ཉི་འོད་སེར་བོ་ཞིག་ལྷོད་ཀྱིས་ཤར་དུས།།
ཕྱི་ནང་ཁོར་ཡུག་ལ་དྲོད་ཀྱིས་ཁྱབ་འདུག།
བསིལ་རླུང་འཇམ་པོ་ཞིག་དལ་བར་ལྡང་བ།།
ད་ནི་དབྱར་གཞུང་གི་མཛེས་པ་སླེབས་བྱུང་།།

ལམ་ཐག་ཀྱ་ཀྱུ་དེ་འཕྲེད་ཀྱིས་བཅད་ཅིང་།།
ཁང་བརྩེགས་མཐོན་པོ་དག་རྒྱབ་ཀྱིས་ཕྱོགས་ནས།།
ཡངས་པའི་རྩྭ་ཐང་ལ་མགྲོན་དུ་ཕེབས་དུས།།
ཞི་བདེ་བག་ཕེབས་ཀྱི་ཚོར་བས་ཕྱུག་སོང་།།

མཐིང་སྨུག་སྦྲ་ནག་དེ་ཕྱོགས་བཞིར་བརྐྱངས་ཞིང་།།
དུད་སྤྲིན་ལང་ལོང་ཞིག་དགུང་དུ་འཕྱུར་བ།།
མར་ཆུར་རྩམ་གསུམ་གྱི་སྣུམ་ཞག་འཐུལ་བ།།
ཕ་ཡུལ་འབྲོག་ཐང་གི་འཚོ་བ་ཡིན་སོང་།།

རྩི་ཤིང་མེ་ཏོག་གི་མགོ་ལྕོག་ལྡེམ་ཞིང་།།
ཁུ་བྱུག་སྔོན་མོ་ཡི་སྐད་སྙན་སྒྲོག་པ།།
དྭངས་གཙང་ཆུ་ཕྲན་ཞིག་དལ་བར་བཞུར་བ།།
རང་བྱུང་ཁོར་ཡུག་གི་དགའ་ཚལ་ཡིན་སོང་།།

རྫ་རི་མཐོན་པོ་ཞིག་ནམ་མཁར་སྙེག་ཅིང་།།
གཡང་དཀར་ལུག་ཁྱུ་དེ་སྤྲིན་ལ་འདྲེས་བྱུང་།།
གླུ་སྐད་སང་སིང་ཞིག་རྣ་བར་འཁོར་བས།།
ལ་ཁའི་ཕྱུགས་རྫི་དེའི་འཚོ་གནས་དྲན་བྱུང་།།

གདོང་ལ་དགའ་སྤྲོ་དང་འཛུམ་མདངས་རྒྱས་ཤིང་།།
སེམས་ལ་བྱམས་བརྩེ་ཡི་ཆོས་ཀྱིས་ཕྱུག་པ།།
དུས་ཀུན་ཡིག་དྲུག་གི་དབྱངས་རྟ་གྱེར་བ།།
ཆོས་ལྡན་བོད་པ་ཡི་རིགས་རྒྱུད་ཡིན་སོང་།།

སྐྲ་ལོ་དཀར་དཀར་གྱི་བགྲེས་པོ་དེ་ཡིས།།
ཕྱག་ཏུ་མ་ཎི་ཡི་འཁོར་ལོ་སྐོར་བཞིན།།
གནའ་མིའི་གཏམ་རྒྱུད་ལ་བསམ་གྱིན་བསམ་གྱིན།།
གདོད་མིའི་ལོ་རྒྱུས་ལ་ཕྱིར་དྲན་བགྱིས་སོང་།།

མགོ་དཀྲི་དམར་བོ་ཞིག་མགོ་བོར་དཀྲིས་ནས།།
ཞལ་རས་གོར་གོར་ལ་སྐགས་རྩི་བྱུགས་པ།།
ལུས་ལ་གོས་གསར་གྱི་བོད་ལྭ་གྱོན་པ།།
ཨ་ཅེ་འབྲོག་མོ་ཡི་ཁྱད་ཆོས་ཡིན་སོང་།།

སྦྲ་ནག་གྲུ་བཞི་དེའི་འདབས་རོལ་ཞིག་ན།།
བརྩེ་ལྡན་ཕ་མ་གཉིས་ཙོག་པུར་བསྡད་དེ།།
བུ་ཆུང་ལོག་ཕེབས་ལ་སྒུག་ཡོད་བསམ་ན།།
བདག་ནི་གློ་བུར་དུ་འཛུམ་དགོས་བྱུང་སོང་།།

འབྲོག་སྐད་གཤའ་མ་ཡི་ཁ་མཚར་བཤད་ཅིང་།།
ཚིག་ལ་མནའ་ཆེན་གྱི་རམ་འདེགས་མང་བ།།
འདོ་རིག་རྟ་བོ་ཡི་བང་རྩལ་ངོམ་དུས།
སྟག་ཤར་གཞོན་ནུ་ཚོའི་དཔའ་རྩལ་རྒྱས་སོང་།།

མཐུན་སྒྲིལ་ལས་དོན་གྱི་ཐག་པ་གསུམ་བསྒྲིལ།།
ཆོས་སྲིད་ལུགས་གཉིས་ཀྱི་བརྗོད་དོན་དངོས་མ།།
སུ་དང་གང་ཡིན་གྱི་སྲོང་བའི་ལམ་བུ།།
ལམ་འདི་བསྙེགས་པ་དེ་ཕུགས་བསམ་ཡིན་སོང་།།

ལས་ཀྱི་ལམ་ཡིག་དེ་བསྒྱུར་ཐབས་མི་མངའ།།
ཁྱོད་ཀྱི་མཛད་རྗེས་ལ་གློ་བ་དགའ་བྱུང་།།
བདག་གི་སེམས་ཁོང་གི་མེ་ལོང་ངོས་སུ།།
ཁྱོད་ཀྱི་མཛེས་སྡུག་ལ་རེ་བས་ཅེར་ཡོད།།

        (མཆོད་མེའི་པར་དབང་གཞན་གྱིས་དགོལ་མི་རུང)
 

རྩོམ་ཁུངས། ངེད་དྲ་བ།