པ་རྣམས་རེ་རེ་ནས་རང་ཉིད་ཡུལ་དུ་བྱེད་མཁན་གྱི་བྱེད་པ་པོ་སོ་སོའི་འབྲས་བུ་ཡིན་ཞེས་སེམས་ཡོད་སུ་ཞིག་གིས་སྨྲ་བར་བྱ་ནུས། ཕྱོགས་སྔ་མའི་འགྲེལ་བྱེད་མཁན་པོ་དེ་དག་གི་འདོད་པའི་སྡོམ་ཚིག་ལྟ་བུར་དབྱངས་ཅན་གྲུབ་པའི་རྡོ་རྗེས།

                                    བྱེད་པ་པོ་ནི་ད་ལྟ་དང༌།།

                                    བྱ་ཡུལ་མ་འོངས་པར་བསྡུས་ནས།།

            ཞེས་བྱེད་པ་པོ་ད་ལྟ་བ་དང་བྱ་ཡུལ་མ་འོངས་པར་བསྡུས་ཞེས་པའི་སྡུད་བྱེད་ད་ལྟ་བ་དང་མ་འོངས་པ་གཉིས་པོ་དེ། རྟགས་འཇུག་ནས་བཤད་པའི་དུས་གསུམ་ནང་ཚན་གྱི་ད་ལྟ་བ་དང་མ་འོངས་པར་བསྡུས་པར་དགོངས་ན་ནང་འགལ་ཏེ། ཤིང་གཅོད་པ་པོ་དང༌། གཅད་བྱའི་ཤིང་གཉིས་ཀ་བྱ་བ་ཡིན་པར་ཐལ། དུས་གསུམ་གྱི་དབྱེ་བའི་ཁོངས་སུ་བསྡུས་པའི་ཕྱིར། དེ་ལ་ཁྱབ་པ་མེད་ན།

                                    དེ་བཞིན་བྱེད་པ་པོ་གཞན་དང༌།།

                                    དངོས་སུ་འབྲེལ་མིན་ཇི་ལྟར་ཡང༌།།

                                    བྱ་བ་བྱས་ཟིན་འདས་པ་དང༌།།

                                    བྱ་བ་བྱེད་འགྱུར་མ་འོངས་དང༌།།

                                    བྱེད་བཞིན་པ་ནི་ད་ལྟ་བའོ།།

            ཞེས་དུས་གསུམ་གྱི་དབྱེ་བ་དེ་བྱ་བ་གང་ཞིག་ལ་དེ་ཉིད་བྱས་ཚར་བ་དང་མ་ཚར་བ། བྱེད་བཞིན་པ་བཅས་ཀྱི་སྒོ་ནས་འཇོག་དགོས་པར་བཤད་པ་དང་དངོས་སུ་འགལ།

            ཡང་དུས་གསུམ་གྱི་དབྱེ་བ་ལས་ལོགས་སུ་དངོས་པོ་བདག་གཞན་གྱི་དབྱེ་བ་ཕྱེ་བ་ལ་དགོས་པ་མེད་པར་ཐལ། དངོས་པོ་བདག་གཞན་གཉིས་ཀ་དུས་ཀྱི་དབྱེ་བའི་ནང་དུ་འདུ་བའི་ཕྱིར། འདོད་མི་ནུས་ཏེ། བྱེད་པ་པོ་དང༌། བྱ་ཡུལ་གཉིས་བསྡུ་ཕྱིར་བདག་གཞན་གྱི་དབྱེ་བ་མཛད་པར་བཤད་པའི་ཕྱིར་ཏེ། དེ་ཉིད་ལས།

                                    ་་་་་བྱེད་པོ་དང༌། །

                                    བྱ་ཡུལ་བསྡུ་ཕྱིར་དབྱེ་བ་དེ། །

                                    མཛད་ནས་་་་་༌།།

            ཞེས་གཞུང་འདིར་བྱེད་པ་པོ་དང་བྱ་ཡུལ་གྱི་སྒྲ་རྣམས་བསྡུ་བའི་ཕྱིར་བདག་གཞན་གྱི་དབྱེ་བ་ཟུར་དུ་མཛད་པ་ཡིན་ཞེས་གསུངས་པ་དང་དངོས་སུ་འགལ་བའི་ཕྱིར། འདི་དང་འདིས་མཚོན་ནས་བྱ་བྱེད་ལས་གསུམ་གྱི་རྣམ་གཞག་ལ་དཔྱད་པར་བྱ་བ་མང་དུ་སྣང་མོད། རེ་ཞིག་དེ་ཙམ་སྟེ། སྒྲ་ཚད་སེངྒེའི་འགྱིང་སྣོལ་ལ་དབང་བསྒྱུར་བའི་མཁས་པ་ཚོས། གསུང་རབ་དགོངས་འགྲེལ་གྱི་གཞུང་ཆེན་པོ་དག་གི་ཐ་སྙད་གཙིགས་ཆེར་བཟུང་ནས་བརྡ་སྤྲོད་ཐ་སྙད་ཀྱི་གཞུང་ལ་ཚུར་དཔྱད་པ་མ་གཏོགས། ཐ་སྙད་རིག་པ་ལ་བློ་ཁ་ཅུང་ཟད་ཕྱོགས་པས་རྒྱགས་ཏེ། གཞུང་ཆེན་པོ་དག་གི་བརྡ་ཆད་ལ་བཟོ་བཅོས་ཅིས་ཀྱང་མི་གནང་བར་འཚལ། ཡང་གསུང་རབ་ཀྱི་བརྡ་ཆད་དང་ཐ་སྙད་པའི་བཞེད་སྲོལ་མི་འདྲ་གང་ཞིག་ཡོད་པ་རྣམས་ལུགས་གཉིས་ཀའི་བཞེད་སྲོལ་མ་འདྲེས་པར་བཀྲལ་བ་ལས་ཕན་ཚུན་བསྲེ་བ་ཅིས་ཀྱང་མི་མཛད་པར་འཚལ།

 
         གཉིས་པ་བདག་གཞན་གྱི་དབྱེ་བ་ལ་ཅུང་ཟད་དཔྱད་པ།

           གཉིས་པ་བདག་གཞན་གྱི་དབྱེ་བ་འཆད་པ་ལ། བདག་གཞན་གྱི་གོ་དོན་དང་དེའི་རྣམ་གཞག་འཇོག་ཚུལ་ནི། བྱེད་པ་པོ་ཞིག་གིས་བྱ་བ་གང་ཞིག་བྱེད་པའི་ཚེ། བྱེད་པ་པོ་དེ་ཉིད་དང༌། དེའི་བྱེད་པའི་ལག་ཆས། དེ་གཉིས་ཀྱིས་བྱ་ཡུལ་གྱི་ངོས་ལ་ཕར་འགུལ་སྐྱོད་བྱེད་པའི་ཆ་གསུམ་པོ་ལ་དངོས་པོ་བདག་ཟེར། བྱ་བ་གང་ཞིག་བྱེད་པའི་ཡུལ་དང༌། དེ་ལས་ཚུར་རྣམ་པར་འགྱུར་བའི་ཆ་གཉིས་ལ་དངོས་པོ་གཞན་ཟེར། དཔེར་ན། ཤིང་མཁན་གྱིས་སྟ་རེས་ཤིང་གཅོད་པ་ལྟ་བུར་མཚོན་ན། ཤིང་མཁན་ནི་བྱེད་པ་པོ་ཡིན། སྟ་རེ་ནི་བྱེད་པ་ཕལ་བའམ་བྱེད་པ་ཟེར། སྟ་རེ་ཤིང་གི་ངོས་ལ་ཕར་འདེགས་འཇོག་བྱེད་པ་དེ་ལ་བྱེད་པ་པོ་ལ་ཡོད་པའི་བྱ་བའམ། བྱེད་པ་པོ་ལ་ཡོད་པའི་ལས་ཟེར། དེ་གསུམ་ག་དངོས་པོ་བདག་ཡིན། སྟ་རེ་ཕར་གཡུག་སའི་ཡུལ་ཤིང་ལ་ལས་སམ་བྱ་བའི་ཡུལ་ཟེར། དེ་ཉིད་སྟ་རེའི་སོ་དང་འཕྲད་པ་ན་དུམ་བུ་གོག་ཡོང་བའི་ཆ་ལ་བྱ་བའི་ཡུལ་ལ་ཡོད་པའི་བྱ་བའམ་བྱ་བའི་ཡུལ་ལ་ཡོད་པའི་ལས་ཟེར། དེ་གཉིས་ཀ་དངོས་པོ་གཞན་ཡིན། དངོས་པོ་བདག་གཞན་གྱི་དབྱེ་བ་དེ། བུམ་པ་ལྟ་བུ་ཞིག་ལ་ཐོལ་བྱུང་དུ་ཕྱེ་རྒྱུ་མིན་པར། བྱ་བ་གང་ཞིག་རང་དང་ངོ་བོ་ཐ་དད་པའི་བྱེད་པ་པོ་ཞིག་ཡོད་མེད་ལ་ལྟོས་ནས། དངོས་པོ་བདག་གཞན་གྱི་དབྱེ་བ་ཕྱེ་དགོས། འོན་ཀྱང་བྱེད་པོ་དང་བྱ་ཡུལ་གཉིས་ཀྱི་བར་དུ་ཡོད་པའི་བྱ་བ་ལ་གཙོ་བོར་དགོངས་ནས་དངོས་པོ་བདག་གཞན་གྱི་དབྱེ་བ་ཕྱེ་བ་མིན། དེ་འདྲའི་བྱ་བ་ཞིག་མེད་ན་ཡང་དངོས་པོ་བདག་གཞན་གྱི་དབྱེ་བ་ཕྱེ་རྒྱུ་མེད་དོ།།

            དེས་ན་རྡོ་མཁན་གྱིས་རྡོ་བཅག་ལྟ་བུར་དངོས་པོ་བདག་གཞན་གྱི་དབྱེ་བ་ཕྱེ་རྒྱུ་གཙོ་བོ་ནི། རྡོ་མཁན་དང་རྡོ་གཉིས་ཡིན་གྱི། དེ་གཉིས་ཀྱི་བར་དུ་བྱ་བྱེད་ལ་ཡོད་པའི་ལས་གཅག་དང་གཅོག་ལ་དགོངས་ནས་ཕྱེ་བ་མིན་ཏེ། དེ་གཉིས་ནི་འོག་ནས་འབྱུང་བའི་དུས་གསུམ་གྱི་དབྱེ་བས་བསྡུ་ནུས་པའི་ཕྱིར། འོན་ཀྱང་བཅག་ཚར་བ་དང་གཅོག་བཞིན་པ། གཅག་པར་འགྱུར་བའི་ཁྱད་པར་འབྱེད་པའི་སྒྲ་དེས། གཅོག་པའི་བྱ་བ་བྱེད་མཁན་སུ་ཡིན་དང༌། གཅག་རྒྱུ་ཅི་ཡིན་ཤེས་མི་ཐུབ། བདག་གཞན་གྱི་དབྱེ་བ་ཕྱེ་བ་འདིས་གཅོག་པའི་བྱ་བ་བྱེད་པ་པོ་རྡོ་མཁན་ཡིན་པ་དང༌། གཅག་རྒྱུ་རྡོ་ཡིན་པ་གསལ་པོར་ཤེས་ཐུབ། བྱ་བྱེད་ལ་ཡོད་པའི་ལས་གཅག་པར་བྱ་བ་དང༌། གཅོག་པར་བྱེད་པ་གཉིས་ནི་དངོས་པོ་བདག་གཞན་གྱི་དབྱེ་བའི་ཞོར་ལ་བསྡུས་པ་ཡིན་ནོ།།

དེས་ན་དངོས་པོ་བདག་གཞན་གྱི་དབྱེ་བ་ཕྱེ་རུང་བའི་ལས་ཚིག་ལ་བྱེད་འབྲེལ་ལས་ཚིག་ཟེར། སྐབས་འདིར་དངོས་པོ་བདག་གཞན་གཉིས་སུ་ཕྱེ་བའི་བདག་གམ་བྱེད་པ་པོ་དང༌། མྱུ་གུའི་བྱེད་པོ་ས་བོན་དང༌། དུ་བའི་བྱེད་པོ་མེ། འབྲས་བུ་སྐྱེ་བའི་དོན་བྱེད་ནུས་པ་རྒྱུར་འཇོག་པའི་བྱེད་པོ་རྣམས་དང་མི་མཚུངས་པར་ཤེས་དགོས་ཏེ། རྩ་ཤེ་ལས།  གལ་ཏེ་ཤིང་དེ་མེ་ཡིན་ན།།བྱེད་པ་པོ་དང་ལས་གཅིག་འགྱུར།།

            ཞེས་རྒྱུ་ལ་བྱེད་པ་པོའི་མིང་འདོགས་པར་མཛད་ཅིང༌། འདི་ནས་བཤད་པའི་བྱེད་པོ་ནི། བདག་གམ་གནས་སྐབས་ཀྱི་བྱ་བ་གང་ཞིག་བྱེད་ཀྱིན་ཡོད་པ་དེ་ལ་རྩོལ་བའི་འབད་པ་དངོས་སུ་བསྟེན་པའི་སྐབས་ཀྱི་གང་ཟག་གཅིག་ལ་གོ་དགོས་པས་སོ་སྙམ་སྟེ། དཔེར་ན། རས་དཀར་པོ་དམར་པོ་རུ་བསྒྱུར། ལྟ་བུ་སྒྱུར་མཁན་སུ་རེད་ཅེས་དྲིས་ན་བཙོ་བླག་མཁན་རེད་ཅེས་ལན་འདེབས། སྒྱུར་བྱེད་ཅི་རེད། ཅེས་དྲིས་ན་ཚོས་དམར་པོ་རེད་ཅེས་ལན་འདེབས་འོང༌། དེ་གཉིས་ཀྱིས་བྱེད་པོ་དང་བྱེད་པ་གཉིས་བསྟན། བསྒྱུར་རྒྱུ་ཅི་རེད་དྲིས་ན། རས་ཡུག་དཀར་པོ་རེད། ཅེས་ལན་འདེབས་འོང༌། དེས་དངོས་པོ་གཞན་བསྟན། ཡང་རས་དཀར་པོ་དམར་པོ་རུ་གྱུར། ཅེས་བརྗོད་ཚེ། འགྱུར་བྱེད་ཚོས་དང་འགྱུར་བྱ་རས་ཡུག་དེ་གཉིས་ཕྲད་ནས་དམར་པོར་གྱུར་པ་མ་གཏོགས་སྒྱུར་མཁན་སུ་ཞེས་འདྲི་ལུགས་མེད། དེས་ན་འདི་རིགས་ལ་དུས་གསུམ་མ་གཏོགས་བདག་གཞན་གྱི་དབྱེ་བ་ཕྱེ་མི་རུང༌། སྔ་མ་ལ་བདག་གཞན་དང་དུས་གསུམ་གཉིས་ཀའི་ཁྱད་པར་ཕྱེ་རུང་བས། སྔ་མ་ལ་བྱེད་འབྲེལ་ལས་ཚིག་དང༌། ཕྱི་མ་ལ་བྱེད་མེད་ལས་ཚིག་ཟེར། མདོར་ན། བྱ་བྱེད་ལས་གསུམ་པོ་དངོས་པོ་བདག་གཞན་གྱིས་བསྡུ་བའི་ཚེ། བྱེད་པ་པོ་བདག་དང༌། ལས་སམ་བྱ་ཡུལ་ནི་གཞན་གྱིས་བསྡུས། བྱ་བ་ནི་སྤྱིར་དངོས་པོ་གཞན་གྱིས་བསྡུས་མོད། ནང་གསེས་ཕྱེ་ན་བྱེད་པ་པོ་ལ་ཡོད་པའི་བྱ་བ་ནི་བདག་དང༌། ལས་ལ་ཡོད་པའི་བྱ་བ་ནི་གཞན་གྱི་ཁོངས་སུ་བསྡུས་པ་ཡིན་ནོ།། བྱེད་པོ་དང་བྱ་ཡུལ་གཉིས་དུས་གསུམ་གང་དུའང་མི་གཏོགས་ཏེ། བྱ་བ་མ་ཡིན་པའི་ཕྱིར།

            ཕུགས་སམ་དོན་དངོས་ཀྱི་གོ་དོན་དུ། ཕྱི་ནང་གི་རིག་གནས་གཉིས་ཀ་ལ་ནང་བྱན་ཆུད་པའི་ཚད་མའི་སྐྱེས་བུ་དམ་པ་བཤེས་གཉེན་ཆེན་པོ་ལམ་རིམ་པའི་སུམ་རྟགས་ཀྱི་དཀའ་འགྲེལ་དོན་གསལ་མེ་ལོང་ལས། རྗེ་ཞྭ་ལུ་བ་ཆེན་པོས། བདག་མྱ་ངན་ལས་འདས་ནས་གཞན་མྱ་ངན་ལས་བཟླའོ།། ཞེས་པ་དངོས་པོ་བདག་ལ་འཇུག་པའི་དཔེར་མཛད་ལུགས་ལ་བལྟས་ན། འདིར་བསྟན་བདག་གཞན་ནི་གང་ཟག་རྒྱུད་གཅིག་མི་གཅིག་ཙམ་ལ་བཞེད་པར་གསལ་མོད་ཀྱང༌། མཁས་པ་ཕལ་ཆེ་བའི་གསུང་དང་མི་མཐུན་ནོ།། ཡང་རྣམ་གླིང་པཎ་ཆེན་གྱིས། བྱེད་པ་པོས་གང་བྱ་བ་ནི་ལས་སམ་བྱ་བ་ཡིན་ལ། ཞེས་དེ་གཉིས་ཁྱད་མེད་ལྟ་བུར་གསུངས་པ་དང༌། པྲ་ཏིས། ལས་ནི་བྱ་བ་བྱེད་པ་གཉིས།། ཞེས་ལས་དབྱེ་གཞིར་བྱས་ནས་དེ་ལས་བྱ་བྱེད་གཉིས་སུ་དབྱེ་བར་གསུངས་པ་སོགས་ནི། བྱ་བྱེད་ལས་གསུམ་གྱི་འཇོག་མཚམས་ལ་ཐུགས་ཞིབ་མ་ཆུག་པའོ།།ཞེས་དང༌།     སི་ཏུ་པཎ་ཆེན་གྱི་བཞེད་པ། འདིར་བསྟན་བྱ་བ་ལ་དབྱེ་ན་རྣམ་པ་གཉིས་ཏེ། གང་ཡང་བྱེད་པ་པོ་གཞན་དང་དངོས་སུ་འབྲེལ་བ་དང་མ་འབྲེལ་བའོ།། དང་པོ་ནི་ལྕགས་གསེར་དུ་བསྒྱུར་ལྟ་བུ་དང༌། གཉིས་པ་ནི་ལྕགས་གསེར་དུ་འགྱུར་བ་ལྟ་བུ་སྟེ། འདིའི་སྔ་མ་ལ་བདག་གཞན་སོགས་ཀྱི་དབྱེ་བ་བྱར་རུང་ཡང་ཕྱི་མ་ལ་མི་རུང་ངོ༌།། ཅིའི་ཕྱིར་ན། གང་བདག་གཞན་སོགས་བརྩི་བའི་གཞི་ལ་བྱ་བྱེད་ཐ་དད་པ་ཞིག་དགོས་ནའང༌། ལྕགས་གསེར་དུ་འགྱུར་བ་དང༌། བདག་འགྲོ་བ་ལྟ་བུ་ནི་བྱ་བྱེད་ཐ་མི་དད་པའི་ཕྱིར་ཏེ། འགྱུར་བྱ་འགྱུར་བྱེད་གཉིས་ཀ་གསེར་ཡིན་པའི་ཕྱིར་དང༌། འགྲོ་བྱ་འགྲོ་བྱེད་གཉིས་ཀ་བདག་ཡིན་པའི་ཕྱིར་ཟེར་ཞིང༌། བྱེད་པ་པོ་གཞན་དང་དངོས་སུ་འབྲེལ་མ་འབྲེལ་གྱི་དོན་ཡང་བྱ་བ་གང་བྱེད་བཞིན་པའི་གནས་སྐབས་སུ་བྱེད་པ་པོ་གཞན་དངོས་སུ་སྣང་བ་དང་མི་སྣང་བ་ལ་བཞེད་སྣང་ངོ༌།།

            འདི་དག་ལ་རང་བློ་མ་དག་པའི་སྐྱོན་གྱིས་འགལ་འདུ་གང་མང་ཞིག་འཇུག་པར་མཐོང་སྟེ་འདི་ལྟར། གང་བྱ་བ་ཡིན་ན་དེ་བྱེད་པ་པོ་ཡོད་དགོས་པས་ལྕགས་གསེར་དུ་འགྱུར་བ་དང༌། བདག་འགྲོ་བ་ལྟ་བུ་དེ་བྱ་བ་ཡིན་པར་ཁས་བླངས་པ་དང༌། དེ་དག་བྱེད་པ་པོ་མེད་པར་ཁས་བླངས་པ་གཉིས་ནང་འགལ་བ་སྟེ་དང་པོའོ།།

            གལ་ཏེ་བྱ་བ་ལས་གཞན་པའི་བྱེད་པ་པོ་མེད་པར་འདོད་ཀྱི། བྱེད་པོ་ཙམ་མེད་པར་མ་སྨྲས་པས་སྐྱོན་མེད་དོ་སྙམ་ན། དེ་ལྟར་ན་རང་གིས་རང་ལ་བྱ་བ་མི་འཇུག་པས། བྱེད་པོ་ཡོད་ཕྱིན་རང་ལས་གཞན་དུ་ཁས་བླངས་དགོས་ལ། དེའི་ཚེ་བྱེད་པོ་གཞན་ཡོད་པར་ཐལ། བྱེད་པོ་ཡོད་པའི་ཕྱིར་ཞེས་བརྗོད་ན་ལན་མེད་དུ་འགྱུར་བ་སྟེ།གཉིས་པའོ།།

            ཅི་སྟེ་བྱེད་པོ་གཞན་ཡོད་པར་མཚུངས་ཀྱང་དེ་དང་དངོས་སུ་འབྲེལ་མ་འབྲེལ་མི་མཚུངས་པས། བདག་གཞན་སོགས་འཇུག་མི་འཇུག་གི་ཁྱད་པར་འཐད་དོ་སྙམ་ན། གཞན་དང་དངོས་སུ་འབྲེལ་ཚུལ་ཇི་ལྟར་ཡིན་སྨྲོས་ཤིག །གལ་ཏེ་གསེར་དུ་བསྒྱུར་ཅེས་པས་སྒྱུར་བྱེད་གཞན་གྱི་ཡོད་པ་དངོས་སུ་གོ་བའི་ཕྱིར་སྙམ་ན། འོ་ན་གསེར་དུ་འགྱུར་ཅེས་པས་ཀྱང་འགྱུར་བྱེད་གཞན་དངོས་སུ་གོ་བ་སྟེ། ཚད་མ་རྣམ་འགྲེལ་ལས། མ་སྐྱེས་པ་ནི་ཟློག་དོན་དང༌།། འགྱུར་བ་ཉིད་གསུངས་དེ་ཡི་ཕྱིར།། ཞེས་པའི་རྩ་འགྲེལ་གྱི་དགོངས་པའོ།། དེ་བས་སྔ་ཕྱི་ལ་བྱེད་པ་པོ་གཞན་དང་དངོས་སུ་འབྲེལ་མ་འབྲེལ་གྱི་ཁྱད་པར་འབྱེད་པའང་མི་འཐད་པ་ཉིད་དེ་གསུམ་པའོ།།

            གཞན་ཡང་གསེར་དུ་འགྱུར་བྱེད་ནི་བསོད་ནམས་ཀྱི་ལས་སམ་འབྱུང་བའི་བྱེད་པ་ལྟ་བུ་ཡིན་པར་རང་ཉིད་ཀྱི་ཞལ་ནས་དངོས་སུ་གསུངས་ལ། དེ་ལྟ་ན་འགྱུར་བྱེད་ནི་གསེར་མ་ཡིན་དགོས་པས། འགྱུར་བྱ་འགྱུར་བྱེད་གཉིས་ཀ་གསེར་ཡིན་པར་བཞེད་པ་དང་དངོས་སུ་འགལ་བ་སྟེ། བཞི་བའོ།།

གཞན་ཡང་གསེར་དུ་འགྱུར་བྱེད་གསེར་མིན་པར་མ་ཟད། གསེར་དུ་འགྱུར་བྱ་ཡང་གསེར་མ་ཡིན་པ་ཉིད་དེ། དཔེར་མཚོན་ན་གསེར་དུ་བསྒྱུར་བྱ་ལྕགས་ཡིན་པ་བཞིན་དུ་དེར་འགྱུར་བྱ་ཡང་ལྕགས་ཡིན་པའི་ཕྱིར་རོ། །དེ་བས་གང་ཞིག་འགྱུར་བ་དང་གང་དུ་འགྱུར་བ་གཉིས་ཀྱི་དབྱེ་བ་ཕྱེད་དགོས་རྒྱུ་ལ་འཛིངས་འདུག་པ་སྟེ། སྐྱོན་ལྔ་པའོ།།

            གཞན་ཡང་གསེར་དུ་འགྱུར་བ་ནི་རྒྱུ་རྐྱེན་གྱི་སྟོབས་ཀྱིས་ཡིན་པས། འགྱུར་བྱེད་ནི་རྒྱུ་ཡིན་ལ། དེའི་ཟླས་དྲངས་ན་འགྱུར་བ་ནི་འབྲས་བུ་ཡིན་པས། དེ་གཉིས་ཐ་མི་དད་ན་རྒྱུ་འབྲས་ཐ་མི་དད་པའི་སྐྱོན་དུ་འགྱུར་བ་སྟེ། དྲུག་པའོ།།

གཞན་ཡང་འགྲོ་བྱེད་ཐ་མི་དད་ན་བྱ་བྱེད་ཐ་མི་དད་དགོས་ཤིང༌། དེ་མི་དད་ན་གཅིག་པ་ཡིན་དགོས་པས། དེའི་ཚེ། བྱེད་པོ་ལས་དང་བྱ་བ་གཅིག་མིན་པས།། ཞེས་བྱ་བ་ལ་སོགས་པའི་ལུང་རིགས་དང་རྒྱ་ཆེར་འགལ་བ་སྟེ། བདུན་པའོ།།

གཞན་ཡང་བདག་འགྲོ་བའི་གནས་སྐབས་སུ་འགྲོ་བ་པོ་བདག་དང་འགྲོ་བྱ་གཞན་ལམ་ལྟ་བུ་ཡིན་ཞིང༌། གང་དོན་ལ་ཇི་ལྟར་ཡིན་པ་དེ་བཞིན་དུ་བློ་ལའང་དངོས་སུ་སྣང་བས། བདག་འགྲོ་བ་ལྟ་བུ་ལ་བྱ་བ་བྱེད་པའི་གནས་སྐབས་སུ་བྱེད་པ་པོ་གཞན་དངོས་སུ་མི་སྣང་བར་འདོད་པའང་མངོན་སུམ་ལ་བསྙོན་པ་སྟེ། བརྒྱད་པའོ།།

            གཞན་ཡང་འདིར་བསྟན་བདག་གཞན་དང་དུས་གསུམ་ལ་སོགས་པ་ནི་བརྗོད་བྱའི་དོན་ལ་འཇོག་དགོས་པ་ལས་རྗོད་བྱེད་ཚིག་ལ་འཇོག་རྒྱུ་གཏན་ནས་མ་ཡིན་མོད། དེ་ལྟ་ནའང་སྐུ་ཉིད་ཀྱི་ཞལ་ནས། དུས་གསུམ་གྱི་དབྱེ་བས་ནི་བྱ་བྱེད་ཀྱི་ལས་དང་འབྲེལ་བའི་ངག་གི་སྦྱོར་བ་ཐམས་ཅད་ལ་ཁྱབ་སྟེ། ཞེས་དང༌། བྱ་བྱེད་ཀྱི་སྒྲ་ལྷག་མ་རྣམས་བསྡུ་བའི་ཕྱིར་དུ་ཡིན་ནོ།། ཞེས་གསུངས་པ་སོགས་ལ་བལྟས་ན་སྒྲ་ཉིད་ལ་བཞེད་འདུག་པས་ཤིན་ཏུ་ཡང་ནོར་བ་སྟེ། དགུ་པའོ།།

དེ་ལྟར་མགལ་འདུ་མང་དུ་འཇུག་པའི་རྒྱུ།། ཁོ་བོའི་བློ་མིག་མ་དག་པའི་སྐྱོན་ནམ།། ཡང་ན་ཅིག་ཤོས་རིགས་ལམ་མི་མཁྱེན་པས།། ནོངས་ཞེས་གཟུར་གནས་མཁས་རྣམས་དཔྱད་པར་རིགས།། ཞེས་པ་ནི་བར་སྐབས་ཀྱི་ཚིགས་སུ་བཅད་པའོ།།

            དོན་བསྡུས་ན་མདུང་གིས་བསྣུན་པ་ལ་མདུང་བསྣུན་ཞེས་བརྗོད་པ་དང་འདྲ་བར་བདག་གིས་འགྲོ་བ་ལ་བདག་འགྲོ་ཞེས་བྱེད་སྒྲ་བསྡུས་པ་ཙམ་ཡིན་གྱི། དོན་ལ་འགྲོ་བྱ་འགྲོ་བྱེད་གཅིག་ཏུ་བསྡུས་པ་མིན་ཞིང་བསྡུ་ཡང་མི་ནུས་པས། ཚིག་དོན་གྱི་འཇུག་པ་མ་ནོར་བར་བྱ་དགོས་ལ། དེའི་ཕྱིར། ཅུང་ཟད་བསྡུས་པ་ཡོད་ན་ཡང༌།། དེ་དང་དེ་ནི་སྦྱར་བར་བྱ།། ཞེས་གསུངས་པ་ལྟར། བདག་འགྲོ་ཞེས་པ་ལ་བདག་གིས་ཞེས་བྱེད་སྒྲ་སྦྱར་དགོས་པས། དེར་ཡང་བདག་གཞན་སོགས་མི་འཇུག་པ་མིན་ནོ།།

            དེ་རྣམས་ཇི་ལྟར་འཇུག་ཚུལ་ཡང་ཕྱོགས་ཙམ་མཚོན་ན། འགྲོ་བྱེད་བདག འགྲོ་བྱ་གཞན། སོང་ཟིན་འདས། འགྲོ་རྒྱུ་མ་འོངས་པ། འགྲོ་བཞིན་དུས་ད་ལྟ་བ་སོགས་དང༌། དེ་བཞིན་དུ་འགྱུར་བྱེད་བདག་དང༌། འགྱུར་བྱ་མ་འོངས་པ་སོགས་ཏེ། མདོར་ན་བདག་འགྲོ་བ་དང༌། གསེར་དུ་འགྱུར་བ་སོགས་ལའང་བདག་གཞན་སོགས་ཆ་ཚང་སྦྱར་རུང་བས། ཚིག་གི་བརྗོད་ཚུལ་དང་དོན་གྱི་གནས་ཚུལ་ཤན་ཕྱེད་པར་བྱས་ལ། སླད་ཕྱིན་ཆད་བདག་འགྲོ་བ་དང༌། གསེར་དུ་འགྱུར་བ་ལྟ་བུ་ནི་བྱ་བྱེད་ཐ་མི་དད་ཅིང༌། དེ་ཐ་མི་དད་པས་དེར་བདག་གཞན་སོགས་སྦྱར་མི་རུང་ཟེར་བའི་རྨོངས་གཏམ་ནི་ནམ་དུའང་སྨྲ་བར་མི་བྱ་སྟེ། ཕྱི་ནང་གི་མཁས་པ་རྣམས་ཐུགས་ཁྲེལ་བའི་རྒྱུ་ཡིན་པའི་ཕྱིར་རོ།།

            གལ་ཏེ་གསེར་དུ་བསྒྱུར་ཅེས་པས་སྒྱུར་བྱེད་ཀྱི་བདག་ཅིག་ཡོད་པར་གོ་ཡང༌། འགྱུར་ཞེས་པ་ལ་དེ་ལྟར་མིན་པས། སྔ་ཕྱིར་བདག་གཞན་འཇུག་མི་འཇུག་གི་ཁྱད་པར་འཐད་དོ་སྙམ་ན། འདིར་བསྟན་བདག་དང་གང་ཟག་གི་བདག་གཉིས་ཀྱི་དབྱེ་བ་མི་ཕྱེད་པ་སྟེ། དེས་འགྱུར་བར་བྱེད་པ་པོའི་གང་ཟག་ཡོད་པར་མི་འཕེན་ཀྱང༌། འགྱུར་བྱེད་ཀྱི་རྒྱུ་ཡོད་པར་འཕེན་པའི་ཕྱིར་དང༌། དེ་ཉིད་དེའི་བྱེད་པོའི་བདག་ཡིན་པའི་ཕྱིར་རོ།། དེ་བས་ན་བློ་གྲོས་ཀྱི་འཇུག་པ་ཀུ་ཤའི་རྩེ་མོ་ལྟར་ཕྲ་བར་བྱས་ནས་ཚུལ་འདི་ལྟར་དུ་ཕྱེ་དགོས་པ་སྟེ། བདག་གིས་རྐང་པས་བགྲོད་དེ་ལྷ་སར་སྨན་ལེན་དུ་འགྲོ་ཞེས་པ་ལྟ་བུར་མཚོན་ན། དེས་སུ་ཞིག་འགྲོ་བའི་བྱེད་པོ། གང་གིས་འགྲོ་བའི་བྱེད་པ། ཇི་ལྟར་འགྲོ་བའི་བྱེད་ཐབས། གང་དུ་འགྲོ་བའི་ཡུལ། དེར་འགྲོ་བའི་དགོས་པ། གང་དུ་འགྲོ་བའི་བྱ་བ་དང་བཅས་བརྗོད་བྱའི་དངོས་པོ་དྲུག་བསྟན་ལ། གང་ཇི་ལྟར་བསྟན་པ་དེ་ལྟར་འཕྲིགས་ཚུད་པའི་མི་ཞིག་ལ་བདག་གིས་ལྷ་སར་སྨན་ལེན་དུ་འགྲོ་ཞེས་བརྗོད་པ་ན་ཚིག་ལ་བྱེད་པ་དང་བྱེད་ཐབས་གཉིས་བསྡུས་མོད་ཀྱང༌། དོན་ལ་དེ་གཉིས་ཀྱང་གོ་ནུས་ཤིང༌། ཐ་ན་བདག་འགྲོ་ཞེས་པ་ཙམ་ལས་མ་བརྗོད་ཀྱང་སྐབས་སྟོབས་ཀྱིས་དོན་དེ་རྣམས་རྫོགས་པར་གོ་ནུས་པ་སྟེ། ཚད་མ་རྣམ་འགྲེལ་ལས། མ་བརྗོད་ན་ཡང་འདོད་པ་ནི།། སྐབས་ལས་རྟོགས་པར་འགྱུར་བ་ཡིན།། ཞེས་སོ།།

            དེའི་ཕྱིར་ཚིག་གང་དང་གང་ལས་དོན་གང་དང་གང་ཞིག་གོ་བ་ནི་ཚིག་དེ་དང་དེ་ལ་དོན་དེ་དང་དེ་སྟོན་པའི་ནུས་པ་ཡོད་པ་དང༌། བསྟན་འདོད་དང་ཉན་འདོད་སོགས་རྒྱུ་རྐྱེན་དུ་མ་ཞིག་ཆགས་དགོས་པས། དེ་རྣམས་དཔྱིས་ཕྱིན་པར་ཤེས་དགོས་ཤིང༌། དེ་ལའང་སྒྲ་རྟོག་སེལ་བས་འཇུག་ཚུལ་སོགས་དབུ་ཚད་ཀྱི་རིགས་ལམ་ཕྲ་མོ་རྣམས་ངེས་པར་དུ་ཤེས་དགོས་སོ།།

ཞེས་གསུངས་པ་ནི་གཞོམ་གཞིགས་མེད་པའི་ལུང་རིགས་གཉིས་ལྡན་གྱི་རྡོ་རྗེའི་ཐོ་བ་དང་འདྲ་ཞིང༌། སྒྲ་ཚད་གཉིས་ཀ་ལ་སྐྱེས་སྟོབས་ཀྱི་ལུས་རྩལ་རྫོགས་ཤིང༌། སྦྱངས་སྟོབས་ཀྱི་མཆེ་སྡེར་འབར་བས། ཚོགས་ཀྱི་དབུས་ན་འཇིགས་པ་མེད་པར་སེངྒེའི་སྒྲ་སྒྲོག་པ་སྟེ། སྒྲ་ཚད་གཉིས་ཀ་ལ་རྣམ་དཔྱོད་ཀྱི་མིག་དཀྱུས་རིང་བའི་གཟུར་གནས་མཁས་པ་ཚོས་གཟིགས་མོ་མཛད་ན་ཁོང་གི་བཞེད་པ་དེ་ལས་གཞན་དུ་འདའ་བ་མེད་པའི་རྡོ་རྗེའི་བཀའ་ལུང་བཙན་པོ་ཉིད་དུ་ངེས་ཏེ། དེ་ལས་གཞན་དུ་གཡོལ་ན་སྒྲ་ཚད་གཉིས་ཀའི་ལམ་ནས། ལུང་རིགས་རྡོ་རྗེའི་མེ་ཆར་མགོ་ཐོག་ཏུ་འབབ་རྒྱུ་ལས་གཞན་མ་མཆིས་པས། དེས་ན་ཁོ་བོ་ཅག་གི་དམིགས་ཕུག་གི་རང་ལུགས་ངོ་མ་ཡང་འདི་ཉིད་ཁོ་ནར་འདོད་དོ།།

            འོ་ན་ཁྱོད་ཀྱིས་གོང་དུ་དེ་ལས་གཞན་པའི་བཤད་སྲོལ་རྩ་བཤད་ཀྱིས་འཛིན་མཚམས་བྱས་པ་ཇི་ལྟར་ཡིན་ཞེ་ན། དེ་ནི་ད་ལྟའི་གྲགས་ཆེ་བའི་བཤད་སྲོལ་ལ་བསྟུན་ནས་དེ་དག་གི་བཤད་པ་གཞི་གཟུང་གིས་འཛིན་མཚམས་དང་གོ་དོན་ཅུང་ཟད་ཕྲ་རུ་གཏོང་བ་ཡིན་ཏེ། བཤད་སྲོལ་དེ་ཉིད་ཡུལ་དུས་ཀྱི་དབང་གིས་གྲགས་ཆེ་ཞིང་ལག་ལེན་ལ་འགེལ་དུས་ཁྱད་པར་ཆེར་མེད་ཅིང༌། རགས་བཤད་དེའི་ཐོག་ནས་གནས་སྐབས་གོ་དོན་རགས་པ་རེ་ཤེས་ཐུབ་པས། དེ་ལ་བསམ་ནས་ཕྱོགས་སྔ་མའི་འདོད་པ་ཇེ་གསལ་དུ་བཏང་བ་ཡིན་གྱི། དམིགས་ཕུགས་ཀྱི་འདོད་པ་ནི་མ་ཡིན་ཏེ། གོང་དུ་བགྲངས་པའི་རིགས་པ་དེ་དག་གི་གནོད་བྱེད་ཟློག་ཏུ་མེད་པའི་ཕྱིར། དེས་ན་སུམ་རྟགས་ཀྱི་བསླབ་རིམ་ཡང་རིམ་པ་བཞིན་གོ་བ་རགས་བཤད་ནས་གཏན་ཚིགས་རིག་པའི་རྒྱབ་སྐྱོར་མ་རེག་བར་དུ་ཇེ་ཟབ་དང་ཇེ་ཕྲར་བཏང་ནས་ཤེས་པར་བྱ་དགོས་ཀྱི། འོལ་སྤྱི་ཙམ་ཤེས་པས་གསུང་རབ་ཀྱི་བརྡ་ཆད་ཕྱིན་ཅི་མ་ལོག་པར་འགྲེལ་བར་ཕན་པ་གང་ཡང་མི་ནུས་པར་མ་ཟད། ད་དུང་སྐབས་འགར་ལོག་པར་འགྲེལ་བའི་ཉེན་ཡང་ཤིན་ཏུ་ཆེ་བས། རིགས་ལམ་གྱི་རྣམ་གཞག་བརྟན་པོ་མ་ཆགས་པའི་བརྡ་སྤྲོད་སྐམ་པོ་སྨྲ་མཁན་ཚོས་ཅིས་ཀྱང་བག་ཡོད་པར་མཛོད་ཅིག དེས་ན་ཁྱོད་ཅག་གི་བཞེད་པ་ནི་ལས་དང་པོ་བ་ལ་གོ་བརྡ་སྤྲོད་བདེ་བ་དང༌། བརྡ་སྤྲོད་རིག་པའི་གནས་ལ་ཐོག་མའི་འཇུག་སྒོ་རན་ཞིང་འཚམ་པ་ལགས་པས། ཁོ་བོ་ཅག་གིས་ཀྱང་བཤད་ཚུལ་དེ་དག་མཐའ་གཅིག་ཏུ་འདོར་བར་མི་འདོད་དེ། འོག་ཏུའང་ལས་དང་པོ་རྣམས་འཇུག་པ་བདེ་བར་ཆེད་དུ་དམིགས་ནས་བཤད་སྲོལ་དེ་ཉིད་དང་མཐུན་པར་ཅུང་ཟད་ཞིབ་ཚགས་པོའི་སྒོ་ནས་འཆད་པར་བྱ་ཡི་ཕུགས་ཀྱི་བསམ་དོན་ནི་གོང་དུ་བགྲངས་པའི་དགེ་བཤེས་ལམ་རིམ་པའི་བཞེད་པ་དེ་ཉིད་ལ་འཇུག་པའི་ཆེད་ཁོ་ནའོ།།

 
    གསུམ་པ་བྱེད་འབྲེལ་ལས་ཚིག་དང་བྱེད་མེད་ལས་ཚིག་གི་ཁྱད་པར་ལ་ཅུང་ཟད་དཔྱད་པ།

    གསུམ་པ་བྱེད་འབྲེལ་ལས་ཚིག་དང་བྱེད་མེད་ལས་ཚིག་གི་ཁྱད་པར་བཤད་པ་ལ། བྱེད་འབྲེལ་ལས་ཚིག་ནི། བྱ་བ་གང་ཞིག་བྱེད་པའི་ཚེ། བྱེད་པ་པོ་ཞིག་གིས་རྩོལ་བའི་འབད་པ་ལ་དངོས་སུ་བརྟེན་པའི་སྒོ་ནས་བྱེད་པ་ཞིག་ལ། བྱེད་པ་པོ་གཞན་དང་དངོས་སུ་འབྲེལ་བའི་ལས་ཟེར་ཞིང༌། དེ་ཉིད་སྟོན་པའི་ཚིག་ལ་བྱེད་འབྲེལ་ལས་ཚིག་ཟེར། འདི་ལ་བྱ་བྱེད་ཐ་དད་པའི་ལས་ཚིག་ཀྱང་ཟེར། ཡང་ན་ཁྱད་ཆོས་གསུམ་དང་ལྡན་པའི་ལས་ཚིག་ལ་བྱེད་འབྲེལ་ལས་ཚིག་འཇོག་སྟེ། ཁྱད་ཆོས་གསུམ་ནི།

            ༡བྱ་བ་དེ་ཉིད་ཀྱི་བྱེད་པ་པོ་དངོས་སུ་ཡོད་པ།

            ༢དེ་ཉིད་བྱ་ལས་དང་ངོ་བོ་ཐ་དད་པ།

            ༣དེ་ཉིད་བྱ་ཡུལ་དང་བྱ་བྱེད་ཀྱི་འབྲེལ་བ་དངོས་སུ་ཡོད་པ་གསུམ་སྟེ།

དཔེར་ན། རྫ་མཁན་གྱིས་འཁོར་ལོ་བསྐོར་ལྟ་བུ། སྐོར་བའི་བྱ་བ་བྱེད་པ་པོ་རྫ་མཁན་དངོས་སུ་ཡོད་པ་དང་གཅིག བསྐོར་བའི་བྱ་བའམ་འཁོར་ལོ་དེ་ཉིད་རྫ་མཁན་དང་ཐ་དད་དུ་ཡོད་པ་དང་གཉིས། བསྐོར་བ་དེ་ཉིད་རྫ་མཁན་གྱི་འབད་པ་དངོས་སུ་བརྟེན་པ་དང་གསུམ་ཚོགས་པས། བྱེད་འབྲེལ་ལས་ཚིག་ཅེས་བྱ་བ་ཡིན་ནོ།།

            བྱེད་མེད་ལས་ཚིག་ནི། བྱེད་པ་པོའི་རྩོལ་པའི་འགུལ་སྐྱོད་ལ་མ་ལྟོས་པར་དངོས་པོ་རང་ངོས་ནས་རང་བཞིན་གྱིས་རྣམ་པར་འགྱུར་བ་ལྟ་བུ་ཞིག་ལ། བྱེད་པ་པོ་གཞན་དང་དངོས་སུ་མ་འབྲེལ་བའི་བྱ་བའམ་ལས་ཡིན་ཏེ། དེ་ཉིད་སྟོན་པའི་ཚིག་ལ་བྱེད་མེད་ལས་ཚིག་ཟེར། འདི་ལ་བྱ་བྱེད་ཐ་མི་དད་པའི་ལས་ཚིག་ཀྱང་ཟེར།

            ཡང་ན་ཁྱད་ཆོས་གསུམ་དང་མི་ལྡན་པའི་ལས་ཚིག་ལ་བྱེད་མེད་ལས་ཚིག་ཟེར། དེ་ལ་ཞིབ་ཏུ་ཕྱེ་ན་རིགས་གསུམ་སྟེ།

            ༡བྱེད་པ་པོ་ངོས་འཛིན་རྒྱུ་མེད་པའི་བྱེད་མེད་ལས་ཚིག

            ༢བྱེད་པ་པོ་དངོས་སུ་མེད་པའི་བྱེད་མེད་ལས་ཚིག

            ༣བྱེད་པ་པོ་དངོས་སུ་ཡོད་ཀྱང་བྱ་ལས་དང་ངོ་བོ་ཐ་མི་དད་པའི་བྱེད་མེད་ལས་ཚིག་སྟེ་གསུམ་དུ་ངེས་པར་སེམས་སོ།།

དེ་དག་གི་དཔེར་བརྗོད་དང་གོ་དོན་རིམ་པ་བཞིན་བཤད་ན།

            དང་པོ་ནི། འཁོར་ལོ་རང་ཉིད་སྟེས་དབང་གིས་འཁོར་བ་དང༌། དཀར་ཡོལ་ལྟ་བུ་སྟེས་དབང་གིས་ལྷུང་ནས་ཆག་པ་ལྟ་བུ་ཡིན་ཏེ། དེའི་ཚེ་འཁོར་ལོ་སྐོར་བ་པོའི་སྐྱེས་བུ་དང༌། དཀར་ཡོལ་གཅོག་པ་པོའི་གང་ཟག་སུ་ཡང་གང་ངོས་འཛིན་རྒྱུ་མེད་པས་སོ།།འདིས་མཚོན་ནས། ས་གས། རི་ཉིལ། ཆུ་འཁྱིལ། མེ་འབར། རླུང་གཡོ། གློག་འཁྱུག མཚོ་འཕྱུར་ལྟ་བུ་རྣམས་ཀྱང༌། བྱེད་པ་པོ་ངོས་འཛིན་རྒྱུ་མེད་པའི་བྱེད་མེད་ལས་ཚིག་ཏུ་ཤེས་དགོས།

            གཉིས་པ་ནི། རྫ་མཁན་གྱིས་འཁོར་ལོ་བསྐོར་ནས་འཁོར། བྱིས་པས་དཀར་ཡོལ་བཅག་ནས་ཆག་ལྟ་བུ་ཡིན་ཏེ། སྐད་ཅིག་དང་པོར་རྫ་མཁན་གྱིས་འཁོར་ལོ་ཤུགས་ཆེན་པོར་བསྐོར་བས། བྱེད་པ་པོ་རྫ་མཁན་གྱི་རྩོལ་བ་དང་དངོས་སུ་འབྲེལ་ཡང༌། སྔ་མའི་རྩོལ་བ་དེའི་ཤུགས་ཀྱིས་འཁོར་བ་ན། སྐད་ཅིག་དང་པོའི་སྐབས་སྐོར་བར་བྱེད་པ་པོ་དངོས་སུ་འབྲེལ་ཞིང༌། སྐད་ཅིག་གཉིས་པའི་སྐབས་བྱེད་པོས་བསྐོར་རྒྱུ་མཚམས་འཇོག་བྱས་ཀྱང་སྔ་མའི་ཤུགས་ཀྱིས་འཁོར་བ་ལས་བྱེད་པ་པོ་དང་དངོས་སུ་འབྲེལ་བ་མེད་པས་སོ།། དེ་བཞིན་དཀར་ཡོལ་གཅོག་པའི་སྐབས་གཅོག་མཁན་དང་བརྒྱུད་ནས་མ་གཏོགས་དངོས་སུ་འབྲེལ་བ་མེད་དོ།།འདིས་མཚོན་ཏེ། སྤྲད་ནས་འཕྲོད། བསྒྲིགས་ནས་འགྲིགས །བསྒྲུབས་ནས་གྲུབ། བསྒྱུར་ནས་གྱུར། ལྟ་བུ་ལའང་བྱེད་པ་པོ་བརྒྱུད་ནས་ཡོད་ཀྱང་བྱེད་རྩོལ་དང་དངོས་སུ་འབྲེལ་བ་མེད་པས། བྱེད་པ་པོ་གཞན་དང་དངོས་སུ་མ་འབྲེལ་བའི་ལས་ཚིག་ཡིན་ནོ།།

            གསུམ་པ་ནི། ང་འགྲོ། འཁོར་བར་འཁོར་ལྟ་བུ་ཡིན་ཏེ། འགྲོ་མཁན་ང་དངོས་སུ་ཡོད། དེ་ཉིད་འགྲོ་བའི་བྱ་བ་དང་དངོས་སུ་འབྲེལ་མོད། འོན་ཀྱང་འགྲོ་མཁན་ལས་ལོགས་སུ་འགྲོ་བྱ་མེད། འགྲོ་བྱ་ལས་ལོགས་སུ་འགྲོ་མཁན་མེད་པས་སོ།། དེ་བཞིན་དུ་འཁོར་བར་འཁོར་ལྟ་བུ་འཁོར་བའང་རང་ཉིད་ཡིན་ལ་འཁོར་མཁན་ཡང་རང་ཉིད་ཡིན་པས་བྱེད་མེད་ལས་ཚིག་ཡིན་ནོ།། འདིའི་རིགས་ལ་དངུལ་ཆུ་ཡབ་སྲས་སོགས་མཁས་པ་རྣམས་ཀྱིས་བྱེད་པ་པོ་དངོས་སུ་ཡོད་པ་ལ་དགོངས་ནས། བྱེད་འབྲེལ་ལས་ཚིག་རྗེས་མཐུན་པ་དང༌། བདག་དོན་ཕལ་བ་ཞེས་བཏགས་པར་མཛད། གོང་གསལ་དེ་གསུམ་ནི་བྱ་བྱེད་ཐ་མི་དད་པའི་ལས་ཚིག་ཡིན་ནོ།།

            རྣམ་པར་གཞག་པ་འདི་དག་གི་སྐོར་ལ་བརྡ་སྤྲོད་རྐང་ལམ་ཕྲ་མོའི་སྟེང་ནས་ཕོ་སྒྲོབ་ཀྱི་སྨྱུག་རྩེ་སྐྱོད་པ་དང་གཅིག །གཏན་ཚིགས་ཀྱི་གཡང་གཟར་མཐོན་པའི་རྩེ་ནས་ཐལ་སྟོང་གི་ཀི་སྒྲ་འདོན་པ་དང་གཉིས། ནང་དོན་རིག་པའི་གཅོང་རོང་གི་གསེབ་ནས་ཨུ་ཚུགས་ཀྱི་ངན་སྨྲོས་བྱེད་པ་དང་གསུམ་གྱིས། འདིའི་དོན་ལ་ཐུགས་དོགས་ཀྱང་འབྱུང་མི་སྲིད་ལ་གལ་སྲིད་བྱུང་ནའང་ལན་འདེབས་མི་གནང་བ་འཚལ། འདིར་སྒྲ་ཚད་སེངྒེའི་འགྱིང་སྣོལ་ལ་དབང་བསྒྱུར་བར་མི་འཇིགས་པའི་གདེང་ཐོབ་ཅིང༌། མདོ་སྔགས་ཀྱི་གཞུང་ཆེན་པོ་ལ་མཐོང་ཐོས་ཀྱི་ཉམས་མྱོང་ལྡན་པའི་མཁས་པ་རྣམས་ཀྱིས་བཏང་སྙོམས་སུ་མི་འཇོག་པར་ཅིས་ཀྱང་འདིའི་ལན་འདེབས་གནང་བ་འཚལ་ཞེས་ཀྱང་ཞུའོ།།

            སི་ཏུ་པཎ་ཆེན་དང༌། དངུལ་ཆུས། བྱེད་མེད་ལས་ཚིག་ལ་བྱ་བྱེད་ཐ་མི་དད་པའི་ལས་ཚིག་གི་ཐ་སྙད་སྦྱར་གནང་བ་ནི། སོ་སྐྱེ་རང་ག་བས་མ་བརྟག་མ་དཔྱད་པའི་སྐབས་ཀྱི་མཐོང་སྣང་གཞིར་བཟུང་བ་ལས། བརྟག་ཅིང་དཔྱད་པའི་ལུགས་ཀྱི་མཐོང་སྣང་ལ་དགོངས་པ་མ་ཡིན་ཏེ། བྱ་བ་གང་ཞིག་ཡིན་ཡང༌། དེ་ཉིད་བྱེད་པ་པོ་དང་ཐ་མི་དད་པ་ཤེས་བྱ་ལ་མི་སྲིད་པའི་ཕྱིར། ལས་གང་ཞིག་གཞི་ལ་བཞག་ཀྱང༌། དེ་ཉིད་ཀྱི་སྟེང་དུ་བྱ་བ་བྱེད་པ་པོ་དང་བྱ་བ་གཉིས་གཅིག་ཏུ་གྲུབ་པ་ནི་གཞུང་ཆེན་པོའི་ལུགས་ལ་དེ་བས་མི་འཐད་དེ། ཟླ་བ་གྲགས་པས།

                                    བྱེད་པོ་ལས་དང་བྱ་བ་གཅིག་མིན་པས།།

                                    དེ་ཉིད་ཀྱིས་དེ་འཛིན་པ་རིག་མ་ཡིན།།

            ཞེས་སེམས་ཙམ་པའི་ལུགས་ཀྱི་རང་རིག་དགག་པའི་སྐབས། ཤེས་པ་རང་གིས་རང་ཉིད་འཛིན་པའམ་རིག་པ་མི་འཐད་པའི་རྒྱུ་མཚན་དུ། བྱེད་པ་པོ་དང་ལས་དང་བྱ་བ་གསུམ་གཅིག་མིན་པ་རྟགས་སུ་བཀོད་འདུག་པ་འདི་ལས་གསལ་བ་ག་ལ་དགོས།

            འདིར་བྱེད་འབྲེལ་ལས་ཚིག་དང་བྱེད་མེད་ལས་ཚིག་གི་ཁྱད་པར་གོ་སླ་བའི་དཔེར་བརྗོད་འགའ་ཞིག་འགོད་ན།

            ལྟ་བུ་སྟེ། མདོར་ན་བྱེད་འབྲེལ་ལས་ཚིག་ལ་མགོ་ཅན་མང་བ་དང༌། བྱེད་མེད་ལས་ཚིག་ལ་མགོ་ཅན་ཉུང་བའི་ཁྱད་པར་འདི་ཉིད་ཉམས་མྱོང་གི་ཐོག་ནས་ངེས་དགོས།

            མིང་ཚིག་དང་བྱ་ཚིག་གི་ཁྱད་པར། མིང་ཚིག་ཅེས་པ་ནི་མིང་ཙམ་གསལ་བྱེད་ཀྱི་སྒྲ་ཞིག་ལ་ཟེར་ཏེ། དཔེར་ན། བུམ་པ། ཀ་བ། ལྷ། མི། འཇིག་རྟེན་ལྟ་བུ་རྣམས་ཏེ། ཞིབ་ཏུ་ཕྱེ་ན་དངོས་མིང་དང༌། བཏགས་མིང༌། འདོད་རྒྱལ་གྱི་མིང༌། རྗེས་གྲུབ་ཀྱི་མིང༌། མིང་ཁོ་ན་ཡིན་པ། མིང་ཚིག་གཉིས་ཀ་ཡིན་པ། བྱ་ཚིག་གི་ཤན་ཞུགས་པའི་མིང༌། བྱ་ཚིག་དང་ཉེ་ཡང་དེའི་ཤན་མ་ཞུགས་པའི་མིང་བཅས་དུ་མ་ཡོད་པ་ལས། དང་པོ་དངོས་མིང་ནི། དོན་དེའི་མིང་གཙོ་བོ་ཡང་ཡིན། དོན་དེར་འདོད་རྒྱལ་མཁན་པོས་བརྡ་སྦྱར་བ་ཡང་ཡིན་པའི་གཞི་མཐུན་པ་རྣམས་ལ་ཟེར་ཞིང༌། འདི་དང་འདོད་རྒྱལ་གྱི་མིང་གཉིས་དོན་གཅིག་ཏུ་འདོད་པའང་ཡོད་མོད། འཐད་པར་མི་སེམས་ཏེ། སྤངས་རྟོགས་མཐར་ཕྱིན་པའི་གང་ཟག་ལ་སངས་རྒྱས་ཞེས་བཏགས་པ་དེ། དེའི་དངོས་མིང་ཡིན་ཡང་དེའི་འདོད་རྒྱལ་གྱི་མིང་མ་ཡིན་པའི་ཕྱིར་ཏེ། དེ་སྤང་བྱའི་རྨོངས་པ་མཐའ་དག་ལས་སངས་པ་དང་ཤེས་བྱ་མཐའ་དག་ལ་བློ་རིག་རྒྱས་པའི་རྒྱུ་མཚན་ལ་བརྟེན་ནས་བཏགས་པའི་རྗེས་གྲུབ་ཀྱི་མིང་ཡིན་པའི་ཕྱིར། དེས་ན། སེངྒེ། ཉི་མ། ཟླ་བ་ལྟ་བུ་དངོས་མིང་དང་འདོད་རྒྱལ་གྱི་མིང་གི་གཞི་མཐུན་དང༌། སངས་རྒྱས། བྱང་སེམས། ཉན་ཐོས། རང་རྒྱལ། ལྕགས་རྟ། མེ་འཁོར་ལྟ་བུ་རྣམས་དངོས་མིང་དང་རྗེས་གྲུབ་ཀྱི་གཞི་མཐུན་པ་ཡིན་ནོ།།

            གཉིས་པ་བཏགས་མིང་ནི། དོན་དེ་དངོས་མིན་ཡང༌། དོན་དེ་དང་འདྲ་འབྲེལ་གང་རུང་གི་སྒོ་ནས་བཏགས་པའི་མིང་སྟེ། དཔེར་ན། བྲམ་ཟེ་ཁ་ཆེ་སྣ་ཉག་ལ་སེངྒེ་དང༌། མི་གླེན་པ་ལ་བ་ལང༌། མཆོང་རྩལ་བདེ་བ་ལ་སྤྲེའུ་འདོགས་པ་ལྟ་བུ་རྣམས་འདྲ་བ་རྒྱུ་མཚན་དུ་བྱས་ནས་བཏགས་པ་ཡིན་ནོ།། ཉི་མའི་འོད་ཟེར་ལ་ཉི་མ་དང༌། མེའི་ཁ་དོག་ལ་མེ་ཞེས་བཏགས་པ་ལྟ་བུ་འབྲེལ་བ་རྒྱུ་མཚན་དུ་བྱས་ནས་བཏགས་པ་ཡིན་ནོ།། 

            འདིར་མདོ་སྔགས་ཀྱི་གཞུང་ལུགས་ལ་མཁས་པ་ལ་ལའི་གསུང་ན། ཡུལ་མི་རྒན་པོ་ལ་སྤྱི་གཙོ་བོ་ཞེས་འདོགས་པ་དེ། འདྲ་འབྲེལ་གང་ཡང་མེད་པའི་བཏགས་མིང་ཡིན་ཏེ། སྤྱི་གཙོ་བོ་མེད་པའི་ཕྱིར། ཞེས་གསུངས་པ་ནི་གུ་དོག་པ་སྟེ། དེ་ལྟར་འདོགས་མཁན་གྱི་འཇིག་རྟེན་པ་དེ་དག་གི་བློ་ངོར་གྲུབ་མཐའི་བཤད་སྲོལ་དང་འདྲ་བ་སྤྱི་གཙོ་བོའི་དོན་སྤྱི་ཞིག་ཁྲ་ལམ་མེར་ཤར་ནས་བཏགས་པ་ཡིན་པས། དེ་ནི་འཇིག་རྟེན་པ་རྣམས་ཀྱི་བློ་ངོར་ཤར་བའི་དོན་སྤྱི་དེ་དང་འདྲ་བ་ཡིན་ཏེ། བློ་གཟུ་བོར་གནས་པའི་སྒོ་ནས་སོམས་ཤིག། དེ་བས་སངས་རྒྱས་ཆོས་ལུགས་བོད་དུ་དར་བ་ནས་བཟུང༌། ཆོས་ལུགས་དེའི་གཞི་ལམ་འབྲས་བུའི་ཐ་སྙད་གྲགས་ཆེ་བ་སྦྱིན་པ་དང་ཚུལ་ཁྲིམས་སོགས་དང༌། མི་སྣ་གྲགས་ཆེ་བ་ལ་སངས་རྒྱས་དང༌། འཇམ་དབྱངས། བྱམས་པ། སྒྲོལ་མ་སོགས། བོད་ཀྱི་མིའི་མིང་ལ་སྤྱོད་པའི་མགོ་ཚུགས་ཏེ། ཕྲུ་གུ་སྐྱེས་མ་ཐག་ནས། སངས་རྒྱས་དང༌། སྒྲོལ་མ་ཞེས་བཏགས་པ་འདི་དག་འདྲ་འབྲེལ་གང་གི་སྒོ་ནས་བཏགས་པ་ཡིན། ཞེས་བརྩད་ན་དངོས་བཏགས་ཀྱི་མིང་གི་དབྱེ་མཚམས་ལ་གོ་རྟོགས་ཀྱི་སྒོ་ཆེན་གསར་པ་ཞིག་ཕྱེ་ནུས་པར་སེམས་སོ།།

            ཁོ་བོ་ནི་འདི་དག་དངོས་མིང་དུ་འདོད་དེ། དོན་དེ་ལ་དངོས་མིང་དུ་འཇུག་ན་དོན་དེ་ཡིན་མི་དགོས་པའི་ཕྱིར། དཔེར་ན། བཤན་པ་སངས་རྒྱས་དང༌། སྨད་འཚོང་སྒྲོལ་མ་ལྟ་བུ་ཡིན་ཏེ། བཤན་པ་སངས་རྒྱས་སངས་རྒྱས་མ་ཡིན། སྨད་ཚོང་སྒྲོལ་མ་སྒྲོལ་མ་མ་ཡིན་པའི་ཕྱིར། དེ་དག་དངོས་མིང་ཡིན་ཏེ། དེ་གཉིས་སྐྱེས་མ་ཐག་ནས་འདོད་རྒྱལ་མཁན་པོས་འདྲ་འབྲེལ་གྱི་རྒྱུ་མཚན་ལ་མ་ལྟོས་པར་རང་འདོད་ལྟར་བཏགས་པའི་མིང་གཙོ་བོ་ཡིན་པའི་ཕྱིར། དེ་བཞིན་དུ་དོན་དེ་ལ་དངོས་མིང་དུ་འཇུག་ན་དོན་དེའི་དངོས་མིང་ཡིན་མི་དགོས་པ་དཔེར་ན། དངོས་པོ་ལ་ཤེས་བྱའི་སྒྲ་འཇུག་ཀྱང་དེའི་དངོས་མིང་མིན་པ་སོགས་ཀྱང་ཤེས་དགོས་སོ།།

            གསུམ་པ་འདོད་རྒྱལ་གྱི་མིང་ནི། དོན་དེ་ལ་རྒྱུ་མཚན་བཤད་དུ་མེད་པར་འདོད་རྒྱལ་མཁན་པོས་ཐོག་མར་བརྡ་སྦྱར་བའི་མིང་ལ་ཟེར་ཏེ། དཔེར་ན། རི་དྭགས་རྒྱལ་པོ་སེངྒེ་ཞེས་པ་ལྟ་བུ། དེ་བཞིན་དུ། ས། ཆུ། མེ། རླུང༌། ཉི་མ། ཟླ་བ། སྐར་མ་སོགས་ལའང་རིགས་བསྒྲེ།

            བཞི་པ་རྗེས་གྲུབ་ཀྱི་མིང་ནི། དོན་དེའི་བྱེད་ལས་དང་ནུས་ཤུགས། འདྲ་བ་དང་འབྲེལ་བ་གང་ཞིག་ལ་ལྟོས་ནས་རྗེས་སུ་གྲུབ་པའི་མིང་ལ་ཟེར། དཔེར་ན། ལྕགས་ཐབ་ལྟ་བུ། ངོ་བོའམ་རྒྱུ་ཆ་ལྕགས་ཡིན་པ་ལ། རྣམ་པ་མེ་གཏང་སར་བསྒྱུར་བ་ན། སྔར་གྱི་ལྕགས་དང༌། ཐབ་ཅེས་པ་འདོད་རྒྱལ་གྱི་མིང་གཉིས་པོ་དེ་བསྡོམས་པའི་རྗེས་སུ་རྒྱུ་མཚན་དང་སྒྲ་བཤད་ཡོད་པའི་མིང་ཞིག་གསར་དུ་གྲུབ་པས་འདི་རིགས་ལ་རྗེས་གྲུབ་ཀྱི་མིང་ཞེས་བྱ་སྟེ། དེ་བཞིན་དུ། ཆུ་ཚོད། ལྕགས་རྟ། སྡུག་བསྔལ་བདེན་པ། སོགས་ལའང་རིགས་འགྲེ་ཤེས་དགོས།

            ལྔ་བ་མིང་ཁོ་ན་ཡིན་པ་ནི། དོན་གྱི་ངོ་བོ་ཙམ་སྟོན་པའི་སྒྲ་སྟེ། རྣམ་དབྱེ་དང་པོ་དང་དོན་གཅིག་གོ །དཔེར་ན། བུམ་པ། ཀ་བ། ལྟ་བུ། དེ་དག་མིང་ཡིན་ཏེ་ཁང་པའི་ཀ་བའི་མིང་ཡིན་པའི་ཕྱིར། ཚིག་ཡིན་ཏེ་ཁྱད་གཞི་ཁང་པ་ལ་ཁྱད་ཆོས་ཀ་བ་སྦྱར་ནས་བསྟན་པའི་མཉན་བྱ་ཡིན་པའི་ཕྱིར། དེས་གསེར་གྱི་བུམ་པ་ལའང་རིགས་འགྲེ།

            དྲུག་པ་མིང་ཚིག་གཉིས་ཀ་ཡིན་པ་ནི། དོན་གྱི་ངོ་བོ་དང་ཁྱད་པར་གཉིས་ཚོགས་ཅན་གྱི་སྒྲ་སྟེ། དཔེར་ན། ཁང་པའི་ཀ་བ། གསེར་གྱི་བུམ་པ་ལྟ་བུ།

            བདུན་པ་བྱ་ཚིག་གིས་ཤན་ཞུགས་པའི་མིང་ཚིག་ནི། བདག་གཞན་དང་དུས་གསུམ། བྱ་བྱེད་གང་ཞིག་དང་ཕན་ཚུན་ལྟོས་གྲུབ་ཀྱི་སྒོ་ནས་བཏགས་པའི་མིང་ཞིག་ལ་ཟེར་ཏེ། དཔེར་ན། མཐོང་སྤང་དང༌། སྒོམ་སྤང༌། བསླབ་པ། གདིང་བ། བརྗོད་པ། དགག་པ། དཔྱང་ཐག ལྟ་བུ་བྱ་ཚིག་གམ་ལས་ཚིག་གི་ཤན་ཞུགས་པ་དང༌། ངོ་རྒོལ། སྐམ་པོ། རློན་པ། བློ་སྦྱོང༌། སྡོམ་པ། སྔོན་འགོག ཆོས་མཆོད་ཕྱག་རྒྱ། མཐའ་རྩོད། གསུང་རྩོམ། འགོག་བདེན། གྲ་སྒྲིག མཐོང་ལམ། སྦྱོར་ལམ། ལས་སྒྲིབ། ལྟ་བུ་བྱེད་ཚིག་གིས་ཤན་ཞུགས་པ། མྱང་འདས། བདེ་གཤེགས། བཅོམ་ལྡན་འདས། སྤྱིར་བཏང༌། སངས་རྒྱས་ལྟ་བུ་འདས་ཚིག་གིས་ཤན་ཞུགས་པ། རྒྱུན་ཞུགས། ཕྱིར་འོང་ཞུགས་པ། ཕན་ཐོགས། བཤེས་སྤྲིངས། ཁ་སྐྱེངས། ཡིད་སྲུབས། མགུལ་ཆིངས། ཟློས་སྐྱོན་ལྟ་བུ་རྣམས་སྐུལ་ཚིག་གིས་ཤན་ཞུགས་པའི་མིང་ཚིག་ཡིན་ཏེ། དེ་དག་བདག་གཞན་དུས་གསུམ་གང་རུང་ལ་ལྟོས་ནས་བཏགས་པ་ཡིན་ཡང་བྱ་ཚིག་དངོས་མིན་ནོ།།             དེ་ཡང་བྱེད་ཚིག་གི་ཤན་ཞུགས་པ་མང་ཞིང༌། བྱ་ཚིག་དང་འདས་ཚིག་གི་ཤན་ཞུགས་པ་དེ་ཙམ་མི་མང༌། སྐུལ་ཚིག་གི་ཤན་ཞུགས་པ་ནི་ཤིན་ཏུ་ཉུང་ངོ༌།།

            བརྒྱད་པ་བྱ་ཚིག་དང་ཉེ་ཡང་དེའི་ཤན་མ་ཞུགས་པའི་མིང་ནི། སྐྱབས་གསུམ། བྱིན་རླབས། ཁང་རྩེགས་ལྟ་བུ་རྣམས་ཡིན་ཏེ། འདི་དག་བྱ་བྱེད་འདས་སྐུལ་གྱི་ཡིག་གཟུགས་གང་དང་ཡང་མི་མཐུན་པའི་ཕྱིར་རོ།།

            བྱ་ཚིག་ཅེས་པ་ནི། བདག་གཞན་ནམ་ཡང་ན་དུས་གསུམ་གྱི་དབྱེ་བ་ཕྱེ་རུང་བའི་ཚིག་ལ་ཟེར་ཏེ། དེ་ཡང་སྤྱི་བཤད་རགས་པའི་དབང་དུ་བྱས་ན་བྱ་བྱེད་འདས་སྐུལ་གྱི་ཚིག་ཀུན་ལ་བྱ་ཚིག་ཅེས་བརྗོད་ཅིང༌། ཞིབ་ཏུ་ཕྱེ་ན། སྒྲུབ་ལྟ་བུ་བྱེད་ཚིག་དང༌། བསྒྲུབ་ནི་བྱ་ཚིག་གམ་ལས་ཚིག བསྒྲུབས་ནི་འདས་ཚིག །སྒྲུབས་ནི་སྐུལ་ཚིག་སྟེ། དེས་གཞན་ལའང་རིགས་འགྲེ་དགོས། མདོར་ན་བྱ་ཚིག་དང་མིང་ཚིག་གཉིས་སུ་ཕྱེ་བའི་བྱ་ཚིག་དང༌། བྱ་བྱེད་འདས་སྐུལ་བཞིར་ཕྱེ་བའི་བྱ་ཚིག་གཉིས་ཁྱབ་ཆེ་ཆུང་གི་ཁྱད་པར་མི་འདྲ་བ་འདི་ཉིད་ངེས་པར་དུ་ཤེས་དགོས་པ་ཞིག་ཡིན་ནོ།།

            འདི་ལ་བྱ་བྱེད་ཐ་དད་པའི་ལས་ཚིག་དང༌། ཐ་མི་དད་པའི་ལས་ཚིག་གཉིས་ཡོད་ཅིང༌། དུས་གསུམ་མ་ཟད་བདག་གཞན་གྱི་དབྱེ་བ་ཕྱེ་རུང་བའི་ལས་ཚིག་ལ་བྱ་བྱེད་ཐ་དད་པའི་ལས་ཚིག་དང༌། བདག་གཞན་གྱི་དབྱེ་བ་འབྱེད་དུ་མེད་ཅིང་དུས་གསུམ་གྱི་དབྱེ་བ་ཙམ་ཕྱེ་རུང་བའི་ལས་ཚིག་ལ་བྱ་བྱེད་ཐ་མི་དད་པའི་ལས་ཚིག་ཅེས་བྱ་སྟེ། རྒྱས་པ་ནི་གོང་དུ་བཤད་ཟིན་ཏོ།།

            འདི་ནི་མིང་ཚིག་དང་མི་འདྲ་བར་བྱ་བྱེད་དང་དུས་ཀྱི་ཁྱད་པར་ལ་བརྟེན་ནས་ཡིག་གཟུགས་ཀྱང་མི་འདྲ་བ་སྣ་ཚོགས་སུ་འགྱུར་འགྲོ་བས་དཀའ་གནད་འདི་ཉིད་དགྲོལ་བའི་ཆེད་མཁས་པ་འགའ་ཞིག་གིས་བཞེད་པ་ལྟར་བཀོད་ན།

            དབྱེ་བ་དགུ་ལྡན་གྱི་བྱེད་འབྲེལ་ལས་ཚིག

                                    བྱེད་པོ་ལས་དང་བྱེད་ལས་བྱ་བའི་ལས།།

                                    འདས་དང་མ་འོངས་ད་ལྟ་དུས་གསུམ་དང༌།།

                                    སྐུལ་ཚིག་དང་ནི་དགག་བྱའི་སྐུལ་ཚིག་སྟེ།།

                                    འདི་དག་དབྱེ་བ་དགུ་ལྡན་ལས་ཚིག་ཡིན།།

            འདིར་བློ་བཟང་གིས་ཤིང་གཅོད་པ་ལྟ་བུར་མཚོན་ན། གཅོད་པ་པོ་བྱེད་པོ། གཅད་བྱ་ལས། གཅོད་པར་བྱེད་བྱེད་ལས། གཅད་པར་བྱ་བྱ་ལས། བཅད་ཟིན་པ་འདས་པ། གཅོད་བཞིན་པ་ད་ལྟ་བ། གཅོད་འགྱུར་བྱེད་ལས་མ་འོངས་པ། ཆོད་ཅིག་སྐུལ་ཚིག མ་གཅོད་དགག་སྒྲའི་སྐུལ་ཚིག་སྟེ། དབྱེ་བ་དགུར་ཕྱེ་རུང་བ་ཡིན་ནོ།།

            དབྱེ་བ་བདུན་ལྡན་གྱི་བྱེད་འབྲེལ་ལས་ཚིག

                                    བྱེད་པོ་ལས་དང་བྱེད་ལས་བྱ་བའི་ལས། །

                                    འདས་དང་མ་འོངས་ད་ལྟ་བཅས་ཏེ་བདུན། །

            འདིར་ལུག་གིས་ཆུ་འཐུང་ལྟ་བུར་མཚོན་ན། འཐུང་པ་པོ་བྱེད་པོ། བཏུང་བྱ་ལས། འཐུང་བར་བྱེད་བྱེད་པའི་ལས། བཏུང་བར་བྱ་བྱ་བའི་ལས། བཏུངས་ཟིན་འདས་པ། འཐུང་བཞིན་པ་ད་ལྟ་བ། བཏུང་འགྱུར་མ་འོངས་པ། ལུག་ལ་ཆུ་ཐུངས་དང་མ་འཐུང་ཞེས་སྐུལ་ཚིག་དང་དགག་སྒྲའི་སྐུལ་ཚིག་སྦྱོར་དུ་མེད་དེ། སྨྲ་མི་ཤེས་པ་དང་དོན་མི་གོ་བ་ལ་ཐུངས་དང་མ་འཐུང་ཞེས་བརྗོད་པའི་དོན་མེད་ཅིང༌། སྨྱོན་པ་མིན་ན་དེ་ལྟར་རྗོད་མཁན་ཡང་མེད་དོ།།

དེ་བཞིན་དུ་སྤྲིན་གྱིས་ཉི་འོད་སྒྲིབ། རི་བོ་སྨུག་པས་བཏུམས། ཆུ་རླབས་ཀྱིས་བྲག་ལ་བརྡབས་ལྟ་བུ་རྣམས་ཀྱང་གོང་གསལ་ལུག་དང་མི་འདྲ་བའི་ཁྱད་པར་བྱེད་པ་པོ་སེམས་དང་ལྡན་མིན་ཙམ་མ་གཏོགས། དབྱེ་བ་བདུན་ལྡན་གྱིས་ལས་ཚིག་ཡིན་པ་གཅིག་མཚུངས་ཡིན་ནོ།། སྙན་ངག་གིས་བརྒྱན་པའི་སྒྲོ་བཏགས་ཀྱི་ཚིག་སྦྱོར་དུ། མཁའ་ཡི་གླང་པོ་ཉི་འོད་སྒྲིབས་ཤིག་ཀྱེ། ལྟ་བུ་ནི་སྙན་ངག་མཁན་གྱི་ཚིག་སྦྱོར་ལ་བྱང་བའི་བརྡ་རྟགས་ཡིན་གྱི་སྨྱོན་པའི་གཏམ་དང་མི་མཚུངས་པས་འདི་རིགས་དམིགས་བསལ་ཡིན་ནོ།། གོང་གསལ་འཐུང་ཞེས་པའི་བྱ་ཚིག་དེ་ཉིད། སྨྲ་ཤེས་དོན་གོ་བའི་མི་ལ་ལབ་ན། དབྱེ་བ་དགུ་ལྡན་དུ་འགྱུར་ཏེ། དགག་སྒྲུབ་ཀྱི་སྐུལ་ཚིག་གཉིས་ཀྱང་སྦྱར་རུང་བའི་ཕྱིར། དེས་ཕྱི་མ་རྣམས་ལའང་རིགས་འགྲེ།

            དབྱེ་བ་གསུམ་ལྡན་གྱི་བྱེད་མེད་ལས་ཚིག

                                    འདས་དང་མ་འོངས་ད་ལྟ་དུས་གསུམ་ཙམ།།

                                    དབྱེ་རུང་གསུམ་ལྡན་བྱེད་མེད་ལས་ཚིག་ཉིད།།

            འདིར་ཆུ་འཁྱིལ་ལྟ་བུར་མཚོན་ན། འཁྱིལད་ཏོ་འདས་པ། འཁྱིལ་ལོ་ད་ལྟ་བ། འཁྱིལ་བར་འགྱུར་མ་འོངས་པ། དབྱེ་བ་འདི་གསུམ་ལས་གཞན་བྱེད་པོ་དང་བྱ་ཡུལ་གྱི་དབྱེ་བ་མི་འཐད་དེ། འཁྱིལ་བྱེད་དང་འཁྱིལ་བྱ་གཉིས་ཀ་ཆུ་ཡིན་པའི་ཕྱིར། དེ་བཞིན་དུ་ང་འགྲོ། ཁ་སྐྱེངས། མེ་འབར། རླུང་གཡོ་ལྟ་བུ་རྣམས་ཀྱང་བྱེད་པ་པོ་དངོས་སུ་ཡོད་མེད་ཇི་ལྟར་ཡང་དུས་གསུམ་གྱི་དབྱེ་བ་ཙམ་མ་གཏོགས་བྱ་བྱེད་ཀྱི་དབྱེ་བ་ཕྱེ་མི་རུང༌།

            གཟུགས་གཅིག་དབྱེ་བ་དྲུག་ལྡན་གྱི་བྱེད་ཚིག

                                    བྱེད་པོ་གཙོ་ཕལ་བྱེད་ལས་བྱེད་བཞིན་པ།།

                                    བྱེད་ལས་མ་འོངས་དགག་སྒྲའི་སྐུལ་ཚིག་དྲུག།

                                    བདག་གཞན་གཉིས་ལས་བདག་གི་ཁོངས་སུ་བསྡུས།།

                                    དུས་གསུམ་ནང་ནས་ད་ལྟ་བ་ཡི་ཁོངས།།

            འདིར་དཔེར་ན་བློ་བཟང་གིས་ཤིང་གཅོད་པ་ལྟ་བུར་མཚོན་ན། གཅོད་པ་པོ་བྱེད་པ་པོ། གཅོད་བྱེད་བྱེད་པ་ཕལ་པ། གཅོད་པར་བྱེད་བྱེད་པའི་ལས། གཅོད་བཞིན་པ་ད་ལྟ་བ། གཅོད་པར་འགྱུར་བྱེད་ལས་མ་འོངས་པ། མ་གཅོད་དགག་སྒྲའི་སྐུལ་ཚིག་སྟེ། གཅོད་ཅེས་པའི་ཡིག་གཟུགས་གཅིག་པོའི་བྱེད་ཚིག་འདི་ཉིད་གོ་བ་མི་འདྲ་བ་དྲུག་ལ་འཇུག་ཅིང༌། དེ་ཡང་བདག་གཞན་གཉིས་ཀྱི་ནང་ནས་བདག་དང༌། དུས་གསུམ་གྱི་ནང་ནས་ད་ལྟ་བའི་ཁོངས་སུ་འདུས་པ་ཡིན་ལ། དེས་བྱེད་འབྲེལ་ལས་ཚིག་གཞན་ལའང་རིགས་འགྲེ་ཤེས་པར་བྱའོ།།

            གཟུགས་གཅིག་དབྱེ་བ་གཉིས་ལྡན་གྱི་ལས་ཚིག

                                    བྱ་བའི་ཡུལ་དང་བྱ་ལས་གཉིས་པོ་ནི།།

                                    གཟུགས་གཅིག་དབྱེ་བ་གཉིས་ལྡན་ལས་ཚིག་ཡིན།།

                                    བདག་གཞན་གཉིས་ལས་གཞན་གྱི་ཁོངས་སུ་བསྡུས།།

                                    དུས་གསུམ་དག་ལས་མ་འོངས་པ་ཡི་ཁོངས།།

            འདིར་དཔེར་ན། བློ་བཟང་གིས་ཤིང་གཅད་ལྟ་བུར་མཚོན་ན། གཅད་བྱ་བྱ་བའི་ཡུལ། གཅད་པར་བྱ་བྱ་ལས་ཏེ། གཅད་ཅེས་པའི་ཡིག་གཟུགས་གཅིག་པོའི་བྱ་ཚིག་འདི་ཉིད་གོ་བ་མི་འདྲ་བ་གཉིས་ལ་འཇུག་ཅིང༌། དེ་ཡང་བདག་གཞན་གཉིས་ལས་གཞན་དང༌། དུས་གསུམ་ལས་མ་འོངས་པའི་ཁོངས་སུ་འདུ་བ་ཡིན་ལ། དེས་གཞན་ལའང་རིགས་འགྲེ་ཤེས་དགོས། གོང་གསལ་དེ་དག་བདག་གཞན་དང་དུས་གསུམ་གང་ཞིག་གིས་བསྡུ་བར་བཤད་པ་རྣམས་ནི་སྤྱི་བཤད་ཙམ་སྟེ། ཞིབ་ཏུ་དཔྱད་ན་འཐད་དང་མི་འཐད་ཀྱི་རྒྱུ་མཚན་རྒྱས་པ་གོང་དུ་བཤད་ཟིན་ཏོ།།