དྲན་པས་གདུང་ནས་ཤ་ཡང་རིད་པའི་དུས།།
མཁྲིག་མའི་ཆུ་ཚོད་དཔུང་བའི་བར་དུ་ཤུད།།
བྲང་གི་ཚིག་ནག་རྣག་གིས་ལྗིབས་པ་དེ།།
ཁྱེད་དང་འབྲེལ་བ་ཁྱེད་ཀྱིས་ཤེས་སམ་ཀྱེ།།

མིག་གི་མདངས་ཀྱང་ཉམས་ཏེ་མོག་པའི་དུས།།
ཚོན་གྱི་ཁ་དོག་སེམས་ཀྱིས་མི་ཟིན་ལ།།
ཟས་ཀྱི་བྲོ་བ་ལྕེ་ཡིས་མི་ཚོར་བ།།
ཁྱེད་དང་འབྲེལ་བ་ཁྱེད་ཀྱིས་ཤེས་སམ་ཀྱེ།།

ཉལ་བའི་རྨི་ལམ་འཁྲུག་ཅིང་འཐབ་པའི་དུས།།
མངོན་སུམ་སྣང་བ་སྟོང་བའི་ལེའུ་ལ།།
རྒྱུ་འབྲས་འཆོར་བའི་ལས་ཀྱི་བཀོད་པ་དེ།།
ཁྱེད་དང་འབྲེལ་བ་ཁྱེད་ཀྱིས་ཤེས་སམ་ཀྱེ།།

མཚན་མོའི་ཟླ་བ་མཚོ་ལ་ལྷུང་བའི་དུས།།
ཡིད་ཀྱི་སྐར་མ་མཁའ་ནས་འཐོར་བ་ལ།།
ཙག་གི་དཀྲུམ་མདའ་རུས་ལ་ཟུག་པ་དེ།།
ཁྱེད་དང་འབྲེལ་བ་ཁྱེད་ཀྱིས་ཤེས་སམ་ཀྱེ།།

རུས་པའི་ལྷུ་ཆུང་འཐོར་ཏེ་ཆད་པའི་དུས།།
རྩ་གནད་གྲིམ་པོའི་རྐྱ་ཁ་ཞིག་པ་ལ།།
ཚེ་ཡི་རྨུ་ཐག་ལས་ཀྱིས་བཅད་པ་དེ།།
ཁྱེད་དང་འབྲེལ་བ་ཁྱེད་ཀྱིས་ཤེས་སམ་ཀྱེ།།

རྣམ་ཤེས་རྩྭ་སྐྱ་རླུང་གིས་ཟ་བའི་དུས།།
དྲན་པའི་ཞེན་ཆགས་དུར་དུ་འཁོར་བ་ལ།།
བྱ་རྒོད་མིག་ཆུ་ཐིགས་པའི་མྱ་ངན་དེ།།
ཁྱེད་དང་འབྲེལ་བ་ཁྱེད་ཀྱིས་ཤེས་སམ་ཀྱེ།།

གནམ་དང་ས་གཞི་བར་གྱིས་ཆོད་པའི་དུས།།
ཆགས་དང་ཞེན་པའི་སྟོབས་ཀྱིས་སྦྲེལ་བ་ལ།།
རིགས་དྲུག་མྱ་ངན་མཚོན་གྱིས་རྨས་པ་དེ།།
ཁྱེད་དང་འབྲེལ་བ་ཁྱེད་ཀྱིས་ཤེས་སམ་ཀྱེ།།

                                          ཆང་མ་ཟླ་བ་སྒྲོན།

དགུན་འདིའི་རླུང་བུ་བཙན་ནམ་ཅི།།
ཟླ་བའི་སྙིང་གཏམ་བསིལ་ལམ་ཅི།།
ལུས་ཀྱི་བ་སྤུ་གཡོ་བ་ལ།།
སེམས་པའི་རྟ་ཕོ་འདྲོགས་པ་ལ།།

ཆང་གི་བདུད་རྩི་ཞིམ་པ་ལ།།
བདུད་རྩིའི་བཅུད་འདི་སྣུམ་པ་ལ།།
འཐུང་རོགས་ཟླ་བ་བསིལ་བ་ལ།།
སྤྱན་གྱི་བཟི་ཁ་དེ་བས་བསིལ།།

ཕར་ལྟས་འཛུམ་ཆུང་གྲོལ་བ་ལ།།
ཆང་ཁའི་རོལ་དབྱངས་སྙན་པ་ལ།།
དབྱངས་རྟ་འཁྱུག་པ་གྱ་གྱུ་ལ།།
ཟླ་བའི་འོད་ཀྱིས་ཞུགས་པ་ལ།།

ཚུར་ལྟས་མིག་ལས་མཐོང་པ་ལ།།
ཆང་ཕོར་སྙིང་གཏམ་ལྟེམས་པ་ལ།།
སྙིང་གི་ཕྱེད་ཀ་འཕྱུར་བ་ལ།།
ལྦུ་བའི་འོ་མ་དཀར་བ་ལ།།
འཐུང་རོགས་བཞེས་རོགས་ཟླ་བ་ལགས།།

ཆང་ཁང་གློག་འོད་ཁྲ་ཁྲ་ལ།།
སེམས་པ་ཁྲ་ཁྲ་མ་མདུད་ལགས།།
ཁྲ་ཁྲའི་ནང་གི་ཆང་ཕོར་ལ།།
གློ་བ་ཁྲ་ཁྲ་མི་འདུག་ལགས།།

ཆང་ལ་ཧུབ་ཀྱིས་མཆོད་པ་ལ།།
བརྩེ་བ་དལ་གྱིས་བཞེས་པ་ལ།།
སུ་དང་གང་ལ་མ་བཅོལ་ལ།།
སྲ་མོ་བྲག་ལ་བཅོལ་ཡོད་ལ།།

སེམས་པའི་ལྡེབས་སུ་བྲིས་པ་ལ།།
ཁྲག་གི་བཅུད་དུ་བཏུམས་པ་ལ།།
ལས་ཀྱི་ཟླ་བ་གཅིག་པུ་ལ།།
མཚན་མའི་དབྱངས་སུ་འཚེར་བ་ལ།།
སྒོ་དང་སྒེའུ་ཁུང་གསལ་བ་ལ།།
ནང་གི་མེ་ཏོག་གྲོལ་བ་ལ།།
སྟེང་གི་ཕྱེ་ལེབ་སྤྲོ་བ་ལ།།

ཟླ་བ་ཟླ་བ་ཆང་མ་ལ།།
ཆང་མ་ཟླ་བ་སྒྲོལ་མ་ལ།།
ཆང་ཕོར་མཐོར་རུ་བཏེགས་པ།།
བརྩེ་བའི་དགུ་ཚིགས་གྲུབ་པ་ལ།།
ཉི་ཟླ་བར་དུ་ཚེས་པ་ལ།།
ཟླ་བ་ཟླ་བ་ཆང་མ་ལ།།
ཆང་མ་ཟླ་བ་སྒྲོལ་མ་ལ།།

             ཤིན་ཏུ་ར་བཟི་བའི་མཚན་མོ་ཞིག་ལ་ཆང་མ་ཟླ་སྒྲོལ་འབོད་པའི་ གནས་མོ་དེ་ལ། 2014.11.21ཉིན་ལྷ་ས་ནས་བྲིས། 2015.9.16ཉིན་བཅོས།

                                          སེམས་ངོ་འཕྲོད་པ་མ་བྱུང་།

དེང་མ་ལམ་ནས་ཐུག་པས།། 
ཚུར་ལ་འཛུམ་ཆུང་བསྟན་སོང་།།
འགྲོ་ཞོར་ཕྱིར་མིག་འཕངས་པ།། 
ལམ་ཐུག་ལས་ཀྱིས་མདུད་བྱུང་།།

ཁ་པར་སྣེ་ནས་ཕྲད་པ།།
དེ་འདྲའི་འདྲེས་རྒྱུ་མ་བྱུང་།།
འགྲོ་ཞོར་སྒོ་ནས་ཕྲད་པས།།
མཁུར་རྩ་དམར་པོ་ཆགས་སོང་།།

ཚོར་བ་མི་འདུག་མ་གསུང་།། 
མིག་གི་ནང་ན་གསལ་ཡོད།།
ལག་པ་ཚུར་སྲིངས་ཞུས་པས།།
ལུས་པོ་འདར་ཙམ་བྱས་སོང་།།

ཕ་ཡུལ་ག་ནས་དྲིས་པས།།
མཆུ་ཤ་འགུལ་ཙམ་བྱས་སོང་།།
མཆུ་ལ་དམར་ཤ་ཆགས་པས།།
ཡིད་ལ་ན་བ་བྱུང་སོང་།།

མིག་གིས་ཕར་ལ་ལྟས་པས།།
མགོ་བོ་བྲང་ལ་སྨད་སོང་།།
མགོ་བོ་དགྱེ་རོགས་ཞུས་པས།།
ཚུར་ལ་ལྟ་ཙམ་གནང་སོང་།།

མིག་ལ་ཆ་ག་ཆགས་པས།།
སྤང་གི་ཤྭ་བ་དྲན་གི།
ཤྭ་བའི་སྤུ་མདངས་མཛེས་པ།།
མིག་གི་སྐད་ཆར་འཐིམ་ཡོད།།

མིན་ན་འགྲོ་ཞེས་ཞུས་པས།།
དབུ་ལྕོག་ལྡེམ་ལྡེམ་བྱས་བྱུང་།།
གྲོང་མཐའི་ཟམ་པ་བརྒལ་པས།།
སེམས་པ་ལྷོད་ཙམ་བྱུང་སོང་།།

ཟམ་པ་ཨ་ལོང་དགུ་སྦྲེལ།།
ཟམ་རྡོ་གཡའ་མ་བཀྲ་ཤིས།།
ཟམ་སྟེང་ཕོ་མོ་ཆ་འགྲིག།
ཨ་འགྲིག་བསོད་ནམས་རང་འགྲིག།

གོམ་པ་མཉམ་དུ་བཤུབ་པས།།  
ཆུ་ནང་ཉ་མོ་སྤྲོ་སོང་།། 
ལག་པས་ལག་པ་བཟུང་པས།། 
མེ་ཏོག་འདབ་མ་གྲོལ་སོང་།།   

སྤྲིན་པ་ལྷོ་བཞུད་ཅིག་ལ།།
བརྩེ་བའི་དམ་ཚིགས་བསྐུར་ཡོད།།
བུ་མོ་ཞེ་མཐུན་དེ་ལ།།
སེམས་ཀྱི་ལམ་ཡིག་བསྟན་ཡོད།།

དེའུ་འབུར་ཆུང་ཆུང་སྒང་ལ།།
གོམ་འགྲོས་མཉམ་པོར་བཞག་ཡོད།།
སྒང་གི་བསིལ་རླུང་འཇམ་པོར།།
བརྩེ་བའི་འོ་ཆུང་བྱས་ཡོད།།

འོ་ལ་འོ་དྲི་བྲོ་བ།།
འབྲོག་མོའི་ལུས་དྲི་ལོས་ཡིན།།
ལུས་པོ་ལུས་པོར་གླན་པ།།
རང་རང་སེམས་སུ་སྦས་ཡོད།

སེམས་སུ་ཆར་བ་བབས་པས།།
ལྗང་མྱུག་གསར་དུ་འབུས་ཡོད།།
ལྗང་མྱུག་འབུས་པའི་སྒང་ལ།།
སད་དང་སེར་བ་བབས་མེད།།

ཉི་ཞག་ཁ་ཤས་ཤིག་ལ།།
ཁ་པར་འཕྲོད་པ་མ་བྱུང་།།
ས་ཆ་གང་ཡིན་མ་གོ།
ག་ཤེད་གནས་པ་མ་ཚོར།།

ངོ་ཤེས་བློ་གཏད་རེ་ལ།།
སྐད་ཆ་ཚིག་གསུམ་བསྐུར་བ།།
མོ་ལ་ཤོད་ཅེས་ཞུས་ཡོད།།
ལན་ཞིག་གསུང་རོགས་ཞུས་ཡོད།།

མི་འགྲིག་སྐད་ཅིག་དགོས་རེད།།
མི་བཟང་ལན་ཞིག་དགོས་རེད།།
མི་བཟང་མི་འགྲིག་མེད་ན།།
མི་འགྲིག་བསམ་པ་ངར་མེད།།

ནམ་ཟླ་ཇེ་འཁྱག་སོང་བས།།
སེམས་ཀྱང་ཇེ་གྲང་རེད་ཐ།།
སྙིང་གྲོགས་དྲན་དང་མ་དྲན།།
ལུས་ཀྱི་ཤ་ལ་ལྟོས་དང་།།

སེམས་པ་ཕར་ཕྱོགས་ཤིག་ལ།།
སེམས་གཏམ་ཚུར་ཡོང་མེད་ན།།
དེང་མ་མ་འགྲིག་ཆོག་ག།
སེམས་པ་སྐྱོ་དོན་མེད་ག།

པ་ཏྲའི་རི་མོ་ཟེར་བ།།
བརྩེ་བའི་ལམ་ཐིག་ཡིན་ཟེར།།
ལམ་ལ་གྱ་གྱུ་མང་པ།།
རི་མོ་དེ་དང་འདྲ་བྱུང་།།

དཀར་ཡོལ་འབྲུག་རིས་ཤིག་ལ།།
འོ་ཇའི་ཕུད་ཅིག་བཏང་ཡོད།།
འཐུང་རོགས་སོ་ཞོ་དཀར་པོ།།
ག་ཤེད་སྐྱིད་ནས་ཡོད་དམ།།

ཇ་འདི་གསོལ་རོགས་ཞུས་པས།།
ཇ་སྙིགས་མང་སོང་མ་ཞུ།།
ཇ་ཤིང་མེ་ཏོག་སྟེང་ལ།།
འདས་པའི་ལོ་ཟླ་བརྐོས་ཡོད།།

ལོ་ལ་ལོ་ཆང་བསྙལ་ཡོད།།
ཆང་ལ་བདུད་རྩི་ཕབས་ཡོད།།
བདུད་རྩི་སོར་གྱིས་བཏེགས་ཡོད།།
གནམ་སའི་བར་ལ་བཏེགས་ཡོད།།

                                         སྤང་ནས་མེ་ཏོག་འཐུ་རོགས་གཡང་དཀར་ལུག

ལ་མོ་རི་དེ་བརྒལ་བའི་ངལ་དུབ་ཚེ།།
ལུས་པོ་སྤང་ལ་བཞག་ཏེ་མེ་ཏོག་བཏུས།།
ལུག་ཆུང་མཆོང་ལ་ལྡིང་བས་སུག་པ་ཡིས།།
མེ་ཏོག་སྐེད་པ་བཅད་དེ་ང་ལ་བལྟ།།

གློ་བུར་ལམ་གྱི་རླུང་བུ་ལས་ལ་འཁྱུད།
མེ་ཏོག་དྲི་ངད་སེམས་ཀྱི་ཕུགས་སུ་འཛུལ།།
ཀྱེ་མ་ཕ་གིའི་གླུ་ཡང་རྣ་ལ་འཐིམ།།
ལུས་སེམས་རབ་ཏུ་སྨྱོས་ཏེ་སྒང་ལ་བུད།
རི་སྐེད་གླུ་བ་དེ་ལ་གླུ་ལེན་ཕུལ།།
ལུག་ཁྱུ་སྐྱེངས་པའི་ཚུལ་གྱིས་ཞོགས་ནས་ཐལ།།

གོམ་གསུམ་རྡོག་པ་བླངས་ཚེ་རླུང་གི་ཡང་།།
འུར་ཆ་ཀླད་ལ་སྐོར་བའི་བར་གླགས་དེར།།
གནམ་གྱི་སྐར་མ་འཐོར་ཏེ་རུམ་ལ་ལྷུང་།།
ལུག་ཁྱུ་རི་ལས་བབས་ཏེ་རང་ཁྱིམ་སྙེགས།།

ཀྱེ་མ་ལང་ཚོ་འུར་ཆའི་སྣེ་ནས་བསྐོར།།
འཁོར་བའི་ཐབ་རྡོ་གསུམ་གྱི་འབེན་ལ་ཕོག།

ཞོགས་ཉི་གདོང་གི་དམར་ལ་ཕོག་ཙ་ན།
ལུས་པོ་སྒུར་སྒུར་བཞོ་དབྱངས་འཐེན་ནས་ཡོད།
དབྱངས་ཀྱི་སྤྲིས་མ་འོ་མའི་ཁ་ལ་ལྟེམས།།
ལུས་སེམས་གཉིས་ཀ་གཡང་གི་གཞིས་ལ་འཁོར།།

འཁོར་བའི་ལོངས་སྤྱོད་རང་ལ་ཉེ་ཚུལ་དང་།།
སེམས་ཀྱི་ལག་པ་ཉི་མར་བསྲིངས་པ་དེ།།
ལས་ཀྱི་མེ་ལོང་གདོང་ལ་འཆར་ཚུལ་གཉིས།།
ལུག་དང་མེ་ཏོག་སྤང་ལ་འཐིམ་ཚུལ་ལོ།།།
ཆུ་དང་ཆར་བ་གཅིག་དུ་འདྲེས་ཚུལ་ལོ།།།

                   2015-7-4ཉིན།

                                                                       རྩོམ་སྒྲིག་པ། ལྷ་སྐྱིད།

                                                                                 
                                                                                                   (མཆོད་མེའི་པར་དབང་གཞན་གྱིས་དགོལ་མི་རུང)

རྩོམ་ཁུངས། ངེད་དྲ་བ།