ཉི་མའི་འོད་ཟེར
གས་ཆག་ཏུ་གྱུར་དེ་ང་ཡི་གདོང་ལ་བབས
རླུང་གི་ལག་པས
ཁྱོད་ཀྱི་ཚེ་སྲོག་གི་རིན་ཐང་ལ་རམ་འདེགས་བསྩལ
                                                         ཐོག་མའི་ལབ།
 
རི་རབ་དང་གཙང་བོ་སྒུལ་ནུས་པའི་གླུ་སྐད་ཀྱིས
སྲིད་པའི་ལྷིང་འཇགས་ཡོམ་ཡོམ་དུ་བཏང་རྗེས
མཚམས་སྤྲིན་གྱི་མདོག་ལ་ཁུ་བའི་མེ་རླབས་ཁྲོད
རྒྱང་བཞུད་ཀྱི་གཤོག་ཟུང་ཡུན་གྱིས་བརྐྱངས་ཏེ
གནམ་འོག་གི་རྡུལ་འཚུབ་མཐའ་རུ་སྤྲད
 
ས་རྡུལ་གྱིས་གཡོག་པའི་ཁྱོད་ཀྱི་ཕྱག་ཟུང་གིས
གངས་རིའི་མིང་དང་ཡབ་མེས་ཀྱི་མཚན
ཁྲག་གི་མདོག་དང་རུས་པའི་རྐང་སོགས
ཕུག་རོན་གྱི་གཤོག་ངོས་སུ་བཀོད་དེ
བདེན་ལུགས་ཀྱི་སྟངས་སྟབས་གསལ་བར་བྱས
 
མུན་ནག་གི་ཁྲོད་བབས་པའི་རྐང་རྗེས་དེ
གསེར་འོད་ཀྱིས་བཀྲུས་པའི་མེ་ལོང་ཞིག་ཏུ་མཐོང་དུས
སྙིང་ཉེ་ལགས       མེ་མདའ་འཁུར་བའི་རྔོན་པ་གཏུམ་པོ་དེ་ཚོའང
ད་ལྟ་གཞི་ནས་མིག་ཆུ་བརྡོལ་བྱུང
 
ངས་གཟུགས་མེད་ཀྱི་ཁྱོད་ལ་ཕྱག་འཇུ་བྱེད་དུས
འཆི་བའི་རྒྱལ་ཁམས་ཀྱི་ཉི་མའི་འོད་ཟེར
སྲིད་པའི་གངས་རྒན་གྱི་རྩེ་མོར་འཕྲོས་ཏེ
རླུང་ཁྲོད་ཀྱི་དར་ཆ་རྟག་བརྟན་གྱིས་མཁའ་ལ་འཕྱར་བ་མཐོང
 
སྙིང་ཉེ་ལགས     ངའི་སེམས་ཀྱི་སྙིང་ཉེ་ལགས
           ༢༠༡༢.༦.༡༧ལ།
 

རྩོམ་ཁུངས། ངེད་དྲ་བ།