གཟིམས་པ་མེད་པའི་མཆོད་མེ། དབྱངས་གསལ་སོ་བཞིའི་མཛེས་སྡུག  RSSསྔོན་མངག

ལྷུན་གྱིས་འཚེར་ཡ་ཚོ།

2015-06-26 16:44:36 རྨ་འོད། ཀློག་གྲངས། མཆན ཡོད།


ལོ་ཟླ་ག་ཚོད་འགོར་སོང
སྐྲ་ལོ་ག་ཙམ་ཉུང་ཡོད
རྒས་པའི་རླབས་རིས་དེ་གང་ནས་བཞུར་ཡོང
གང་ལ་བཞུར་འགྲོ

ཁ་པར་མཐོང་བ་དེ་ཁྱེད་ཚོ་མཐོང་བ་དང་འདྲ་སོང
སྐད་འཕྲིན་གྱི་སྐུང་ན་མིག་ལྷེམ་ལྷེམ་གྱིས་འཚངས་ལོས་ཡོད་བསམ་ན
ལག་པ་སྔ་ས་ནས་མི་འགུལ་ཐབས་མེད་རེད

ཁ་མཆུ་ཐུག་པ་ཙམ་གྱིས
ཁ་རྣ་འཕྲོད་པ་ཙམ་གྱིས
རྩོད་དགོས་པ་མང་ལ་བརྗོད་འདོད་པའང་མང་བོ་མང་བོ་ཡོད
མགོ་རྣ་བའི་གཟེངས་ན ངག་མཆིལ་མའི་རླབས་ན
ལྷུན་གྱིས་འཚེར་ཡ་ཚོ འོད་ཀྱིས་འཁྱུག་ཡ་ཚོ
འཁོར་བའི་ཕྱི་ནང་ནས འདོད་པའི་སྒང་གཤོང་ནས
ཕྱི་ཆར་བས་རློན་རུང་ནང་ཐིགས་ཆུས་ཟགས་པ་མ་སོང

ཉིན་མཚན་གྱི་རུམ་ཁ་དེ་ནས བདེ་སྡུག་གི་ཐུ་བར་དེ་ནས
ལྷ་ས་བར་ཁ་བ་བབས་ཚེ ཨ་མདོ་བར་གྲང་བ་ཟུག་ཡོང
འབྲོག་སར་ཆར་ཆུ་ཆད་ན རོང་ས་ལའང་ཐན་པ་འཕྱུར་ཡོང
འདི་ལྟར་ལུས་གྲིབ་མ་ཁེན་ནས ཞེ་སྣང་བ་བརྒྱུན་པ་ཉུང་ཉུང་མིན་
འདི་ལྟར་ཁ་ཁོག་པ་བསྲེས་ནས གློ་རྒྱུ་མ་མཐུད་པ་ཉུང་ཉུང་མིན

ད་ཆ་ལག་པ་སྔོན་ལ་བསྲིངས་ཀྱང
རྐང་བས་རྗེས་ནས་འཐེན་འདྲ་དེ་ལོ་ན་ཚོད་ཡིན་འདྲ
འཛོམས་པའི་དུས་ཆད་ཡིན་འདྲ བརྩེ་བ་མུ་རུ་སྦྲེལ་བའི་དྲྭ་བ་ཡིན་འདྲ
ཅི་ཡང་མ་འཁྱོངས་པའི་དེ་རིང གདོང་དམར་པོ་ཉི་མས་བཞུས་ན
དྭངས་བསིལ་བསིལ་གྱི་ཁྱེད་ཚོ
མིག་ཆུའི་ཐིགས་པ་དང་འདྲ་བར་སྙིང་ལ་ལྷུང་ཡོང

ལོ་དེར་ལན་གྲུ་སྔོན་པོ་ནས
མཁའ་དབུགས་ནག་པོ་རེ་རྔུབ་པ་དྲན་ཡོང
ལོ་དེར་སེམས་པ་གཤོག་ཐོགས་ཚོས་རྨ་ཆུ་བརྒལ་ནས
འབྲི་ཆུ་བརྟོལ་ནས སྐྱིད་ཆུའི་ཁ་ཞེང་བྲེགས་པའང་དྲན་ཡོང
ལོ་དེར་འཛམ་བུ་གླིང་འདི་ཆུང་བ་ལ
ང་ཚོ་འཛམ་བུ་གླིང་ལས་ཆེ་བ་ལ

ད་ནི་ཞྭ་ཕུད་ནས་ཉི་མར་མཇལ་སྐབས་ཤིག་འཚོལ་ཡ
ད་ནི་ལྷམ་ཕུད་དེ་ལྷོད་ཆོག་པའི་གནས་ཚང་ཞིག་བཅའ་ཡ

དུས་ཚོད་ག་ཙམ་ལྷག་ཡོད ཞོགས་པའི་ཁ་དབུགས་ལ
དགའ་ལྷང་ལྷང་གི་འཛུམ་རིས་ག་ཙམ་འཁྱུག་ཐུབ
དགོང་ཁའི་རི་རྒྱབ་ལ་བལྟས་ན ང་ཚོ་ཡང་འཇམ་ཐིང་ཐིང་གིས་ཡིབ་བཞིན་པ་ཚོར་རམ

                  ༢༠༡༥•༦•༡༩

(མཆོད་མེའི་པར་དབང་གཞན་གྱིས་དགོལ་མི་རུང)

རྩོམ་ཁུངས། ངེད་དྲ་བ།

དཔྱད་མཆན ཡོངས་སུ་གཟིགས།དཔྱད་མཆན།

མིང་མི་འགོད་པར་སྤེལ།