གཟིམས་པ་མེད་པའི་མཆོད་མེ། དབྱངས་གསལ་སོ་བཞིའི་མཛེས་སྡུག  RSSསྔོན་མངག

རྨེ་སྤྲུལ་བསྟན་འཛིན་རྒྱ་མཚོའི་སྙན་ངག་ཚན་པ་གསུམ།

2018-11-24 13:59:55 རྨེ་སྤྲུལ་བསྟན་འཛིན་རྒྱ་མཚོ། ཀློག་གྲངས། མཆན ཡོད།
                                          མདོ་དབུས་བར་གྱི་བརྐྱང་ཕྱག

ངལ་བའི་རྔུལ་ཆུའི་ཐིགས་པ་ས་ལ་གཏོར།།
ཧལ་ཧལ་དབུགས་ཀྱི་རྒྱུ་བ་རླུང་ལ་བྱིན།།
འདོམ་གང་ལུས་ཀྱི་ལྷ་ཕྱག་བསྟུད་མ་ཡིས།།
རི་ཆུ་སྟོང་ཕྲག་བརྒལ་ནས་གང་དུ་བསྐྱོད།།

འཕྲུལ་གྱི་འཁོར་ལོས་གཙུབས་པའི་རྡུལ་རླུང་ཁྲོད།།
རལ་བའི་ཟར་བུ་གཡོ་བའི་སྐྱ་བསེར་གཟུགས།།
ཡང་ཡང་དགྱེ་ཞིང་རྒུ་བའི་གཟུགས་བརྙན་འདི།།
བདག་གི་ཡིད་ལ་རི་མོ་བྲིས་པ་བཞིན།།

གྲོང་སྡེ་ཆུང་ངུ་ཞིག་གི་ཕང་བ་ནས།།
སྙིང་སྟོབས་ཆེན་པོ་ཞིག་གི་གོ་བགོས་ཏེ།།
ཆུ་བོ་དམའ་མོ་ཞིག་གི་འགྲམ་ངོགས་ནས།།
ལ་མོ་མཐོན་པོ་ཞིག་གི་ཕྱོགས་སུ་ཐེག།

གནམ་གྱི་གྲུ་དང་ས་ཡི་འཕྲུལ་འཁོར་ལས།།
གང་འདོད་གནས་སུ་ཡུད་ཀྱིས་བསྐྱོད་པའི་དུས།།
ཐག་རིང་རྒྱང་ལམ་སྲིན་བུའི་ནུར་འགྲོས་ཀྱིས།།
བགྲོད་པ་གླེན་དགུའི་དྭངས་མར་བརྩི་སྲིད་མོད།།

རྒྱང་གྲགས་སྟོང་ཕྲག་བརྒལ་བའི་མདོ་དབུས་བར།།
ཡན་ལག་ལྔ་ཡིས་བྲིས་པའི་རི་མོ་ཡིས།།
ཡུག་གཅིག་ཁེབས་པར་བྱས་པའི་ངོ་མཚར་གྱིས།།
ཆོས་ལྡན་བོད་མིའི་ཁྱད་ཆོས་ཅིས་མི་མཚོན།།

ཤ་ཐང་ཆད་པའི་ལུས་ཀྱི་ལྷུ་ཚིགས་རེར།།
ན་ཟུག་ཁོལ་བུར་ལྡང་བའི་ཚོར་བ་དང་།།
ཟུངས་ཀྱིས་བཏང་བའི་རུས་པའི་འཕྲུལ་འཁོར་རེར།།
དུབ་པའི་རེག་བྱ་རྩུབ་མོ་ཁུར་དུ་བྱས།།

ཉིན་མོའི་སྣང་བ་རྨི་ལམ་ངོགས་ནས་གསལ།།
མཚན་མོའི་རྨི་ལམ་ཉིན་མོའི་ངོགས་ནས་མཐོང་།།
ཉིན་མཚན་ཀུན་ཏུ་དྲན་པའི་མེ་ལོང་དུ།།
དབུས་ལྗོངས་ལྷ་སའི་སྣང་བརྙན་གསལ་ཞིང་འགྲོ།།

བདོག་པའི་དངོས་པོ་ཅི་ཡང་མ་མཆིས་ཀྱང་།།
རྐང་གི་ཁོང་ནས་རྡོལ་བའི་དད་པ་དང་།།
རྒྱང་ལམ་ཕྱག་གིས་བཅད་པའི་དཀའ་སྤྱད་འདི།།
ཇོ་ཤཱཀ་དགྱེས་པའི་མཇལ་དར་དོད་པོ་ལགས།།

ཤིན་ཏུ་བདེན་ནོ་ལམ་ཐག་ཤིན་ཏུ་རིང་།།
ད་དུང་ཁྱུད་འཁོར་ལོས་ཀྱང་མི་སླེབས་པས།།
ཇི་ལྟ་ཇི་ལྟར་ཚུལ་འདི་རྣམ་བསམས་པ།།
དེ་ལྟ་དེ་ལྟར་བདག་ཡིད་རྣམ་པར་འགུལ།།

མཚུན་གྱི་རྗེ་བོས་གདོས་བཅས་བེམ་གོག་ཏུ།།
ཡུད་ཀྱིས་བསྒྱུར་ཚེ་ཅིར་ཡང་བྱར་མེད་ཀྱིས།།
རང་དབང་ཡོད་དུས་ཤ་ཁྲག་ལུས་འདི་ལ།།
སྙིང་པོ་ལེན་པར་བསྔགས་བརྗོད་ལོས་བགྱི་སྟེ།།

ཆུ་སྣ་བྲག་ལ་ཐུག་པའི་གཅོང་རོང་དང་།།
བྱང་རླུང་བྱེ་མེར་འཐམས་པའི་ངམ་ཐང་དང་།།
ཨར་ཇོ་འགྲོས་ཁ་རྒོད་པའི་རི་ལུང་སོགས།།
གདོང་ལེན་དགོས་པའི་ཉེན་ཁ་ཆེས་ཆེར་བདོ།།

རླངས་འཁོར་ཆེ་རིགས་རི་བོ་ནུར་བ་བཞིན།།
རླངས་འཁོར་ཆུང་རིགས་སྐར་མདའ་རྒྱུག་པ་བཞིན།།
སྦག་སྦག་འཁོར་ལོ་ཉག་ཕྲན་ཡལ་བ་བཞིན།།
གཞུང་ལམ་སྟེང་ནས་ཐུགས་གཟབ་ཅིས་ཀྱང་མཛོད།།

མ་འདྲིས་གློ་བུར་མཇལ་བའི་གྲོགས་པོ་ཁྱོད།།
དུས་ལ་སྡོད་པ་མེད་ཀྱིས་ད་ནི་ཕེབས།།
ཉམ་ང་བ་དང་འཚེ་བས་ཡོངས་དབེན་ཏེ།།
བགྲོད་པའི་ལམ་ནི་རྣམ་པར་ཤེས་གྱུར་ཅིག།

གངས་ཅན་ལྷ་ལྡན་སྙིང་གི་གྲོང་ཁྱེར་གྱིས།།
བོད་ཕྲུག་ཁྱོད་རང་སྒུག་ཡུན་མི་རིང་ཞིང་།།
རྒྱལ་བའི་ཞལ་སྐྱིན་སྐུ་ཚབ་རྣམ་གཉིས་ཀྱི།།
དགྱེས་ཞལ་སྐལ་བཟང་མིག་གིས་མྱུར་མཇལ་ཤོག།

                         ཅེས༢༠༠༤ལོའི་ཟླ༡༢ཚེས༡༥ ཉིན་ཁམས་ནས་ཨ་མདོར་བསྐྱོད་པའི་ལམ་བར་ཞིག་ནས་ལྷ་སར་བརྐྱང་ཕྱག་འཚལ་ཏེ་ཕེབས་མཁན་ཞིག་དང་འཕྲད་དེ་སྐད་ཆ་འགའ་གླེང་རྒྱུ་བྱུང་བ་རྣམས། ཕྱིར་དྲན་ཕྱིས་ཏེ། ༢༠༠༥ལོའི་ཟླ༡ཚེས༡༠ཉིན་ཡི་གེར་ཕབ་པའོ།།
 

                                           ཚེ་ཕྱི་མའི་བརྩེ་དུང་གི་ལས་སྐལ་ཞེས་པའི་གློག་བརྙན་ལ་བལྟས་རྗེས་ཀྱི་འཆར་སྣང་།

ཡིད་འོང་དབེན་པའི་རི་ངོགས་བྱང་ཆུབ་གྱི་དགོན་པར།།
མཚར་སྡུག་ཡིད་འཛིན་བུ་མོའི་དུངས་སེམས་ཀྱི་མེ་ཏོག།
ཁྲེལ་ལྡན་གཞུང་བཟང་བུ་ཡི་སྙིང་ག་རུ་བཞད་པས།།
ཅི་ཞིག་ལྟར་ན་བརྩེ་དུང་འདབ་བརྒྱ་དེ་གྲོལ་སོང་།།

རིགས་གཟུགས་ལང་ཚོ་གནམ་སའི་བར་ཐག་གིས་བཅད་ཀྱང་།།
མཉེན་གཤིན་སེམས་ཀྱི་འདུན་མ་གཞི་གཅིག་ལ་འབྲེལ་བའི།།
མུ་ཡུལ་རྣམ་ཤེས་ཟུང་གི་སྐྱིད་སྡུག་གི་ལས་བསྐོས།།
སེམས་ཆུང་ཤུགས་རིང་འབྱིན་པའི་རྒྱུ་རྐྱེན་དུ་གྱུར་འདུག།

སྡུག་སྣང་སྐྱིད་དུ་ཚོར་བའི་འདོད་གདུང་གི་བཟི་ཁ།།
རྗེས་ཆགས་དྲོད་ཁོལ་འབར་བའི་ལང་ཚོ་རུ་སིམ་སྟེ།།
མངར་སྐྱུར་བྲོ་བ་འདྲེས་པའི་འཇིག་རྟེན་གྱི་འཚོ་བ།།
གཞོན་ཆུང་མི་ཚེའི་སྙིང་གི་བདུད་རྩི་རུ་ཐོབ་ཀྱང་།།

མ་བཅོས་སྙིང་གི་གསང་གཏམ་ཟུར་མིག་ལ་འཁྱུད་ཅིང་།།
ལུས་སེམས་འོ་ཆུ་འདྲེས་པའི་ཉམས་དགའ་ཡི་སྣང་ཤས།།
དབང་ཆེན་དཔོན་པོའི་སེམས་ཀྱི་ཚེར་མ་རུ་མཐོང་ནས།།
མཐའ་མེད་ཆགས་སྒོ་འབོད་པའི་གཡབ་མོ་རུ་གྱུར་སོང་།།

འབྲལ་ཁའི་གདུང་བ་དྲག་པོ་སྙིང་ཁ་རུ་ཟུག་པས།།
སེམས་ཀྱི་རྨ་ཁ་གསར་བར་ན་ཚ་ཞིག་བསླངས་ཏེ།།
དབང་མེད་བཙན་གྱིས་དེད་པའི་གྱེས་བྲལ་གྱི་གདུང་བ།།
ཉམ་ཆུང་ཚེ་སྲོག་འཕྲོག་པའི་གཤེད་མ་རུ་ཆས་སོ།།

བཏབ་པའི་བྲོ་ཚིག་བོར་བའི་བརྡ་འཕྲིན་དེ་འབྱོར་བས།།
རེ་ཐག་བྲལ་བའི་སེམས་པ་ངེས་འབྱུང་ལ་ཕྱོགས་ཏེ།།
མགོ་སྐྱེས་ལྕང་ལོ་བྲེགས་པའི་གཙུག་ཕུད་ཀྱི་ཟར་བུ།།
ཡིད་གཅུགས་བུ་མོའི་སེམས་ཀྱི་དྲན་རྟེན་དུ་བསྐུར་སོང་།།

ཆར་ཞོད་ཆེ་བའི་མཚན་མོའི་སྨག་རུམ་གྱི་ཁྲོད་ནས།།
མཛའ་བོའི་མིང་ནས་འབོད་ཅིང་གདུང་ཡུས་ཀྱིས་མནར་བཞིན།།
འགྱེལ་མ་ལང་གི་གོམ་སྟབས་དབེན་རི་ལ་བསྒྱུར་ཡང་།།
དཀའ་ཐུབ་བརྟུལ་ཞུགས་བླངས་པའི་སྙིང་གྲོགས་དེ་མ་མཐོང་།།

ན་ཆུང་སེམས་ཀྱི་མེ་ཏོག་མི་ཡུལ་ནས་བྲལ་ཁར།།
བརྩེ་གདུང་མཆི་མ་འཁྱིལ་བའི་ཤི་མིག་གི་འོད་ཞགས།།
རྒྱང་རིང་འཇིག་རྟེན་ཕྱི་མའི་ཞིང་ཁམས་སུ་གཏད་ནས།།
ཚེ་རྟིང་མཉམ་འཛོམས་འོང་བའི་ལས་འཕྲོ་ཞིག་བསྒྱུར་ཡོད།།

མལ་གྱི་ཐ་མར་མནལ་བའི་ཉམ་ཆུང་གི་བུ་མོས།།
ཤི་གསོན་བར་དུ་སྤྲིངས་པའི་དུང་སེམས་ཀྱི་ཡིག་ཆུང་།།
ཕྱི་ཐག་རིང་བའི་གྲོགས་ཀྱི་སྤྱན་ལམ་དུ་འབྱོར་ཚེ།།
དྲན་གདུང་སྤུ་གྲིས་སྙིང་ག་འགས་སྙམ་ཞིག་ལོས་བྱེད།།

བག་དྲང་ལས་ཀྱི་རླུང་དམར་དྲག་པོ་ཡིས་བདས་པའི།།
སྐྱོ་མོའི་སྣང་བ་ཡད་ཡུད་ཕྱད་ཕྱོད་ཀྱི་ངོགས་ནས།།
ཤི་གསོན་ངོ་འཕྲད་བྱུང་བའི་དགའ་སྐྱོ་ཡི་མིག་ཆུ།།
བར་དོའི་འཇིག་རྟེན་ཁམས་ཀྱི་རི་ཀླུང་དུ་བབས་སོ།།

མི་ལོ་བརྒྱ་སྟོང་དུ་མའི་བར་ཐག་གིས་བསྐལ་ཡང་།།
འགྲོགས་པའི་ལས་སྐལ་སྒུག་པའི་བརྩེ་དུང་གི་སྐྱོར་གར།།
སྐྱེ་ཤིའི་ཕྲེང་བ་བརྒྱུད་པའི་ལམ་ཕྲན་གྱི་ངོགས་ནས།།
ད་དུང་ཕྱི་མིག་བགྲད་ན་ཐེངས་གཅིག་ལ་ལྟ་ངེས།།

                                            དམར་ཆུང་སེམས་པ་གཙང་པོའི་ཆུ་ལ་བསྐྱུར།

དམར་ཆུང་སེམས་པ་གཙང་པོའི་ཆུ་ལ་བསྐྱུར། །
རྒྱ་སེའི་མེ་ཏོག་ཐལ་བའི་གསེབ་ཏུ་བོར། །
གནག་སྣུམ་སྐྲ་ལོ་རལ་གྲིའི་ཟས་ལ་བྱིན། །
འཁོར་བའི་ཆོས་ལ་བཞི་ཤད་རྫོགས་ཚིག་བྲིས། །

གྱེས་ཁའི་ཕྱི་མིག་མདུན་ནས་རྒྱབ་ཏུ་འཕངས། །
ཕ་ཡུལ་རི་ལྗོངས་ན་བུན་གསེབ་ཏུ་བསྐྱུར། །
ན་གཞོན་ང་དང་སྟོན་གྱི་ཤིང་ལོ་གཉིས། །
ལས་ཀྱི་རླུང་གིས་ཕྱོགས་མེད་གནས་སུ་སྤུར། །

ནུབ་ཁའི་ཉི་འོད་གསེར་ཏོག་ངོས་སུ་འཁྱུད། །
བྱེའུ་ཆུང་འཇོལ་མོ་བྱ་འདབས་པང་དུ་བསྙེགས། །
དགུང་ཁའི་གཟིམ་དུང་དལ་གྱིས་གཉིད་དུ་ཡུར། །
ལྷིང་འཇགས་དགོན་པའི་མཚན་མོ་བག་རེ་ཕེབས། །

སྒེའུ་ཁུང་ནང་ནས་རྒྱང་རིང་ནམ་མཁའ་མཐོང་། །
ཚེས་བརྒྱད་ཟླ་བ་ཕྱེད་ཆས་བྲི་གྱུར་ཀྱང་། །
རབ་དགའི་ཆ་རྫོགས་ཡིད་ཀྱི་རི་བོང་ཅན། །
བློ་བདེའི་ལྷ་ལམ་ངོས་ན་འོད་དུ་འཚེར། །

གྲྭ་ཁང་ནང་གི་རྨི་ལམ་ཚོན་མ་ཡིས། །
སྤུ་ལོང་རྒྱས་པའི་ངེས་འབྱུང་སྙིང་ནས་བསླངས། །
ཞོགས་པའི་ཆོས་སྒྲ་དྲིལ་གཡེར་སྒྲ་དང་བསྡེབས། །
དགའ་སྐྱོ་འབྲེལ་བའི་མཆི་མ་སེམས་ལ་ལྷུང་། །

ཟླ་འོད་ཟིལ་དཀར་དལ་གྱིས་ལེན་པ་ཡི། །
མུ་འབྲེལ་གྲྭ་ཤག་བསྟར་བའི་ཁོར་ཡུག་ནས། །
ཞི་དུལ་དགེ་སྦྱོང་བཙུན་པའི་ཁྱུ་འཁྲིགས་པས། །
དད་བརྒྱའི་འདུན་མ་ཐར་བའི་ཕྱོགས་སུ་བསྒྱུར། །

འདས་དོན་འཁོར་བའི་སྣང་བརྙན་སོར་རྩེ་ཡིས། །
སྙན་ཚིག་གཟུགས་སུ་ཕབ་པའི་ཡིག་ཆུང་དེ། །
ན་བཟའ་དཀར་མོའི་ཁམས་སུ་རྒྱས་བཏབ་པས། །
སྙིང་གི་དབུས་སུ་བདེ་བའི་དྲོད་ཁོལ་འབར། །

མི་ཚེ་ཕྱེད་ཀྱི་ཡུན་ལ་བཙལ་བ་ཡི། །
ཞི་བའི་ཕ་ཁྱིམ་རྙེད་པའི་དགའ་བ་འདིས། །
ཡུན་རིང་དུབ་པའི་སེམས་ཉིད་ངལ་སོས་ཕྱིར། །
ད་ནི་མིག་ཟུང་ཟུམ་ཡང་འགྱོད་པ་ཅི། །

དབེན་གསུམ་རི་བོའི་ངོགས་སུ་གནས་བཅས་ནས། །
དབུ་སྐྱེས་ལོ་ཟླའི་ཚོན་གྱིས་དཀར་བ་ཡི། །
མཚུངས་བྲལ་བླ་མའི་རྗེས་ཞུགས་ཚེ་དང་ཆོས། །
སྙོམས་པའི་ཞེ་དམ་སྙིང་ལ་རི་མོར་འབྲི། །

དུར་ཁུང་ནང་གི་ཨ་མ་རྒན་མོ་དེས། །
ཕྱི་མའི་ཡུལ་ནས་དུང་བའི་ཤི་མིག་གིས། །
བུ་ཡི་ཆོས་ལམ་བསྙེགས་པའི་ལྟད་མོ་དེ། །
ཀྱེ་མ་དངོས་སུ་མཐོང་ན་དགའ་བ་ལ། །
 

རྩོམ་སྒྲིག་པ། དབང་མོ།

                 (མཆོད་མེའི་པར་དབང་གཞན་གྱིས་དགོལ་མི་རུང)    

 

རྩོམ་ཁུངས། ངེད་དྲ་བ།

དཔྱད་མཆན ཡོངས་སུ་གཟིགས།དཔྱད་མཆན།

མིང་མི་འགོད་པར་སྤེལ།