སྔ་རབས་མེས་པོས་གནང་བའི་རིག་གཞུང་དང་།།
ཕ་སྐད་བོར་བའི་ཕངས་སེམས་དྲག་པོ་འདི།།
ལུས་པོ་ཐང་དཀར་རྒོད་པོའི་ཟས་སུ་སྤྱད།།
རུས་རྐང་ས་རྡོར་འཐིམ་ཡང་ཉམས་མི་སྲིད།།
           
བརྒྱ་ཕྲག་ཉག་མ་འགའ་ཡི་སྔ་རོལ་དུ།།
སྔ་རབས་མེས་པོས་གནང་བའི་རིག་གཞུང་དང་།
ཕ་སྐད་གཙང་མའི་དྲི་བཟང་མ་ཡལ་བར།།
ལ་རྒྱའི་དར་ཆེན་ལྷབ་ལྷུབ་མཁའ་ན་གཡོ།།
           
འོན་ཀྱང་བཟློག་ཏུ་མེད་པའི་ལས་ཤིག་གམ།།
ཡང་ན་འཕྲད་པའི་རྐྱེན་ངན་གང་རུང་གིས།།
རིག་གནས་མཚོ་ཆེན་བྱེ་གླིང་ཁྲོད་དུ་ནུབ།།
ཕ་སྐད་གཙང་པོའི་བཞུར་རྒྱུན་གཏན་ཏུ་ཆད།།
           
མེས་པོའི་གྱོན་ཆས་ཞྭ་གོས་ལྷམ་སོགས་ཉམས།།
ཚ་བོའི་འགྲོ་འདུག་སྤྱོད་ལམ་གཞན་ལ་འདྲེས།།
མི་རབས་རྗེས་མར་དབང་བའི་ཤུལ་ནོམ་རྣམས།།
ད་ལྟ་ལྷ་སྒྲུང་ཙམ་གྱི་སྣང་བ་སྟེར།།
           
དེའི་ཕྱིར་བླུན་རྨོངས་འགའ་ཞིག་རིགས་རུས་ཞེས།།
དྲིས་ན་ངེས་པ་མེད་ཅེས་སྨྲ་བ་མཆིས།།
ཤེས་རློམ་ཁ་ཅིག་རིགས་རུས་གཞན་ཞེས་སྨྲ།།
ལ་ལ་དར་ལྕོག་ཇི་བཞིན་རླུང་གིས་བསྐྱོད།།
         
འདི་ལྟར་ལོ་ཟླའི་གྲང་ངར་རྒོད་ན་ཡང་།།
ཕམ་ཁའི་མགོ་བོ་སྨད་དོན་ཅི་ཡང་མེད།།
རིགས་རུས་ཨ་ཀར་ལྗོན་པའི་རྩེ་མོ་ནས།།
ལ་རྒྱའི་ཀི་རིང་དཔུང་ཁག་བསྒྲིགས་ནས་འདེབས།།
        
ད་དུང་མ་འོང་བདེ་སྐྱིད་བསྐྲུན་ཕྱིར་དུ།།
གསར་སྐྱེས་གཞོན་རྣམས་ལེགས་བསྐྱངས་རིག་པའི་གཞུང་།
རྒྱ་མཚོའི་ཕ་མཐར་བརྒལ་བའི་གྲུ་ཞུགས་ནས།།
རྒྱལ་ཁའི་དར་ཆེན་བསྒྲེངས་བར་བསྐུལ་མ་གཏོང་།
              ༢༠༠༧  ༡༢  ༦
 

རྩོམ་ཁུངས། ངེད་དྲ་བ།