གཟིམས་པ་མེད་པའི་མཆོད་མེ། དབྱངས་གསལ་སོ་བཞིའི་མཛེས་སྡུག  RSSསྔོན་མངག

སློབ་གྲྭ་ཆུང་འབྲིང་གི་བསླབ་ཚན་གསར་པའི་སྐོར་བཤད་པ།༢

2012-05-02 10:54:00 དབུ་རུ་དོན་འདུར། ཀློག་གྲངས། མཆན ཡོད།

  ལྔ་པ།    གཞི་རིམ་ན་ཁྱིམ་བདག་གི་རྒྱབ་སྐྱོར་ཐོབ་པ་བྱ་གལ་འགངས་ཆེ།
  ཁྱིམ་བདག་སློབ་གསོ་ཞེས་པར་ཐད་ཀར་གོ་བ་བླངས་ན་ཕ་མ་ཚོས་རང་བུ་ཕྲུག་ལ་བརྒྱབ་པའི་སློབ་གསོའི་རྣམ་པ་ཞིག་ལ་ཟེར་ཡང་།  དེ་རིང་ཁོ་བོས་བཤད་རྒྱུའི་ནང་དོན་ནི་དེ་ལྟར་མིན་པར་ཁྱིམ་བདག་ཚོར་གཞུང་ནས་སྒྲིག་བཙུགས་བྱས་ཏེ་རྨོངས་བློ་སེལ་བའི་སློབ་གསོ་བྱ་རྒྱུ་དེ། བོད་ཀྱི་སློབ་གསོ་ཕྱོགས་ཡོངས་ནས་དར་རྒྱས་གོང་འཕེལ་འགྲོ་རྒྱུའི་སྔོན་འགྲོ་ཞིག་ཡིན་པར་བསམ་པས།  དེའི་དོན་དུ་གོང་འོག་ཚང་མས་དོ་སྣང་གནང་དགོས་འདུག་ཞེས་ཞུ་རྒྱུ་མ་ཟད་རྒྱུ་མཚན་དང་གནས་ལུགས་ཁ་ཤས་ཀྱང་གསལ་བཤད་བྱེད་རྒྱུའི་དགོས་པ་འདུག་བསམ་པ་བྱུང་།
  ༡ ཁྱིམ་བདག་ཚོས་སློབ་གསོར་འཛིན་པའི་ལྟ་ཚུལ།
    བོད་ཀྱི་ཞིང་འབྲོག་ས་ཁུལ་དུ་བྱིས་པ་སློབ་གྲྭར་གཏོང་བའི་རྣམ་འགྱུར་ཤིན་ཏུ་  ཞན་པ་དང་།   སྤྱི་དམངས་ཀྱི་བསམ་བློའི་བྱང་ཚད་ཧ་ཅང་སྐྱོ་བས།   བྱིས་པ་སློབ་གྲྭར་བཏང་ནས་ལས་བྱེད་པ་བྱེད་རྒྱུ་མ་བྱུང་ན།   ཕན་པ་མེད་པར་ལྟ་ཞིང་དགེ་རྒན་གྱིས་ངེས་པར་དུ་སློབ་གྲྭར་གཏོང་དགོས་ཟེར་ན། ལས་བྱེད་པ་ཆགས་
རྒྱུའི་འགན་ལེན་བྱ་དགོས་ཞེས་བསམ་ཡུལ་ལས་འདས་པའི་རེ་བ་འདོན་སྲིད། སློབ་གྲྭར་ བཏང་ནས་ཀྱང་དགེ་རྒན་གྱི་ཀུན་སྤྱོད་དང་།  ཤེས་བྱ་ཡོན་ཏན་གྱི་དོན་དུ་དྲག་    གཏམ་ཚིག་འགའ་ལབ་པར་ཕ་མ་ཚོས་དགེ་རྒན་དགྲ་བོར་བཟུང་ནས་སློབ་གྲྭའི་སྒོ་ འགྲམ་དུ་དགྲ་ཤ་ལེན་རྒྱུའི་སྒུག་སྡོད་བྱ་བའི་གནས་ཚུལ་ཡང་དོན་དངོས་ཡིན་པ་དང་།   ནང་གི་ལས་ཀ་ཆུང་ཙག་རྫི་བོ་ལྟ་བུར་འགྲོ་དགོས་ཚེ་བྱིས་པ་སློབ་གྲྭ་ནས་དགོངས་ཞུ་ཉིན་མང་ཞུ་བ་དང་ཉེས་པ་སོགས་ལ་ཞེད་སྣང་རྩ་བ་ནས་བྱེད་མི་སྲིད།   དེ་ལྟར་ཕ་མའི་རྨོངས་བློ་གཏུགས་པའི་ཡུལ་ལུང་ཁག་ལ་སློབ་ཁྲིད་སྤུས་ཚད་ཞེས་པ་ གླེང་ཐབས་ག་ལ་ཡོད།
 ༢   ཕ་མའི་རྨོངས་བློ་སེལ་དགོས་པའི་གལ་ཆེའི་རང་བཞིན།
 གོང་དུ་བཤད་པ་ལྟར་བོད་ཀྱི་མི་འབོར་མང་ཤོས་གནས་སའི་ཞིང་འབྲོག་ས་ ཁུལ་དུ་ཕ་མའི་སློབ་གསོའི་ལྟ་བ་ཡག་པོ་མ་བྱུང་བ་དེས།  སློབ་གསོའི་སྤུས་ཚད་ལ་ཐད་ ཀའི་ཤུགས་རྐྱེན་ངན་པ་ཐེབས་བཞིན་ཡོད་པ་དང་།   དེས་སྤྱི་དམངས་ཁྱོན་ཡོངས་ཀྱི་བསམ་བློའི་བྱང་ཚད་གོང་མཐོར་འགྲོ་དགོས་པའི་རྒྱལ་ཁབ་ཀྱི་སློབ་གསོའི་ དགོངས་དོན་ངོ་མ་ལེགས་གྲུབ་ཐུབ་ཀྱི་མེད།    ལྷག་པར་དུ་དོ་སྙོམས་སློབ་གསོའི་ དགོངས་དོན་ལྟར་གྲོང་ཁྱེར་དང་གྲོང་གསེབ་ཀྱི་བར་ཐག་ཉེ་རུ་བཏང་ནས་སྤྱི་ཡོངས་ཡར་རྒྱས་གཏོང་རྒྱུའི་དམིགས་ཡུལ་ཡང་དེ་བས་སྒྲུབ་ཐབས་ག་ལ་ ཡོད།  ཕ་མའི་ བརྒྱབ་སྐྱོར་ཡག་པོ་མེད་པའི་གནས་ཚུལ་དེ་ཤིན་ཏུ་རྒྱ་ཆེ་བས་དེས་དོན་དུ་བོད་ཀྱི་ སློབ་གསོའི་སྤུས་ཚད་ལ་གཞི་ཁྱོན་ཆེ་བའི་འགོག་རྐྱེན་ཐེབས་བཞིན་ཡོད་པ་དེ་གྲོང་ ཁྱེར་ཕ་མའི་བསམ་བློ་དང་ཡོངས་སུ་འགལ་བ་རེད།   གྲོང་ཁྱེར་ནང་དུ་ཕ་མ་ཚོས་  སློབ་གྲྭ་ཡག་ཉེས་ཀྱི་བྱིས་པའི་སློབ་སྦྱོང་དོན་དུ་རྩོད་ལེན་དྲག་པོ་བྱེད་པ་དང་།  གྲོང་  གསེབ་མང་ཆེ་བར་ཕ་མ་ཚོས་བྱིས་པ་སློབ་གྲྭར་གཏོང་མ་འདོད་པའི་ནོར་འཁྲུལ་ཅན་གྱི་ལྟ་བ་ཤུགས་ཆེན་ཡོད།     དེར་བརྟེན་ང་ཚོས་འགོག་རྐྱེན་ངོ་མ་དེ་ཕ་མའི་རྨོངས་བློ་ཡིན་པར་ངོས་འཛིན་བྱས་ན།  དེ་ལ་འགྱུར་བ་གཏོང་རྒྱུ་དེ་ཡང་བོད་ཀྱི་སློབ་ གསོ་རྗེས་ལུས་ཀྱི་རྣམ་པ་ལས་བསྐྱབ་རྒྱུའི་བརྒྱབ་དགོས་ངེས་ཀྱི་གོམ་པ་དང་པོ་ལྟ་བུར་མཐོང་གི་འདུག།
  ༣  ང་ཚོས་ཇི་ལྟར་བྱས་ཏེ་རྫོང་མཐུག་པའི་རྨོངས་བློར་འཐབ་དགོས།
   དགེ་རྒན་ནི་མང་ཚོགས་ཀྱི་ཁྲོད་དུ་ལྟ་སྟངས་ཤིན་ཏུ་ཞན་པའི།    ལས་བྱེད་པ་དཀྱུས་མ་ཞིག་ཡིན་པས་དེ་ལ་བྱིས་པ་ལས་བྱེད་པ་བཟོ་རྒྱུའི།  ནུས་པ་མེད་ལ་དགེ་རྒན་གྱི་སྐད་ཆར་ཆ་འཇོག་བྱེད་མཁན་དེ་བས་ཀྱང་ཤིན་ཏུ་ཉུང་བས།    ཕ་མའི་གཏིང་ཟབ་པའི་རྨོངས་བློ་སེལ་དགོས་ན་དགེ་རྒན་གཅིག་པུའི་ནུས་པས་འཇོན་པ་ཞིག་རྩ་བ་ནས་མ་རེད།  དགེ་རྒན་གྱིས་སློབ་མ་བསྡུ་བར་འགྲོ་སྐབས་ཞིང་འབྲོག་པའི་ཁྱིམ་ནས།   ཇ་ཐང་སླ་བོ་ཞིག་ཀྱང་གཏེར་མཁན་དཀོན་ཞིང་ཤང་གི་ལས་བྱེད་དང་།     སྨན་པ་ལྟ་བུ་གཤམ་བསྐྱོད་བྱས་ན་སྣེ་ལེན་གང་ཟབ་གནང་བ་ནི།  ཁོ་ཚོའི་གནས་སྐབས་ཀྱི་ལྟ་སྟངས་ཙམ་མིན་པར་སློབ་གསོ་ལ་འཛིན་པའི་རྣམ་འགྱུར་ཡ་ང་དགོས་པ་དེ་རེད།   དེས་ན་དགེ་རྒན་གྱིས་རང་ས་ཁུལ་གྱི་སློབ་མ་བསྡུ་བའི་ལས་ཀ་དེ། ལེགས་གྲུབ་བྱ་མི་ཐུབ་ལ་ཕ་མའི་སློབ་གསོར་འཛིན་པའི་ལྟ་ཚུལ་འགྱུར་ལྡོག་གཏོང་རྒྱུ་ནི་དེ་བས་ཀྱང་ཁག་པོ་མ་ཡིན་ནམ།    ངའི་ལྟ་ཚུལ་ལྟར་བྱས་ན་རྫོང་སློབ་གསོ་ཚན་པ་དང་།  གྲོང་ཁྱེར་སློབ་གསོ་ཐིང་། ཤང་མི་དམངས་སྲིད་གཞུང་དང་།  རྫོང་མི་དམངས་སྲིང་གཞུང་སོགས་འབྲེལ་ཡོད་སྲིད་འཛིན་ཚན་པས་དོ་སྣང་དམ་འཛིན་གནང་སྟེ།   མི་སྣ་ཆེད་མངག་གིས་ཕ་མ་ཚོར་མིའི་བྱང་ཚད་ཡར་རྒྱས་མ་སོང་ན་དུས་རབས་ཀྱི་རྗེས་སུ་ལུས་པ་དང་།  གནས་སྐབས་ཀྱི་རྒྱུ་ནོར་ཡག་པོ་ཡོད་ཀྱང་བསམ་ བློའི་བྱང་ཚད་དུས་རབས་ཀྱི་རྗེས་སུ་ལུས་ན། རིམ་བཞིན་རྗེས་ལུས་ཀྱི་གནས་ལས་ཐར་མི་ཐུབ་པ་ནི།  བཤད་མི་དགོས་པས་ཕ་མ་ཚོས།རང་བུ་ཕྲུག་སློབ་གྲྭར་གཏོང་དགོས་པ་མ་ཟད་སློབ་སྦྱོང་ཐོག་རེ་བ་ནན་པོ་འདོན་དགོས་པ་དང་།  དགེ་རྒན་ནི་ཐད་ཀར་བཤད་ན།  རང་གི་བྱིས་པའི་མ་རིག་མུན་པ་སེལ་མཁན་གྱི་བཀའ་དྲིན་ཆེ་བའི་སློབ་དཔོན་ཡིན་པས། དེ་ལ་སློབ་མས་གུས་བཀུར་ཞུ་དགོས་པ་མ་ཟད།  ཕ་མ་ཚོས་ཀྱང་གུས་བཀུར་བྱ་དགོས་ཤིང་།སློབ་སྦྱོང་ཆེད་དུ་དགེ་རྒན་དང་ཕ་མ་ཟུང་དུ་འབྲེལ་ནས་ཐབས་ཤེས་སྣ་ཚོགས་སྤྱད་དེ།  བྱིས་པའི་མ་འོངས་པར་རིག་གནས་ཤེས་བྱ་ལྡན་ལ།  བསམ་བློ་ཀུན་སྤྱོད་བཟང་བའི་མི་རབས་ཤིག་གི་གྲས་སུ།ཚུད་པ་བྱ་དགོས་ཞེས་པའི་དོན་སྙིང་ལྡན་པའི།  སློབ་གསོ་རྒྱག་མཁན་ལས་དོན་ཚོགས་ཆུང་ཆེད་དུ་བཏང་ན། གོང་རིམ་ནས་ཀྱང་དེའི་དོན་དུ་དངོས་སུ་གཙིགས་ཆེན་གནང་གི་འདུག་བསམ་ནས།ཕ་མ་ཚོས་བྱིས་པ་སློབ་གྲྭར་གཏོང་རྒྱུ་དང་ཤེས་བྱ་ཡོན་ཏན་དགོས་པ། དགེ་རྒན་ལ་དགོས་ངེས་ཀྱི་ལྟ་སྟངས་ཡོག་པོ་ཆགས་རྒྱུར།  ཕན་པ་ཤིན་ནས་ཆེ་བར་བསམ།
   ༤   མཇུག་གཏམ།  
  གོང་གསལ་གནས་ཚུལ་དེར་ལམ་ཙམ་བལྟས་ན་དེ་ལྟ་བུའི་གལ་འགངས་ཆེ་བར་མ་མཐོང་རུང་ཞིབ་ཏུ་བསམ་གཞིགས་བྱས་ན།  དེ་ནི་བོད་ཀྱི་སློབ་གསོ་ཁྱོན་ཡོངས་ནས་ལྟོས་བཅས་ཀྱི་རྗེས་སུ་ལུས་པའི་རྒྱུ་རྐྱེན་དུ་མཐོང་བར་ངེས། གནད་དོན་དེར་ད་བར་སུས་ཀྱང་དོ་སྣང་མ་བྱུང་བའམ།  སྣང་ཆུང་ཤོར་བ་ཙམ་ལས་དོན་དུ་གཞི་རིམ་ཀྱི་ས་ཆ་མང་པོར།    ལབ་གླེང་སྣ་ཚོགས་སྔ་ས་ནས་འཁྱབ་བསྡད་ཡོད།  དེར་བརྟེན་ཁྱིམ་བདག་གི་རྨོངས་བློ་སེལ་བའི།   ལས་དོན་མི་སྣ་ཆེད་དུ་མངག་ནས་སློབ་གསོ་སྐྱོན་པ་ཡིན་ན།    གོང་རིམ་ནས་སློབ་གསོར་མཐོང་ཆེན་གནང་བའི།    དོན་དངོས་མང་ཚོགས་ཚོས་ཤེས་རྟོགས་ཐུབ་ལ་སློབ་གྲྭར་བཏང་ནས།  ཤེས་བྱ་ཡོན་ཏན་སྦྱོང་རྒྱུའི་གལ་ཆེའི་རང་བཞིན་དེ་ཡང་།     མག་མོག་རབ་རིབ་ཙམ་མིན་པར་གསལ་པོ་ཤེས་ཏེ།   བྱིས་པ་སློབ་གྲྭར་གཏོང་བའི་ཧུར་བརྩོན་རང་བཞིན་སྐུལ་འདེད་ཐུབ་པ་དང་།  དགེ་རྒན་ལ་འཛིན་པའི་ལྟ་སྟངས་སྐྱུག་བྲོ་བོ་དེ་ཚོ་མེད་པར་འགྱུར་ནས་སློབ་གསོའི་དོན་སྙིང་རྟོགས་ཏེ།    ཡ་ང་དགོས་པའི་རྣམ་འགྱུར་ངན་པ་རིམ་བཞིན་འགྱུར་བ་འགྲོ་སྲིད་སྙམ།
  དྲུག་པ།    སློབ་ཁྲིད་སྔོན་དུ་དགེ་རྒན་གྱིས་ངེས་པར་དུ་བསྒྲུབ་དགོས་པའི་བྱ་བ་གཉིས།
  ༡ དགེ་རྒན་གྱིས་སློབ་ཁྲིད་འཆར་འགོད་ཡག་པོ་ཞིག་བྱེད་དགོས།
  སློབ་ཚན་ཞིག་ཐབས་ཤེས་གང་འདྲ་སྤྱད་དེ་ཁྲིད་རྒྱུའི་ཐད་དགེ་རྒན་གྱིས་སྔོན་ཚུད་ནས་གྲ་སྒྲིག་བྱེད་དགོས་པ་མ་ཟད་ཁྲིད་ཟིན་ཐོག་འཆར་འགོད་བྱ་རྒྱུ་ནི་དགེ་རྒན་   གྱིས་བཞག་ན་མི་འགྲིག་པའི་དོན་ཞིག་ཡིན་ཀྱང་སློབ་ཁྲིད་འཆར་འགོད་བྱེད་རྒྱུ་དེ་ སློབ་ཁྲིད་དཔྱད་གཞི་བཤུ་འབྲི་བྱས་ན་འགྲིག་པར་ལྟ་བ་ནི་ནོར་འཁྲུལ་ཆེན་པོ་ཞིག་ ཡིན་པར་བསམ་པས་བོད་ཡིག་དགེ་རྒན་ཚོས་ངེས་པར་དུ་སློབ་ཚན་དེ་དཔྱད་ གཞིའི་ནང་བཏོན་པའི་རེ་བ་ཕུད་རང་གིས་ཐབས་ཤེས་གསར་པ་གང་ཞིག་བེད་ སྤྱོད་བྱ་ དགོས་པ་དང་རོལ་རྩེད་ཅི་ཞིག་བཀོད་སྒྲིག་བྱས་ན་འཚམས་པ།  སློབ་མ་ཚོར་བསམ་སྤྱོད་འགུལ་སྤྱོད་བྱེད་པའི་ཚད་གཞི་བརྒྱ་ཆ་བདུན་ཅུ་ཡན་ཟིན་པའི་སློབ་ཚན་ཞིག་སྔོན་ཚུད་ནས་གྲ་སྒྲིག་ཚད་ལྡན་ཡོང་བ་བྱ་རྒྱུ་དེ་སློབ་ཁྲིད་འཆར་འགོད་ཀྱི་རེ་བ་ཡིན།  དེས་ན་དཔྱད་གཞི་བཤུ་འབྲི་བྱེད་པ་ནི་དགོས་མེད་ལས་རྙོག་སྒྲུབ་པ་མ་ཟད་དེང་རབས་སློབ་ཁྲིད་ཀྱི་རེ་བ་དང་འཚམས་པའི་སློབ་ཚན་འཆར་འགོད་བྱ་རྒྱུར་འགོག་རྐྱེན་བཟོས་ཡོད་པར་བསམ་པས་ང་ཚོས་རིག་ཚན་གཞན་ལྟར་སློབ་ཁྲིད་སྔོན་གྱི་གྲ་སྒྲིག་དེ་ཚད་ལྡན་ཞིག་ཡོང་རྒྱུར་ནུས་པ་ཆེན་པ་ འདོན་དགོས་སོ།དཔེར་ན།  ཡུམ་བུ་བླ་མཁར་ཞེས་པའི་སློབ་ཚན་དེར་འཆར་འགོད་བྱེད་སྐབས་སློབ་ཚན་གྱི་བརྒྱུད་རིམ་ལྟར་བསྐྱར་སྦྱོང་དང་གསར་འདྲེན། གསར་ཁྲིད།  སྲ་བརྟན།   སྦྱོང་ཚན་བཀོད་སྒྲིག་སོགས་གོམ་པ་རིམ་འགྲོས་ཀྱིས་འཆར་འགོད་བྱེད་སྟངས་ གཅིག་པ་ཡིན་རུང་་དེའི་སྒྲིག་གཞིའི་ཐད་སློབ་མ་གཙོ་བཟུང་གི་བསམ་བློ་གཏོང་རྒྱུ་ཡོད་པ་དང་ལག་པ་འགུལ་རྒྱུ་ཡོད་པ།སློབ་མ་ཕན་ཚུན་གྲོས་བསྡུར་བྱེད་རྒྱུ་ཡོད་པ།  སློབ་མ་དང་དགེ་རྒན་བར་ལ་སྐད་ཆ་ཤོད་རེས་ཡོད་པའི་སློབ་ཁྲིད་བྱེད་སྒོ་སྣ་ཚོགས་བཀོད་སྒྲིག་བྱ་དགོས་ཤིང་མདོར་ན་སློབ་མའི་ལུས་སེམས་འགུལ་བའི་གོ་སྐབས་མང་ཙམ་ཐོབ་པའི་འཆར་ཟིན་ནི་སློབ་ཁྲིད་གསར་པའི་ལམ་ལ་འཇུག་པའི་སྔོན་འགྲོ་ཡིན་ནོ།    
  ༢  དགེ་རྒན་གྱིས་སློབ་ཁྲིད་རྒྱུ་ཆ་མཐུད་ཚང་ཞིག་འཚོལ་བསྡུ་བྱེད་དགོས།
  འཆར་འགོད་བཟང་པོ་ཞིག་བྱས་ཀྱང་སློབ་ཁྲིད་ནང་དོན་ལ་མཁོ་བའི་རྒྱུ་ཆ་འདང་ངེས་ཤིག་མེད་ན་སློབ་ཚན་ལེགས་སྒྲུབ་ལྡན་པ་ནི་ག་ལ་ཁྲིད་ཐུབ།   དེར་བརྟེན་དགེ་རྒན་གྱིས་སློབ་ཚན་མ་ཚུགས་གོང་ནས་སློབ་ཚན་ལ་མཁོ་བའི་རྒྱུ་ཆ་སྣ་ཚོགས་འཚོལ་བསྡུ་གྲ་སྒྲིག་བྱ་དགོས་ཤིང་བོད་ཡིག་དགེ་རྒན་གྱིས་ཀྱང་དཔྱད་གཞིའི་ཡིག་ཆ་དང་དངོས་གཟུགས་དཔེ་གཞི།    དོན་དངོས་སློབ་ཚན་ལས་བཤད་པའི་རྒྱུ་ཆ་སྣ་ཚོགས་གྲ་སྒྲིག་བྱ་དགོས་ཤིང་སློབ་ཚན་སྐབས་གང་ལ་དེ་ འཚམས་ཀྱི་མཁོ་འདོན་བྱེད་རྒྱུ་མ་འཆུག་པ་ཞིག་དགོས་པ་རེད།དཔེར་ན།  གཙུག་ལག་ཁང་རྣམ་གཉིས་ཞེས་པའི་སློབ་ཚན་ལྟ་བུར་མཚོན་ན་ པར་རིས་དང་དཔྱད་གཞིའི་ཡིག་ཆ།    ནང་དོན་གོ་དཀའ་བའི་མིང་ཚིག་ལ་མཆན་འགྲེལ་སོགས་སྔ་ས་ནས་གྲ་སྒྲིག་བྱས་ཏེ་སློབ་ཚན་སྐབས་གང་དགོས་འདོན་ཆོག་དགོས་ཀྱི་རེད།  འོན་ཀྱང་བོད་ཡིག་དཔེ་དེབ་ཀྱི་དྲ་བའི་རྒྱུ་ཆ་དཀོན་པ་དང་བཟོ་བསྡུ་ཉར་ཚགས་མེད་པས་ཡོ་ཆས་སྣ་ཚོགས་དཀོན་པ།   དཔྱད་གཞི་འཚོལ་བསྡུ་ཁག་པ་སོགས་སློབ་ཁྲིད་ཁོ་ནར་དམིགས་པའི་རྒྱུ་ཆ་ཧ་ཅང་དཀོན་པས་དཀའ་ངལ་ཆེན་པོ་ འདུག།   དེ་ནི་རང་ཉིད་ཚུད་པའི་བོད་ཡིག་དགེ་རྒན་གྱིས་རྒྱུ་ཆ་འཚོལ་བསྡུ་སྤེལ་ རེས་དཀོན་པ་དང་དྲ་བ་ལ་བཞུགས་ནས་རྒྱུ་ཆ་སྒྲིག་འཇུག་མ་བྱས་པ་སོགས་ཀྱིས་ད་ལྟའི་དཀའ་ངལ་འདི་བྱུང་བར་བསམ་ནས་ད་ནི་ང་ཚོ་བོད་ཡིག་ དགེ་རྒན་ཡིན་པ་  ཚང་མས་བོད་ཡིག་སློབ་ཁྲིད་ཀྱི་རྒྱུ་ཆ་གསོག་འཇོག་སྤེལ་རེས་དང་དྲ་བ་ལ་རྒྱུ་ཆ་སྣ་ མང་སྒྲིག་འཇུག་བྱ་དགོས་པ་ནི་གལ་ཧ་ཅང་ཆེ་བར་བསམ།   ཁོ་བོས་དྲ་ཐོག་ནས་བོད་ཡིག་རྩིས་རིག་དྲ་བ་ཞིག་གསར་བཟོ་བྱས་པ་མཐོང་ཡང་དེའི་ནང་ཞུགས་ཏེ་རྒྱུ་ཆ་མཁོ་འདོན་བྱ་མཁན་ཤིན་ཏུ་ཉུང་བ་ཤེས་རྟོགས་བྱུང་ རྗེས་ཡིད་ཧ་ཅང་སྐྱོ་བོ་བྱུང་། དྲ་བ་གསར་བཟོ་བྱ་མཁན་གྱི་སྐུལ་སློང་ཤིན་ཏུ་ལེགས་ཀྱང་བེད་སྤྱོད་བྱེད་མཁན་དཀོན་པ་ནི་ངོ་མ་སྐྱོ་དགོས་པ་ཞིག་མིན་ནམ་སྙམ།     དེ་དང་ཕྱོགས་མཚུངས་བོད་ཡིག་དྲ་བ་མང་པོ་གསར་དུ་ཐོན་ཡོད་ཀྱང་བོད་སྐད་ཡིག་སློབ་ཁྲིད་རྒྱུ་ཆ་དཀོན་པ་ནི་ང་ཚོ་སློབ་ཁྲིད་དགེ་རྒན་མཁོ་ནས་བརྩིགས་ཆེན་མ་གནང་བའི་སྐྱོན་དུ་མཐོང་ནས་ ཞོར་དུ་སྐུལ་སློང་གི་ཚུལ་དུ་འདི་ལྟར་ཐལ།
  བདུན་པ།  དགེ་རྒན་གྱིས་ངེས་པར་དུ་བཞག་ན་མི་འགྲིག་པའི་ལས་ཀ་གཉིས།   
  ༡ དགེ་རྒན་གྱིས་སློབ་གསོ་སློབ་ཁྲིད་ལ་ཞིབ་འཇུག་དཔྱད་རྩོམ་འབྲི་དགོས།
བོད་ཡིག་སློབ་ཁྲིད་ཀྱི་དཔྱད་གཞི་ཉུང་བ་ནི་བོད་ཡིག་དགེ་རྒན་གྱི་ཆུ་ཚད་སྐྱོ་བས་མ་རེད་ལ་བོད་སྐད་ཡིག་སློབ་ཁྲིད་ལ་འཇུག་མཁན་ཉུང་བས་དེ་བས་ཀྱང་མ་རེད།
བོད་སྐད་ཡིག་དགེ་རྒན་གྱི་ཁྲོད་དུ་སློབ་ཁྲིད་ལ་མཁས་པའི་དགེ་རྒན་མང་པོ་ཡོད་ ཅིང་མཁྱེན་རྒྱ་ལྷག་པར་ཆེ་བའི་བཤེས་གཉེན་དེ་བས་ཀྱང་ལྷག་ཏུ་མང་།    འོན་ཀྱང་མཐུན་མོང་ལ་ཡོད་པའི་གོམས་གཤིས་ངན་པ་ཞིག་ནི་རྩོམ་ཡིག་མ་བྲིས་ པའི་སྐྱོན་དེ་ རེད།  འབྲི་མཁན་རེ་ཟུང་ཡོད་པའི་དབང་དུ་བཏང་ཡང་དེ་ནི་གོ་མིང་ཐོབ་ཐང་གི་ ཆེད་དུ་ཡིན་པ་ལས་དོན་དུ་སློབ་གསོ་སློབ་ཁྲིད་ཀྱི་ཆེད་དུ་མིན་པས་འཕྲལ་མངོན་ སླ་བཅོས་ལས་ཕན་པ་ཡོད་པ་ཧ་ལམ་རེ་ཟུང་རེད།  བོད་སྐད་ཡིག་སློབ་ཁྲིད་དེ་ཁྱོན་ཡོངས་ནས་གོང་འཕེལ་འགྲོ་དགོས་ན་བོད་ཡིག་དགེ་རྒན་ གྱིས་སློབ་ཁྲིད་དངོས་ལ་ བཞུགས་པའི་ཉམས་མྱོང་གླེང་དགོས་ཤིང་སློབ་ཁྲིད་ཁྲོད་དུ་སིམ་པའི་དགེ་སྐྱོན་སྣ་ ཚོགས་ཡོ་བསྲང་སྤེལ་རེས་བྱ་རྒྱུ་ནི་གལ་ཤིན་ཏུ་ཆེ་བས་བོད་ཡིག་དགེ་རྒན་གྱིས་རྩོམ་ཡིག་འབྲི་རྒྱུ་ནི་ཆད་ན་མི་འགྲིག་པའི་བོད་ཡིག་སློབ་ ཁྲིད་ཀྱི་དགོས་མཁོ་ཆེན་པོ་ཞིག་ཡིན་ནོ།།
 
 

རྩོམ་ཁུངས། ངེད་དྲ་བ།

དཔྱད་མཆན ཡོངས་སུ་གཟིགས།དཔྱད་མཆན།

མིང་མི་འགོད་པར་སྤེལ།