ཟླ་འོག་གི་འཁྲེང་སེམས།
ཟླ་འོག་སྐྱ་མིའི་གྲིབ་མ་འགུལ།།
སྒོ་ཁྱིའི་ཟུག་སྐད་དབྱིངས་ལ་སྦྲིངས།།
དངངས་ཤིང་སེམས་པས་གོང་ཁ་སྒུལ།།
རྒྱང་རིང་མཛའ་བོ་ཡིན་ནམ་སྙམ།།
ཉིན་མོའི་ཕྱུགས་རྫི་མིག་ན་འདུར།།
མཚན་གྱི་ཆུང་གཅིག་ཡིད་ན་འདུར།།
སྒོ་ཁྱི་རྒྱ་བོའི་ངུ་རྒྱངས་ལས།།
རྟོག་ཡན་རྨི་ལམ་རུམ་ལ་བསུས།།
ཟླ་འོད་ཟད་པས་མེད་དམ་སྙམ།།
སྐྱ་རེངས་བཀྱགས་པས་ཡོད་དམ་སྙམ།།
ཕྲག་པ་སྒུལ་བའི་རྨི་ལམ་གྱིས།།
ཞོགས་པའི་ཉི་ཟེར་འཕོངས་ལ་བསུས།།
དྲན་གདུང་རུམ་ནས་གང་ལ་ཕྱོ།།
རེ་སྒུག་མདུད་པ་སུ་ཡིས་བཀྲོལ།།
རྒྱང་གིས་གཏུབས་པའི་བརྩེ་བ་ཟུང་།།
གསོན་མིན་ཤི་བའི་བརྡ་མ་འཕྲོད།།
ལས་འཕྲོས་སྐ་རགས་ལྷོད་དམ་ཅི།།
ཐལ་སྦྱར་སོར་བཅུ་འཁུམ་མམ་ཅི།།
མི་སེམས་གསོད་པའི་འཁྲེན་པ་ཡིས།།
ལུས་དང་སྐྲ་ཡི་ལན་བུ་གཏར།།
དང་བོའི་དགའ་དུང་དྲོ་བ་ལ།།
བར་མའི་བརྩེ་སེམས་འཇམ་པ་ལ།།
མ་བསམ་ཡུལ་མཁར་སོ་སོ་བའི།།
ཐ་མའི་མནར་གཅོད་ལྕི་བ་ལ།།
༢༠༡༢།༠༩།༡༢
རྩོམ་ཁུངས། ངེད་དྲ་བ།