གཟིམས་པ་མེད་པའི་མཆོད་མེ། དབྱངས་གསལ་སོ་བཞིའི་མཛེས་སྡུག  RSSསྔོན་མངག

སྐྱིད་པའི་ཕ་ཡུལ། མཛེས་པའི་གམ་པ།

2016-02-27 13:22:18 ཚེ་དབང་དཔལ་འབྱོར། ཀློག་གྲངས། མཆན ཡོད།

མཐའ་ནས་གངས་རི་ར་བས་ཡོངས་སུ་སྐོར་གྱུར་བ།།
བར་དུ་མུ་མེད་རྩྭ་ཐང་ཡངས་པོ་རབ་མཛེས་ཞིང་།།
གངས་ལྗོངས་བདུད་རྩིའི་ལྷ་ཆུའི་འབྱུང་ཡུལ་ཞེས་གྲགས་པའི།།
ང་ཡི་མཛེས་སྡུག་ལྡན་པའི་ཕ་ཡུལ་གམ་པ་སྐྱིད།།

ལྟ་ན་སྡུག་པའི་རི་ཀླུང་སྤང་ལྗོངས་ཡངས་པོའི་སྟེང་།།
གཡང་དཀར་ལུག་གུའི་ཁྱུ་ཚོགས་ཤ་ཤེད་རབ་རྒྱས་པས།།
དེང་གི་ཁྲོམ་རའི་སྟེང་དུ་བྲིན་ཚོང་ལེགས་རྒྱུགས་པའི།།
རོ་བཅུད་ཁྱད་དུ་འཕགས་པའི་ལུག་ཤ་ངེད་ཚོའི་རྒྱན།།

དྲིན་ཆེན་སློབ་དཔོན་པད་མའི་མཛད་རྗེས་ཁྱད་པར་ལས།།
ནད་རིགས་བཞི་བརྒྱ་རྩ་བཞི་ཡོངས་སུ་བཅོས་གྱུར་བའི།།
བདུད་རྩིའི་སྨན་མཆོག་བོད་ལྗོངས་ལྷ་ཆུ་རྟགས་ཅན་དེའི།།
སྙན་གྲགས་བ་དན་ཕྱོགས་བཅུར་ཁྱབ་པ་ངེད་ཚོའི་རྒྱན།།

ལྷོ་ཡི་གནས་རི་གཞི་བདག་གངས་ཅན་རྒྱ་བོ་གཅིག།།
བྱང་གི་གནས་བཟང་གུར་མའི་ལྷ་ཆེན་ཟངས་ར་དང་།
བཙན་པོའི་སྐབས་ཀྱི་རང་བྱུང་གནས་བརྒྱའི་སྒྲུབ་ཁང་སོགས།།
རང་ཅག་ཁ་བའི་རྒྱན་དུ་གྱུར་བ་ངོ་མཚར་ཆེ།།

བོད་བརྒྱུད་ནང་བསྟན་རྙིང་མའི་ཆོས་ཀྱི་དགོན་ལག་གཙོ།།
རིན་ཐང་གཞལ་དུ་མེད་པའི་རྟ་མགྲིན་རང་བྱོན་སྐུ།།
དད་ལྡན་བུང་བ་སྤྲིན་ཚོགས་འཁོར་བའི་གནས་བྱིན་ཆེན།།
གནས་མཆོག་རྡོ་རྗེ་ཉི་མའི་མཆོད་རྟེན་ངེད་ཚོའི་རྒྱན།།

ངོ་མཚར་ཅན་གྱི་མཚོ་མོ་གཡུ་མཚོ་དུང་མཚོ་ལས།།
འགྲོ་བའི་སེམས་ཅན་རྣམས་ཀྱི་ལས་གྲིབ་ལྕི་ཡང་དང་།།
རང་གི་འབྱུང་འགྱུར་ལས་དབང་མེ་ལོང་ལྟར་གསལ་བ།།
རྡོ་རྗེ་མཆོད་རྟེན་ཉི་མའི་གནས་མཚོོ་ངེད་ཚོའི་རྒྱན།།

 
                                              
རྩོམ་སྒྲིག་འགན་ཁུར་བ། ལྷ་སྐྱིད།


(མཆོད་མེའི་པར་དབང་གཞན་གྱིས་དགོལ་མི་རུང) 


རྩོམ་ཁུངས། ངེད་དྲ་བ།

དཔྱད་མཆན ཡོངས་སུ་གཟིགས།དཔྱད་མཆན།

མིང་མི་འགོད་པར་སྤེལ།