གཟིམས་པ་མེད་པའི་མཆོད་མེ། དབྱངས་གསལ་སོ་བཞིའི་མཛེས་སྡུག  RSSསྔོན་མངག

ངས་ཀྱང་ཁང་བ་ཞིག་ཕུབ་འདོད།

2012-03-20 19:16:00 མདོ་མེད་པ་ཁ་དྲག ཀློག་གྲངས། མཆན ཡོད།

          ༡
ངས་ཀྱང་ཁང་བ་ཞིག་ཕུབ་འདོད།
 ཉི་འོད་འཛོམས་ཤིང་རླུང་བུ་རྒྱུ་ས་ཞིག་ནས         ས་བབས་མཐོ་ཞིང་ཆུ་བོ་གཙང་ས་ཞིག་ནས
སྔོ་ལྕི་དང་ས་དཀར་བསྲེས་ཏེ ་ཡང་ན་ཕྱིང་བ་དང་ཁུ་ལུ་འཐག་ནས
སྟབས་བདེ་བའི་ཁང་བ་ཞིག་ཕུབ་འདོད།
ཁང་བ་དེར་བརྩེགས་རིམ་སྤྲོད་མི་དགོས་མོད།   ངེས་པར་དུ་མཐོང་ཡངས་ས་ཞིག་ཡིན་དགོས།
                     ༢
ངས་ཀྱང་ཁང་བ་ཞིག་ཕུབ་འདོད།
ང་ལ་རླངས་འཁོར་མེད་པས།    འགྲིམ་འགྲུལ་སྟབས་མ་བདེ་ན་ཆོག
ང་ལ་རྩིས་འཁོར་མེད་པས།            གློག་ལམ་ཡང་མེད་ན་ཆོག
གང་ལྟར་ཀྱང་།  ཁང་བ་དེར་སྒོ་དང་སྒེའུ་ཁུང་ཆེ་རེ་ཕུག་དགོས།
སྒེའུ་་ཁུང་ལས་ངས་སྡེ་ཆེན་ཁྲོམ་ལ་ཉན་དགོས།
སྒོ་ཆེན་ལས་ངས་མི་ཆེན་རྣམ་པ་བསུ་དགོས།
                  ༣
ངས་ཀྱང་ཁང་བ་ཞིག་ཕུབ་འདོད།
ར་བ་སྐོར་མི་དགོས།
མེ་ཏོག་ལྡུམ་ར་ཡང་གཉེར་མི་དགོས།
འོན་ཀྱང་།
ཁང་བ་དེའི་རྒྱབ་ནགས་རི་ཡིན་དགོས།  ཁང་བ་དེའི་མདུན་སྤངས་ལྗོངས་ཡིན་དགོས།
ངའི་གཡང་དཀར་བལ་ཁ་ཅན་པོ་ནགས་རི་ནས་འཚོ་དགོས།
ངའི་རྐྱང་ངེ་གོམ་ཁ་ཅན་པོ་སྤངས་རི་ནས་རྒྱུགས་དགོས།
                   ༤
ངས་ཀྱང་ཁང་བ་ཞིག་ཕུབ་དགོས།
ང་ལ་ནང་ནོར་ཉུང་བས་ཁང་བ་དེའི་ནང་ཆེ་མི་དགོས །
ང་ལ་མགྲོན་པོ་ཉུང་བས་ཁང་བ་དེའི་ནང་ཡག་མི་དགོས།
ཡིན་ནའང་།   ཁང་བ་དེའི་ནང་་ཁག་གཉིས་སུ་བགོ་དགོས་སྟེ།
ཤས་གཅིག་ནས་ཨ་ཕའི་མཆོད་པ་དང་ཨ་མའི་རྐྱང་ཕྱག་ཤོང་དགོས་ལ།
ཟུར་གཞན་ཞིག་ནས་མ་འོངས་བའི་ཆུང་མའི་མདུན་ནས་ཁ་བགད་ལེ་ཀུ་རེ་རྩེ་ས་དང་
ཁ་རོག་གེར་ནས་ཆང་འཐུང་ས་ཞིག་ཀྱང་ཡོད་དགོས།
               ༥
ངས་ཀྱང་ཁང་བ་ཞིག་ཕུབ་འདོད།
བསམས་བསམས་ནས་འཆར་རིས་བྲིས་ཏེ།     འབད་འབད་ནས་ཁང་བ་འགྲུབ་རྗེས།
འཆར་འགོད་ལས་མི་ཚེ་ཡི་རིན་ཐང་གཞལ་དགོས།
ཁང་བ་ལས་འཚོ་བ་ལ་ཁ་མདོག་བསྒོ་དགོས།
                ༦
ངས་ཀྱང་ཁང་བ་ཞིག་ཕུབ་འདོད།
གྲོགས་པོ་ལགས   ་ཁོམ་པ་ཡོད་ན་མགྲོན་ལ་ཕེབས།……………………

ང་ཁང་བ་དང་མཉམ་དུ་རྒས་ཐུབ་པར་སྨོན།  ཁང་བ་ང་དང་མཉམ་དུ་མི་འཐོར་བ་ཤོག  །
                              ༢༠༡༡ལོའི་ཟླ༡༠ཚེས་༡༠ཉིན་གྱི་དགོང་མོར།

རྩོམ་ཁུངས། ངེད་དྲ་བ།

དཔྱད་མཆན ཡོངས་སུ་གཟིགས།དཔྱད་མཆན།

མིང་མི་འགོད་པར་སྤེལ།