ལྷུན་པོ་གངས་རིའི་དབུ་རྩེ་མཁའ་ལ་བསྙེགས།།
སེང་གེ་དཀར་མོའི་རྩལ་ཆེན་འདེཊ་པའི་གཞིས།།
ཕ་ཡུལ་བསིལ་ལྡན་རི་བོའི་འདས་དོན་དྲན།།
དྲན་པའི་གཞས་ཆུང་སེམས་ཀྱི་འདུན་པ་ཡིན།།

བྱམས་སེམས་བརྩེ་བ་ལྷན་སྐྱེས་མི་ཡི་གཤིས།།
ཡ་རབས་སྤྱོད་པ་རིགས་བཟང་ལྷ་ཡི་རྒྱུད།།
གདོང་དྲུག་རུས་ཀྱི་མཆེད་ཁུངས་ཡབ་ཡུམ་དྲན།།
དྲན་པའི་གཞས་ཆུང་སེམས་ཀྱི་འདུན་པ་ཡིན།།

པོ་ཏ་ལ་རིའི་དབུ་འཕང་དགུང་ལས་མཐོ།།
རྒྱ་ཕིབས་སེར་བོའི་གསེར་འོད་གླིང་བཞིར་འཕྲོས།།
མི་དབང་སྲོང་བཙན་རྒྱལ་པོའི་མཛད་འཕྲིན་དྲན།།
དྲན་པའི་གཞས་ཆུང་སེམས་ཀྱི་འདུན་པ་ཡིན།།

བསྟན་པ་རིན་ཆེན་ཆོས་ཀྱི་སྒོ་མོ་ཕྱེས།།
བཅུ་ཕྲག་རིག་པའི་བང་མཛོད་བོད་དུ་འབྱེད།།
མེས་དབོན་དམ་པའི་བཀའ་དྲིན་སྙིང་ནས་དྲན།
དྲན་པའི་གཞས་ཆུང་སེམས་ཀྱི་འདུན་པ་ཡིན།།

དྭངས་གཙང་ས་གཞི་ལྷ་ཡི་ཞིང་ཁམས་ཆེ།།
གངས་ཆབ་བསིལ་མ་ལྷང་ལྷང་འབབ་པའི་ཡུལ།།
ཁ་བ་གངས་ཅན་རང་གི་ཕ་ཡུལ་དྲན།།
དྲན་པའི་གཞས་ཆུང་སེམས་ཀྱི་འདུན་པ་ཡིན།།
 

རྩོམ་ཁུངས། ངེད་དྲ་བ།