སྦྲང་ཆར་དང་མེ་ཏོག་འཛུམ་པའི་དེ་རིང།
ན་སོའི་དེད་དཔོན་གྱི་ལྕག་ཚན་འགྲེང་པ་དེ།
བསྐལ་འདིར་ཁྱོད་ཚོའི་ཨོང་ཏོར་མྱངས་པར་ཚབས།
མཉམ་དུ་འཚར་ས་དང་འབྱུང་སའི་གནས་མོས།
ཁྱོད་ཚོར་སྐྱེལ་མ་དང་ཁ་ཏའི་ལག་རྟགས་སྤྲད།
ཡུན་དུ་གཤིབ་པའི་གྲོགས་པོ་ཚོས།
བརྩེ་དུང་གི་མཛའ་གླུ་དྲངས་ཏེ།
ཁྱོད་ཚོར་མིག་ཆུས་ཞལ་གྱེས་ཞུས།
ད་དུང༌། ཅི་ཞིག་གི་སླད་དུ་འགྲོ་མ་འདོད།
དོར་ཐབས་མེད་པའི་གྲོགས་པོའི་ལ་རྒྱ།
དྲོ་ཞིང་སྐྱིད་པའི་གནས་མོའི་བྱམས་སྐྱོང།
སོས་དལ་བག་ཕེབས་ཀྱི་ཁ་སང་འཚོ་བར་ཞེན་ཆགས།
ཡང་ན༌། ཅི་ཞིག་གི་ཆེད་དུ་འགྲོ་མ་ཕོད།
ཆང་རག་དང་རྩེད་འཇོས་འདས་པའི་ལོ་ཟླ།
རིག་པའི་གཤོག་འདབ་མ་རྒྱས་པའི་ལུས་ཕུང།
འགྲན་རྩོད་གོ་མཚོན་ཕྱོགས་བཞི་ནས་གཏད་པའི་ཕྱི་རོལ།
ཡིན་ནའང༌། ཁྱོད་ཚོ་ནི་ཁ་སང་གནས་མོའི་མགྲོན་པོ།
དེ་རིང་གི་ལམ་བཞུད་འགྲུལ་པ།
འགའ་རེས། དགོད་སྒྲ་དང་མེ་ཏོག་ཆུན་པོའི་སླེ་པོ་རྒྱབ་ཏུ་འཁྱེར།
སྟངས་སྟབས་མྱུར་བར་མདུན་ཕྱོགས་སུ་འཕག།
འགའ་རེས། འཁུན་སྒྲ་དང་ཕྱི་མིག་གི་རྡོག་མཁྲེགས་བཀྱགས་ཏེ།
ཡུན་རིང་གནས་ཚང་སྒོ་ཁར་ལངས་ཏེ།
མ་འདོད་བཞིན་ཏུ་མགོ་བོ་དུད་དེ་གོམ་གང་སྤོས།
ང་རང༌། དེ་རིང་གི་མགྲོན་པོ།
ཁྱོད་ཚོར་ལག་པ་གཡུག་གཡུག།
ག་ལེ་ཕེབས་ཨང༌། ང་ཡི་གཅེན་པོ་གཅེན་མོ།
ཁྱོད་ཚོས་ཅི་ཡང་མི་སྨྲ།
དགའ་སྐྱོའི་ཟློས་གར་དུམ་བུ་ཞིག་ང་ལ་ཆེས་སུ་བཞག།
ཀྱེ། གཅེན་པོ་གཅེན་མོ།
སང་ཉིན་ད་གཟོད་ཟློས་གར་དེ།
སང་ཉིན་མགྲོན་པོས་གདེང་འཇོག་ཅི་བྱ།
དེ་བས་ངས་སྤྲོ་གར་འཛུམ་ཤོར་ཞིག་གི་ཆེད།
དེ་རིང་གནས་མོའི་སར་ནང་སྦྱོང་བྱ་བར་འགྲོ༌།

                      མཚོ་མོའི་པད་འདབ་འོག་ནས། 
                                    ༢༠༠༦.༧.༣

རྩོམ་ཁུངས། ངེད་དྲ་བ།