བཤེར་འཚོལ།
རྟོག་པའི་ཆིག་ལབ།
ཨོཾ༔
རྒྱལ་ཀུན་ཡེ་ཤེས་ཤེས་རབ་གཅིག་འདུས་དཔལ།།
ཟླ་བྲལ་ངག་རིག་རིག་མཛོད་མཁྱེན་པའི་གར།།
གཅིག་འདུས་འདུས་པ་སྨྲ་བའི་ཉི་མ་ཡིས།།
བྱིན་རླབས་རླབས་ཆེན་བྱང་ཆེན་ལམ་སྟོན་འཚལ།།
ལྷོད་མེད་རེ་དོག་སྟོང་གི་རྣམ་རྟོག་གིས།།
རང་གཞན་རྒྱལ་ཕམ་གཤིབ་པའི་ངལ་བ་འདི།།
མི་སྡུག་དུ༔ཁས་གཙེས་པའི་ས་བོན་ལ།།
ཆུ་གཤེར་དྲོད་ཀྱིས་རྐྱེན་བཞིན་མ་ལགས་སམ།།
སྐྲ་སེར་ཆང་ལ་སྲེད་དང་གདོང་དམར་པ།།
ཤ་ལ་རྔམ་པ་ཅི་བཞིན་གཉུག་མའི་གཤིས།།
མི་ཟིན་མཁས་གྲུབ་སྟོང་གི་གཙུག་སྐྱེས་སུ།།
ཞབས་སེན་འགོད་མ་སྙིང་གི་འཕར་ལྷེམ་ཡིན།།
ངག་རིག་རང་གཞན་ཡིད་གསོའི་ན་ཆུང་མར།།
ཚིག་སྦྱོར་དཀར་དམར་སྐག་གིས་བྱུག་བྱུག་ནས།།
རབ་ཕུལ་གཟི་བྱིན་སྟོང་གི་སྣང་སྟོང་གཟུགས།།
མཐོང་བའི་སྐལ་བཟང་དེ་ཀོ་རང་དུ་བྱོལ།།
ལྷན་སྐྱེས་ཤེས་རབ་རླུང་གིས་ཞགས་པ་ཡིས།།
བརྟན་གཡོའི་ཆོས་ཀུན་བསྡུ་བའི་རྩལ་མངའ་ན།།
དོན་དམ་དབྱངས་ཅན་སྒྱུ་མའི་སྐུ་ལུས་ཀུན།།
གཅེར་བུར་འབྲི་བའི་སྒྱུ་རྩལ་ངང་གིས་གྲུབ།།
ཚིག་འགྲོས་སྡེབ་སྦྱོར་ཙམ་ལ་འཐམ་པ་ཀུན།།
ཆོས་ཉིད་སྟོང་བའི་གསང་ལམ་མི་རྙེད་ཅིང་།།
གཞན་ཚིག་ཁ་སྐོང་ཕྲི་སྣོན་གཏོང་གཏོང་ནས།།
ཚིག་བཅད་རྐང་བཞི་འབྲི་ལ་མཛུབ་མོ་གཤེར།།
ལང་ཚོ་རྨད་བྱུང་ཟླ་བའི་སྒེག་འཕྲོག་པའི།།
བཞིན་བཟང་བརླ་སྒམ་ཙན་དན་དམར་པོའི་སྒོ།།
ཤིན་ཏུ་ཡངས་པ་སོ་སོར་སྐབས་ཕྱེས་ཏེ།།
ལྷན་སྐྱེས་རྡུལ་ཀྱང་པདྨའི་མཚོ་རུ་རྩེ།།
ཤང་ཤང་ཅ་ཅོ་སྒྲོག་མིན་སྙན་འགྱུར་གྱི།།
དྲི་ཟའི་འགྱུར་ཁུགས་སྟོང་གི་རོལ་མོ་ཡིས།།
ལྷ་དབང་གཡེར་བག་སྙེམ་པའི་ཟློས་གར་གྱིས།།
སྲོག་གི་གཟུངས་ཐག་ཁྱོད་སྐུའི་ལང་ཚོར་དཔྱང་།།
མཐོང་སྣང་མི་གཙང་རྡུལ་གྱི་རྩི་ཆགས་པ།།
ཡོངས་སུ་ཕྱེས་པའི་སྟོན་ཀའི་མཁའ་དབྱིངས་ཀྱི།།
ཆུ་ཁུར་ཚོགས་དག་བྱེར་བའི་རྗེས་ཤུལ་ན།།
ཟླ་བའི་ཞལ་བཟང་འགྲོས་ཅན་མཁའ་འགྲོ་མ།།
སྐྱེ་མང་གོམས་པའི་མཐུ་ལས་འདི་ངོགས་ཀྱི།།
ཉལ་བའི་སྔས་དང་ཡིད་ཀྱི་རྟེན་གཅིག་ཀྱེ།།
ངག་རིག་གསེར་གྱི་སྙིང་པོ་ཟེགས་པའི་རྡུལ།།
མོས་ལྡན་རྐང་དྲུག་མཉེས་པའི་སྟོན་མོར་སྨོན།།
མ་སྨིན་བིམ་པ་གསར་བའི་རོ་བཅུད་ཀྱིས།།
འགྲམ་པའི་ཆུ་ཡང་ཤོར་བའི་ངང་ཚུལ་དེས།།
རིག་འཛིན་རྒྱལ་པོའི་སྲས་ཡང་འདར་བྱེད་ན།།
བདག་བློ་བྱེའུ་ཆུང་འཕུར་ལྡིང་ཅིས་མི་བྱེད།།
ཨ༔
མི་བརྟན་བརྟན་པ་སྐད་ཅིག་མེད་ནའང་།།
སྣང་ཚོར་ཚོར་རྟོག་ཆོས་བརྒྱད་རྒྱུད་འབྱམ་པ།།
གཟུང་འཛིན་འཛི་པའི་འཆིང་རྒྱ་མི་གཏོང་བས།།
འདི་སྣང་སྣང་བ་བདེན་གྲུབ་གཤིས་སུ་རྒྱུ།།
སྒྱུ་ལུས་བྱེ་མའི་ཆང་བུ་ཇི་བཞིན་དུ།།
མི་བརྟན་སྡུག་ཀུན་ཤྭ་བ་རས་ཟིན་པས།།
འགོག་ལམ་ཉི་ཟླ་ཟུང་གི་སྣང་བ་ཡི།།
སྙིང་པོར་རེག་པ་དུས་ཀྱིས་ཡོངས་སུ་བསྐལ།།
མཚར་ཆགས་གཞན་ཡིད་འབིགས་པའི་མིག་མཚོན་གྱིས།།
གློ་སྙིང་མཆིན་པ་གསིལ་བའི་གསང་བ་ཞིག།
མི་ཚེའི་དགའ་སྐྱོ་སྤེལ་མའི་སྙིང་བཅུད་དུ།།
སྦྲུམ་ཏེ་འཁོར་འདས་སྐྱོ་གར་ཅི་ཡང་མཐོང་།།
གཞན་གྱི་རིག་བྱེད་ཟན་གྲོན་བརྐུས་བརྐུས་ནས།།
རང་བློ་ལྟོགས་གྲིར་ཤི་བའི་ཉིན་ཞིག་ལ།།
ན་ཚའི་གདུང་བ་ཞི་བའི་ངག་རིག་སྨན།།
བཙལ་ཀྱང་མི་རྙེད་རྙེད་ཀྱང་ཕན་དུ་མེད།།
ཆོས་ཉིད་འཇའ་ཤེལ་དྭངས་མའི་ཚེས་རི་ལ།།
ཉོན་མོངས་ཆར་སྤྲིན་སྨག་གིས་ཚོན་བྱུག་པས།།
འདི་སྣང་བདེན་འཛིན་སྒྱུ་མར་སྤྲུལ་ལ་ཡང་།།
འབད་རྩོལ་བྱ་བའི་ངལ་བ་ཁུར་དུ་ལྗིད།།
མཚན་རླུང་ཨམ་ཅོག་བུ་གར་གཟན་གྱུར་ཀྱང་།།
སྒོ་ཁྱིས་བསིལ་བའི་ཚོར་བའི་ལྕག་སིལ་གྱིས།།
ཞབས་རྗེས་ཁ་བར་དཔར་བའི་སྙན་ངག་ཞིག།
མཁུར་མགོར་མིག་ཆུ་བྲུལ་བཞིན་འབྲི་བར་མོས།།
ཕྱག་སོར་སྙེ་མ་མགུལ་ནས་དམ་སྦྱར་ཞིང་།།
ཁ་སྒོར་ཨཏྤལ་དྲི་མ་ལྡང་བྱེད་མོས།།
དགའ་སྐྱེད་བདེ་དྲོད་སྤྱིལ་བུར་བསྲོ་བྱས་ཀྱང་།།
འདོད་མྱོས་ཆགས་པའི་གདོང་རྩ་མེ་ལྟར་རྒྱས།།
དཀར་དམར་གློག་ཞགས་འཁྱུགས་པའི་ནང་མ་ནས།།
ཚོར་བའི་བ་སྤུ་འགུལ་བའི་མེ་ན་ཀས།།
མངར་གཏེར་སྦྲང་རྩིའི་མཆུ་ཡིས་མཚམས་སྦྱོར་གྱིས།།
“ཟུང་ཁྲག་གཏིགས་པའི་ཐྲིག་སྒྲ་སུས་ཀྱང་ཚོར།།”
ཇི་ལྟ་ཇི་སྙེད་མཁྱེན་པའི་ཤེས་རབ་ཀྱིས།།
རྗེས་ཆགས་སྣང་སྟོང་ཆུ་ཟླའི་རྩེད་མོ་ཡིས།།
ཉམས་དགའ་དབང་པོ་དུལ་བའི་མཛད་སྤྱོད་ཀྱི།།
ལས་སྨོན་སྐྱ་རེངས་གསར་བའི་ཉིན་མོར་རེ།།
ལྟར་སྣང་བདེན་རྫུན་མི་ཤེས་ཨོ་ཟོབ་ཀྱིས།།
གནོད་ཚིག་སྐྱུགས་ལོག་འཕེན་པའི་འདྲེན་པ་ཡིས།།
དགུ་འགྱུར་རྣམ་འགྱུར་ཕྱི་ལ་མངོན་ནའང་།།
གཙང་མའི་བདེན་ལམ་སྐྱོང་བས་ང་ཅི་འཇིགས།།
གངས་སྣེའི་ཁྲམ་པའི་ཞགས་སྣེར་ཚུད་པ་ལ།།
སྐྱ་ཆད་འཚོ་བའི་ཞྭ་མོ་འགེལ་བྱས་ཤིང་།།
རང་བཞིན་སེམས་ཀྱི་གསང་བ་གསོང་པོ་ཡིས།།
སྨྲ་བར་སྤོབས་པའི་གད་རྒྱང་སུ་ལ་མཆིས།།
རྡུལ་བྲལ་སྟོང་ཆེན་དབྱིངས་ཀྱི་ལྷ་ལམ་ནས།།
ནུ་འབྲས་ཁུར་ལྡན་ངག་རིག་འཇོ་བའི་ལྷ།།
གཟུགས་སྣང་སོ་སོར་འཆར་བའི་སྒྱུ་འཕྲུལ་ཁམས།།
སུ་ཡིས་འདི་ཞེས་མཛུབ་མོ་གང་དུ་ཀེར།།
ཧཱུཾ༔
རུས་རྐང་རྐང་མར་བྲུས་པའི་ལོ་རྒྱུས་ངོས།།
འཁྲེང་ཞེན་ཞེན་པ་དཀར་པོའི་མདངས་ཉམས་པའི།།
ངོ་ལོག་ལོག་བསྒྲུབ་བསྟན་པའི་དགྲ་བོ་ཀུན།།
ཁྲོ་ཞལ་ཞལ་སྨུག་སོ་ཞོའི་སྦུབས་སུ་འཁུམས།།
ཀུན་རྟོག་ཆར་རྗེས་ཤིང་ལོའི་ཟིལ་ཐིགས་ཆུ།།
ས་རུ་སྙིལ་བར་རྣ་བ་བླགས་པའི་ཚེ།།
ལུས་ངག་ཡིད་ཀྱི་སྒོ་དང་སྒེའུ་ཁུང་ནས།།
དབྱངས་ཅན་རྐང་པའི་རྡོག་སྒྲ་ཉེ་སར་བཅར།།
རྒྱ་སེས་ཁུ་བ་བྱུགས་པའི་གདོང་གི་མདངས།།
དཀྱུས་རིང་མིག་གི་སྐར་མདའ་གཡོ་བའི་ཚེ།།
སྲོག་གི་པདྨོ་འདར་བའི་བྱ་སྤྱོད་ཀྱིས།།
སྙིང་ལ་ཚེ་རབས་དམིགས་པའི་མོས་པ་རྙེད།།
ནམ་ཕྱེད་སྐར་མདའ་བརྒྱུགས་པའི་ངང་ཚུལ་ལས།།
ཆོར་རྟོག་གཙང་པོ་བྲུག་པའི་རྦ་རླབས་ཀྱིས།།
རྫོབ་ངན་ལུད་སྙིགས་དོར་དེ་ངག་རིག་གི།།
དབྱངས་ཀྱི་མུ་ཏིག་དྭངས་མའི་བྱིང་ནས་ལུད།།
རིག་གཞུང་གནད་ལ་བསམ་རྗེས་ངག་རིག་གི།།
འཆར་རྟོག་གླུ་བརྒྱ་གདང་ལ་སྦྲུམ་པའི་ཚེ།།
མི་ཕྱེད་མཚར་སྡུག་གཉུག་མའི་སྒྱུ་རྩལ་གྱིས།།
སྙིང་ལ་དང་བའི་དཔལ་ནི་ལྷག་ཏུ་འདྲེན།།
ཀུན་བྱེད་སེམས་པའི་འཕྲུལ་གྱིས་བསྐྲུན་པ་ཡི།།
ངོ་མཚར་བདེ་གཤེགས་དྭངས་མའི་ཁོང་གསེང་ན།།
རིག་རུས་ཆོ་འབྲང་མེད་པའི་དབྱངས་ཅན་མ།།
འབྲལ་མེད་གཡུང་དྲུང་རྡོ་ལ་བརྐོས་རིས་བཞིན།།
མཁའ་མཉམ་མཁྱེན་རབ་གཡུ་ཡི་མེ་ལོང་དུ།།
སྤྲོས་རྟོག་དགུ་འགྱུར་འཕྲུལ་གྱི་ཞགས་པ་ཡིས།།
བཅིང་སྡོམ་སྐྱེ་བ་ལྔ་པའི་མགྲིན་དབྱངས་ཅན།།
སྭ་ར་སྭ་སྟིས་ངག་གི་གཟུངས་སྤོབས་སྩོལ།།
མང་ཐོས་ཆོས་རིག་ཀུན་དགའི་སྐྱེད་ཚལ་ནས།།
ཐལ་ངག་རིག་སྦྱོར་འགྲན་པར་ཉེ་ནའང་།།
བན་བུན་རྟོག་པའི་ཆུ་རིས་གཡོ་བའི་ངོས།།
འགོག་མེད་ཟླ་བའི་སྲས་མོ་ཡང་ཡང་འཆར།།
རྔ་སིལ་དུང་གླིང་དར་ནག་གཡབ་དར་གྱིས།།
བོས་པའི་ཐུགས་རྒྱུད་བསྐུལ་བ་མཛད་པའི་དུས།།
མ་བོས་མགྲིན་པའི་དཔལ་དུ་སྒེག་པ་ཡི།།
རང་བཞིན་གནས་པའི་འོད་ཁྱེད་ཤིན་ཏུ་དྲན།།
རྐང་སྣེ་རྡོ་གཅལ་ལམ་ལ་བཀོད་པའི་ཚེ།།
ཡིད་རྟོག་གསལ་རིག་ངོས་སུ་བྲིས་པ་ཡི།།
མཚན་ལེགས་རྗེ་མོར་ཧད་པའི་རྐྱེན་ཞིག་གིས།།
དམིགས་འབེན་འགྲོ་ཕྱོགས་ལམ་ཡང་ནོར་འཛོལ་གྱུར།།
སྲོད་ཀྱི་རླུང་བུ་བྱང་ནས་ལྷོ་རུ་གཡུགས།།
ཤར་ཁའི་ཉི་འོད་ནུབ་རིའི་ཕག་ཏུ་གབ།།
རེས་མོས་འཁོར་བའི་ཨ་ལོང་སྦྲེལ་མཚམས་ནས།།
མི་ཚེའི་བྱ་བཞག་སྙུག་སོའི་རྩེ་ནས་ལུད།།
ཚིག་འབྲུའི་ཚེར་མོ་ལུག་གི་ཁལ་སྒང་ན།།
སྐྱེ་འཆིའི་ལམ་ཀ་འཚོལ་བའི་སྲིན་འབུ་ང་།།
གངས་ཁྲོད་རྟ་དྲེལ་ཁྲིད་དེ་འགྲོ་བའི་དུས།།
མགུར་གླུ་ཆང་དང་བསྲེལ་ཏེ་ཉམས་སྣང་འུར།།
ཆོས་རིག་ལི་ཤིའི་ཡལ་འདབ་ཟོས་གྱུར་པའི།།
སྨྲ་བའི་དབང་པོ་སྒྲེགས་པའི་དྲི་བཟང་གིས།།
ཕྱོགས་ཀྱི་རྒོལ་བའི་ཁེངས་པ་བསྙིལ་བྱས་ཤིང་།།
དམར་སེར་སྙིང་གི་གང་བུ་འོད་ཀྱིས་བསྟིམས།
ཚ་རྔམས་དབུགས་སྣ་མཐོ་བའི་སྡང་ཞུགས་ཀྱིས།།
དཔའ་མཚན་ལོན་ཞེས་འུར་གྱིས་འགྱིང་ན་ཡང་།།
ཉམས་སྣང་རྗེན་པར་འབྲི་བའི་སྙན་ངག་པ།།
ཚོར་བའི་རྒུན་ཆང་ཁུགས་ན་མགོ་འཕང་སྙེམས།།
རྩོམ་སྒྲིག་པ། དབང་མོ།
རྩོམ་ཁུངས། ངེད་དྲ་བ།