བྱེ་མ་འཁྲུད་པའི་གསེར་ལྡན་མ།།
དལ་བུར་འདི་ནས་གཡོན་དུ་དཀྱོགས།།
དེ་ཡི་གྲུ་ཁུག་དྲོན་མོ་ན།།
སྦྲ་ནག་སྟོང་གིས་མི་ཡུལ་སྲུང༌།།

ཉི་མས་རྨ་ཆུའི་ཟུངས་ཁྲག་རྒྱུན།།
གཞིབས་པའི་བཞིན་རིས་རབ་དམར་ཞིང༌།།
མྱོས་བའི་གོམ་པ་འཁྱོར་ཆེ་ནས།།
དལ་ཅིག་རི་བོའི་ཕག་ལ་འགྱེལ།།

ཨ་བྲས་བོད་པའི་བྱམས་བརྩེ་ཡི།།
ཉི་ཁུག་རྙེད་པས་ཡིད་ཚིམ་ནས།།
ཟླ་བ་སྒེག་མོའི་ཨ་དར་ཤ།།
ནག་ནོག་དྲི་མས་བསླད་པར་བྱས།།

གཟས་ན་འཁྱམ་པའི་བེའུ་ཡི།།
འདར་སྐད་ཆུ་བོའི་གྲམ་པར་ཟུག།
རྫི་བོ་འཚབ་པའི་འུར་ཆ་ཡི།།
ལྕག་སྐད་བསེར་མ་རླུང་གིས་ཁྱེར།།

སྤྲིན་པ་དམའ་བས་སྤང་ལ་འདྲེས།།
སྤང་ཐང་ཡངས་བས་གནམ་ལ་ཐུག།།
གནམ་སའི་ཁ་བར་དོག་མོ་ན།།
འདུར་ལ་བྲེལ་བ་མི་ཡི་ཚོགས།།

ཁ་ལ་ཡུག་གི་གཤོག་ལྕག་གིས།།
ཆུ་ཕྲན་དལ་མོར་གཉེར་མ་བསླངས།།
ཟས་ལ་སྲེད་པའི་ཉ་ཡི་ཚོགས།།
དེ་རུ་འདྲོགས་ནས་སོ་སོར་འཐོར།།

ས་ལ་བགྲད་པའི་སྦྲ་ནག་གི།
དུ་བའི་རྔ་མ་དགུང་ལ་བསྲིངས།།
ཁྱི་རྒན་ཟུག་པའི་སྒྲ་གསལ་བོས།།
བདག་མོ་སྒོ་ལ་ཡང་ཡང་བོས།།

ཚོར་བ་རྐྱེན་པའི་གྲོགས་མས་ཀྱང༌།།
རྭ་ཅོ་གཡོ་བཞིན་ཚང་ལ་ཕྱོགས།།
ཅར་ཅིར་སྒྲོག་པའི་ཅོ་ཀས་ཀྱང༌།།
རང་གི་ཚང་ལ་གཤོག་པ་རྡེབ།།

ད་ནི་སྤྲིན་པའི་མདངས་ཀྱང་འགྱུར།།
ས་གཞིར་མུན་པའི་ཡོལ་བ་འཁྱུད།།
རི་སྤྱང་ངུད་མོ་མ་སྒྲོགས་གོང༌།།
བདག་ཀྱང་ཡུལ་ལ་སྙེག་པར་བྱ།།
                          2006．6．25
 

རྩོམ་ཁུངས། ངེད་དྲ་བ།