གཟིམས་པ་མེད་པའི་མཆོད་མེ། དབྱངས་གསལ་སོ་བཞིའི་མཛེས་སྡུག  RSSསྔོན་མངག

སྙན་ཚོམ་རྟོག་པའི་ངོས་ཀྱི་རི་མོ།

2014-01-27 13:33:00 རོང་བོ་དགེ་འདུན་ལྷུན་གྲུབ། ཀློག་གྲངས། མཆན ཡོད།

           ཡིད་འགྱུ།
 
སྨུག་སྤྲིན་ཞགས་པ་བཏབ་འདྲའི་རྨི་ལམ་ཡན་པོ།།
འཚོ་བའི་ཐང་ཤིང་སྔོན་མོའི་རྩེ་ལ་བབས་དུས།།
ཆར་སིམ་ཁྲོད་ན་ལུས་པའི་མི་ཚེ་ལྷག་མ།།
བདག་གི་འདོད་དོན་བསྐང་ཕྱིར་གང་དུ་བསྔོ་འམ།།
བས་མཐའི་ཉིད་འོད་འདི་ལ་དམར་མདངས་བཀྲ་ཞིང་།།
གཞོན་པའི་འཛུམ་ཀོང་བྱེ་མའི་ཀློང་དུ་ནུབ་སྐབས།།
ལས་ཀྱིས་དར་ལ་བརྒྱུས་པའི་ཤ་ཉེ་སྤུན་མཆེད།།
ཐོ་ཡོར་གྲིབ་མ་ཙམ་གྱིས་ག་བར་ཕྱིན་སོང་།།
རྒྱང་མིག་སྡོང་རྩེར་ལྷུང་བའི་སྐར་མ་ཕྲ་ཆུང་།།
དྲན་པའི་རྟེན་དུ་གཟེབ་ལ་ཚུད་པ་འདྲ་ཡང་།།
སྐྱབས་ཀྱི་ནོར་བུ་ལོ་ཟླའི་གསེབ་ན་ལུས་པས།།
མགོ་ལ་སེ་མདའ་ལྷུང་བའི་དངན་པ་འཁོར་སོང་།།
ཀྱེ་ཧོ་བདག་གི་ལུས་པོ་ཕར་ལ་བསལ་ཏེ།།
གློ་དང་རྒྱུ་མའི་དོན་སྣོད་རེ་རེར་བསྙབས་ན།།
འཆར་ཡན་ཁྲོད་ཀྱི་གླེགས་བམ་གེའུ་ཁ་སྦྱར།།
གང་དུ་སྦས་པའི་ཤུལ་ཙམ་རྙེད་རྒྱུ་མི་འདུག།
 
          བདག་གི་འཆར་ཡན།
 
ཡང་བའི་སེམས་ལ་རླུང་སྤུར་ནས།།
མིག་གི་ཆུ་རིས་ཡོམ་པའི་ཚེ།།
ཡིད་ལ་འགུལ་བའི་ལྗོན་པ་ནི།།
བྱེའུ་ཆུང་ཞིག་གི་འཕུར་ས་ཡིན།།
གྱ་གྱུའི་ཤུགས་ལྡན་གཙང་བོ་ཞིག།
བྱེ་ཐང་བརྒལ་ནས་དུབ་པའི་ཚེ།།
ངག་གི་སྐྱོ་དབྱངས་གསིལ་བ་ནི།།
རྣམ་ཤེས་གང་གི་འོད་ཟེར་རོ།།
མི་སྨྲའི་བརྟུལ་ཞུགས་བཟུང་བ་ཡི།།
མེ་ཏོག་ལྟ་བུའི་རལ་གྲི་གང་།།
ཡིད་ལ་བསྣུན་པའི་བརྡ་ཐབས་སུ།།
དཀོན་མཆོག་འབོད་པའི་ཕོ་ཉར་བཏང་།།
གློ་བ་ཟིལ་བས་དཀར་བ་དང་།།
གདོང་ལ་དྲི་མས་ནོངས་བྱས་པའི།།
སྐྱིད་ཆུའི་འགྲམ་གྱི་ཚངས་མགུར་ཞིག།
ཤེལ་ཕོར་གཏིང་ལ་ལྕེབས་ཏེ་ཐལ།།
བདག་གི་མགྲིན་པ་འདར་བ་དང་།།
ཁོང་གི་སྙིང་ཡང་འདར་བ་འདིས།།
ཕ་གིའི་རྩིག་ངོས་ནག་པོ་ལ།།
སངས་རྒྱས་སྟོང་གི་བྱིན་རླབས་འབྱུག།
ཞབས་གདུབ་ཕུད་པའི་རྗེ་བཙུན་མ།།
ལམ་གྱི་དཀར་ནག་མཚམས་སུ་ནི།།
ཡོན་པོའི་སྤྱན་ལ་འཐེང་བོའི་འགྲོས།།
མཉམ་དུ་བསྡེབས་ནས་རྫི་གསང་དོད།།
ཨེ་མ་ལུས་ཀྱི་རྩ་འདི་དང་།།
རླུང་གི་བྱེད་ནུས་བསམ་མི་ཁྱབ།།
བསམ་མི་ཁྱབ་པའི་ངང་ཉིད་ལས།།
ཡིད་ཀྱི་འཆར་སྣང་བསམ་མི་ཁྱབ།།
 
          ཚོད་ཚོད་ལ་བྲིས་པ་ཡིན།
 
དོ་ནུབ་དགུ་ཆུར་ཅ་ཅོ་ཆེ་ཞིང་།།
སེར་བུ་ཞིག་ཀྱང་ཞོར་ནས་ཁྲིད་དེ།།
ང་ཡི་ཉེ་སར་ཀྱ་ཀྱུར་འབབ་དུས།།
ཇ་ཕོར་ནང་ལ་ཤག་སྒྲ་འཁྱིལ་འོང་།།
མིག་གིས་ཕར་ལ་བལྟས་ཙམ་ཉིད་དུ།།
མདུན་གྱི་དཔྱངས་ཟམ་སྟེང་ལ་ཡན་པའི།།
གྲིབ་རིས་མགྱོགས་པོ་མ་ཡལ་གོང་ལ།།
ཟླ་བ་ནུབ་རིར་བྲོས་པ་མཐོང་འོང་།།
 
 
           རྟོག་པའི་ངོས་ཀྱི་རི་མོ།
               
ལུས་སེམས་དགེ་བ་ལ་སྦྱར་ནས།།
འདུག་སྟངས་ཙོག་ཙོག་ཅིག་བྱས་ཏེ།།
བག་ཆགས་སེང་རས་ཀྱི་ངོས་ལ།།
རྗེ་བཙུན་སྒྲོལ་མ་ཞིག་བྲིས་ཡོད།།
ཡིད་ཀྱི་མངོན་འདོད་ལ་བསྲེས་པའི།།
ངག་སྒོ་འདར་འདར་ཞིག་བྱས་ཏེ།།
ཞེད་སྣང་རྔུལ་ཆུ་ཡི་མུ་ཏིག།
བ་སྤུའི་རྩེ་མོ་རུ་བཤམས་བཞག།
ཞོགས་པའི་སྤྲིན་པ་ཡི་མགུལ་འཆིང་།།
དྲན་སྣང་སེར་བུ་དེས་སྒུལ་བཞིན།།
འདས་པའི་ལོ་ཟླ་ཡི་རི་མོ།།
སྙིང་གི་རྩིག་ངོས་སུ་ཤར་འོང་།།
མ་རྒན་སྐྱེས་འབྲས་ནི་མཚར་ལ།།
ཕ་རྒན་དཔུང་ཤ་ནི་སྦོམ་དུས།།
མིང་སྲིང་ངེད་ཅག་རང་སྐྱིད་པས།།
སྣང་བ་མེ་ཏོག་གིས་མི་མཚོན།།
ཁ་དཀར་གཏིང་ནག་གི་དུས་ཚོད།།
སེམས་ལ་དུག་སྦྲང་ལྟར་ཟུག་ཅིང་།།
འདུ་འབྲལ་དམྱལ་སྲུང་གི་ཁྲོ་གཉེར།།
ཁྱི་རྒན་རྒྱ་བོ་ལས་འཇིགས་པ།།
ཡོད་ན་སྐྱིད་མདོག་གིས་འཚོ་བའི།།
བཟའ་མི་དགྱེས་འཛོམས་ཀྱི་ལོངས་སྤྱོད།།
ལྷ་ཡི་འགྲམ་ཆུ་དེ་གཏོང་ས།།
དྲན་ན་གློ་བ་དེ་གས་འོང་།།
བྱིའུ་ཡར་འཕུར་གྱི་མགོ་ལ།།
རྐྱེན་ངན་སྐྱ་ཁྲ་ཡིས་སྤར་མོ།།
ལྕགས་ཀྱི་མཆེ་བ་ལྟར་གཟེངས་ནས།།
འཆི་བའི་མགྲོན་པོ་རུ་ཁྲིད་སོང་།།
མ་ཎི་འུར་འདོན་གྱི་གསེབ་ནས།།
མིང་སྲིང་འདུ་འབྲལ་གྱི་སྐྱོ་བ།།
སྐྲ་ལོའི་འཕྱིང་ཕྱོགས་ལས་འཛར་འོང་།།
དབུགས་ཀྱི་གཏོང་ལེན་ལས་འཛར་འོང་།།
སྡུག་གི་ལོ་ཟླ་ཡི་ཕྲེང་བ།།
དེད་ན་ཕ་མཐའ་ཞིག་མེད་ཀྱང་།།
སྐྱབས་ཡུལ་དཀོན་མཆོག་ལ་བཅོལ་ནས།།
ཁྱེད་ལ་སྐྱེལ་མ་རང་བྱས་ཡོད།།
དེ་རིང་ད་ལྟ་འང་དྲན་པའི།།
སང་ལོའི་ད་མཚམས་ཀྱང་དྲན་པའི།།
མ་ལོའི་སྙིང་དབུས་ཀྱི་ཐིག་ལེ།།
ནམ་རྒྱུན་བརྗེད་ཐབས་དེ་དཀའ་འོ།།
 
       (མཆོད་མེ་དྲ་བའི་པར་དབང་གཞན་གྱིས་དགོལ་མི་རུང)

རྩོམ་ཁུངས། ངེད་དྲ་བ།

དཔྱད་མཆན ཡོངས་སུ་གཟིགས།དཔྱད་མཆན།

མིང་མི་འགོད་པར་སྤེལ།