བསྡུས་གཟུགས།
 
དུབ་པའི་ངལ་བས་ཡོངས་སུ་དཀྲོགས་པ་ཡི།།
རྐང་བའི་འདེགས་འཇོག་ཡོངས་སུ་བཟི་གྱུར་ཏེ།།
གཡས་བརྐྱངས་གཡོན་བསྐུམས་སིལ་གདུབ་སྒྲ་དང་བཅས།།
དཀར་དམར་པད་གདན་གནོན་པའི་ཁུར་དུ་སྦྱིན།།
 
ཟགས་པའི་སེམས་ཀྱི་རྩེ་མོ་གཡོ་བའི་བརྡ།།
ལག་པའི་སོར་མོ་གཡོ་བའི་རྣམ་པ་ཡིས།།
ཟགས་པ་དང་བྲལ་ཁྱེད་སྐུར་མངོན་དད་ན།།
བརྩེ་བའི་སྤྱན་རས་གཟིགས་པ་མ་ལྷོད་ཨང་།།
 
བདེན་པའི་རི་བོའི་ཟོམ་ལས་སྐྱེས་པ་ཡི།།
རྟེན་འབྱུང་འགྲམ་ཆང་གིས་ཕྱེས་ཨུཏྤལ་བསྣམས།།
ཟགས་མེད་བདེ་བའི་ལང་ཚོའི་མུ་ཏི་ཀ།
གློ་བ་དཀར་པོའི་གཤོངས་ལས་སྨིན་པར་རེ།།
 
མ་བཅིངས་སིལ་བུར་ཐོར་བའི་སྐྲ་ལོ་ཡིས།།
སྲིད་པའི་མཛེས་སྡུག་མཐའ་དག་བསྡུས་པའི་དཔལ།།
ཡང་དག་རྒྱལ་བ་ཀུན་གྱིས་བརྔུབས་པའི་ཚེ།།
ཐར་བའི་རྒྱལ་ཡུམ་ཆེན་མོར་ཁྱེད་གཤེགས་སོ།།
 
           བཀླགས་མི་ཚར་བའི་དཔེ་དེབ།
 
གཡོ་བའི་སེམས་ཀྱིས་པད་ཁ་ཕྱེས་མ་ཐག།
གདོང་གི་མེ་ལོང་བཀལ་བའི་ཉི་ཟེར་གྱིས།།
 ཡོན་པོའི་མིག་གིས་སྐར་མ་འཐུ་བཞིན་དུ།།
ཤེལ་གྱི་བུང་བ་བློ་ཡི་བཙོན་དུ་བཟུང་།།
 
ཚངས་དབྱངས་རྒྱ་མཚོའི་གྲེ་བ་རལ་བའི་ཤུལ།།
མཁའ་འགྲོའི་གླུ་ཡི་མུ་ཏིག་ཐོར་བའི་གཤོངས།།
རབ་འབྱམས་རྒྱལ་བའི་གསང་མིག་གཡོར་བའི་ས།།
ལན་གཅིག་བརྙེས་པའི་མི་ཚེ་གཙང་བོར་འདྲེས།།
 
        དེ་རིང་སྙན་ངག་གི་ཉིན་མོ།
 
མིག་ཟུང་གཡོ་བའི་མཛེས་སྡུག་གིས།།
འཇིག་རྟེན་ཡོངས་སུ་བཅིངས་པ་ན།།
ཁྱེད་ཀྱི་སྨྲ་བ་མ་ལུས་པ།།
བ་སྤུའི་ཟོམ་ལས་ཕྱི་རུ་ཕྱུངས།།
 
ཀྱེ་མ་བདག་གི་མདུན་ངོས་སུ།།
ནམ་མཁའི་མིག་ཆུ་ཐོར་བ་བཞིན།།
སྐར་མདའ་རེ་རེ་ལྟུང་བའི་དུས།།
སེམས་ཀྱི་གཙང་པོ་གང་དུ་བཞུར།།
 
སུ་ཞིག་སྦྲུལ་གྱི་ཐག་པ་ལྟར།།
སྙིང་གི་དྲུང་ནས་ཕུད་པའི་ཚེ།།
ཨེ་མ་མ་ལ་འཁོར་བའི་མགྲོན།།
བདག་གི་ཡིད་འདི་གློ་བུར་འདར།།
 

རྩོམ་ཁུངས། ངེད་དྲ་བ།