གཟིམས་པ་མེད་པའི་མཆོད་མེ། དབྱངས་གསལ་སོ་བཞིའི་མཛེས་སྡུག  RSSསྔོན་མངག

མགར་དང་འགར་གྱི་ཁྱད་པར་ལས་འཕྲོས་པའི་རིགས་རྒྱུད་སྐོར་རོབ་ཙམ་གླེང་བ།

2012-06-17 17:02:00 མགར་བུ་འཇམ་བསམ། ཀློག་གྲངས། མཆན ཡོད།

  དེ་ཡང་ལོ་རྒྱུས་ཀྱི་ཚིག་གསུམ་མ་ཤེས་ན། །   ཕ་ཨ་ཁུ་ཡིན་རུང་ངོ་མི་ཤེས། ། ཞེས་པ་ལྟར།མི་བུ་གང་ཞིག་གིས་རང་ཉིད་གང་དུ་འོང་བ་དང་ཅིའི་དོན་དུ་འོང་བ་གང་དུ་འགྲོ་བ་སོགས་ཞིབ་ཏུ་ཤེས་པ་རང་ཉིད་མི་ཞིག་ཡིན་པའི་འོས་འགན་རེད་བསམ་བྱུང་སྙམ། དེས་ན་ང་རང་ཆུང་དུས་རང་ཉིད་གང་གི་རིགས་རྒྱུད་ཡིན་པ་གསལ་བོ་མ་ཤེས་མོད། འོན་ཀྱང་དྲིན་ཆེན་ཕ་མ་སོགས་ཀྱིས་ངག་རྒྱུན་དུ་བོད་ཀྱི་རྒྱལ་རབས་སོ་གསུམ་པ་ཆོས་རྒྱལ་སྲོང་བཙན་སྒམ་པོ་ལ་མེད་དུ་མི་རུང་བའི་བློན་པོ་མགར་སྟོང་བཙན་གྱི་རྒྱུད་ལས་མཆེད་པ་ཡིན་ཞེས་དུས་རྒྱུན་ཁ་ན་ལྷང་ལྷང་དུ་གྲག་པ་ཐོས་སོ།།   འགར་སྟོང་བཙན་གྱི་རྒྱུད་ནས་མཆེད་པ་ཡིན་ཟེར་མཁན་མི་བུ་མང་དུ་འབྱུང་བཞིན་པ་རེད། དེའི་ཕྱིར་རང་ཉིད་ཀྱི་མིང་བྱང་འབྲི་བའི་ཚེ་མགར་དང་འགར་ལ་ཁྱད་མེད་འབྲི་བ་ཤིན་ཏུ་མང་པོ་ཡོད་ཕྱིར།
  ངས་འདི་ནས་ལོ་རྒྱུས་དང་ཡིག་ཚང་སོགས་ལ་བསྟུན་ནས་ཅུང་ཙམ་བཀོད་ན། ཡི་གེར་འབྲི་ཚུལ་གྱི་ཐད་ནས་གླེང་ན་དུས་ལ་འཇུག་པའི་སྐབས་ལ་ལར་མགར་དང་འགར་གཉིས་ཁྱད་མེད་དུ་འབྲི་ཆོག་པར་སྣང་སྟེ། དཔེར་ན། སྔོན་གྱི་ཆོས་འབྱུང་ཆེན་པོ་བསྟན་པའི་རྒྱ་མཚན་ལྡེའུ་ཇོ་སྲས་ཀྱི་མཛད་པ་དེ་ཉིད་དུ་འགར་སྟོང་ཡུལ་བཟུངས། ཞེས་པ་དང་།འགར་བཙན་སྟ་ལྡོམ་བུ།འགར་ཁྲི་འབྲིང་བཙན་རྒོད་ཅེས་ཀྱི་སྐབས་སུ་མགར་གྱི་ཚབ་སུ་འགར་བྲིས་པ་མང་པོ་སྣང་བྱུང་།བསྟན་པ་ཕྱི་དར་གྱི་ཕྱིས་སུ་བརྩམས་པའི།(བོད་མི་བུ་གདོང་དྲུག་གི་རུས་མཛོད་མེ་ཏོག་སྐྱེད་ཚལ།ཞེས་པ་དང་།ཆོས་འབྱུང་མཁས་པའི་དགའ་སྟོན་དང་།དེབ་ཐར་སྔོན་པོ། ཆོས་འབྱུང་དཔག་བསམ་ལྗོན་བཟང་།ཚེ་ཏན་ཞབས་དྲུང་མཆོག་གི་ཐོན་མའི་དགོངས་རྒྱན།ཆོས་སྲིད་ཉི་ཟླའི་འོད་རླབས་)སོགས་སུ་འགར་ཆེན་ཡེ་ཤེས་བཟང་པོ་དང་འགར་དམ་པ་ཆོས་ལྡིངས་སོགས་གནམ་གྱི་ས་བཀབ་པའི་བླ་མ་དེ་དག་གི་རྟོགས་བརྗོད་གླེང་སྐབས་།མཐའ་གཅིག་ཏུ་མགར་བྲིས་ཡོད།ཏུན་ཧོང་ཡིག་ཚགས་ལས།དོན་ཆེན་གནད་བསྡུས་དང་བཙན་པོ་སྲོང་བཙན་སྒམ་པོའི་རྣམ་ཐར་ཉུང་བསྡུས་སོགས་སུ་མགར་རྩན་ཡུལ་ཟུང་།མགར་སྟ་གུ་རི་ཐུང་སོགས་སུ་མགར་ཡིག་ཁོ་ན་བྲིས་ཡོད་པ་དཔག་ན་སྐབས་འགར་མགར་དང་འགར་གཉིས་ཀྱི་དོན་ལ་ཁྱད་མེད་པ་ཐུན་མོང་གིས་རུས་ཚན་གཅིག་ཡིན་པ་ཤ་སྟག་རེད།དེས་ན་སྔོན་གྱི་ཡིག་རྙིང་དང་བསྟན་པ་ཕྱི་དར་གྱི་སྐབས་སུ་ཡི་གེ་འབྲི་སྲོལ་བྱུང་རིམ་གྱི་ཆ་ནས་བལྟས་ན་བོད་གདོད་མའི་དུས་སྐབས་སུ་རྒྱལ་ཕྲན་སིལ་མ་བཅུ་གཉིས་ཀྱི་རུས་ཚན་མཆེད་སྐབས་ངག་རྒྱུན་ཙམ་ལས་ཡི་གེའམ།དག་ཡིག་འབྲི་བའི་སྲོལ་མ་བྱུང་བ་ནི།བོད་ཀྱི་རྒྱལ་རབས་དང་ཡང་ན་ལོ་རྒྱུས་ལ་དབྱེ་ཞིབ་བྱེད་བཞིན་པའི་མཁས་པ་དག་གི་བཞེད་ཚུལ་མཐུན་ནོ།།
  རྒྱལ་རབ་སོ་གསུམ་པའི་སྐབས་སུ་སློབ་དཔོན་ཐོན་མའི་མཛད་རྗེས་ཁོ་ན་ལ་བརྟེན་ནས་ཡི་གེའི་སྲོལ་བྱུང་རྗེསམགར་ཞེས་པའི་སྒྲ་དེ་ཉིད་ཡིག་གཟུགས་སུ་ཐོག་མར་ཕབ་དུས་མགར་ཡིག་ཁོ་ན་བྲིས་པར་ངེས་ལ།དེ་ནས་རྒྱལ་རབས་ག་གེ་མོ་ཞིག་གི་རིང་ལ་བོད་ཀྱི་སྤྱི་ཚོགས་འགྱུར་ལྡོག་གི་དབང་གིས་རིག་གནས་གོད་ཆག་ཆེན་པོ་ཐེབས་པ་མཉམ་དུ་ཡི་གེ་རྙིང་བ་རྣམས་མེད་བརླགས་སུ་བཏང་། དུས་སྐབས་དེར་བསྟན་པ་སྔ་དར་མཇུག་རྫོགས་སོ།།བསྟན་པ་སྔ་དར་གྱི་སྐབས་སུ་རིག་གནས་དང་དགོན་སྡེ་སོ་སོ་ཅུང་ཡར་རྒྱས་སུ་གནས་པའི་སྐབས་ནས་མགར་ཡིག་གི་དོད་དུ་འགར་ཡིག་འབྲི་བའི་སྲོལ་བྱུང་བ་ཡིན་ནམ་དཔྱད་པའི་གནས་སོ།།དེའི་ཕྱིར།མགར་དང་འགར་གཉིས་མཐའ་གཅིག་ཏུ་དོན་ལ་ཁྱད་མེད་པར་ཐུན་མོང་གིས་རུས་རྒྱུད་གཅིག་སྟོན་པ་ཡིན་ཞེས་ང་ལ་དོགས་ཟྭ་བས།སྐབས་འགར་འདྲ་ས་སྐབས་འགར་མི་འདྲ་བའི་ཡི་གེ་དེ་གཉིན་ལ་མཐུན་པའི་ཆ་ཡོད་ལ་མི་མཐུན་པའི་དོན་ཡང་ཡོད་པའི་ཁྱད་པར་ཤེས་དགོས་པ་གལ་ཆེའོ།།མགར་རྩེ་ཞེས་པ་ནི།མགར་ཚེ་གནམ་ས་འབྲུག་གི་ཚེ་དེའི་སྒྲ་རིམ་བཞིན་འགྱུར་ནས་རྩེ་རུ་བཀླགས་པ་ཡིན་ཞེས་རྒྱལ་དབང་ལྔ་བ་ཆེན་མོའི་དེབ་ཐེར་དཔྱིད་ཀྱི་རྒྱལ་མོའི་གླུ་དབྱངས་སུ་གསལ་བར་གསུངས་པའི་ཧ་ཅང་གོ་བདེ་བའི་དེ་ལ་གཟིགས་རོགས། དེ་ཡང་མགར་ཞེས་པ་ནི།(བཤད་མཛོད་ཡིད་བཞིན་ནོར་བུ་)ལས་ཀྱང་།  རུས་ཆེན་བཞི་རུ་མཆེད་ཚུལ་ནི།།ལྡོང་ལ་རུས་ཆེན་བཅོ་བརྒྱད་སྲིད།།རྨུ་ལ་ཀེ་ལེའི་ཕྲ་བརྒྱད་སྲིད།།སྟོང་ལས་རྗེ་བཞི་ཁོལ་རྒྱད་སྲིད།།སེལ་བྱུང་སོགས་ཀྱི་བུ་བཞི་སྲིད།།རུས་ཆེན་བཞི་ཡི་མཆེད་ཚུལ་ཡིན།།ཞེས་གསུངས་པ་ལྟར།རྩ་བའི་རུས་ཆེན་བཞི་རུ་བསྟན་ཡོད།རྒྱ་བོད་ཡིག་ཚང་ཆེན་མོ་རུ།གནའ་སྔ་མོ་ནས་འགྲོ་བ་མི་རྣམས་སྤྲེའུ་བྱང་ཆུབ་སེམས་དཔའ་ལས་སྤྲེའུ་ཕྲུག་མིར་གྱུར་བ་རྣམས་ཇེ་མང་དུ་སོང་ནས།འབྲུ་ལ་མ་འཆམ་པར་ཚོ་བཞིར་བགོ་བས་།སེ་དང་རྨུ་དང་སྟོང་དང་ལྡོང་བཞི་ལ་མི་བུ་རིས་བཞི་ཟེར།རུས་ཆེན་དེ་དག་གི་སྟེང་དུ་ལྷ་རིགས་སྒོ་བསྣན་ནས་རུས་ཆེན་ལྔ་ཡང་བཤད་སྲོད་ཡོད།དཔའ་བོ་གཙུག་ལག་ཕྲེང་བས།(ཆོས་འབྱུང་མཁས་པའི་དགའ་སྟོན)་དུ། བོད་ཀྱི་མི་བུ་རིགས་བཞི་ཞེས་སེ་དང་རྨུ་ལྡོང་དང་སྟོང་གིས་རུས་ཚན་བཞི་བྱུང་བར་གྲགས་ཤིང་ཡང་དབྲ་དང་འདྲུ་བསྣན་ནས་མི་བུ་རིགས་དྲུག་དུའང་གྲག་གོ།ཞེས་གསུངས།མདོར་བསྟན་ཏེ་བཤད་ན།མགར་ནི་རུས་ཆེན་དེ་དག་ལས་ལྷ་རིགས་སྒོ་ལས་མཆེད་པ་དང་རུས་ཆེན་རྨུ་ལས་མཆེད་པ་བཅས་རིགས་གཉིས་སོ།།དང་པོ་ནི།ལྷ་རིགས་སྒོ་ལས་མཆེད་པ་བརྗོད་པ་ནི།ཚེ་དབང་རིག་འཛིན་གྱིས།(སྡེ་དགེ་རྒྱ་རབས་ལས)།བོད་ཆེན་ལྗོངས་ཀྱི་འགྲོ་བ་འདི་དག་ཀུན།སྒ་འབྲུ་སྦྲ་གདོང་བཞི་ལས་མང་མོད་ཀྱང་།ཞེས་པ་ནས།ཞང་བ་ལྷ་སྡེ་དཀར་པོ་སྒོ་རིགས་ལས།ཆད་དེ་སྟོད་སྨད་ཕྱོགས་སུ་ཡོད་ནང་ནས།ཞེས་དང་།ལྷ་བབས་ནས་བརྒྱུད་སྟོང་བཙན་ཡུལ་བཟུང་ནས།ད་ལྟའི་བར་དུ་རིམ་པར་དྲངས་པ་དང་།།དེ་ལས་རྔུ་ཚོ་ཉེར་གཅིག་གྱེས་ཚུལ་བཤད།ཅེས་པ་འདིའི་སྐབས་སུ།མགར་སྟོང་བཙན་གྱི་རུས་ཡུལ་སོགས་ལྷ་སྡེ་དཀར་པོ་ཡི་རིགས་ལས་མཆེད་པར་བརྗོད་ཡོད་དོ།།གཞན་ཡང་།ལྷ་རིགས་སྒོ་ལས་མཆེད་ཚུལ་ནི།(ཆོས་སྲིད་ཉི་ཟླའི་འོད་རླབས་ལས།)འགར་ཁྲི་ཆོས་འཕེལ་ལགས་ཀྱིས་ཀྱང།འཆི་མེད་ལྷའི་བུ་བཞར་ར་ལྷ་རྩེར་བབས།། གནམ་ཚ་འབྲུག་ཅེས་སྙན་ཡང་ཕྱོགས་སུ་ཁྱབ།།སྒོ་རིགས་དཀར་པོ་ཕྱོགས་སུ་གྱེས་པ་ལས།།ངོ་མཚར་གཏམ་གྱི་ཕྲེང་བ་འཇིག་རྟེན་རྒྱན།།ཞེས་གསུངས་པ་ལ།གཞིགས་ན།ལོ་རྒྱུས་དང་སྦྱར་ནས་སྒོ་ལྷ་སྡེ་དཀར་པོ་ལས་མཆེད་ཚུལ་གསུངས་ཡོད།ཡང་དེ་ཉིད་ལས།ཨ་བར་ཚེ་རིང་དོན་འགྲུབ་ཀྱིས།གཉིས་པ་སྒོ་ལྷ་སྡེ་དཀར་པོ་བྱེ་བྲག་ཏུ་བཤད་པ་ནི།ཞེས་སོགས་ཀྱིས་སྐབས་སུ་ཐེ་ཚོམ་མེད་པར་གསལ་བར་བསྟན་ཡོད་དོ།།མགར་ནི་རུས་ཆེ ན་ལྷ་རིགས་སྒོ་ལས་མཆེད་པའི་དོགས་པ་ང་ལ་ངང་ངམ་ཤུགས་ཀྱིས་ཟྰའོ།།ཞིབ་ཏུ་རྗེས་ནས་བཤད།གཉིས་པ་ནི།མགར་ནི་རུས་ཆེན་རྨུ་ལས་མཆེད་པའི་རིགས་ནི་སྔོན་འགྲོ་བ་མི་རྣམས་ཕ་རྒན་སྤྲེའུ་བྱང་ཆུབ་སེམས་དཔའ་ལས་དེའི་རྒྱུད་རིམ་པར་འཕེལ་ཞིང་རུས་ཆེན་རིགས་བཞི་དབྱེ་བ་ནི།སེ་དང་ རྨུ་དང་ ལྡོང་དང་ སྟོང་བཞིའོ།།
དེའི་ནང་ཚན་གྱི་རྨུ་ལས་མཆེད་པར་མངོན་ཏེ།རྨུ་ལ་ཀོ་ལེའི་ཕྲ་བརྒྱད་སྲིད།།ཅེས་གསུངས་པ་ལྟར།རྨུ་ལས་ཀོ་ལས་ཕྲ་བརྒྱད་སོ་སོར་གྱེས་པས་རིགས་རུས་ཀྱི་མིང་ནི།རབ་དང་གཞུབ་དང་།བཞུང་དང་སྨོན་ནོ།།འགར་དང་།དཀར་དང་ལྟོས་དང་།ངན་ལམ་སྟེ་བརྒྱད་ཀྱི་མིང་ངོ་།། མདོར་བསྡུས་ན།ནམ་མཁའི་ནོར་བུ་ལགས་ཀྱིས།(བཤད་མཛོད་ཡིད་བཞིན་ནོར་བུ་)ལས་ཀྱང་།།ངམ་དང་སྣུབས་དང་གཞུང་དང་གསུམ།།འགར་དང་དཀར་དང་སྨོན་དང་གསུམ།།སྙོས་དང་ངན་ལམ་གཉིས་ཏེ་བརྒྱད།།རྨུ་ཀོ་ལེ་ཕྲ་བརྒྱད་ཟེར་བ་ཡིན།།ཞེས་སོགས་གསལ་བར་གསུངས་ཡོད་པ་ནི།མགར་རུས་རྨུ་ལས་མཆེད་ཚུལ་བཤད་པ་མིན་ན་གང་རེད།སོམས་ཤིག  མགར་ཞེས་པ་ནི་བོད་གདོད་མའི་སྔ་རོལ་ནས་གྲུབ་པའི་རུས་ཚན་ཞིག་ཡིན་པ་བསྟོན་དུ་མེད་མོད།འོན་ཀྱང་།མགར་ཞེས་པ་ནི་རུས་ཆེན་སྒོ་ལྷ་སྡེ་དཀར་པོ་དང་རུས་ཆེན་རྨུ་ལས་མཆེད་པའི་ཕྱོགས་གཉིས་ཡོད་པ་ལོ་རྒྱུས་དང་ཡིག་ཚང་སོགས་སུ་གསལ་བར་བསྟན་ཡོད་ལ།འདི་ནི་ཡང་དག་པ་དང་འདི་ནི་ལྟར་སྣང་རེད་ཅེས་ཁ་ཚོད་གཅོད་རྒྱུ་ནི་གོང་འོག་བསྒྲིག་མི་ཤེས་པའི་ང་ལྟ་བུའི་ལག་ཏུ་ཤོར་ན་བཞད་གད་ཀྱི་གནས་སུ་ལྷུང་བ་གདོན་མི་ཟའོ།དང་པོ་མི་འཐད་པ་ལ་དོགས་སྨོང་ཕྲན་ཙམ་རེ་བརྗོད་ན།མགར་སྟོང་བཙན་ཁོང་ནི་སྒོ་ལྷ་སྡེ་དཀར་པོ་ལས་མཆེད་པ་ཡིན་ཟེར་མཁན་དག་ན་རེ། རུས་ཆེན་བཞི་ལས་དཀར་པོ་ཆོས་ལ་དད་ཅིང་ལས་རྣམས་བཟང་པོས་སྒོ་ལྷ་སྡེ་དཀར་པོ་ལས་མཆེད་པ་ཡིན་ཟེར།  འོ་ན་བསེ་ཁྱུང་སྦྲ་ཡང་སྒོ་ལྷ་སྡེ་དཀར་པོ་ལས་མཆེད་པ་ཡིན་པར་ཁས་ལེན་དགོས་པས། དེ་ནི་བསེ་ཡི་ནང་གི་རིགས་བཟང་པོ་དང་ཆོས་ལ་དད་པའི་ཕྱིར། སོམས་ཤིག  གཞན་ཡང་།མགར་སྟོང་བཙན་སྒོ་ལྷ་སྡེ་དཀར་པོ་ལས་མཆེད་པའི་ཤེས་བྱེད་དུ། (སྡེ་དགེ་རྒྱལ་རབས་ལས། )བོད་ཆེན་ལྗོངས་ཀྱི་འགྲོ་བ་འདི་དག་ཀུན།།ཞེས་སོགས་དྲངས་པ་དང་།རུས་ཆེན་སྒོ་ལྷ་སྡེ་དེ་ལ་བྱེ་བྲག་ཏུ་ངྷུ་ཆེན་རྒྱལ་མོ་བཅོ་བརྒྱད་དུ་གྲགས་པ་ལས། ཡང་(བོད་མི་གདུང་དྲུག་གི་རུས་མཛོད་མེ་ཏོག་སྐྱེད་ཚལ་ལས། )འགར་ཀེ་འགོལ་གསུམ།ཞེས་སོགས་ལུང་འདྲེན་བྱེད་པ་ནི་མཁྱེན་རྒྱ་ཡངས་པའི་རིགས་སྨྲ་དེ་དག་གི་དཔེ་ཀློག་བྱས་པའི་མཇུག་འབྲས་ཡིན་མོད་ཀྱང་། ལུང་དེ་དག་གི་དོན་ནི་མིང་ཙམ་མམ་ས་མིང་བཏགས་པ་ལས་རུས་མཆེད་པ་ནི་མ་ཡིན་ནོ། །གལ་སྲིད་ཡིན་ན་མགར་ནི་རྩ་བའི་རུས་ཆེན་བཞི་འམ་དྲུག་ལས་མཆེད་པ་མིན་པའི་ཐལ་བའི་སྐྱོན་ཞིག་བཟློག་མེད་ངང་གིས་མགོ་ལ་གོན་པ་མ་ཡིན་ནམ།
  དེས་ན་མགར་གྱི་མཆེད་ཁུངས་རྨུ་ལས་མཆེད་པར་བརྗོད་དགོས་པར་ང་རང་གཅིག་པུ་མ་ཡིན་པར་བོད་ཀྱི་ལོ་རྒྱུས་དེབ་ཐེར་རྣམས་ཁ་མཐུན་པའི་ཞལ་ཡམས་གཅིག་ཏུ་བཀོད་པ་ཡིན།ཀིརྟི་ཆེན་པོ་བློ་བཟང་བསྟན་འཛིན་གྱིས་ཀྱང་མཛད་པས་(གནའ་རབས་བོད་ཀྱི་སྲིད་དོན་ལོ་རྒྱུས་ལ་དཔྱད་པ་དྭངས་གསལ་མེ་ལོང་ལས།)
རྨུའི་རིགས་ལ་ཀོ་ལེབ་ཕྲ་བརྒྱད་ཅེས་པའི་ནང་ཚན།མགར་དཀར་དང་སྨོན་དང་གསུམ།ཞེས་པའི་མགར་ལས་འཁྲུངས་པར་སེམས།ཞེས་གསུངས་པ་ནི་དོན་དང་བདེན་པའི་གཏམ་ཁ་ནའོ། །ཡང་ཕྱོགས་གཞན་ཞིག་ནས་བཤད་ན་བདག་གི་གྲོགས་མཆོག་མགར་ཚང་དར་རྒྱས་དང་ངེད་གཉིས་ཀྱིས་དེའི་ཐད་ནས་བགྲོ་གླེང་རགས་ཙམ་གླེང་མཐར་མགར་སྟོང་བཙན་གྱིས་རྒྱུད་པ་ཡིན་ན་མ་མགར་འབྲི་དགོས་པའི་བློ་རྩེ་མཐུན་མོད་ཀྱང་།འོན་ཀྱང   ཁོས་བཤད་རྒྱུ་ད་དུང་འུ་ཅག་མགར་དམ་པ་ཆོས་སྡིངས་ཀྱི་རིགས་ཡིན་མིན་དཔྱད་དགོས་པ་རེད་ཅེས་ང་ལ་བཤད་ཀྱང་ངས་དེའི་ཐད་ནས་དཔེ་ཀློག་མང་པོ་བྱས་ཀྱང་ད་དུང་མ་རྙེད་པའི་བཏང་སྙོམས་སུ་བཞག་ཡོད།
  ཁོང་ནི་རྩེ་མགར་གྱི་སྙན་ངག་པ་ཞིག་ཡིན།ད་དུང་དུས་དེབ་དང་ཚགས་པར་སོགས་སུ་མི་བུ་རང་ཉིད་ཁ་གསལ་བའི་སྒོ་ནས་རང་གི་མིང་བྱང་འབྲི་སྐབས།ཨ་བར་དང་ཐེ་བར་ཡིན་ཕྱིན།དཔེར་ན།ཨ་བར་དཀོན་མཆོག་ཚེ་རིང་དང་ཐེ་བར་སྒྲོལ་མ་ཟེར་བའི་མི་གཉིས་ཀྱི་རང་ཉིད་གང་གི་ཡིན་པའི་མཚོན་བྱེད་དུ་ཨ་བར་དང་ཐེ་བར
ཞེས་བྲིས་ཡོད་པ་དེ་བཞིན་དུ་འབྲི་མཁན་ཧ་ཅང་མང་པོ་རིག་རྒྱུ་ཡོད།དེ་ནི་ལོ་རྒྱུས་དང་དེབ་ཐེར་ལ་མ་མཇལ་བའི་རྣམ་འགྱུར་ཙམ་དུ་གསལ་ལོ།།ཨ་བར་ཞེས་པ་ངའི་ཡིག་ཚང་སོགས་ལས་མ་མཐོང་ཐལ།འོན་ཀྱང་། (མགར་རྩེ་ཚོ་བ་བཅོ་བརྒྱད་ཀྱི་ལོ་རྒྱུས་ཤེལ་དཀར་མེ་ལོང་།)ནང་དུ་མགར་སྟོན་དམ་པ་ཆོས་སྡིངས་ཀྱི་མིང་སྤུན་མཆེད་མགར་ཨ་བོར་(བུར་)དམ་པ་དང་།མགར་ཐེ་བོར་(བུར་)དམ་པ་ཞེས་གསལ་བར་བསྟན་ནོ།འདི་ལ་དཔག་ན་(ཨ་བར་)ཞེས་པའི་བར་འདི་གང་ལས་ཐོན་པ་མི་ཤེས་པའི་དཔྱད་པའི་གནས་སོ།། བདག་གཞུང་ལུགས་ལ་དབྱེ་ཞིབ་ཀྱི་བྲེལ་འཚབ་ཆེ་བས་རེ་ཞིག་བཞག་གོ །
  སྨྲས་པ།
  མགར་དང་འགར་ལ་ཁྱད་པར་མ་མཐོང་བས།།
  ལོ་ངོ་འགའ་ལ་ས་རྡོ་ཁྲོད་དུ་ལུས།།
  གོམ་པའི་ཡུན་གྱིས་རི་ལོང་བགྲོད་པ་བཞིན།།
  རིམ་གྱིས་གཞུང་དང་ལོ་རྒྱུས་དེབ་ཐེར་སོགས།།
མཇལ་ཕྱིར་བདག་གི་མིང་བྱང་རྙེད་པ་འདི།།
ཤོག་དཀར་ངོས་ལ་ཕབ་ན་བདག་སེམས་སྤྲོ།།
རྒྱལ་རབས་སོ་གསུམ་དེ་དང་བློན་ཆེན་གྱི།།
མཛད་འཕྲིན་མཐོང་བས་བདག་ལ་ང་རྒྱལ་འཕེལ།།
རྒྱལ་རབ་ཞེ་གཉིས་ཆོས་སྲིད་བྱུས་ཉེས་པའི།།
བརྟན་བརླིང་ཆབ་སྲིད་རླུང་ལ་བསྐུར་འདིས་སྐྱོ།།

རྩོམ་ཁུངས། ངེད་དྲ་བ།

དཔྱད་མཆན ཡོངས་སུ་གཟིགས།དཔྱད་མཆན།

མིང་མི་འགོད་པར་སྤེལ།