གཟིམས་པ་མེད་པའི་མཆོད་མེ། དབྱངས་གསལ་སོ་བཞིའི་མཛེས་སྡུག  RSSསྔོན་མངག

འབྲོག་མོའི་ཆོས་འབྱུང་།

2014-06-13 15:18:00 རྩེ་སྐྱེས་རིག་པའི་རྣོ་གྲི། ཀློག་གྲངས། མཆན ཡོད།

ཟུར་མིག་ལ་སྡུག་རྩུབ་དང་གསང་བ་མོད་ལ།།
འཛུམ་ཆུང་ལ་ན་ཟུག་དང་འགུགས་ཤུགས་རྒོད་བ།
ཤ་མདངས་ལ་རོ་བཅུད་དང་ལྷོད་ཤ་ལྡན་པའི།།
འབྲོག་མོ་འདི་ལྷ་མོ་དེའི་རྣམ་སྤྲུལ་ཡིན་འདྲ།།

དུང་སོ་ལ་དཀར་མདོག་དང་སྐྱེས་ཉམས་ལྡན་ལ།།
མཆུ་སྒྲོ་ལ་སྣུམ་ཁུ་དང་ནེམ་ཤས་ཀླན་པ།།
སྣ་ཁུང་ནི་ཆེ་མིན་ལ་ཆུང་མིན་ཚད་ལྡན།།
འབྲོག་མོ་འདི་བསླུ་བྲིད་ཀྱི་བདག་མོ་ཡིན་འདྲ།།

འགྲམ་པ་ལ་མཚོན་རྩི་དང་སྐག་གིས་མ་བསླད།།
ཐོད་པ་ལ་འགུལ་རིས་དང་ཆུས་ཡིས་མ་བརྒྱན།།
རྫི་མ་ལ་གསེར་ཉ་དང་ངང་བ་འཁྱུག་འདྲའི།།
འབྲོག་མོ་འདི་མ་ཡུམ་གྱི་ནོར་བུ་ཡིན་འདྲ།།

མིག་ནང་ན་བྱ་ཕོ་ཞིག་འཕུར་དང་མཚུངས་པའི།།
བརྩེ་དུང་གི་ཐམས་ཅད་པོ་ཁྱོད་ལ་ལྡན་འདྲ།།
འཛུམ་ནང་ན་སྐད་ཆ་ཞིག་བཤད་དང་ཉེ་བའི།།
བདེ་སྐྱིད་ཀྱི་ཡོད་ཚད་ཟིག་ཁྱོད་ཀྱིས་ཁྱེར་འདྲ།།

མ་དབང་ན་སྡུག་གཏམ་གྱི་འཁོར་ལོ་བསྐོར་བའི།།
ཁྱོད་ཉིད་ལ་དགའ་སེམས་ཀྱི་མཚོ་མོ་མོད་རེད།།
དབང་སོང་ན་མྱུར་ཏུ་རང་ཤོར་བར་དོགས་པའི།།
ཁྱོད་ཉིད་ལ་རྣམ་རྟོག་གི་ཁྲུང་ཁྲུང་མང་རེད།།

སྐྲ་ལོ་དེ་ནག་མདོག་གི་ཚར་ནག་རྩེན་འདྲ།།
ཉམས་འགྱུར་དེ་དབྱར་གཞུང་གི་པདྨོ་རྒྱུ་འདྲ།།
སྐད་ངག་དེ་སྟོན་གསར་གྱི་ཁུ་ལོ་གྲག་འདྲ།།
འབྲོག་མོ་འདི་ཆུ་ནང་གི་ཟླ་ཤེལ་ཨེ་རེད།།

རྣ་ལུང་དེ་ཡོད་མེད་ལ་ཁྱད་པར་མེད་རེད།།
སྐྲ་སྡོམ་དེ་ཡག་མིན་ལ་རག་ལས་མེད་རེད།།
མུ་ཏིག་དེ་གཏེགས་མིན་ཡང་གཙོ་བོ་མ་མེད།།
འབྲོག་མོ་འདི་འབྲོག་ཐང་གི་མཛེས་མ་རེད་ལ།།

བརྩེ་སེམས་དེ་ཡོད་མེད་ལ་རྩོད་གླེང་མེད་རེད།།
རིགས་རང་ལ་དགའ་མིན་ཡང་བལྟས་ན་ཤེས་རེད།།
གསར་ཞེན་གྱི་བླུན་རྟགས་དང་ཧ་ཅང་རིང་བའི།།
འབྲོག་མོ་འདི་རྩྭ་ཐང་གི་བདག་མོ་རེད་ལ།།

ཁྱོད་ཐོབ་ན་ཤི་གསོན་ལ་བལྟོས་པ་མེད་ཅེས།།
གསར་བུ་ཚོས་འཁྲུལ་སྣང་གི་སྐད་ཆ་ལབ་རེད།།
ཁྱོད་མེད་ན་འཚོ་བ་ལ་དོན་སྙིང་མེད་ཅེས།།
འབྲོག་ཕྲུག་ཚོས་བསླུ་གཏམ་གྱི་སྒོ་མོ་འབྱེད་རེད།།

ལུག་ཁྱུ་དང་གཡག་ཁྱུ་དེ་དེད་ནས་འགྲོ་དུས།།
སྣ་གླུ་དང་རི་གཞས་སོགས་མཛེས་མའི་རྒྱན་རེད།།
འབྲི་དཀར་གྱི་འོ་མཚོ་དེ་དལ་བཞོ་བྱེད་དུས།།
མིག་ཟུང་དང་བརྩེ་བ་སོགས་རྒྱང་ལ་ཕྱོགས་རེད།།

ཚད་གཞུང་ནས་དཔྱད་ན་ཁྱོད་འདོད་པའི་ཡོན་ཏན།།
ཤེས་ངོར་ལ་བལྟས་ན་ཁྱོད་འདོད་པའི་བདེ་བ།།།
མི་ཆོས་དང་ལྷ་ཆོས་སོགས་གང་ལ་སྦྱར་ཡང་།།
ཁྱེད་ཉིད་ལ་མཐུན་མིན་གྱི་ཁྱད་ཆོས་ཡོད་རེད།།

ཤིང་སོང་བའི་རྣམ་ཤེས་སམ་གྲངས་མེད་དག་གིས།།
ཁྱོས་བྱིན་པའི་བག་ཆགས་དེར་སྙིང་ལ་ལོས་སྒོམ།།
ཤི་མིན་གྱི་སྟག་ཤར་མ་ཆགས་ལྡན་དག་གིས།།
ཁྱོད་ཉིད་ཀྱི་ལང་ཚོ་དེས་འདོད་སེམས་ལོས་སྟེར།།

མཐོང་སྣང་ལ་འཁྲུལ་བཅས་ཀྱི་རྨི་ལམ་མང་ལ།།
དྲན་སྣང་ལ་བརྩེ་དུང་གི་ལྷ་ཆེན་ཞེན་འདྲ།།
སྣ་ཚོགས་ལ་འཕགས་མ་ཡི་རང་བཞིན་ལྡན་པའི།།
འབྲོག་མོ་འདི་འཛམ་གླིང་གི་གནམ་ཏོག་ཨེ་རེད།།

གདགས་གཞི་ལས་གདགས་ཆོས་དེ་ཤིན་ཏུ་ཡག་ལ།།
རེག་པ་ལས་བལྟས་ཚོར་དེ་ཧ་ཅང་བསོར་འདྲའི།།
འགོག་བདེན་གྱི་བར་ཆད་ལ་ཕུལ་དང་འདྲ་བའི།།
འབྲོག་མོ་འདི་འབྲོག་སྐྱེས་ཀྱི་སྐར་ཆེན་རེད་དོ།།

           (མཆོད་མེའི་པར་དབང་གཞན་གྱིས་དགོལ་མི་རུང)

རྩོམ་ཁུངས། ངེད་དྲ་བ།

དཔྱད་མཆན ཡོངས་སུ་གཟིགས།དཔྱད་མཆན།

མིང་མི་འགོད་པར་སྤེལ།