གཟིམས་པ་མེད་པའི་མཆོད་མེ། དབྱངས་གསལ་སོ་བཞིའི་མཛེས་སྡུག  RSSསྔོན་མངག

བདེ་བར་གཤེགས་པའི་སྨོན་ལམ།(ཞར་བཀོད་གཅིག་ཡོད)

2018-08-27 16:05:40 གཡུ་སྒང་དཔལ་ལྡན། ཀློག་གྲངས། མཆན ཡོད།


གང་ལ་གང་མཁོ་དེ་ལ་དེ་ཡི་ཆེད།།
རིགས་དང་རུས་པ་མི་དབྱེ་སྟོན་མཛད་པ།།
འཁོར་བ་ཡང་དག་བདེ་བར་གཤེགས་མཛད་པ།།
ང་ཡི་དགེ་རྒན་དེ་ལ་གུས་པས་འདུད།།
 
སུ་ཡི་མགོན་དང་གང་གི་སྐྱབས་སུ་བཀན།།
སུ་ལ་མེད་དང་མུག་གི་དབུལ་བ་ན།།
ལམ་དང་གྲོགས་ཀྱིས་རོགས་དང་རམ་འདེགས་མཛད།།
ང་ཡི་དགེ་རྒན་དེ་ལ་ཕྱག་འཚལ་ལོ།།
 
དད་པ་ཡོད་མེད་མི་བལྟ་ཀུན་ལ་འགྲིག།
གྲུབ་མཐའ་གཙོ་མིན་མི་ཕྱེ་ཚང་མར་འཕྲོད།།
མི་ཡི་ཚུགས་ཀར་དང་དོད་མི་དབྱེ་བ།།
ལུས་དང་སྲོག་གི་བསྟན་པ་ཁྱེད་ལ་བཅོལ།།
 
འཁོར་ནི་གཙོ་བོ་མི་བྱ་རིགས་ཀྱི་བུ།།
ལུགས་ནི་ཞེད་པས་མི་འཛིན་འཁོར་བའི་བུ།།
སྨད་པས་མི་ཐུབ་བསྟོད་པས་མི་ཁེངས་པ།།
འཇིག་རྟེན་རྒད་པོ་ཁྱེད་ལ་ཡིད་རང་མཛའ།།
 
དད་པས་གླེན་རྟགས་མི་ཕུད་ཤ་གཅུ་བརྒྱག།
གློ་བུར་བ་སྤུ་མི་གཡོ་ལུས་ཀྱིས་གཅོག།
ཀླད་པས་མཆུམས་པ་དེ་རྩ་མོ་མིན།།
ཕུང་བོས་ནོན་པ་དེ་ཡང་ཨུ་ཚུགས་མིན།།
 
དྲི་མ་སེམས་སུ་གསལ་ཞིང་སེམས་སུ་འདུལ།།
རྣམ་རྟོག་བྲང་ཁར་ཡེངས་ཞིང་བྲང་ཁར་བཀྲམ།།
ཚུགས་ཀ་མྱོས་བུམ་ཅན་གྱི་སྟོན་པ་གན།།
ཞི་དུལ་གཉིས་ཀ་སྒོམ་སྟེ་བདེ་བར་ཕེབས།།
 
སྟོང་བ་ག་ལེར་ཡེངས་ཤིང་ག་ལེར་སངས།།
དྲི་བྲལ་ག་ལེར་འབྱར་ཞིང་ག་ལེར་འཐོར།།
འཁོར་བ་མེད་དགག་མི་བལྟ་དགག་སྒྲའི་དགྲ།།
མཛད་པ་མེད་མུག་མི་སྟོན་བདག་སྒྲའི་དགྲ།།

                    
                      སྨུག་པའི་ལྭ་བ་རློན་པ།

 

སྒེའུ་ཁུང་ཕྱེད་ཙམ་རླངས་པས་ཟིན་ཏེ་མདུན་གྱི་ནགས་ཚལ་ཕྱེད་ཙམ་མཐོང་།།
ཤྭ་ཕོ་འདྲོགས་ཏེ་ལོ་འདབ་ཤག་ཤག་སྨུག་པ་རྒྱབ་རིའི་ཤོད་དུ་རྒྱུ།། 


གྲིབ་མ་གོན་པའི་དེའུ་འབུར་ངོས་སུ་མིག་ཆུ་ཞོགས་པའི་བར་སྐབས་དེར །།
ནམ་མཁའ་ལྟ་བུའི་ཁང་བའི་ནང་དུ་སྤྲིན་གྱི་ཡི་གེ་དུམ་བུར་ཆད །།
 
ཉག་ག་གན་གྱི་ཕར་ངོས་ཤིག་ནས་བུ་མོ་ཟླ་བ་འཛུམ་སེ་ཤར །།
ཐུ་སྣེ་མཚོ་ངོར་དལ་གྱིས་དྲུད་དེ་ཆུ་ངོར་ཞབས་རྗེས་ཤར་སེ་འཐེན །།
རི་བོའི་རྩེ་མོ་འདུན་པ་བྱས་ཡོད་ཆུ་ཡི་མེ་ལོང་སེམས་པ་བྱས །།
གྲིབ་གཟུགས་འཐེན་པའི་རྩྭི་ཤིང་གན་ལ་ཁེན་ནས་ཁྱེད་ལ་ཡུན་རིང་ཅེར །།
 
མིག་ཟུང་གོར་གོར་ཁྱེད་ཀྱིས་བཀང་ཞིང་སྐྲ་འདབས་རླུང་བུས་ཡོམ་ཡོམ་བསྒུལ།།
ལག་པ་ཕྲ་མོས་ཁྱེད་ཉིད་བསྐྱོར་ཞིང་བ་སྤུ་རླན་གྱིས་ཤག་སེ་ཤག།།
ང་ཡི་གདོང་བ་དམར་བོར་གྱུར་ཏེ་མཚམས་སྤྲིན་ཁོངས་སུ་དལ་གྱིས་ཡལ།།
ཡི་གེ་མིན་པའི་སྲོག་རྩ་གན་ནི་སྙིང་གི་ཞབས་ལ་ཁྲིགས་སེ་འཕྲོད།།


རྩོམ་སྒྲིག་པ། གངས་དགའ།

(མཆོད་མེའི་པར་དབང་གཞན་གྱིས་དགོལ་མི་རུང)


རྩོམ་ཁུངས། ངེད་དྲ་བ།

དཔྱད་མཆན ཡོངས་སུ་གཟིགས།དཔྱད་མཆན།

མིང་མི་འགོད་པར་སྤེལ།