གསལ་སྟོང་ལྷུན་གྲུབ་གཞི་དབྱིངས་དག་པའི་མཁའ།།
ཡེ་ནས་དྭངས་པ་ཆེན་པོའི་མེ་ལོང་ངོར།།
རབ་གསལ་རྗེན་པར་གཟུགས་པའི་རང་བཞིན་ལ།།
སྣང་བ་མ་འགག་ཀློང་ལས་ཕྱག་འཚལ་ལོ།།
        
བདེན་མེད་འཁོར་བར་འཕྱན་པའི་ངན་གཡོ་བློས།།
སྣང་གྲུབ་མེད་ལུགས་དོན་ལ་གལ་འཛོལ་འཇོག།
ཡངས་པ་མཐའ་བྲལ་ཟབ་མོའི་དཀྱིལ་དབུས་སུ།།
འདུར་སྣང་ཆོས་ཀྱི་ཕྱོགས་ལ་ཞེན་པའི་ལྟ།།

བདག་འཛིན་ངར་ཆེན་སྟག་མོའི་མཆེ་སྡེར་གྱིས།།
ཡིན་ལུགས་དོན་ལ་ཕྱང་ཆད་བཙན་གྱི་དགྲད།།
འཕྲོ་རྒོད་ཡིད་ཀྱི་མཁའ་དབྱིངས་དོག་པོའི་བློའི།།
ཁོངས་ཡངས་སྣོད་དུ་ཕྱེ་བའི་རྟོག་པ་བསླུས།།

བྱམས་སྡང་ཞེ་ལ་མི་སྙོམས་བརྗོད་བྲལ་བློ།
ཏིང་འཛིན་ཡིད་ལ་མི་རྟོག་སྐྱེ་ཤིའི་གྲོང་།།
སྔ་ཕྱི་འགྱུར་བག་རྒོད་པའི་གཉིས་སྣང་ཆོས།།
མ་གྲུབ་ཕྱི་རུ་ཐལ་ཅེས་ཁོ་བོས་བཤད།།
            
མཁའ་ཁྱབ་སྐྱེ་འགྲོར་བྲོད་པའི་གཞི་དག་པ།།
འཚོལ་ཕྱིར་སྤྲོས་བྲལ་ཡངས་པའི་ཀློང་ཆེན་ནས།།
ངེས་དོན་རིག་པའི་རྒྱལ་སར་སྙེག་བསམ་པ།།
མི་འདྲེད་ཤོང་ཡངས་ཐབས་ཀྱི་དམ་ཚིག་ལགས།།

 
མི་འཕོ་རང་བཞིན་ཡེ་ཀློང་འདིར་མཆིས་པའི།།
མི་འགག་རྒྱུ་མའི་སྣང་ངོ་སྟོང་གཟུགས་ལས།།
མི་འཇིགས་རྩལ་དུ་བརྗོད་པའི་མཚར་ཉམས་ལ།།
མི་རྟག་འཕྲུལ་དུ་སོམས་ཤིག་གང་སྣང་རིགས།།

 
དོན་དམ་རིག་པའི་གད་རྒྱངས་བསྒྲགས་པའི་ཚེ།།
ཕྱོགས་རྫོགས་མཁའ་ལམ་རྒྱུ་སྐར་བྱེ་བའི་རྫོང་།།
ས་ཆེན་ཕང་བར་བཏབ་པའི་སྣང་བ་སྟེ།།
མ་འགག་ཆེན་མོར་འཁྲུལ་འདི་བློ་ལུས་བྱུང་།།
               
མཁྲེགས་འཛིན་འུར་རྡོ་ནག་པོས་རང་གི་མགོ།།
འགེམ་པའི་སྤྱོམ་པར་སྨྲ་བའི་བབ་ཅོལ་ཆོས།།
ཆད་ལྟའི་བློ་རུ་བདོག་པའི་འདུར་སྣང་གཟུགས།།
ཕྲ་རགས་རྟོལ་བའི་སྤྱི་ཅེར་རྒན་པོ་མཚར།།
                   
སྲིད་པར་བརྐམ་པའི་བག་ཆགས་དུག་གི་ཚེར།།
རེགས་ན་མི་བཟོད་ཕྱིས་སུ་མི་བཏུབ་པའི།།
འདི་ལ་སྤྱོ་བའི་སྒོ་ནས་བསྙད་གྱུར་གྱང་།།
ཡངས་དོག་གཉིས་ཀྱི་ངོས་སུ་འཐིམ་ནས་འགྲོ།།
              
སྲ་འཐས་རྒྱུད་གྱོང་བརླན་པའི་གཉིས་གྲོལ་ལམ།།
བཙལ་ན་མི་རྙེད་འགྲོ་ན་མི་རིང་ཞེས།།
ཁས་ཆེར་སྨྲ་བའི་བདག་དེ་འདིར་གནས་ཀྱང་།།
གྲོག་རོང་འཇིངས་སུ་བྱིངས་པ་ཁྱོད་མ་མཐོང་།།
 
ཉམས་སྣང་དབྱིངས་སུ་བཏེག་ནས་བླངས་པའི་གླུ།།
འཁོར་བའི་གྲོང་ཚོ་བསྒུལ་བའི་རྟོག་འཕྲུལ་ཡིན།།
སྣང་ཚོགས་རིགས་སུ་ཞོག་ལ་ཉན་པར་གྱིས།།
འཛོལ་འཁྲུལ་རྨི་ལམ་དཀྲོག་པའི་རོལ་དབྱངས་ཡིན།།

                                               2012   5    6
 

རྩོམ་ཁུངས། ངེད་དྲ་བ།