གཟིམས་པ་མེད་པའི་མཆོད་མེ། དབྱངས་གསལ་སོ་བཞིའི་མཛེས་སྡུག  RSSསྔོན་མངག

སྐྱེ་བ་འདི་ལ།

2015-09-21 10:09:09 ཐོ་ཡོར།༼ དཀར་མཛེས ༽ ཀློག་གྲངས། མཆན ཡོད།


              ___ཕོ་ལོ་ཉེར་གཅིག་ལ་སླེབས་པའི་རང་ཉིད་ལ་ཕུལ།

མཐོང་ལམ་སྒྲིབ་བྱེད་ཀྱི་ལག་པ་འདི་གང་ནས་བྱུང་བ་རེད
ཆུ་ཤུལ་གྱི་རི་མོའི་སྟེང་གི་ལས་སྐལ་བསུབ་རྗེས
ཁ་བའི་ཁྲོད་དུ་རྐང་རྗེས་རེ་རེར
སྨོན་ལམ་འདེབས་པའི་དུས་ཚིགས་ཤིག་ཤར་འདུག
ཁ་བ་བསྟུད་མར་བབས་པས
ཕ་ཡུལ་དང་ཁ་འབྲལ་དགོས་པའི་སྣང་བ་ཞིག་སྐྱེ་བྱུང
རྡོག་ཁྲེས་བར་དཔྱངས་བའི་ལོ་མ་དག་ས་ལ་ལྷུང

གྲགས་འགུལ་ཅི་ཡང་མེད་པའི་གཙང་ཆུས
ང་རང་བསྟུད་མར་ཉིན་ནས་མཚན་དུ་ཁུར
ས་སྲོད་ཀྱི་འཚམས་སུ་ཕུ་རོན་ཁྱུ་ཞིག་གིས་ངའི་ལུས་སྟེང་དུ་གནས་ཚང་སྤར
ནགས་ཚལ་སྐྱེས་ཡོད་པའི་ལུས་སྟེང་གི་རྨ་ཁས་ཁྱེད་རང་མཐོང་གི་འདུག་ཟེར
ནགས་ཚལ་དེ་རུ་བླ་འཁྱམ་པའི་མེས་པོ་ཚོའི་དྲན་གདུང་མེ་རུ་འབར
དུས་ཚིགས་འདིར་ཡུལ་གྱར་བའི་ཟླ་བ་ཀེང་རུས་ལྟར་འཁྲེགས་པས
བདག་གི་གྲིབ་མའི་ནང་དུ
སྐར་ཚོགས་འདོགས་པའི་རྨི་ལམ་ཞིག་སླེབ་ཐུབ་བམ

མཐའ་མེད་པའི་མཚན་མོའི་བྱེ་ཐང་དུ་ཉི་འོད་བགྲེས་པོ་དེ་བསྔལ་ཞིང་དུབ
ང་རང་རུས་སྒྲོམ་ལྟ་བུའི་གསང་བའི་ཕོ་བྲང་དེ་རྡིབ་པའི་སྐྱོ་སྣང་གིས་ཚོས
མུན་པའི་བྱ་ཁྱུའི་གཤོག་པས་ཁེར་རྐྱང་གི་སྒོ་མོ་ང་ཡི་ཕྱོགས་སུ་ཕྱེས་ཏེ་འཕུར
བྱ་ཁྱུ་རྒྱང་རིང་དུ་འཕུར་བས
ང་ཡི་སྣང་བ་འདར་ལྕུག་ལྕུག་གིས་རྗེས་སུ་བསྙེགས་ནའང

གློ་བུར་ཏུ་མཚོ་རྫིང་སྟོང་བ་རུ་གྱུར་བའི་མིག་ཟུང་གིས
ང་ལ་ཐེངས་གཅིག་བལྟས་པས
དབུལ་ཕོངས་ཀྱི་ནམ་མཁའ་འདིའི་ཁ་གཏད་དུ་ལུས་པའི
བྱེ་མས་བསགས་པའི་འཚོ་བའི་མཛེས་སྡུག་དེ་དྲན་བྱུང
གཙང་ཆུར་ཁུར་བཞིན་པའི་བདག་གི་བེམ་པོའི་སྟེང་གི་རུལ་མྱགས་ཀྱི་རྒྱན་ཆ
རླུང་དམར་གྱིས་ཟོས་པའི་ཤ་ཁྲག་འདྲེས་སྦྱོར་གྱི་སྲང་ལམ་ཞིག་ཏུ་གྱུར
དུས་དེ་ནས་བཟུང་ངས་རྒྱུན་དུ་རང་གི་སེམས་པར་ཁ་ལག་བཟེད་ནས
ཁ་ཕྱོགས་ནོར་བའི་སྐྱེ་བོ་དེའི
དཔག་པར་དཀའ་བའི་མིག་ཟུང་དེ་དྲན་གྱིན་ཡོད

ལེ་བར་སྟོང་གིས་ཆོད་པའི་སྐྱོ་བའི་གཟེབ་དྲའི་ཁྲོད་དུ་འཕུར་བའི་བྱིའུ
རྒྱ་མཚོའི་ལྷུམས་སུ་ཞུགས་པའི་མེ་མདའི་མཆུ་ཁར་དགོད་པའི་སྐར་མ་ཞིག
སྨུག་པ་སྟུག་པོའི་ལྷན་པ་གསེར་བྱེ་ཟམ་ཟིམ་འཕྱོ་བ་དེས
སྒེའུ་ཁུང་འགྲམ་གྱི་སྣང་བ་ཟ་ཟི་དེ་བཙེམ
གྱང་ངོས་ཀྱི་ལམ་ཕྲན་སྟེང་ནས
ཁུར་ལྕི་བའི་གཟུགས་མེད་ཀྱི་རོལ་མོ་དེའི་བླ་དྲག་ཏུ་བརྡུང
ནགས་ཚལ་དེར་ཁེར་རྐྱང་དུ་ལུས་པའི
སེང་གེ་དང་དུར་བྱང་གདམ་ག་མང་བས་རབ་ཏུ་མོག

ཁྱེད་ཀྱི་ཕྱོགས་ལ་རེ་ཞིང་དུབ་པའི་རི་དྭགས་དེ་གློ་བུར་དུ་མི་གཉིས་སུ་གྱུར
གཅིག་ནི་ངལ་ཞིང་དུབ་པའི་ཚང་རྙིང་ལས་རབ་ཏུ་བྱུང
གཞན་པ་དེ་ཤི་ཟིན་པའི་མཛའ་མོའི་ཚབ་བྱས་དེ་འཁོར་བའི་སྐྱོ་ངལ་བསགས
ངས་དུར་ཁྲོད་ལྟ་བུའི་ལག་མཐིལ་ནས་ང་རང་འཆར་བར་ཡུན་རིང་བསྒུག
དུར་བྱང་ངོས་ཀྱི་མེ་ཏོག་གི་འཕྲེང་བ་དག
སྐྱེ་བ་འདིའི་མཛའ་མོའི་ཕྱིར་མིག་ལྟར་འཁྱུག་ཙམ་ནས་ཕྱིར་འོང་མེད་པར་གྱུར

ནད་ཁང་ངོས་ཀྱི་མེ་ལོང་དེར་ཡུན་རིང་བར་གད་བརྡར་མ་བྱས་པས
ས་སྲོས་ཀྱི་སྡོམ་རྒྱ་ནི་ང་ཡི་མིང་ཡིག་དང་ཧ་ཅང་འདྲ
སྡོམ་རྒྱའི་སྐུད་པ་རེ་རེའི་སྟེང
ང་རང་འཁུར་བྱེད་ཀྱི་གཙང་ཆུ་དང་སྐད་ཅིག་ལ་མངོན་པའི
ཁ་བ་ལྷབ་ལྷུབ་འབབ་པའི་ལྗང་མདོག་གི་མཚན་མོ་སོགས་ཡོད་པར་ཚོད་བགམས་བྱས
“ཤིན་ཏུ་ཐང་ཆད་པའི་ང་ཡི་སྐྱེ་བ་འདིར་སྐྱོ་བ་ནི་ཁེར་རྐྱང་དུ་ལུས་པ་དེ་མ་ཡིན་པར
ཁེར་རྐྱང་གི་དུས་སུ་ངག་བསྡམས་དགོས་པའི་མུན་པ་དེའང་མ་ཡིན„
འཆི་ཁའི་ཁ་ཆེམས་བཏུམ་བྱེད་ཀྱི་རས་ཕད་ནག་པོ་དེ་རལ་ནས་འགྲོ་བ
ཁྱེད་ཀྱི་གདོང་ལ་བབས་པའི་ཆར་བའི་ཁྲོད་ནས་ངས་མཐོང་གིན་འདུག

                       ༢༠༡༥ལོའི་ཟླ༤བའི་ཚེས༣༠ལ་གྲུབ།

(མཆོད་མེའི་པར་དབང་གཞན་གྱིས་དགོལ་མི་རུང)

རྩོམ་ཁུངས། ངེད་དྲ་བ།

དཔྱད་མཆན ཡོངས་སུ་གཟིགས།དཔྱད་མཆན།

མིང་མི་འགོད་པར་སྤེལ།