ལག་ན་སྤྲིན་ནག་ཡུག་གཅིག་བཟུང་སྟེ།།
ཞལ་གྱི་ཁྲོ་གཉེར་བསྡུ་བཞིན་འདུག་པ།།
གྲིབ་མ་མང་བོས་ལག་རྡང་སྦྲེལ་ཏེ།།
ཡིད་ངོར་བྱ་ར་བྱེད་དོན་ཅི་ཡོད།།
ང་ནི་ནགས་བྱེའུ་ཆུང་ཆུང་ཞིག་ཡིན།།
ཤིང་སྡོང་ཡལ་གར་མཚམས་ལ་བསྡད་པ།།
འཇིག་རྟེན་ཟུར་གསུམ་ཞིག་ལ་སྐྲག་གོ།
འཚོ་བ་སྐྱ་རིབ་ཅིག་ལ་སྔངས་ངོ་།།
བྱེ་ཐང་རླུང་བུས་ཟ་བཞིན་འདུག་པ།།
དེ་ལ་སྨྲེང་བའི་ཚུགས་ཀ་ཨེ་འདུག།
རྨི་ལམ་གསལ་མ་གསལ་ཞིག་རྨིས་པ།།
དེ་ལ་མཚར་སྡུག་ཟེར་བ་ཨེ་གདའ།།
ང་ལ་ནམ་མཁའ་སྔོན་པོ་མེད་ཀྱང་།།
གཡུ་ཡི་ལྗོན་པ་འདི་ཡིས་ཆོག་འདུག།
དེ་ཡི་ཡལ་ག་རེ་རེའི་བར་ན།།
ཆུ་ཡི་ཐིགས་པ་སྟོང་ཡང་འཛུམ་ཡོད།།
སྣང་བ་ཆུ་ལ་བསྐུར་བའི་ཟོལ་དེ།།
ཡི་གེའི་ཚོགས་ཀྱིས་ནམ་ཞར་བཟློ་འོ།།

               ཐོན་མི།

ཡུལ་ནི་བས་མཐའ་ཀུན་ཏུ་བསྐོར་ཏེ།།
སྟག་གཟིག་ང་རོ་དེ་གས་གཙེས་ཀྱང་།།
ངལ་བའི་ཚ་གྲང་བཟོད་འདི་ཅི་ཞིག།
ཀཱ་ལི་གཤོག་པ་ཅན་དག་འཕུར་ཏེ།།
ཉི་མའི་དཀྱིལ་འཁོར་མང་བོ་བྲིས་བཞག།
དབྱངས་ཀྱི་ཟླ་འོད་རྒུམ་པའི་ཐུ་བྷོད།།
ཚེ་ཡི་དར་སྐུད་བོད་ལ་དཀྲིས་ན།།
བཙན་གྱི་རལ་གྲི་བོད་ལ་བཏགས་ན།།
གླེགས་བམ་སེར་པོ་བྱང་ལ་དྲངས་ན།།
འོད་ཀྱི་གོང་བུ་ཕྱག་གིས་གཏོར་ན།།
དེ་ལ་གློ་བ་མི་དགའ་ཅི་དགའ།།
བོད་དང་བོན་གྱིས་དྲིན་འདི་གོ་ཤོག།
བོད་དང་བོན་གྱིས་དྲིན་འདི་གསོས་ཤོག།

             ཆུ་སྐྱེས་ཤིག་གི་ཁ་ཕྱེ་ཉིན།

ཁྱེད་ཀྱི་ཚེ་དང་བླ་ཡི་དབྱངས།།
ས་གནམ་བར་དུ་བྲིས་ཙམ་གྱིས།།
ཆོ་ལོ་ཞིག་གིས་ངོས་འཛིན་བྱེད།།
གཅེས་མིང་ཞིག་གིས་ནམ་ཞར་འབོད།།
ཕ་དང་མ་དང་གཉེན་ཚན་གྱིས།།
ངོ་གདོང་རེ་ནས་ཟེར་མ་འཕྲོས།།
ཐོར་རུ་སྔོག་བཅད་གོང་བཞུགས་ཏེ།།
གསར་རུའི་སྣང་བ་རླུང་ལ་བསྐུར།།
སྤྲིན་དང་ཉི་འོད་རྐྱ་འཐབ་སྟེ།།
དྲོད་དང་བསིལ་བའི་རུམ་ཁ་རྙེད།།
ཡིན་ཙང་དོན་ཀུན་གྲུབ་པ་བཞིན།།
འཁོར་བའི་འཁྲིས་སུ་ངེས་འབྱུང་སྐྱེས།།
དགོན་པའི་གསེར་ཏོག་འཁྱུག་མཐོང་བས།།
མིག་གི་མདངས་ལས་མཆི་མ་འཛུམ།།
དེ་ཚེ་རས་གཟན་ནར་མོ་ཡིས།།
ཁྱེད་ཉིད་སྐྱོ་བའི་སྐྱོ་རོགས་གནང་།།

            གཉིད་མི་ཡོང་བའི་མཚན་ཞག

མུན་པའི་རལ་བ་ནག་པོ་གསིག་པ་ན།།
ཞེན་པའི་སྣང་བ་དལ་གྱིས་འགག་ལ་ཁད།།
རང་གི་ལག་པས་སྒོའུ་ཡོལ་ཕྱེས་པ་ན།།
ཁང་ཁྱིམ་འོད་དང་ཟེར་མས་བཏུམ་སོང་སྐད།།
རླུང་གིས་སྤྲིན་ནག་དེ་ག་གཏོར་བྱུང་ངོ་།།
ཆུ་ཡིས་སེམས་ཀྱི་དྲི་མ་བཀྲུས་སོང་ངོ་།།
ཟླ་འོད་མཚོ་ངོགས་བརྒྱབ་པའི་དེ་ཙ་ན།།
ང་ཡང་ངུ་མ་དགོད་ཀྱིས་ཆུ་ཁར་ཤར།། 

(མཆོད་མེའི་པར་དབང་གཞན་གྱིས་དགོལ་མི་རུང)

རྩོམ་ཁུངས། ངེད་དྲ་བ།