གཟིམས་པ་མེད་པའི་མཆོད་མེ། དབྱངས་གསལ་སོ་བཞིའི་མཛེས་སྡུག  RSSསྔོན་མངག

ཀ་ཕྲེང་མི་རྟག་དྲན་གླུ།

2014-05-21 11:21:00 སེར་ཤུལ་ལྷ་ཕྲུག ཀློག་གྲངས། མཆན ཡོད།


ཀ་དག་གནས་ལུགས་མངོན་འགྱུར་དྲིན་ཅན་གྱི་བླ་མ།།
ཁ་ཙམ་མིན་པར་སྙིང་ནས་གསོལ་བ་ཞིག་འདེབས་སོ།།
ག་ན་ཡོད་རུང་ཐུགས་རྗེའི་སྐྱབས་འོག་ནས་མ་འདོར།།
ང་ལ་རེ་ས་སྐྱབས་གནས་ཁྱེད་ཉིད་ལས་མེད་དོ།།

ཅ་ཅོའི་ལོང་གཏམ་སྨྲ་བའི་དབུགས་འཕྲེང་དེ་ཆད་ནས།།
ཆ་རྒྱུས་མེད་པའི་ཕྱོགས་སུ་གཅིག་བུ་རང་འགྲོ་ཚེ།།
ཇ་དར་གོས་སོགས་ཡོད་ཀྱང་ཁྱེར་ས་ནི་མི་འདུག།
ཉ་རོ་བཞིན་དུ་དམྱལ་མེས་སྲེག་དུས་དེར་ཅི་དྲག།

ཏ་ཐཱ་ག་ཏའི་བསྟན་ལ་ཞུགས་ལོ་ཞིག་བྱས་ཀྱང་།།
ཐ་ཆད་ཆགས་སྡང་བློ་ངན་གོམས་པ་འདིའི་དབང་གིས།།
ད་བར་བྱས་ཚད་སྡིག་པ་ཁོ་ན་ལས་མི་འདུག།
ན་འཆི་རྐྱེན་ངན་བྱུང་དུས་བླ་མ་རང་མཁྱེན་ནོ།།

པ་ཏྲ་ལྟར་འཁྱུག་མི་ཚེའི་བགྲོད་ལམ་དེ་ཟད་ནས།།
ཕ་རོལ་ཕྱི་མར་སོང་བ་ཅི་འདྲ་ཞིག་མཐོང་ཡང་།།
བ་སྤུ་ཙམ་ཡང་མི་གཡོ་སོས་དལ་དུ་འདུག་པའི།།
མ་རབ་བདག་ལ་མི་འཆིའི་གདེང་ཚད་ཅིག་ཡོད་འདྲ།།

ཙ་གེ་ཙིག་གེའི་ཚེ་ལ་སྣོན་རྒྱུ་ནི་མེད་ལ།།
ཚ་གྲང་ནད་སོགས་འཆི་བའི་ཆ་རྐྱེན་ནི་མང་བར།།
ཛ་ཡའི་གསུང་དང་རང་གི་ཉམས་མྱོང་གིས་གྲུབ་མོད།།
ཝ་མོ་བཞིན་དུ་ཚེ་འདིའི་བྱ་བ་ལ་གཡེང་འདུག།

ཞ་མཐོང་འོན་ལོང་མ་ཡིན་དབང་བོ་ཀུན་ཚང་ལ།།
ཟ་མ་མ་ནིང་མ་ཡིན་སྡོམ་རྟེན་དུ་རུང་བ།།
འ་ཅག་རིན་ཆེན་ལས་ལྷག་དལ་རྟེན་འདི་རྙེད་དུས།།
ཡ་མཚན་ལྷ་ཆོས་མི་སྒྲུབ་སྨྱོན་པ་དང་མཚུངས་བྱུང་།།

རྭ་གདང་འཆི་བདག་གཤིན་རྗེའི་བང་ཆེན་དེ་འབྱོར་དུས།།
ལ་ལུང་རྒྱུད་ནས་བྲོས་ཀྱང་ཐར་ཐབས་ནི་མེད་པས།།
ཤ་ཁྲག་ལུས་འདི་དོར་ནས་འགྲོ་ཉིན་དེར་ཇི་དྲག།
ས་གསུམ་འགྲོ་བའི་རེ་སྐོང་བླ་མ་དེ་མཁྱེན་ནོ།།

ཧ་ལམ་མི་ཚེ་འདི་ཡི་ཕྱེད་ཀ་ནི་འགྲོ་ཚར།།
ཨ་རེ་ད་ནི་སྙིང་ནས་ལྷ་ཆོས་ཞིག་སྒྲུབ་པར།།
དྲིན་ཅན་རྩ་རྒྱུད་བླ་མའི་བྱིན་གྱིས་རང་རློབས་ཤིག།
ཉམ་ཆུང་བདག་ལ་རེ་ས་ཁྱེད་ཉིད་ལས་མེད་དོ།།

    (མཆོད་མེའི་པར་དབང་གཞན་གྱིས་དགོལ་མི་རུང)

རྩོམ་ཁུངས། ངེད་དྲ་བ།

དཔྱད་མཆན ཡོངས་སུ་གཟིགས།དཔྱད་མཆན།

མིང་མི་འགོད་པར་སྤེལ།