གཟིམས་པ་མེད་པའི་མཆོད་མེ། དབྱངས་གསལ་སོ་བཞིའི་མཛེས་སྡུག  RSSསྔོན་མངག

གྱེས་གཏམ་བུང་བ་གཞོན་ནུའི་སྨྲེང་གླུ།

2018-02-10 11:47:29 གཅན་མེ་ཏོག(གཅན་ཚ) ཀློག་གྲངས། མཆན ཡོད།

ཀ་རྡོ་ལྟར་བརྟན་འགྱུར་མེད་ཕུགས་འདུན་བློ།།
ཁ་མིན་ཞེ་ལ་བཅགས་ནས་གནམ་གྱི་མཐའ།།
ག་ལེར་གཏེར་ལེན་ཁ་ལ་ཡོང་དུས་དེར།།
ང་ནི་ལང་ཚོས་སྙེམས་པའི་བུ་མོ་ཞིག །

ཅ་དག་གཞུང་སྒྲུབ་ཁང་བཟང་ཡངས་པོའི་ནང་།།
ཆ་མེད་ལས་གྲོགས་ཚོ་དང་ཉེར་འདྲིས་ཤིང་།།
ཇ་རྒོད་འཐུང་བཞིན་ཉི་མ་འཁྱོལ་བའི་ཚུལ།།
ཉ་ཉོག་དེ་དག་དྲན་ཚེ་ཉམས་རེ་དགའ།།

ཏ་རེན་དཔོན་པོར་སྤྲེལ་ལད་མ་བསྟན་ཞིང་།།
ཐ་ཆད་གསུག་རྔན་མནོག་མོ་མ་བརྫངས་པས།།  
ད་ལྟ་ད་དུང་ཕལ་བར་ལུས་པ་འདི།།
ན་ཆུང་གསར་འབྱོར་མདུན་དུ་ངོ་སོ་ཆུང་།།

པ་སངས་མདངས་ལས་དཀར་བའི་ལྷག་བསམ་གྱིས།།
ཕ་སྐད་སྤེལ་བའི་ལོ་ཙཱའི་བྱ་གཞག་ཆེའི།།  
བ་དན་བསྒྲེང་བར་རང་ནུས་འདོན་འདོད་ལ།།
མ་རངས་ཕྲག་དོག་ཚིག་མདས་ཡང་ཡང་གཞོམ།།

ཙ་རིའི་དཔངས་ཀྱི་གཞོན་སྣང་འགྲིབ་ན་ཡང་།།
ཚ་གྲང་འཁོར་བའི་གཏན་གྲོགས་མ་འཕྲད་ལུས།།   
ཛ་ཛོར་ལས་ཀྱིས་མི་ཚེའི་ཉིན་གུང་ཡོལ།།   
ཝ་ལེར་བསམ་ན་དོན་གྱི་སྙིང་བོས་སྟོངས།།

ཞྭ་གོས་གང་ཡག་མ་གོན་བསམ་པ་མེད།།   
ཟ་མ་གང་ཞིམ་མ་ཟོས་ཕངས་སྣང་མེད།།  
འ་འུར་ཀློང་ནས་ཚེ་ལྷག་འཛད་པ་ལས།།  
ཡ་མེད་ང་ནི་ཡུལ་ལ་ལོག་པར་རན།།

ར་ལུག་འབའ་སྒྲའི་དབྱངས་ཀྱིས་སྐྱོར་བ་ཡི།།
ལ་ལུང་གཤིན་སའི་འབྲུ་དྲུག་སྙེ་མ་ལྡེམ།།  
ཤ་ཉེ་མིང་སྲིང་འཛོམས་པའི་ཡུལ་ལ་འགྲོ།།
ས་མཐའི་གཏེར་ལེན་ཁ་ཁྱོད་བདེ་མོ་བྱོས།།

ཧ་ལམ་བགྲང་བྱ་བཅུ་ཕྲག་གཅིག་གི་ཡུན།།  
ཨ་མདོ་ཆུ་ལྷའི་ཕྱོགས་ཀྱི་ས་འདིར་ལུས།།
ཧ་ཅང་འཁྲེང་བའི་ཕྱིར་མིག་གཉོམ་པོ་འདི།།
ཨ་སྡུག་ང་ཡིས་གྱེས་ཁའི་རྟེན་དུ་འཇོག།
 
           གཏེར་ལེན་ཁ་ནས་ལས་གནས་སྤོར་ཏེ་ཕ་ཡུལ་དུ་ལོག་པར་ལམ་ལ་ཆས་དུས།  འཁྲེང་ལ་སྨྲེང་བའི་ཚོར་བ་ཞིག་གིས་བསྐུལ་ཏེ་རྩོམ་ཐུང་འདི་ཤར་མར་བྲིས།  


རྩོམ་སྒྲིག་པ། དབང་མོ།

(མཆོད་མེའི་པར་དབང་གཞན་གྱིས་དགོལ་མི་རུང)


རྩོམ་ཁུངས། ངེད་དྲ་བ།

དཔྱད་མཆན ཡོངས་སུ་གཟིགས།དཔྱད་མཆན།

མིང་མི་འགོད་པར་སྤེལ།