དགོང་ཁའི་གྲིབ་མ་ཐོད་ལ་བབས་ནས།།
ཚེ་ཡི་དར་ཐག་ཐུང་དུ་ཕྱིན་དུས།།
འུ་ཅག་འཁོར་བའི་མགྲོན་པོ་འདི་ཚོ།།
སྲང་གི་ལྟད་མོ་འཚོལ་བར་བྲེལ་ཅིང་།།
ཡིད་ཀྱི་ན་ཟུག་བརྗོད་པར་སྤྲོ་བས།།
ཕྱི་མིག་མེད་ལ་ཁེངས་སེམས་ཅི་ཡོད།།

རང་བྱས་ལས་ཀྱི་མཐའ་མ་ཞིག་ལ།།
འགྱོད་པའི་ན་ཟུག་སྙིང་ལ་འཚེར་ཡང་།།
གཏོང་བའི་སེམས་ནི་ཆགས་ཐབས་བྲལ་བས།།
མི་ཚེ་ཟེར་བ་དགའ་སྡུག་གཉིས་ཏེ།།
སུ་དང་གང་གིས་རང་དབང་མིན་པ།།
གདོང་ལ་དོད་པའི་གཉེར་མས་བསལ་ཡོང་།།

ང་ནི་ཆང་རག་བརྟེན་པར་ཞེན་ཡང་།།
ལན་རེར་འདི་ལས་ལྷག་པའི་གྲོགས་མེད།།
ལྷག་པར་ཡིད་སེམས་སྐྱོ་བས་གཟིར་ནས།།
གྲིབ་མ་ཁོ་ནར་ཁེན་དགོས་ཐུག་དུས།།
མི་ཚེའི་ལ་འགོར་མུན་པ་དགུ་འཁྱིལ།།
བདུད་རྩི་ཆང་གིས་ག་ལེར་བསང་ཡོང་།།

གཞན་གྱིས་མི་རྙེད་ཁང་ཀོག་ཅིག་ཏུ།།
གཅིག་པུར་བེམ་གཟུགས་སྐྱ་མོར་འགྲེང་ནས།།
བས་མཐའ་ཞིག་ཏུ་འཁྱམ་ཉུལ་བྱེད་པ།།
ང་ཡི་སྣང་བའི་སྒོ་མོ་ཡིན་ན།།
ཉིན་དང་ཞག་གི་ལག་པའི་རི་མོ།།
རབ་རིབ་ཤིག་ལས་སྣང་རྒྱུ་མ་བྱུང་།།

ཧ་ཅང་གནག་པའི་མཚན་མོ་ཞིག་ཏུ།།
སྒོ་ཁྱིའི་ཟུག་སྐད་རྣ་བར་ལྷུང་དུས།།
འཚོ་བ་ཞིག་གི་ཕྱི་ནང་བསམ་ཞིང་།།
ལས་དང་རླུང་རྟའི་ཁ་འཚབ་དྲན་ནས།།
བྱིས་པའི་དུས་ཀྱི་ངུ་མ་དགོད་ཁ།།
ད་དུང་སྙིང་ནས་ག་ལེར་འཚེར་ཡོང་།།
                ༢༠༡༤-༡༢-༡༩ ཉིན།

              གས་ཆག

ལོ་དང་ཟླ་བ་ཙག་གིས་ཕྱིད་ཅིང་།།
བརྩེ་བའི་རི་ལ་ཁ་བ་འབབ་དུས།།
འཇིག་རྟེན་མི་ཡི་གནས་མལ་ཡུལ་དུ།།
སྡུག་གི་རླུང་འཚུབ་དང་རྒྱུ་མ་བྱུང་།།

འཚོ་བའི་གྲུ་ཟུར་ཁྲག་གིས་སྦགས་ཤིང་།།
ཉེ་བའི་མི་དག་རྒྱང་དུ་བཀྱེད་དུས།།
ཁེར་རྐྱང་སྣང་བ་རབ་རིབ་འཁོར་བའི།།
མི་ཡི་ཚོགས་འདི་ཉམས་ཆུང་རེད་ཨང་།།

རང་གི་རྣམ་ཤེས་མེ་ལ་སྦར་ཅིང་།།
གཞན་གྱི་འཇིག་རྟེན་རླུང་ལ་སྐུར་དུས།།
ཤུལ་གྱི་ཐལ་བ་སྤར་མོ་གང་བོ།།
ཕྱོགས་མཚམས་ཀུན་དུ་གཏོར་ཏེ་ཐལ་བ།།

ཆུ་ལ་ཤར་བའི་མི་རྟག་གཟུགས་བརྙན།།
ཁྱོད་ཀྱི་སེམས་པའི་ཡོལ་གོར་འཁྱིལ་ཡང་།།
ཉི་མའི་ཤར་ནུབ་ཞེ་ལ་སྣང་དུས།།
སྙིང་རྩ་ལྷེམ་ལྷེམ་ཅི་ཞིག་འདར་བ།།
                 ༢༠༡༤-༡༢-༣ཉིན་འབྲི་འཕྲོར་ལུས།

             གྲོང་མཐའི་རླུང་བུ།

ཕྱི་ཡི་ཉི་འོད་གཉོམ་པོ་བཟི་བོ་རུལ་མ།།
དེ་ཡི་རྗེས་སུ་སྙེག་པའི་རླུང་བུ་འཐོར་མ།།
དེའི་ཀྱང་ཤུལ་དུ་བསྐྱུར་བའི་གླུ་སྐད་ཟ་ཟི།།
ང་ཡི་སྐྱོ་ངལ་གནོན་པའི་གཏིང་མར་རག་བྱུང་།།

འབྲོག་སྟོང་སྐྱ་བོ་ཞིག་ཏུ་ཁེར་མོར་གསོན་པ།།
ཆང་ཁང་འཁྱག་པ་ཞིག་ནས་གཅིག་པུར་འདུག་དོན།།
ལས་ཀྱི་ཆང་མ་གང་ཡང་སྒུག་འདུན་མིན་ཏེ།།
ལྷིང་འཇགས་རབ་རིབ་ཤིག་ལ་སྣང་བ་བསྲེས་ནི།།

འདི་ནས་ས་དང་གནམ་གྱི་བར་ཐག་རིང་བ།།
ངའི་ནི་ལུས་དང་སེམས་ཀྱི་ཁྱད་པར་ཆེ་བ།།
འདི་དང་ཕྱི་མའི་འགག་འཕྲང་ག་ཙམ་བརྒྱུད་ན།།
སེམས་ཀྱི་འོད་གསལ་ཞིང་དེ་མིག་ལ་མངོན་ཐུབ།།

གཞུང་ལམ་སྟེང་ན་ནུར་བའི་ལྕགས་ཀྱི་སྒམ་ཆུང་།།
གནམ་མཁའི་དབྱིངས་ནས་གཏོར་བའི་ཁ་བ་ལེབ་མོ།།
རླུང་བུ་ཚད་རིམ་གཅིག་གིས་སྤུར་བ་འདྲ་ན།།
འཇིག་རྟེན་ཕྱ་ལེ་ཡིན་པའི་འཛུམ་རེ་སྟོན་འོས།།
                    ༢༠༡༤-༡༢-༢༥ ཉིན་གྱི་ཕྱི་དྲོ།

(མཆོད་མེའི་པར་དབང་གཞན་གྱིས་དགོལ་མི་རུང)

རྩོམ་ཁུངས། ངེད་དྲ་བ།