དབྱར་ཕ་མ་འདྲ་ཞིག་གི་བརྩེ་བའི་བྲང་གཞོང་ན
འདབ་ཆགས་དང་རི་དྭགས
ཨ་མའི་པང་ན་ཉལ་བ་ལྟར
ཡོད་ཚད་སོས་དལ་གྱིས་འཚོ

ནགས་རི་དང་རྫ་རི
ད་དུང་སྤངས་ཐང་ན
དུས་བྱ་སྣ་ཚོགས་ཀྱི་གསུང་དབྱངས་དྲོན་མོས
ཕྱི་སྣོད་ཀྱི་གཡང་གཞི་ལ་སྙན་ཆ་བསྐྱིལ་འདུག

ཁུ་བྱུག་དང་ཁྲུང་ཁྲུང
མིང་མི་ཐོགས་པའི་དུས་བྱ་སྣ་ཚོགས་ཀྱིས
སྔོ་ཡུག་ཡུག་གི་རྩྭ་ཐང་ནས
སྔོ་ཡུག་ཡུག་གི་གླུ་དབྱངས་ལེན་བཞིན
སེར་ཡུག་ཡུག་གི་མེ་ཏོག་གསེབ་ནས
སེར་ཡུག་ཡུག་གིས་བྲོ་གར་འཁྲབ

དབྱར་གྱི་གོས་གདན་མ་ཟད་པའི་ཙུར་རོལ་ཏུ
དུས་བྱའི་ཚོགས
རང་ཉིད་ཀྱི་མགྲིན་པ་མ་འགག་བར
གླུ་སྐད་ཀྱིས་ས་གཞི་ཁེངས་བར་བར་བྱེད་ལ
རང་ཉིད་ཡོད་ཚད་ཀྱི་རྣ་ལམ་ལ་གོམས་སུ་འཇུག་སྲིད

དུས་བྱའི་ཚོགས་ཀྱིས་གནམ་ས་འགེང་བའི་སྐབས
དེ་དག་རེ་རེས རེ་རེ་བཞིན
ཀུན་གྱི་སྤྲོ་བའི་སེམས་ལ་གདངས་དབྱངས་དཀྲོལ་དུས
ཆེས་སྙན་པ་ནི་ཁུ་བྱུག་སྟེ
དཔྱིད་ཀྱི་ཕོ་ཉའི་མཚན་སྙན་ཡང་དེས་འཕྲོག་སོང

ཡིན་ཡང    ས་གཞི་འདི
གྲང་འཁྱག་གི་ཐག་པས་བསྡམས་པའི་དུས་གང་ལ
ཀུན་གྱི་སེམས་ཁམས་དང་མཐུན་པའི་སྐྱོ་དབྱངས་ཤིག་གྱེར་དགོས་ཚེ
འུག་པ་དང་ཁྭ་ཏ་ལས་ལྷག་མེད་དུས
དུས་བྱའི་ཚོགས་ལ
དགོས་མཁོ་གཞན་ཞིག་གི་མགྲིན་པ་བརྣངས་འདུག་པ
ང་ཚོས་གཞི་ནས་ཚོར་བྱུང
            2010.1.7ཉིན།
 

རྩོམ་ཁུངས། ངེད་དྲ་བ།