དཔལ་ལྷའི་རི་རབ་བམ་དཔལ་ལྷའི་རི་ཁྲོད་ཀྱི་དུས་ཆེན་ངོ་སྤྲོད།

ཆུ་སྐྱེས་སྒྲོལ་མ། མཆོད་མེ་བོད་ཀྱི་རྩོམ་རིག་དྲ་བ། 2010-12-18

   
    ༡ དཔལ་ལྷ་མོ་གཙུག་ལག་ཁང་གི་སྒོ་འཕྱོར་འོག་གདན་ཞུ། 
   
   ༢ དཔལ་ལྷ་མོར་གསེར་སྐྱེམས་འབུལ་བ།
  
   ༣ དཔལ་ལྷའི་གསོལ་ཆང་ཞུ་བ།
   
   ༤ དཔལ་ལྷའི་ཞལ་འབག
   
   ༥ གྲིབ་རྫོང་བཙན་ཆོས་སྐྱོང་།

     ལྷ་ས་ཁུལ་གྱི་ཤོད་སྲོལ་ལ། ལྷ་ས་དཔལ་ལྷའི་རི་ཁྲོད། ཞོལ་པ་དགའ་ལྡན་ལྔ་མཆོད། ཅེས་བཤད་སྲོལ་ཡོད། དེའི་གོ་དོན་སྙིང་པོ་ནི། དཔལ་ལྷའི་རི་ཁྲོད་ཀྱི་ཉིན་དེར། ལྷ་སའི་གཡས་གཡོན་དུ་བཞུགས་མཁན་གྱི་གྲོང་མི་དང་སྤུན་མཆེད་རྣམས། ལྷ་སའི་གཙུག་ལག་ཁང་དུ། མཆོད་མཇལ་ཞུ་བ་དང་དཔལ་ལྷ་མོ་མཇལ་དུ་ཕེབས་ཀྱི་ཡོད་པ་དང༌། སྐབས་དེར་ལྷ་ས་བ་ཚོས་ཞོལ་བ་རྣམས་སྐུ་མགྲོན་དུ་སྐད་བཏང་ནས། གསོལ་ཚིགས་འདེགས་སྲོལ་ཡོད། ཡང་དགའ་ལྡན་ལྔ་མཆོད་ཀྱི་ཉིན་མོར། ཞོལ་པ་རྣམས་ཀྱིས་ལྷ་ས་པ་རྣམས་སྐུ་མགྲོན་དུ་འབོད་པ་དང༌། གསོལ་ཚིགས་འདེགས་སྲོལ་ཡོད། བོད་དབུས་ཁུལ་དང༌། ལྷག་པར་དུ་ལྷ་སའི་གཡས་གཡོན་གྱི་བོད་མི་ཚོར་མཚོན་ན། དཔལ་ལྷ་རི་རབ་ཀྱི་དུས་ཆེན་འདི་ནི། དགའ་སྣང་ཆེ་ཤོས་བྱེད་པའི་དུས་ཆེན་གྱི་གྲས་ཤིག་ཡིན།
    དཔལ་ལྷའི་རི་ཁྲོད་ཀྱི་དུས་ཆེན་དངོས་གཞི་དེ་ནི། ལོ་རེའི་བོད་ཟླ་བཅུ་པའི་ཚེས་བཅོ་ལྔའི་ཉིན་ཡིན་ཞིང༌། ཉིན་དེར། ལྷ་ལྡན་གཙུག་ལག་ཁང་གི་གནས་སྲུང་དཔལ་ལྷ་དྲག་མོར་ལྷ་གསོལ་ཞུ་བའི་དུས་ཆེན་ཞིག་ ཆགས་ཀྱི་ཡོད། དཔལ་ལྷའི་གསོལ་བའི་དུས་ཆེན་གྱི་ཐོག་མའི་བྱུང་རིམ་སྐོར་ལ། བོད་ཀྱི་དམངས་ཁྲོད་དུ་སྙན་འཇེབསལྡན་པའི་ཤོད་སྲོལ་ཞིག་ཡོད་པ་དེའི་སྐོར་ཞུས་ ན། གཙུག་ལག་ཁང་གི་སྲུང་མ་ཆེན་མོ་དཔལ་ལྡན་དམག་ཟོར་རྒྱལ་མོ་ལ་ཕྲུ་གུ་བུ་མོ་གསུམ་ བྱུང་བ་ལས། ཆུང་བའི་མིང་ལ་དཔལ་ལྷ་ཤིག་མོ་ཞུ་བ་དང༌། དེ་ནི་དམག་ཟོར་རྒྱལ་མོས་ཁོང་གི་དབུ་ལ་ཤིག་མང་པ་ཡོད་ཙང༌། བུ་མོ་ལ་ཐེངས་མང་པོ་སྒྲུག་བཅུག་པ་ཡིན་ནའང༌། བུ་མོ་དེས་ཨ་མ་ལགས་ཀྱི་ཞལ་ལ་མ་ཉན་ནས། དུས་རྟག་ཏུ་རྩེད་འཇོར་གཡེང་བསྡད་པ་རེད་ཟེར། དམག་ཟོར་རྒྱལ་མོ་ཁོང་ཁོང་ཁྲོ་ལངས་ནས། བུ་མོ་ཁོང་གི་གཟུགས་པོ་ཡོངས་རྫོགས་ལ་ཤིག་གིས་ཁྱབ་པར་ཤོག་ཅེས། སྨོན་ལམ་ལོག་པ་བཏབས་གནང་བས། ཕྱིས་སུ་དཔལ་ལྷ་ཤིག་མོ་ཞེས་ལུས་ཡོངས་རྫོགས་ཤིག་གིས་གཡོག་ནས་ཡོད་པ་ཞིག་ཆགས་ པར་བཤད།
     བུ་མོ་འབྲིང་བའི་མཚན་ལ་གདོང་བཙན་རྒྱལ་མོ་ཞུ་གི་ཡོད་པ་དང༌། དེས་ནི་དུས་རྟག་ཏུ་ཨ་མ་ལགས་ལ་ཁ་ལན་སློག་གི་ཡོད་སྟབས། ཨ་མས་མོ་རང་སློང་མོ་བ་ཞིག་ཏུ་འགྱུར་བར་ཤོག་ཅེས་སྨོན་ལམ་བཏབས་པ་ལ་བརྟེན་ནས། མཐར་མ་དེར་གཙུག་ལག་ཁང་གི་ལྷོ་ངོས་ཀྱི་རྡོ་སྟེང་དུ་སློང་མོ་བའི་ཚུལ་གྱིས་ བཞུགས་ནས་ཡོད་པ་ཞིག་དེང་སང་ཡང་མཇལ་རྒྱུ་ཡོད། དེ་ནི་ལམ་གྱི་མགྲོན་པོ་རྣམས་ཀྱིས་མཆོད་འབུལ་ཁོ་ནར་བརྟེན་ནས་བཞུགས་ཀྱི་ཡོད།
    བུ་མོ་ཆེ་བའི་མིང་ལ་དཔལ་ལྷ་དྲག་མོ་ཟེར་བ་དེ་ནི། སྐྱེས་པ་ཕོ་གང་བྱུང་མང་བྱུང་དང་མཉམ་དུ་ཆགས་པ་སྤྱོད་པ་ཞིག་ཆགས་སྟབས། ཨ་མ་དམག་ཟོར་རྒྱལ་མོས། མོ་རང་ལ་ཚེ་གང་པོར་ཁྱོ་ག་གཅིག་ཀྱང་མི་རག་པར་ཤོག གལ་སྲིད་རག་པའི་དབང་དུ་བཏང་ནའང༌། ཁྱོ་ག་དེ་དང་ལོ་གཅིག་ལ། དུས་གཅིག་ལས་ཐུག་འཕྲད་མི་ཡོང་བར་ཤོག་ཅེས་སྨོན་ལམ་བཏབས་པས། ཕྱིས་སུ་དཔལ་ལྷ་དྲག་མོར་ཁྱོ་ག་གཅིག་རང་བྱུང་བ་དེ་ནི། དེ་སྔར་གཙུག་ལག་ཁང་གི་ཇོ་བོའི་སྐུ་སྲུང་ཡིན་པ་ཆོས་སྐྱོང་རྫོང་བཙན་རེད།
    དེ་ཡང༌། ཁོང་གཉིས་ལོ་གཅིག་ལ་ཐེངས་གཅིག་ལས་མཇལ་འཕྲད་གནང་ཐུབ་ཀྱི་མེད་དོན་ནི། དཔལ་ལྡན་དམག་ཟོར་རྒྱལ་མོས། ཆོས་སྐྱོང་རྫོང་བཙན་ནི། རང་གི་བུ་མོ་བློ་འབྲིད་མཁན་ཡིན་ཞེས། གཙུག་ལག་ཁང་ནས། ལྷ་སའི་སྐྱིད་ཆུའི་ཁ་གཏད་ལ་ཡོད་པའིགྲིབ་ཚེ་མཆོག་གླིང་ལ་རྒྱང་ཕུད་བཏང་ཙང༌། དུས་དེ་ནས་ཁོང་གཉིས་ལོ་གཅིག་ཐུག་འཕྲད་ཐེངས་གཅིག་ལས་གནང་ཐུབ་ཀྱི་མེད་པ་རེད་ ཞེས་ཤོད་སྲོལ་འདུག དེ་ལ་བརྟེན་ནས། ལོ་གཅིག་གི་དུས་ཚོད་ནང་ལ། དཔལ་ལྷ་དྲག་མོ་དང་གྲིབ་རྫོང་བཙན་གཉིས། ཕན་ཚུན་ཞལ་མཇལ་འཕྲད་ཀྱི་ཉིན་མོ་གཅིག་ཡོད་པ་དེ་ནི། བོད་ཟླ་བཅུ་པའི་ཚེས་བཅོ་ལྔའི་ཉིན་ཆགས་ཀྱི་ཡོད་པ་དང༌། ཁོང་བཟའ་ཟླ་གཉིས་ཀྱི་ཞལ་མཇལ་བའི་ཆོ་ག་དེ་རིམ་པས་གྲ་རྒྱས་པོ་ཆགས་ནས། དཔལ་ལྷའི་དུས་ཆེན་འདི་བྱུང་བ་ཡིན་པ་རེད་འདུག
    དེ་ཡང་དཔེར་ན། དཔལ་ལྷ་དྲག་མོ་གཙུག་ལག་ཁང་གི་ཕྱི་ལ་གདན་འདྲེན་བྱེད་པའི་སྐབས་ལ་མཚོན་ན། ཚེས་བཅོ་ལྔ་ཉིན་གྱི་ཞོགས་པར་དགེ་འདུན་པ་ཚོས། དཔལ་ལྷ་མོའི་སྐུ་གསོབ་བར་སྐོར་ནང་གདན་ཞུའི་སྐབས་སུ། བར་སྐོར་གྱི་ཤར་ལྷོ་མཚམས་སུ་གདན་འདྲེན་ཞུས་ནས། དེར་བཞུགས་པའི་སྤུན་མཆེད་ཆུང་བ་གདོང་བཙན་རྒྱལ་མོ་དང༌། མཇལ་འཕྲད་བྱེད་དུ་འཇུག་པ་དང༌། དེ་ནས་དཔལ་ལྷ་དྲག་མོའི་སྐུ་གསོབ་དེ། གྲིབ་ཚེ་མཆོག་གླིང་གི་ཕྱོགས་ལ་ཁ་ཕྱོགས་སུ་བཅུག་ནས་འཇོག་པ་དང༌། དེའི་སྐབས་སུ་གྲིབ་ཚེ་མཆོག་གླིང་གི་ཕྱོགས་ནས་ཀྱང་རྫོང་བཙན་ཆོས་སྐྱོང་གི་ཞལ་ དེ་ཚུར་བྱང་ཕྱོགས་གཙུག་ལག་ཁང་གི་ཕྱོགས་སུ་ཞལ་ཚུར་སློག་ནས་འཇོག་སྲོལ་ཡོད་པ་ དེ་ནི། དཔལ་ལྷ་མོ་དང་རྫོང་བཙན་གཉིས་ལོ་གཅིག་དུས་གཅིག་གི་ཞལ་རས་མཇལ་བའི་དུས་ཚོད་དེ་ རེད།
    དུས་ཆེན་སྲུང་བརྩི་ཞུ་སྟངས་ཀྱི་སྐོར་དེ་དཔྱད་གཞིའི་ཡིག་ཆ་ཁག་ལ་གཞི་བཞག་པ་ ཡིན་ན། དེ་སྔའི་མཛད་སྒོའི་སྐོར་ནས་ཞུས་པ་ཡིན་ན།  དེ་ནི། བོད་ཟླ་བཅུ་པའི་ཚེས་བརྒྱད་དགུ་ཙམ་ནས་མགོ་ཚུགས་ཀྱི་ཡོད་པ་རེད། རྨེ་རི་དགོན་པའི་དགེ་འདུན་པ་ཚོས། གཙུག་ལག་ཁང་གི་དཔལ་ལྷའི་ལྕོག་ལ་གཏོར་སྒྲུབ་ཚུགས་སྲོལ་ཡོད་པ་དང༌། གུང་ཐང་བླ་མ་ཞང་གིས་གཏེར་ནས་བཞེས་པའི་དཔལ་ལྷ་དྲག་མོའི་ཞལ་འབག་གདན་འདྲེན་ ཞུས་ནས། དཔལ་ལྷའི་ལྕོག་གི་སྒོ་འགྲམ་གྱི་ཀ་ཕིབས་འོག་ལ། དཔལ་ལྷའི་ཞལ་ལྷོ་རུ་གཟིགས་ནས་བཞུགས་བཅུག་པའི་མདུན་ལ། མཆོད་པའི་རྫས་སྣ་ཚོགས་བཤམས་ནས་མཆོད་བསྟོད་བྱེད་པ་དང༌། སྐབས་དེར། མཆོད་མཇལ་ཞུ་མཁན་ཚོས་ཀྱང༌། བསང་གསོལ་དང་གསེར་སྐྱེམས་འབུལ་བ་སོགས་ཞུས་ནས་མཆོད་སྲོལ་ཡོད་པ་པ་ཞིག་ཡིན་ལ། དཔལ་གསོལ་མ་ཞེས་དཔལ་ལྷ་མོ་གསོལ་མཁན་བུད་མེད་བཅུ་གྲངས་ཤིག་དམིགས་འཛུགས་བྱེད་ སྲོལ་ཡོད་ཅིང༌། བུད་མེད་དེ་ཚོས་རྒྱན་གོས་གཟབ་འཆོར་སྤྲས་ཏེ། དཔལ་ལྷའི་ལྕོག་གི་སྒོ་འགྲམ་དུ་གྲལ་བསྒྲིགས་ནས་བསྡད་དེ། དཔལ་ལྷའི་ལྕོག་ཏུ་བཞུགས་པའི་དགེ་འདུན་པ་ཚོས། དཔལ་ལྷ་ཞི་བ་དང་དྲག་མོའི་གསོལ་མཆོད་ཞལ་འདོན་གནང་བ་དེ་དང་མཉམ་དུ་ཞལ་འདོན་ སྐྱོར་བ་སོགས་བྱས་ནས་གསོལ་མཆོད་བྱེད་སྲོལ་ཡོད། ཚེས་བཅུ་བཞི་ཉིན་དྲག་མོའི་སྐུ་གསོབ་དེ། གཙུག་ལག་ཁང་གི་ཡང་སྟེང་ཁྱམས་རའི་འོག་ཏུ་གདན་འདྲེན་པ་དང༌། དེའི་ཉིན་མོར། བཀའ་ཤག་ལྷན་རྒྱས་ནས་འཕྲིན་བཅོལ་གཏོང་བ། གཞུང་ཞབས་ཚོས་གསེར་སྐྱེམས་འབུལ་བ་སོགས་གནང་སྲོལ་ཡོད་པ་རེད་འདུག ཚེས་བཅུ་བཞིའི་ཉིན་གྱི་གསོལ་མཆོད་གྲུབ་རྗེས། དངོས་གྲུབ་གཏོར་མ་ཞེས། མང་ཚོགས་ལ་ཚོགས་གཏོར་མ་འགྲེམས་སྐབས་འཚང་ཁ་ཆེ་ཞིང༌། ཚོགས་གཏོར་དེ་ནི་དངོས་གྲུབ་རྩ་ཆེ་ཤོས་ལྟ་བུར་བརྩི་བ་ཡིན།
    བོད་ཟླ་བཅུ་པའི་ཚེས་བཅོ་ལྔ་ཉིན། དཔལ་ལྷའི་དུས་ཆེན་དངོས་གཞིའི་མཛད་སྒོར་མཚོན་ན། ཉིན་དེའི་ཞོགས་པ་སྔ་པོར། ལྷ་ས་ཁུལ་གྱི་ཁྱིམ་འཛིན་བུད་མེད་ཚོ་འཚང་ཁ་ཤིག་ཤིག་གིས་དཔལ་ལྷ་མོར་མཆོད་མཇལ་དུ་འགྲོ་བ་དང༌། དེ་ནས་ཉི་འོད་ས་གཞིར་ཁྱབ་པ་དང་མཉམ་དུ། དཔལ་ལྷའི་སྐུ་བརྙན་དེ། གཙུག་ལག་ཁང་གི་ཁྱམས་རའི་མཐིལ་དུ་གདན་དྲངས་པའི་སྐབས་ལ། བླ་བྲང་ཕྱག་མཛོད་ལས་ཁུངས་ནས་སྙན་ཤལ་འབུལ་བ་སོགས་གྲུབ་རྗེས། གཙུག་ལག་ཁང་གི་སེང་སྡེང་སྒོ་མོ་དང༌། ཁྱམས་ར་བརྒྱུད་ནས་དཔལ་ལྷ་བར་སྐོར་དུ་གདན་འདྲེན་ཞུ་བ་དང༌། དེའི་སྐབས་སུ་བར་སྐོར་དུ་འཛོམས་པའི་མཆོད་མཇལ་བ་ཚོས། སྙན་ཤལ་འབུལ་བ་དང་མཆོད་མཇལ་བྱེད་སྲོལ་ཡོད།
    དཔལ་ལྷ་མོ་གཙུག་ལག་ཁང་ནས་ཐོན་ཏེ་ཐོག་མར་ཀླུ་སྦུག་ཏུ་ཕེབས་རྗེས། གཏོར་ཟོར་འཕེན་པ་དང༌། དེ་ནས་ཁྲོམ་གཟིགས་ཁང་གི་ཐང་སྡེར་བར་སྐོར་གྱི་ཤར་ལམ། ལྷོ་ངོས་སུ་གཏོར་ཟོར་འཕེན་པའི་མཛད་སྒོ་བཅས་ཡོད། གང་ལྟར་ཉིན་འདིར། ལྷ་མོ་ཕེབས་ལམ་འཁེལ་ས་དག་ན་ཡོད་པའི་ཁྱིམ་མི་ཚོས། སྙན་ཤལ་འབུལ་བ་སོགས་བྱས་ནས་མཆོད་སྲོལ་ཡོད།
    དུས་ཆེན་འདི་དང་འབྲེལ་བའི་ཡུལ་སྲོལ་གྱི་སྐོར་ནས་ཞུས་ན།  དེ་སྔར་མཚོན་ན། བུ་མོ་ལོ་ན་བཅུ་དྲུག་ཟིན་སྐབས་སྤ་ཕྲུག་གཡོག་སྲོལ་གྱི་མཛད་སྒོ་དེ་ཡང༌། དཔལ་ལྷའི་དུས་ཆེན་གྱི་ཉིན་འདིར་བྱེད་པ་ལྟ་བུར་ཡོད་པ་དང༌། གཞན་ཡང༌། དཔལ་ལྷའི་དུས་ཆེན་འཆར་ལ་ཉེ་བའི་དུས་ཚོད་དེའི་ནང་ལ། དགའ་ཉེ་སྤུན་མཆེད་དང༌། གྲོང་པ་ཁྱིམ་མཚེས་ཀྱི་ཕྲུ་གུ་ལོ་ཆུང་ཚོ། གཡོག་པོའི་རིགས་བཅས་ནས་དཔལ་ལྷའི་མདུན་ཆང་ཞེས་དངུལ་སློང་སྲོལ་ཡོད་པར། དེ་ལ་མང་ཉུང་ལ་མ་ལྟོས་པའི་དངུལ་སྟེར་སྲོལ་ཡོད་སྟབས། དཔལ་ལྷའི་དུས་ཆེན་འཆར་ལ་ཉེ་བའི་དུས་ཚོད་དེ་ནི་དབུལ་ཁུལ་གྱི་ཕྲུ་གུ་ཚོར་དངུལ་གསོག་པའི་དུས་ཚོད་ཡག་ཤོས་ཤིག་ཀྱང་ཆགས་ཀྱི་ཡོད། ལྷ་ས་ཁུལ་ལ་ཡིན་ན། དེང་སྐབས་དཔལ་ལྷའི་དུས་ཆེན་འཆར་ཉེའི་སྐབས་ལ། བུད་མེད་ཚོས་སྐྱེས་པ་ཚོར་དངུལ་དང་རྔན་པ་སློང་སྲོལ་ཞིག་དར་བཞིན་ཡོད་འདུག ཉིན་འདིར་གནམ་གཤིས་མ་འདྲ་བ་ཞིག་སྟོན་གྱི་ཡོད་པ་ནི། ཉིན་འདིའི་ཕྱི་དྲོ་བོད་ལྷ་ས་ཁུལ་གྱི་གནམ་གཤིས་ནི་ཧ་ཅང་གི་རླུང་འཚུབ་ཅན་གྱི་ ལྷགས་པ་ཚ་པོ་ཞིག་ལྡང་གི་ཡོད་པར། བོད་མི་ཚོས་ལྷ་མོ་ར་བཟི་བ་རེད་ཅེས་ཤོད་སྲོལ་ཡོད།


  དཔྱད་གཞི་དང་ཁུངས་བཅོལ་ཞུ་ཡུལ་ཡིག་ཆ།

༡ 《བོད་ཀྱི་ཡུལ་སྲོལ་རྣམ་བཤད》རྡོ་དགོན་གསང་བདག་རྡོ་རྗེ་དང་དགའ་བ་པ་སངས། བོད་ལྗོངས་མི་དམངས་དཔེ་སྐྲུན་ཁང༌།
༢ 《དུང་དཀར་ཚིག་མཛོད་ཆེན་མོ》དུང་དཀར་བློ་བཟང་འཕྲིན་ལས། ཀྲུང་གོའི་བོད་ཀྱི་ཤེས་རིག་དཔེ་སྐྲུན་ཁང་ 
༣ 《བོད་ལྗོངས་ཡུལ་སྐོར་སྣེ་ཤན》ནོར་བུ་བསམ་འགྲུབ་ཀྱིས་བརྩམས་པ། བོད་ལྗོངས་མི་དམངས་དཔེ་སྐྲུན་ཁང་
༤ 《པོ་ཏ་ལ་དུས་དེབ》 སྤྱིའི་འདོན་ཐེངས་ ༣༡ རྒྱལ་སྲིད་སྤྱི་ཁྱབ་ཁང་གསར་འགྱུར་གཞུང་ལས་ཁང༌།
༥ 《པོ་ཏཱ་ལ་དུས་དེབ》 སྤྱིའི་འདོན་ཐེངས་ ༣༦ རྒྱལ་སྲིད་སྤྱི་ཁྱབ་ཁང་གསར་འགྱུར་གཞུང་ལས་ཁང༌།
www.qhtb.cn  www.tibetculture.net སོགས་དྲ་ཚིགས་ཁག་ཅིག་བཅས་ཡིག་ཐོག་གི་དཔྱད་གཞི་དང་། འབྲེལ་ཡོད་ཁག་ཅིག་ལ་བཅར་འདྲིའི་དོན་གནད་བཅས་ལ་ཁུངས་བཅོལ་ཞུས་ཡོད།

 


རྩོམ་ཁུངས། ངེད་དྲ་བ།

གཟིམས་པ་མེད་པའི་མཆོད་མེ། དབྱངས་གསལ་སོ་བཞིའི་མཛེས་སྡུག  RSSསྔོན་མངག

དཔལ་ལྷའི་རི་རབ་བམ་དཔལ་ལྷའི་རི་ཁྲོད་ཀྱི་དུས་ཆེན་ངོ་སྤྲོད།

2010-12-18 ཆུ་སྐྱེས་སྒྲོལ་མ། ཀློག་གྲངས། མཆན ཡོད།

   
    ༡ དཔལ་ལྷ་མོ་གཙུག་ལག་ཁང་གི་སྒོ་འཕྱོར་འོག་གདན་ཞུ། 
   
   ༢ དཔལ་ལྷ་མོར་གསེར་སྐྱེམས་འབུལ་བ།
  
   ༣ དཔལ་ལྷའི་གསོལ་ཆང་ཞུ་བ།
   
   ༤ དཔལ་ལྷའི་ཞལ་འབག
   
   ༥ གྲིབ་རྫོང་བཙན་ཆོས་སྐྱོང་།

     ལྷ་ས་ཁུལ་གྱི་ཤོད་སྲོལ་ལ། ལྷ་ས་དཔལ་ལྷའི་རི་ཁྲོད། ཞོལ་པ་དགའ་ལྡན་ལྔ་མཆོད། ཅེས་བཤད་སྲོལ་ཡོད། དེའི་གོ་དོན་སྙིང་པོ་ནི། དཔལ་ལྷའི་རི་ཁྲོད་ཀྱི་ཉིན་དེར། ལྷ་སའི་གཡས་གཡོན་དུ་བཞུགས་མཁན་གྱི་གྲོང་མི་དང་སྤུན་མཆེད་རྣམས། ལྷ་སའི་གཙུག་ལག་ཁང་དུ། མཆོད་མཇལ་ཞུ་བ་དང་དཔལ་ལྷ་མོ་མཇལ་དུ་ཕེབས་ཀྱི་ཡོད་པ་དང༌། སྐབས་དེར་ལྷ་ས་བ་ཚོས་ཞོལ་བ་རྣམས་སྐུ་མགྲོན་དུ་སྐད་བཏང་ནས། གསོལ་ཚིགས་འདེགས་སྲོལ་ཡོད། ཡང་དགའ་ལྡན་ལྔ་མཆོད་ཀྱི་ཉིན་མོར། ཞོལ་པ་རྣམས་ཀྱིས་ལྷ་ས་པ་རྣམས་སྐུ་མགྲོན་དུ་འབོད་པ་དང༌། གསོལ་ཚིགས་འདེགས་སྲོལ་ཡོད། བོད་དབུས་ཁུལ་དང༌། ལྷག་པར་དུ་ལྷ་སའི་གཡས་གཡོན་གྱི་བོད་མི་ཚོར་མཚོན་ན། དཔལ་ལྷ་རི་རབ་ཀྱི་དུས་ཆེན་འདི་ནི། དགའ་སྣང་ཆེ་ཤོས་བྱེད་པའི་དུས་ཆེན་གྱི་གྲས་ཤིག་ཡིན།
    དཔལ་ལྷའི་རི་ཁྲོད་ཀྱི་དུས་ཆེན་དངོས་གཞི་དེ་ནི། ལོ་རེའི་བོད་ཟླ་བཅུ་པའི་ཚེས་བཅོ་ལྔའི་ཉིན་ཡིན་ཞིང༌། ཉིན་དེར། ལྷ་ལྡན་གཙུག་ལག་ཁང་གི་གནས་སྲུང་དཔལ་ལྷ་དྲག་མོར་ལྷ་གསོལ་ཞུ་བའི་དུས་ཆེན་ཞིག་ ཆགས་ཀྱི་ཡོད། དཔལ་ལྷའི་གསོལ་བའི་དུས་ཆེན་གྱི་ཐོག་མའི་བྱུང་རིམ་སྐོར་ལ། བོད་ཀྱི་དམངས་ཁྲོད་དུ་སྙན་འཇེབསལྡན་པའི་ཤོད་སྲོལ་ཞིག་ཡོད་པ་དེའི་སྐོར་ཞུས་ ན། གཙུག་ལག་ཁང་གི་སྲུང་མ་ཆེན་མོ་དཔལ་ལྡན་དམག་ཟོར་རྒྱལ་མོ་ལ་ཕྲུ་གུ་བུ་མོ་གསུམ་ བྱུང་བ་ལས། ཆུང་བའི་མིང་ལ་དཔལ་ལྷ་ཤིག་མོ་ཞུ་བ་དང༌། དེ་ནི་དམག་ཟོར་རྒྱལ་མོས་ཁོང་གི་དབུ་ལ་ཤིག་མང་པ་ཡོད་ཙང༌། བུ་མོ་ལ་ཐེངས་མང་པོ་སྒྲུག་བཅུག་པ་ཡིན་ནའང༌། བུ་མོ་དེས་ཨ་མ་ལགས་ཀྱི་ཞལ་ལ་མ་ཉན་ནས། དུས་རྟག་ཏུ་རྩེད་འཇོར་གཡེང་བསྡད་པ་རེད་ཟེར། དམག་ཟོར་རྒྱལ་མོ་ཁོང་ཁོང་ཁྲོ་ལངས་ནས། བུ་མོ་ཁོང་གི་གཟུགས་པོ་ཡོངས་རྫོགས་ལ་ཤིག་གིས་ཁྱབ་པར་ཤོག་ཅེས། སྨོན་ལམ་ལོག་པ་བཏབས་གནང་བས། ཕྱིས་སུ་དཔལ་ལྷ་ཤིག་མོ་ཞེས་ལུས་ཡོངས་རྫོགས་ཤིག་གིས་གཡོག་ནས་ཡོད་པ་ཞིག་ཆགས་ པར་བཤད།
     བུ་མོ་འབྲིང་བའི་མཚན་ལ་གདོང་བཙན་རྒྱལ་མོ་ཞུ་གི་ཡོད་པ་དང༌། དེས་ནི་དུས་རྟག་ཏུ་ཨ་མ་ལགས་ལ་ཁ་ལན་སློག་གི་ཡོད་སྟབས། ཨ་མས་མོ་རང་སློང་མོ་བ་ཞིག་ཏུ་འགྱུར་བར་ཤོག་ཅེས་སྨོན་ལམ་བཏབས་པ་ལ་བརྟེན་ནས། མཐར་མ་དེར་གཙུག་ལག་ཁང་གི་ལྷོ་ངོས་ཀྱི་རྡོ་སྟེང་དུ་སློང་མོ་བའི་ཚུལ་གྱིས་ བཞུགས་ནས་ཡོད་པ་ཞིག་དེང་སང་ཡང་མཇལ་རྒྱུ་ཡོད། དེ་ནི་ལམ་གྱི་མགྲོན་པོ་རྣམས་ཀྱིས་མཆོད་འབུལ་ཁོ་ནར་བརྟེན་ནས་བཞུགས་ཀྱི་ཡོད།
    བུ་མོ་ཆེ་བའི་མིང་ལ་དཔལ་ལྷ་དྲག་མོ་ཟེར་བ་དེ་ནི། སྐྱེས་པ་ཕོ་གང་བྱུང་མང་བྱུང་དང་མཉམ་དུ་ཆགས་པ་སྤྱོད་པ་ཞིག་ཆགས་སྟབས། ཨ་མ་དམག་ཟོར་རྒྱལ་མོས། མོ་རང་ལ་ཚེ་གང་པོར་ཁྱོ་ག་གཅིག་ཀྱང་མི་རག་པར་ཤོག གལ་སྲིད་རག་པའི་དབང་དུ་བཏང་ནའང༌། ཁྱོ་ག་དེ་དང་ལོ་གཅིག་ལ། དུས་གཅིག་ལས་ཐུག་འཕྲད་མི་ཡོང་བར་ཤོག་ཅེས་སྨོན་ལམ་བཏབས་པས། ཕྱིས་སུ་དཔལ་ལྷ་དྲག་མོར་ཁྱོ་ག་གཅིག་རང་བྱུང་བ་དེ་ནི། དེ་སྔར་གཙུག་ལག་ཁང་གི་ཇོ་བོའི་སྐུ་སྲུང་ཡིན་པ་ཆོས་སྐྱོང་རྫོང་བཙན་རེད།
    དེ་ཡང༌། ཁོང་གཉིས་ལོ་གཅིག་ལ་ཐེངས་གཅིག་ལས་མཇལ་འཕྲད་གནང་ཐུབ་ཀྱི་མེད་དོན་ནི། དཔལ་ལྡན་དམག་ཟོར་རྒྱལ་མོས། ཆོས་སྐྱོང་རྫོང་བཙན་ནི། རང་གི་བུ་མོ་བློ་འབྲིད་མཁན་ཡིན་ཞེས། གཙུག་ལག་ཁང་ནས། ལྷ་སའི་སྐྱིད་ཆུའི་ཁ་གཏད་ལ་ཡོད་པའིགྲིབ་ཚེ་མཆོག་གླིང་ལ་རྒྱང་ཕུད་བཏང་ཙང༌། དུས་དེ་ནས་ཁོང་གཉིས་ལོ་གཅིག་ཐུག་འཕྲད་ཐེངས་གཅིག་ལས་གནང་ཐུབ་ཀྱི་མེད་པ་རེད་ ཞེས་ཤོད་སྲོལ་འདུག དེ་ལ་བརྟེན་ནས། ལོ་གཅིག་གི་དུས་ཚོད་ནང་ལ། དཔལ་ལྷ་དྲག་མོ་དང་གྲིབ་རྫོང་བཙན་གཉིས། ཕན་ཚུན་ཞལ་མཇལ་འཕྲད་ཀྱི་ཉིན་མོ་གཅིག་ཡོད་པ་དེ་ནི། བོད་ཟླ་བཅུ་པའི་ཚེས་བཅོ་ལྔའི་ཉིན་ཆགས་ཀྱི་ཡོད་པ་དང༌། ཁོང་བཟའ་ཟླ་གཉིས་ཀྱི་ཞལ་མཇལ་བའི་ཆོ་ག་དེ་རིམ་པས་གྲ་རྒྱས་པོ་ཆགས་ནས། དཔལ་ལྷའི་དུས་ཆེན་འདི་བྱུང་བ་ཡིན་པ་རེད་འདུག
    དེ་ཡང་དཔེར་ན། དཔལ་ལྷ་དྲག་མོ་གཙུག་ལག་ཁང་གི་ཕྱི་ལ་གདན་འདྲེན་བྱེད་པའི་སྐབས་ལ་མཚོན་ན། ཚེས་བཅོ་ལྔ་ཉིན་གྱི་ཞོགས་པར་དགེ་འདུན་པ་ཚོས། དཔལ་ལྷ་མོའི་སྐུ་གསོབ་བར་སྐོར་ནང་གདན་ཞུའི་སྐབས་སུ། བར་སྐོར་གྱི་ཤར་ལྷོ་མཚམས་སུ་གདན་འདྲེན་ཞུས་ནས། དེར་བཞུགས་པའི་སྤུན་མཆེད་ཆུང་བ་གདོང་བཙན་རྒྱལ་མོ་དང༌། མཇལ་འཕྲད་བྱེད་དུ་འཇུག་པ་དང༌། དེ་ནས་དཔལ་ལྷ་དྲག་མོའི་སྐུ་གསོབ་དེ། གྲིབ་ཚེ་མཆོག་གླིང་གི་ཕྱོགས་ལ་ཁ་ཕྱོགས་སུ་བཅུག་ནས་འཇོག་པ་དང༌། དེའི་སྐབས་སུ་གྲིབ་ཚེ་མཆོག་གླིང་གི་ཕྱོགས་ནས་ཀྱང་རྫོང་བཙན་ཆོས་སྐྱོང་གི་ཞལ་ དེ་ཚུར་བྱང་ཕྱོགས་གཙུག་ལག་ཁང་གི་ཕྱོགས་སུ་ཞལ་ཚུར་སློག་ནས་འཇོག་སྲོལ་ཡོད་པ་ དེ་ནི། དཔལ་ལྷ་མོ་དང་རྫོང་བཙན་གཉིས་ལོ་གཅིག་དུས་གཅིག་གི་ཞལ་རས་མཇལ་བའི་དུས་ཚོད་དེ་ རེད།
    དུས་ཆེན་སྲུང་བརྩི་ཞུ་སྟངས་ཀྱི་སྐོར་དེ་དཔྱད་གཞིའི་ཡིག་ཆ་ཁག་ལ་གཞི་བཞག་པ་ ཡིན་ན། དེ་སྔའི་མཛད་སྒོའི་སྐོར་ནས་ཞུས་པ་ཡིན་ན།  དེ་ནི། བོད་ཟླ་བཅུ་པའི་ཚེས་བརྒྱད་དགུ་ཙམ་ནས་མགོ་ཚུགས་ཀྱི་ཡོད་པ་རེད། རྨེ་རི་དགོན་པའི་དགེ་འདུན་པ་ཚོས། གཙུག་ལག་ཁང་གི་དཔལ་ལྷའི་ལྕོག་ལ་གཏོར་སྒྲུབ་ཚུགས་སྲོལ་ཡོད་པ་དང༌། གུང་ཐང་བླ་མ་ཞང་གིས་གཏེར་ནས་བཞེས་པའི་དཔལ་ལྷ་དྲག་མོའི་ཞལ་འབག་གདན་འདྲེན་ ཞུས་ནས། དཔལ་ལྷའི་ལྕོག་གི་སྒོ་འགྲམ་གྱི་ཀ་ཕིབས་འོག་ལ། དཔལ་ལྷའི་ཞལ་ལྷོ་རུ་གཟིགས་ནས་བཞུགས་བཅུག་པའི་མདུན་ལ། མཆོད་པའི་རྫས་སྣ་ཚོགས་བཤམས་ནས་མཆོད་བསྟོད་བྱེད་པ་དང༌། སྐབས་དེར། མཆོད་མཇལ་ཞུ་མཁན་ཚོས་ཀྱང༌། བསང་གསོལ་དང་གསེར་སྐྱེམས་འབུལ་བ་སོགས་ཞུས་ནས་མཆོད་སྲོལ་ཡོད་པ་པ་ཞིག་ཡིན་ལ། དཔལ་གསོལ་མ་ཞེས་དཔལ་ལྷ་མོ་གསོལ་མཁན་བུད་མེད་བཅུ་གྲངས་ཤིག་དམིགས་འཛུགས་བྱེད་ སྲོལ་ཡོད་ཅིང༌། བུད་མེད་དེ་ཚོས་རྒྱན་གོས་གཟབ་འཆོར་སྤྲས་ཏེ། དཔལ་ལྷའི་ལྕོག་གི་སྒོ་འགྲམ་དུ་གྲལ་བསྒྲིགས་ནས་བསྡད་དེ། དཔལ་ལྷའི་ལྕོག་ཏུ་བཞུགས་པའི་དགེ་འདུན་པ་ཚོས། དཔལ་ལྷ་ཞི་བ་དང་དྲག་མོའི་གསོལ་མཆོད་ཞལ་འདོན་གནང་བ་དེ་དང་མཉམ་དུ་ཞལ་འདོན་ སྐྱོར་བ་སོགས་བྱས་ནས་གསོལ་མཆོད་བྱེད་སྲོལ་ཡོད། ཚེས་བཅུ་བཞི་ཉིན་དྲག་མོའི་སྐུ་གསོབ་དེ། གཙུག་ལག་ཁང་གི་ཡང་སྟེང་ཁྱམས་རའི་འོག་ཏུ་གདན་འདྲེན་པ་དང༌། དེའི་ཉིན་མོར། བཀའ་ཤག་ལྷན་རྒྱས་ནས་འཕྲིན་བཅོལ་གཏོང་བ། གཞུང་ཞབས་ཚོས་གསེར་སྐྱེམས་འབུལ་བ་སོགས་གནང་སྲོལ་ཡོད་པ་རེད་འདུག ཚེས་བཅུ་བཞིའི་ཉིན་གྱི་གསོལ་མཆོད་གྲུབ་རྗེས། དངོས་གྲུབ་གཏོར་མ་ཞེས། མང་ཚོགས་ལ་ཚོགས་གཏོར་མ་འགྲེམས་སྐབས་འཚང་ཁ་ཆེ་ཞིང༌། ཚོགས་གཏོར་དེ་ནི་དངོས་གྲུབ་རྩ་ཆེ་ཤོས་ལྟ་བུར་བརྩི་བ་ཡིན།
    བོད་ཟླ་བཅུ་པའི་ཚེས་བཅོ་ལྔ་ཉིན། དཔལ་ལྷའི་དུས་ཆེན་དངོས་གཞིའི་མཛད་སྒོར་མཚོན་ན། ཉིན་དེའི་ཞོགས་པ་སྔ་པོར། ལྷ་ས་ཁུལ་གྱི་ཁྱིམ་འཛིན་བུད་མེད་ཚོ་འཚང་ཁ་ཤིག་ཤིག་གིས་དཔལ་ལྷ་མོར་མཆོད་མཇལ་དུ་འགྲོ་བ་དང༌། དེ་ནས་ཉི་འོད་ས་གཞིར་ཁྱབ་པ་དང་མཉམ་དུ། དཔལ་ལྷའི་སྐུ་བརྙན་དེ། གཙུག་ལག་ཁང་གི་ཁྱམས་རའི་མཐིལ་དུ་གདན་དྲངས་པའི་སྐབས་ལ། བླ་བྲང་ཕྱག་མཛོད་ལས་ཁུངས་ནས་སྙན་ཤལ་འབུལ་བ་སོགས་གྲུབ་རྗེས། གཙུག་ལག་ཁང་གི་སེང་སྡེང་སྒོ་མོ་དང༌། ཁྱམས་ར་བརྒྱུད་ནས་དཔལ་ལྷ་བར་སྐོར་དུ་གདན་འདྲེན་ཞུ་བ་དང༌། དེའི་སྐབས་སུ་བར་སྐོར་དུ་འཛོམས་པའི་མཆོད་མཇལ་བ་ཚོས། སྙན་ཤལ་འབུལ་བ་དང་མཆོད་མཇལ་བྱེད་སྲོལ་ཡོད།
    དཔལ་ལྷ་མོ་གཙུག་ལག་ཁང་ནས་ཐོན་ཏེ་ཐོག་མར་ཀླུ་སྦུག་ཏུ་ཕེབས་རྗེས། གཏོར་ཟོར་འཕེན་པ་དང༌། དེ་ནས་ཁྲོམ་གཟིགས་ཁང་གི་ཐང་སྡེར་བར་སྐོར་གྱི་ཤར་ལམ། ལྷོ་ངོས་སུ་གཏོར་ཟོར་འཕེན་པའི་མཛད་སྒོ་བཅས་ཡོད། གང་ལྟར་ཉིན་འདིར། ལྷ་མོ་ཕེབས་ལམ་འཁེལ་ས་དག་ན་ཡོད་པའི་ཁྱིམ་མི་ཚོས། སྙན་ཤལ་འབུལ་བ་སོགས་བྱས་ནས་མཆོད་སྲོལ་ཡོད།
    དུས་ཆེན་འདི་དང་འབྲེལ་བའི་ཡུལ་སྲོལ་གྱི་སྐོར་ནས་ཞུས་ན།  དེ་སྔར་མཚོན་ན། བུ་མོ་ལོ་ན་བཅུ་དྲུག་ཟིན་སྐབས་སྤ་ཕྲུག་གཡོག་སྲོལ་གྱི་མཛད་སྒོ་དེ་ཡང༌། དཔལ་ལྷའི་དུས་ཆེན་གྱི་ཉིན་འདིར་བྱེད་པ་ལྟ་བུར་ཡོད་པ་དང༌། གཞན་ཡང༌། དཔལ་ལྷའི་དུས་ཆེན་འཆར་ལ་ཉེ་བའི་དུས་ཚོད་དེའི་ནང་ལ། དགའ་ཉེ་སྤུན་མཆེད་དང༌། གྲོང་པ་ཁྱིམ་མཚེས་ཀྱི་ཕྲུ་གུ་ལོ་ཆུང་ཚོ། གཡོག་པོའི་རིགས་བཅས་ནས་དཔལ་ལྷའི་མདུན་ཆང་ཞེས་དངུལ་སློང་སྲོལ་ཡོད་པར། དེ་ལ་མང་ཉུང་ལ་མ་ལྟོས་པའི་དངུལ་སྟེར་སྲོལ་ཡོད་སྟབས། དཔལ་ལྷའི་དུས་ཆེན་འཆར་ལ་ཉེ་བའི་དུས་ཚོད་དེ་ནི་དབུལ་ཁུལ་གྱི་ཕྲུ་གུ་ཚོར་དངུལ་གསོག་པའི་དུས་ཚོད་ཡག་ཤོས་ཤིག་ཀྱང་ཆགས་ཀྱི་ཡོད། ལྷ་ས་ཁུལ་ལ་ཡིན་ན། དེང་སྐབས་དཔལ་ལྷའི་དུས་ཆེན་འཆར་ཉེའི་སྐབས་ལ། བུད་མེད་ཚོས་སྐྱེས་པ་ཚོར་དངུལ་དང་རྔན་པ་སློང་སྲོལ་ཞིག་དར་བཞིན་ཡོད་འདུག ཉིན་འདིར་གནམ་གཤིས་མ་འདྲ་བ་ཞིག་སྟོན་གྱི་ཡོད་པ་ནི། ཉིན་འདིའི་ཕྱི་དྲོ་བོད་ལྷ་ས་ཁུལ་གྱི་གནམ་གཤིས་ནི་ཧ་ཅང་གི་རླུང་འཚུབ་ཅན་གྱི་ ལྷགས་པ་ཚ་པོ་ཞིག་ལྡང་གི་ཡོད་པར། བོད་མི་ཚོས་ལྷ་མོ་ར་བཟི་བ་རེད་ཅེས་ཤོད་སྲོལ་ཡོད།


  དཔྱད་གཞི་དང་ཁུངས་བཅོལ་ཞུ་ཡུལ་ཡིག་ཆ།

༡ 《བོད་ཀྱི་ཡུལ་སྲོལ་རྣམ་བཤད》རྡོ་དགོན་གསང་བདག་རྡོ་རྗེ་དང་དགའ་བ་པ་སངས། བོད་ལྗོངས་མི་དམངས་དཔེ་སྐྲུན་ཁང༌།
༢ 《དུང་དཀར་ཚིག་མཛོད་ཆེན་མོ》དུང་དཀར་བློ་བཟང་འཕྲིན་ལས། ཀྲུང་གོའི་བོད་ཀྱི་ཤེས་རིག་དཔེ་སྐྲུན་ཁང་ 
༣ 《བོད་ལྗོངས་ཡུལ་སྐོར་སྣེ་ཤན》ནོར་བུ་བསམ་འགྲུབ་ཀྱིས་བརྩམས་པ། བོད་ལྗོངས་མི་དམངས་དཔེ་སྐྲུན་ཁང་
༤ 《པོ་ཏ་ལ་དུས་དེབ》 སྤྱིའི་འདོན་ཐེངས་ ༣༡ རྒྱལ་སྲིད་སྤྱི་ཁྱབ་ཁང་གསར་འགྱུར་གཞུང་ལས་ཁང༌།
༥ 《པོ་ཏཱ་ལ་དུས་དེབ》 སྤྱིའི་འདོན་ཐེངས་ ༣༦ རྒྱལ་སྲིད་སྤྱི་ཁྱབ་ཁང་གསར་འགྱུར་གཞུང་ལས་ཁང༌།
www.qhtb.cn  www.tibetculture.net སོགས་དྲ་ཚིགས་ཁག་ཅིག་བཅས་ཡིག་ཐོག་གི་དཔྱད་གཞི་དང་། འབྲེལ་ཡོད་ཁག་ཅིག་ལ་བཅར་འདྲིའི་དོན་གནད་བཅས་ལ་ཁུངས་བཅོལ་ཞུས་ཡོད།

 


རྩོམ་ཁུངས། ངེད་དྲ་བ།

དཔྱད་མཆན ཡོངས་སུ་གཟིགས།དཔྱད་མཆན།

མིང་མི་འགོད་པར་སྤེལ།