ལྷག་བསམ་གྱི་གངས་རི་བརྒལ་ནས།
ལྗང་མདོག་གི་མཚེར་ས་བསྐྱུར་ནས།
རྨི་ལམ་གྱི་ཁ་དོག་བོར་ནས།
འདི་ལྟར།   ང་རང་ཕ་རོལ་དུ་ཐོན་འདུག
 
གནམ་སྔོན་པོ་མིན་པའི་དེ་རིང་།
ས་དོག་མོ་མིན་པའི་དེ་རིང་།
མཇའ་དབུགས་འདྲ་བའི་ལྷིང་འཇགས་འདིས།
ངའི་འཇིག་རྟེན་ལ་ཟིང་ཆ་བསླངས་སོང་།
 
གངས་དཀར་པོ་མིན་པའི་དེ་རིང་།
བོད་མགོ་ནག་མིན་པའི་དེ་རིང་།
སྟོན་ལོ་འདྲ་བའི་རྨི་ལམ་སྐྱུར་མོས།
ངའི་མི་ཡུལ་ལ་ཁ་བ་ཕབ་སོང་།
 
སྐྱ་ཐིང་ཐིང་གི་ཕ་རོལ་ན།
འཁྱག་སིབ་སིབ་ཀྱི་ཕ་རོལ་ན།
གང་ཞིག་ལ་འཁྲུལ་བའི་རྣམ་ཤེས་གྲངས་མེད།
གང་ཞིག་ལ་ཆགས་པའི་རྣམ་ཤེས་གྲངས་མེད།
ཕྱིར་མིག་ལ་གཟི་མདངས་ཤོར་ཡང་།
ཚུར་རོལ་གྱི་ཉི་ཐིགས་དྲོ་བས།
ཆུ་ཆེན་ལ་འཇའ་ཟམ་བསྐྲུན་འདོད།
 
ཨ་མ་མ།
རྨི་ལམ་དང་འདྲ་བའི་རྨི་ལམ་དུ།
འདྲེ་རྒོད་ཀྱི་མཆེ་སྡེར་དེ་ངའི་ལག་པ་ཡིན་ལ།
སྲིན་པོ་ཡི་ཕོ་བྲང་དེ་ངའི་བྱང་ཁོག་མིན་ནམ།
 
ང་།   འདི་ལྟར་ཚུར་རོལ་ན་ཤི་འོས་ཀྱང་།
ང་།   དེ་ལྟར་ཕ་རོལ་ན་གསོན་འདུག
                          ༢༠༡༢་༧་༡༧་ཉིན་ཟི་ལིང་ནས་བྲིས།

རྩོམ་ཁུངས། ངེད་དྲ་བ།