ཀུ་ཤུ་དམར་པོ་
པགས་པ་ཞིབ་མོར་བཤུས་ཤིང་
ནང་བཅུད་དལ་མོར་ཟོས་

པགས་པ་སྲབ་ཅིང་རེག་བྱ་འཇམ་
ནང་སྙིང་མངར་ཞིང་རོ་བཅུད་འཛོམས་
ཀུ་ཤུ་དམར་པོ་སྙིང་དང་འདྲ་
སྙིང་གསོན་པོ་ཞིག་ཟོས་པ་དང་འདྲ་

དུས་ཚིགས་གང་དུའང་དམར་པའི་ཀུ་ཤུ་དམར་པོ་
རྒྱང་ཐག་རིང་ཐུང་དུ་སྨིན་པའི་ཀུ་ཤུ་དམར་པོ་
ཁ་བའི་ཁྲོད་དུ་གོམ་པ་མཉམ་དུ་ལེན་དུས་
གྲང་རླུང་ཁྲོད་དུ་ལག་ཟུང་དམ་དུ་འཁྱུད་དུས་
དམར་ཞིང་སྨིན་པའི་ཁ་དོག་ནམ་ཡང་
ངའི་སྙིང་ཁར་བཞད་
ངའི་རྐང་རྗེས་སུ་བཞད་
ངའི་རྨི་ལམ་དུ་བཞད་
 
ཀུ་ཤུ་དམར་པོ་   པགས་པ་དྲོད་འཇམ་ངང་བཤུས་
ནང་བཅུད་ཞིམ་མངར་ངང་ཟོས་
ལོ་ངོ་དུ་མ་ལ་

ལོ་ངོ་དུ་མའི་སྔོན་གྱི་ཀུ་ཤུ་དམར་པོ་
བོད་ཡུལ་གྱི་གནས་གཙང་ས་ཞིག་ཏུ་སྨིན་དུས་
སྡིག་ཅན་གྱི་དུང་སོ་སུམ་ཅུས་ཟོས་ཤིང་
སྒེར་དབང་གིས་གྲོད་པ་རུ་མིད་

ལྷ་སའི་ཆང་ཁང་དུ་བཞད་པའི་
ཨ་མདོའི་རི་ལུང་དུ་བཞད་པའི་
ཁམས་པའི་ཇག་ལམ་དུ་བཞད་པའི་
ཀུ་ཤུ་དམར་པོ་རེ་རེའི་
པགས་པ་སྲབ་ཅིང་བ་སྤུ་འཇམ་པའི་ངོས་
སྡིག་ཅན་གྱི་ལག་པས་དལ་མོར་བཤུས་ཤིང་
རོ་བཅུད་རྫོགས་པའི་ནང་སྙིང་
ཁམ་བུ་རེ་རེས་ཟོས་
མི་ཚེ་གང་བོར་ཟོས་
མཛེས་སྡུག་གིས་ངང་ཟོས་དུས་
དེ་དང་ལྷན་གྱི་མི་ཚེ་གཅིག་ནི་ཇི་འདྲའི་ཐུང་ཨང་

དམར་ཞིང་སྨིན་ལ་ལང་ཚོའི་ཆགས་སྲེད་ཡོད་ཚད་མཚོན་བྱེད་ཀྱི་
ཀུ་ཤུ་དམར་པོ་
              ༢༠༠༥  ༩  ༡༡གྱི་དགུང་མོ་མཚེ་རུ་མ་སློབ་ཆུང་གི་མལ་ཤག་ཏུ་ཉིན་གཅིག་གི་རིང་སྦག་སྦག་བཞོན་པའི་ངལ་དུབ་དང་བཅས།

རྩོམ་ཁུངས། ངེད་དྲ་བ།