གཟིམས་པ་མེད་པའི་མཆོད་མེ། དབྱངས་གསལ་སོ་བཞིའི་མཛེས་སྡུག  RSSསྔོན་མངག

ང་དང་དར་རྩེ་མདོའི་ཉི་ནུབ།

2016-02-27 16:33:07 རས་གཟན་དམར་པོ། ཀློག་གྲངས། མཆན ཡོད།


ཆར་སིམ་ཁྲོད་ཀྱི་མི་ཚོགས་ལགས་ཡར་མར་རྒྱུ་བ་ག་རེ་ཡིན།།
བཀོད་པ་མཛེས་པའི་ཁང་བརྩེགས་དག་ཡར་ལ་འགྲེངས་ནས་སུ་ལ་བལྟ།།
ཚོན་རུས་ལེགས་པའི་གློག་སྒྲོན་ཚོས་སུ་ཡི་མིག་ཟུང་སྒུལ་བར་འབད།།
འདི་གའི་མཚན་མོ་འུར་ཟིང་ཆེ་སྙིང་གི་ཤ་ཚ་འཆོར་བ་ངེས།།

གཙང་འགྲམ་དེ་ཡི་གཞོན་ནུ་ཟུང་བརྩེ་བའི་མེ་ཁ་གསོས་སམ་ལགས།།
ཡང་ན་དགའ་བའི་མངར་ཁ་ལ་ད་དུང་ཅི་ནས་རོལ་སམ་ཀྱེ།།
བུ་ཆུང་ཁེར་ཧྲེང་ད་ནངས་ནས་ཉི་ནུབ་བར་ཏུ་བྲོས་པ་གན།།
རི་སུལ་དེ་ཡི་ཡུ་མོ་ཚོས་མིག་གི་མདའ་མོ་འཕེན་ནམ་སྙམ།།

ཡིད་ཀྱི་སྒོ་ཆེན་བྱང་ལ་ཕྱེས་བྱང་གི་གྲིབ་མ་ནང་དུ་འཛུལ།།
དྲན་ཤེས་དང་ནི་ཞེན་ཆགས་ཁྱེར་སུ་ཡི་རྣམ་ཤེས་འཚོལ་བར་མོས།།
ང་ཡི་དྲན་པ་ཁྱོད་ཀྱིས་འཕྲོག་ད་ནི་ང་རང་ཁེར་རྐྱང་སྟེ།།
རླུང་དང་ཆུ་མོ་སྐྱོམས་ས་ན་སྐྱོ་བའི་སྙན་ངག་གྱེར་བར་སྤྲོ།།

ཅུང་ཙམ་འཁྱག་པའི་མཚན་མོ་འདིར་ང་རང་ཞེ་ནས་སྐྱོ་བྱུང་སྟེ།།
ཕ་ཀིར་འཛུམ་པའི་སྨན་ཆུང་ཚོས་དུང་བའི་ཡིག་ཆུང་བྲིས་འདྲ་ལེ།།
ས་སྲོད་འདི་ལ་ཁེར་རྐྱང་ཡིན་ཞེ་སེམས་གདུངས་བས་གཙེས་ཙམ་བྱུང་།།
ཞུ་དུལ་འདོད་པའི་བདེ་བ་ཆེ་བློ་ཡི་ཞིང་ལ་སྨིན་པར་ཤོག།

                                 2015.7.18


                                                                        རྩོམ་སྒྲིག་འགན་ཁུར་བ། ལྷ་སྐྱིད།


(མཆོད་མེའི་པར་དབང་གཞན་གྱིས་དགོལ་མི་རུང) 


རྩོམ་ཁུངས། ངེད་དྲ་བ།

དཔྱད་མཆན ཡོངས་སུ་གཟིགས།དཔྱད་མཆན།

མིང་མི་འགོད་པར་སྤེལ།