རྟ་བདུན་བདག་པོ་ཤར་རི་རྩེ་ནས།།
འོད་ཟེར་འབུམ་ཕྲག་རིང་དུ་བསྐྱང་དུས།།
ཙོག་ཙོག་རི་བོའི་སྒང་དུ་ཆགས་པའི།།
རི་གྲོང་ཆུང་ཆུང་ཅི་འདྲ་མཛེས་ཨང་།།

ཞོགས་ཀའི་རི་གྲོང་ཉི་ཟེར་ཁྲོད་ནས།།
ལྷིང་འཇགས་ཚོར་བའི་སྣང་བ་སྦྱིན་ཞིང་།།
དྭངས་གཙང་འབབ་ཆུའི་སྐད་སྒྲ་སྙན་མོ།།
རི་གྲོང་འདི་ཡི་ཡུལ་གླུ་འདྲ་བྱུང་།།

དུད་ཁྱིམ་ཡོང་གི་བསང་ཁུང་ནང་ནས།།
ལྷ་བསང་དུ་བ་ནམ་མཁར་འཕྱུར་ཞིང་།།
མཛེས་པའི་རི་གྲོང་བསང་དུའི་དཀྱིལ་ནས།།
ཞི་བདེ་འདྲེན་པའི་དབེན་གནས་འདྲ་བྱུང་།།

གཡས་རི་གཡོན་རིའི་སྤང་ལྗོངས་ངོགས་ན།།
དཀར་ནག་ཕྱུགས་ཟོག་བག་ལ་རོལ་ཏེ།།
ཕྱུགས་རྫི་བུ་མོའི་ཡུལ་གླུ་སྙན་པོས།།
བརྒྱ་ལམ་འགྲུལ་པའི་རྣ་དབང་འཕྲོག་སོང་།།

རྡོ་ཁང་གྲུ་བཞིའི་ཁོ་ར་ཁོར་ཡུག།
ཚ་ཟེར་ཉི་མས་ཡོངས་སུ་བཟུང་དུས།།
དམན་ཆུང་བུ་མོ་བལ་གྱི་དབུས་ནས།།
ཤད་མ་སྤུ་ཕྲུག་འཐག་ལ་བྲེལ་སོང་།།

དགོང་དྲོ་ཉི་མ་ནུབ་རིའི་མཚམས་ནས།།
ཕྱི་ལྟས་ལན་གཅིག་སློག་པའི་ཚེ་ན།།
དྲིན་ཆེན་ཨ་མ་རྡོ་ཐབ་སྟེང་ལ།།
ཐུག་པ་རྩམ་ཐུག་སྐོལ་ལ་བྲེལ་སོང་།།

མུན་པའི་རྒྱལ་པོས་སྒོ་མོ་མནན་དུས།།
ནང་མི་ལྷན་འཛོམས་ཁྱིམ་ལ་འདུས་ཏེ།།
དགོང་ཟས་རོལ་པའི་བསོད་སྐལ་འདི་དག།
ད་ལྟ་ལྡན་ན་ཅི་འདྲ་སྐྱིད་ཨང་།།

རྩོམ་ཁུངས། ངེད་དྲ་བ།